Badi bambuluisha bena Chine mu Mexique

‘BANTU dikumi ba mu bisamba bidi biakula miakulu mishilangane, nebakuate muena Yuda umue ku luzemba lua tshilamba, bamuambila ne: Tudi basue kuya nebe bualu tudi bumvue ne: Nzambi udi nenu.’ (Zekâya 8:23, MMM) Lelu’eu, mulayi mulenga eu udi wenda ukumbana pa buloba bujima. Bantu ba “mu bisamba bidi biakula miakulu mishilangane” badi balonda bena Isalele ba mu nyuma bua kutendelela Yehowa Nzambi. Bantemu ba Yehowa badi batabalela ne muoyo mujima dikumbana dia mulayi eu. Ba bungi badi balonga muakulu mukuabu bua kuyisha lumu luimpe.

Ke mudibi kabidi bua Bantemu ba Yehowa ba mu ditunga dia Mexique. Badi batshinka ne: kudi bantu batue ku 30 000 badi bakula tshiena-Chine mu Mexique. Mu 2003, bantu 15 ba kudibu bavua babuele mu Tshivulukilu tshia lufu lua Kristo mu tshimenga tshia Mexico. Nunku, Bantemu ba mu Mexique bakamona ne: kuvua bena Chine bavua dijinga ne kulonga Bible. Ke bualu kayi bakalongolola kalasa ka ngondo isatu bua kulongesha Bantemu ba mu Mexique mushindu mupepele wa kuyukila ne bantu mu tshiena-Chine tshia Mandarin. Bantemu 25 bakabuela mu kalasa aka. Ku ndekelu kua kalasa, munene mukuabu muena Chine utu musombele mu Mexico ne wakula muakulu wa Mandarin wakabuela pende mu difila dia mapoloma, ne kuambaye muvua kalasa aku kikale kimpe. Tshisumbu kampanda tshia bena Chine tshiakafutshila basatu ba ku balongi aba njila bua kuyabu kumanya bimpe tshiena-Chine.

Bavua balonga badibidija kabidi. Panyima pa balongi bamane kulonga biambilu bia nshindamenu, bavua diakamue baya kuyisha mu tshiena-Chine muaba wa disumbishila bintu mu tshimenga tshia Mexico. Balongi bena tshisumi aba bakatuadija malonga a Bible 21. Broshire wa Ntshinyi tshidi Nzambi utulomba? mu tshiena-Chine (udibu bakudimune mu mfundilu wetu wa bena Lomo udibu babikila ne: Pinyin) wakabambuluisha bikole.

Mmunyi muvua Bantemu batshivua anu batuadijilaku dilonga tshiena-Chine mua kulombola malonga a Bible? Ku ntuadijilu, bavua bamba anu patupu ne: “Qing Du [Suaku ubale],” pashishe batue munu pa tshikoso ne ku ndekelu bautua kabidi pa lukonko. Panyima pa muntu mumane kubala ne muandamune mu tshiena-Chine, bavua bamba ne: “Shei shei [Tuasakidila]” pashishe ne: “Hen Hao [Bimpe bitambe].”

Mamu kampanda wakatuadijabu kulonga nende Bible uvua udiamba muvuaye muena Kristo. Panyima pa dilonga disatu, muanetu wa bakaji uvua ulonga nende uvua udiebeja bikala mamu au umvua bivuaye ulonga. Ke kuyaye ne muanetu wa balume mukuabu  muena Chine. Pakakonka muanetu muena Chine mamu au ni udi ne lukonko, mamu wakamuebeja ne: “Bua meme kutambula, bikengela nganji kumanya mua kuowela anyi?”

Panyima pa matuku makese patupu, bakenza Kasumbu ka Dilonga dia Mukanda dia Tshisumbu muvuabu babuela kudi bantu 9 bavua bakula tshiena-Chine ne Bantemu 23 ba mu Mexique. Ku bantu bavua babuele mu dilonga dia mukanda adi kuvua doktere uvuabu bapeshe Tshibumba tshia Nsentedi ne Réveillez-vous! bia mu muakulu wa tshiena-Espagne kudi umue wa ku babedi. Bu muvuaye kayi ubala tshiena-Espagne, wakakeba muntu uvua umukudimuina malu makese patupu. Pakamonaye ne: bibejibeji ebi mbimanyine pa Bible, wakalomba mubedi au ni kuvua mushindu wa yeye kubipeta mu tshiena-Chine. Wakabipeta ne biro bia filiale bia mu Mexique biakamutumina Ntemu uvua wakula tshiena-Chine bua kulua kumutangila. Pavuaye mu Chine, mamuende uvua ne Bible wa tshiena-Chine ne uvua musue kumubala bikole. Pakumbukaye mu Chine bua kuya mu Mexique, mamuende wakamuambila ne: kulekedi dibala dia Bible to. Ke kutuadijaye kulomba Nzambi bua amutumine muntu uvua mua kumuambuluisha bua kumanya bimpe Nzambi muena Bible. Wakakema wamba ne: “Nzambi mmuteleje disambila dianyi!”

Ku bantu bavua babuela mu dilonga dia mukanda, kuvua kabidi dîku dia bena Chine divua difutshila nzubu kumbelu kua mamu mukuabu muena Mexique uvua ulonga Bible ne Bantemu ba Yehowa. Nansha muvua bena dîku edi bumvua tshiena-Espagne anu tshikese, bavua pabu balonda bivua muena lupangu ulonga ne Bantemu. Panyima pa matuku, bena dîku adi kukonka Ntemu uvua ulombola dilonga ni uvua ne mukanda wa mu tshiena-Chine. Ke bobu kutuadija kulonga nabu Bible mu tshiena-Chine. Matuku anu makese, bena dîku edi kulejabu dijinga dia kuyisha bena kuabu ne kudilambulabu kudi Yehowa.

Mbulelela se: tshiena-Chine ntshikole. Kadi anu bu mudi malu adibu balonde kuulu eku aleja, ne diambuluisha dia Yehowa, bantu ba miakulu ya bungi ne tshiena-Chine kabidi, badi balonga disua diende mu Mexique anu bu mudibi bienzeka mu matunga makuabu.

[Tshimfuanyi mu dibeji 17]

Kalasa ka dilonga dia tshiena-Chine mu Mexico

[Tshimfuanyi mu dibeji 18]

Ntemu muena Mexique udi ulombola dilonga dia Bible mu tshiena-Chine

[Tshimfuanyi mu dibeji 18]

Badi bayisha mu tshiena-Chine ku nzubu ne ku nzubu mu Mexico