‘Kumanyisha bena lukanu dikopoka diabu’

PAKATUADIJA Yezu mudimu wende, wakamba ne: uvua kabidi ne bua ‘kumanyisha bena lukanu dikopoka’ diabu. (Luka 4:18) Bena Kristo balelela badi balonda tshilejilu tshia Mfumuabu padibu bayisha “bantu bonso” lumu luimpe lua Bukalenge bua kubapikula ku bupika bua mu nyuma ne kubambuluisha bua kulengeja nsombelu wabu.​—1 Timote 2:4.

Lelu, mudimu eu udi kabidi umvuija kuyisha bantu badibu bela mu maloko bua malu mabi avuabu benze, kadi basue bua babapatule mu buloko bua mu nyuma. Luapolo ludi lulonda elu ndua mudimu udi Bantemu ba Yehowa benze mu maloko a mu Ukraine ne mu matunga makuabu a ku Mputu, nelukusankishe.

Banu ba diamba badi balua bena Kristo

Serhii * udi ne bidimu 38, kadi mmuenze bidimu 20 mu tshimanu. Wakajikijila tulasa tuende mu buloko. Udi wamba ne: “Kukadi bidimu bivule, bakangela mu tshimanu bualu mvua mushipangane ne meme kushalamu too ne lelu’eu. Mvua ngenzamu malu ne tshikisu ne bena buloko nanyi bavua bantshina bikole.” Kadi wakadiumvua muikale ne budikadidi anyi? Tòo. Munkatshi mua bidimu bia bungi, Serhii wakashala mupika wa maluvu, mfuanka ne diamba.

Pashishe, muena buloko nende mukuabu kutuadija kumulongesha malu a Nzambi. Bivua anu bu bukenke mu mîdima. Mu ngondo mikese patupu, wakalekela maluvu ne makanya ne diamba, kuluaye mumanyishi wa lumu luimpe ne kutambulaye. Serhii udi mpindieu muambi wa lumu luimpe wa ku dîba ne ku dîba mu buloko. Mmuambuluishe bena buloko nende bakuabu muanda mutekete bua kushintuluka ne kulua bena Kristo. Bakapatula basambombo ba kudibu mu buloko, kadi Serhii yeye utshidi anumu. Kêna unyingalala to, bualu udi ne disanka dia kuambuluisha bakuabu bua kupatukabu mu buloko bua mu nyuma.​—Bienzedi 20:35.

Umue wa ku balongi ba Serhii ba mu buloko uvua Victor; uvua yeye unua ne upanyisha diamba. Pakapatukaye, wakatungunuka ne kudiunda mu nyuma ne kubuelaye too ne mu Kalasa ka Dilongesha Mudimu mu Ukraine. Patudi tuakulangana apa, udi mpanda-njila wa pa buende mu Moldavie. Victor udi wamba ne: “Ngakatuadija kunua mfuanka pamvua ne bidimu 8,  maluvu makole ne bidimu 12 ne diamba ne bidimu 14. Ngakenza muanyi muonso bua kushintululuka kadi tshivua nkokesha to. Pashishe mu 1995, pamvua meme ne mukajanyi tukeba mushindu wa meme kushipa malanda ne balunda banyi babi, mutomboke mukuabu wakamutua kele kumushipa. Ngakumvua bibi be! Mvua ndikonka ne: ‘Mpindieu mukajanyi udi penyi? Ntshinyi tshidi tshifikila muntu padiye ufua?’ Ngakatungunuka ne kudiela nkonko eyi kadi tshiyi mpeta diandamuna to. Ke meme kuditua mu dinua dia diamba bua kupeta disulakana. Bakankuata bua dipanyisha dia diamba ne kumfundilabu tshibawu tshia bidimu bitanu bia buloko. Muine amu, ke muakangambuluisha Serhii bua kupeta mandamuna ku nkonko yanyi. Ngakateta mu mishindu yonso bua kulekela diamba, kadi anu Bible ke wakangambuluisha bua kudilekela. Bushuwa, Dîyi dia Nzambi didi ne bukole!”​—Ebelu 4:12.

Benzavi banene badi bashintuluka

Vasyl kavua muanji kunua diamba to, kadi bakamukuata. Udi wamba ne: “Dikumangana dia mbata ne miseba ke wanyi mudimu. Ngakalonga bua kututa bantu tshiyi mbuuja to.” Vasyl uvua ukuma bantu ubanyenga bintu ku bukole. “Bakangela mu buloko misangu isatu, ke mukajanyi kumbengaye. Pavuabu bangele mu tshimanu musangu wa ndekelu bua bidimu bitanu, ngakapeta mikanda ya Bantemu ba Yehowa. Yakansaka ku dibala Bible, kadi mvua anu musue dinaya dianyi dia mvita edi.

“Meme mumane kubala Bible munkatshi mua ngondo isambombo, ngakashintuluka. Kukuma bakuabu kakuvua kabidi kunsankisha to. Meme kutuadija kudikonkonona ku diambuluisha dia Yeshaya 2:4 ne kumona ne: meme tshiyi mushintulule ngelelu wanyi wa meji, nemfuile mu buloko. Meme kuimansha bilamba bia manaya bionso ne kutuadija kudienzeja bua kushintulula bumuntu buanyi. Kabuvua bualu butekete to, kadi dielangana meji pa bimvua mbala ne disambila biakangambuluisha ku kakese ku kakese bua kulekela tshilele etshi tshibi. Imue misangu mene mvua ndila nsengelela Yehowa bua ampeshe bukole bua meme kulekela dinaya edi. Ndekelu wa bionso ngakadilekela

“Pangakapatuka mu buloko, ngakasomba kaba kamue ne dîku dianyi. Mpindieu, ndi ngenza mudimu mu mine ya sharbon. Ndi ne dîba divule dia kuyisha ne mukajanyi ne kuenza midimu ya mu tshisumbu.”

Mykola ne balunda bende bakavua bibe makuta mu banke ya bungi ya mu Ukraine. Bakamuela  mu buloko bua bidimu dikumi. Kumpala kua kumukuatabu, uvua muye mu nzambi anu musangu umue kadi anu bua kuibamu. Wakapanga mua kuibamu, kadi wakamona dituku adi ne: Bible udi mua kuikala muule tente amu ne miyuki ya badiambike ba Ortodokse, buji ne mafesto a malu a nzambi. Udi wamba ne: “Tshivua mumanye menemene tshivua tshinsake to, kadi ngakatuadija kubala Bible. Ngakamona ne: kuvua dishilangana dinene ne tshimvua ngela meji!” Wakalomba bua kulonga Bible ne kutambulaye mu 1999. Wewe mumumone lelu’eu kuena mua kuitaba ne: musadidi wa mudimu eu ke uvua wenda wiba makuta a mu banke ne tshingoma tshikuata ku bianza to!

Bavua bakosela Vladimir tshibawu tshia lufu. Kadi pavuaye windila dituku dia lufu luende, wakasambila Nzambi ne: yeye mupanduke, neamukuatshile mudimu. Pinapu, mikenji ya mu ditunga kushintulukayi, ke kumukoselabu buloko bua kashidi pamutu pa kumushipa. Bua kukumbaja dîyi diende, Vladimir wakaditua mu dikeba tshitendelelu tshilelela. Wakatuadija kulonga Bible pa kufundilangana mikanda ne kupetaye dipoloma dia ba-Advantiste, kadi kabivua anu bimutuile to.

Kadi panyima pa yeye mumane kubala bibejibeji bia Tshibumba tshia Nsentedi ne Réveillez-vous! bivua mu tshitekelu tshia mikanda tshia buloko, wakafundila biro bia Bantemu ba Yehowa bia mu Ukraine ulomba bua balue kumutangila. Pakaya Bantemu kumutangila, ukavua udimona anu bu Ntemu ne uvua uyisha mu buloko. Bakamuambuluisha bua kukumbajaye malu malomba ne kulua mumanyishi wa lumu luimpe. Patudi tuakula apa, Vladimir ne bena buloko nende bakuabu muanda mutekete mbindile bua kutambula. Kadi badi ne lutatu. Bu mutubu bela bantu badi ne bua kushala kashidi mu buloko muaba umue bilondeshile bitendelelu biabu, Vladimir ne bamanyishi bakuabu abu badi pabu mu nzubu umue. Nunku, nnganyi wayishabu? Badi bayisha balami ba buloko ne bantu bakuabu pa kubafundila mikanda.

Nazar wakumbuka mu Ukraine ne kuya mu République Tchèque muakabuelaye mu dingumba dia bivi. Wakabuela mu buloko bua bidimu bisatu ne tshitupa. Pavuaye mu buloko apu, wakitaba bua kulonga ne Bantemu ba Yehowa ba mu tshimenga tshia Karlovy Vary ne kushintulukaye. Pakamona umue wa ku balami ba buloko nanku, wakambila bonso bavua mu buloko ne: “Nuenu bonso bashintuluke balua bu muena Ukraine eu, ndi nshintulula mudimu.” Mukuabu mulami wakamba yeye ne: “Bantemu ba Yehowa aba mbamanyi bapiluke bushuwa. Muntu udi ubuela mu buloko muikale muenzavi, umupatuka muntu wa nsongo.” Nazar ukadi mupatuke mu buloko. Wakalonga mudimu wa mabaya, kuselaye, yeye ne mukajende badi benza mudimu wa ku dîba ne ku dîba. Udi usanka bikole bua muvua Bantemu balue mu buloko.

Mbulamatadi udi witaba mudimu wabu

Ki nganu bena buloko batu banyisha nkayabu mudimu wa Bantemu ba Yehowa to. Miroslaw Kowalski, muimanyinyi wa bena lukanu ba mu ditunga dia Pologne wakamba ne: “Tudi tuanyisha makumbula abu bikole. Bamue bena lukanu mbakole bibi. Imue misangu bavua babakengeshe bikole. . . . Diambuluisha [dia Bantemu] didi ne mushinga mukole bualu tudi ne bena mudimu ne balongeshi anu bakese.”

Mutangidi wa buloko bukuabu bua mu Pologne wakafundila biro bia Bantemu ba Yehowa ulomba bua kuikalabu balua misangu ya bungi mu buloko buende. Bua tshinyi? Udi umvuija ne: “Padi bena Watchtower balua kutangila bena buloko misangu ya bungi, badi bapeta ngikadilu mimpe ne balekela ditutangana bobu nkayabu.”

Tshikandakanda kampanda tshia mu Ukraine tshidi tshilonda muvua muena buloko mukuabu uvua mumvue ya panu mimutonde musue kudishipa, kadi Bantemu ba Yehowa kumuambuluishabu. Tshidi tshiamba ne: “Patudi tuakula apa, muntu eu udi wenda umvua bimpe. Udi wenza midimu yende ya mu buloko bimpe, ne udi tshilejilu tshimpe.”

Diambuluisha bakadi bapatuke mu buloko

Bantemu ba Yehowa kabena bambuluisha bantu anu padibu mu buloko to, kadi nansha padibu bapatukamu. Tshilejilu, Brigitte ne Renate  mbambuluishe bantu mu mushindu eu munkatshi mua bidimu ndambu. Tshikandakanda kampanda tshia mu Allemagne tshidi tshiamba bua bualu buabu ne: “Badi baya kutangila bena buloko bantu bakaji panyima pa dipatuka diabu mu buloko munkatshi mua ngondo isatu too ne ku itanu, babambuluisha bua kumona bulenga bua muoyo. . . . Mbulamatadi udi ubangata bu batangidi ba ku budisuile ba nsombelu wa bantu badi bapatuka mu buloko. . . . Badi kabidi bapetangana bimpe ne bena mudimu ba mu buloko.” (Main-Echo Aschaffenburg) Biakafikisha ba bungi ba kudibu ku didilambula kudi Yehowa.

Nansha bena mudimu ba mu buloko mbafike pabu ku dilonga Bible ne Bantemu ba Yehowa. Tshilejilu, Roman uvua major wa basalayi ne uvua utangila bikadilu bia bena buloko. Pakaluabu kumutangila kudi Bantemu ba Yehowa ku nzubu kuende, wakitaba bua kulonga Bible. Pashishe kumuambilabu ne: ki mbitabile Bantemu bua kumonangana ne bena buloko mu buloko buvuaye wenza mudimu to. Ke kulombaye mutangidi wa buloko bua amuanyishile bua kuenza mudimu ne Bible padiye utangila bena buloko. Bakamuanyishila, ne bena buloko batue ku dikumi bakaleja dijinga dia kumanya bivule. Roman wakatuadija pende kuyisha bena buloko bivuaye ulonga, ne mudimu wende wakapatula bipeta bilenga. Bamue ba kudibu bakatungunuka ne kudiunda mu nyuma ne kuluabu Bantemu panyima pa bamane kupatuka mu buloko. Pakamona Roman muvua Dîyi dia Nzambi ne bukole, wakaditua mu dilonga ne muoyo mujima. Wakalekela busalayi ne kutungunuka ne mudimu wende wa dilongesha Bible. Lelu’eu, udi uyisha lumu luimpe pamue ne muena buloko wa kale.

Muena buloko mukuabu wakamba ne: “Mu buloko emu, tudi ne muoyo anu bua Bible, bua mikanda idi yumvuija Bible ne bua dilonga Bible.” Mêyi aa adi aleja patoke ne: kudi amue maloko adi ne dijinga dia mikanda idi yumvuija Bible. Bena mu tshisumbu kampanda tshia mu Ukraine badi bamba bua mudimu uvuabu benza mu buloko ne: “Balombodi ba buloko badi basanka bikole bua mikanda itudi tufila. Tudi tubashila bibejibeji 60 bua nimero yonso wa Tshibumba tshia Nsentedi ne wa Réveillez-vous!” Tshisumbu tshikuabu tshidi tshiamba ne: “Tudi tutangila buloko budi ne bilaminu bia mikanda bikese 20. Tuakafila mikanda yetu minene mu bilaminu bionso. Nunku, tuakafila turton tua mikanda 20.” Mu buloko bukuabu, balami mbateke nimero yonso wa bibejibeji bietu mu tshitekelu tshia mikanda bua bena buloko bonso bikale babibala.

Mu 2002 biro bia mu Ukraine biakenza tshibambalu tshidi ne bua kutabalela bena buloko. Katshia batshienza, tshibambalu etshi ntshipetangane ne maloko 120 ne ntshilombe bisumbu kampanda bua kutabalela bena buloko badimu. Ku ngondo yonso, badi bapeta mikanda mitue ku 50 ya kudi bena buloko ne mu ya bungi badi balomba mikanda anyi dilonga dia Bible. Biro bitu bianji kutuma mikanda, bibejibeji ne broshire kumpala kua kulomba bisumbu bua kubatangila.

Mupostolo Paulo wakafundila bena Kristo nende ne: “Nuvuluke badi mu nkanu.” (Ebelu 13:3) Uvua wakula bua bavuabu bakuate bua ditabuja diabu. Lelu, Bantemu ba Yehowa badi bavuluka bantu badibu bakuate, baya mu maloko ne ‘bamanyisha bena lukanu dikopoka diabu.’​—Luka 4:18.

[Mêyi adi kuinshi]

[Tshimfuanyi mu dibeji 9]

Tshimanu tshia buloko bua L’viv mu Ukraine

[Tshimfuanyi mu dibeji 10]

Mykola

[Tshimfuanyi mu dibeji 10]

Vasyl ne mukajende Iryna

[Tshimfuanyi mu dibeji 10]

Victor