Tshikondo tshia mafesto netshikumbaje majinga ebe anyi?

“Peter [Munene] wakela dîyi bua bitendelelu bionso bienze mikiya ya pa buayi bua Bunane mu dituku dia 1 dia ngondo wa kumpala. Wakalomba kabidi bua bantu balengeje mishiku ya biibi munda mua nzubu yabu ne matamba a mitshi ya [sapen] ne wakambila kabidi bantu bonso ba mu tshimenga tshia Moscou bua ‘kuleja disanka diabu pa kuelangana muoyo ne dîyi dikole’ mu dituku dia Bunane.”​—Peter the Great—​His Life and World.

NTSHINYI tshiudi muindile mu tshikondo tshitu ba bungi babikila ne: tshikondo tshia mafesto? Pa buloba bujima, bantu batu bamba ne: tshikondo etshi ntshishindamene pa Nowele (dituku didibu bamba ne: diakalelabu Kristo), kadi mutu kabidi difesto dia Bunane. Nunku ntshikondo tshia matuku bungi kampanda. Ntshikondo tshidi baledi ne bana mua kuikala mu dikisha, nunku bidi mua kumueneka bu tshikondo tshimpe bua mêku kusomba pamue. Kadi bakuabu pabu batu batshibikila ne: “tshikondo tshia Nowele,” bualu mbasue kutumbisha Kristo mu tshikondo etshi. Imue misangu, wewe pebe udi umona ne: ebu ke bualu bua mushinga budi buenzeka tshikondo etshi.

Nansha bikale bua kutumbisha Kristo, kusomba mu dîku anyi bua bionso bibidi, bantu bungi kabuyi kubala (balume ne bakaji ne bana) pa buloba bujima batu bindila tshikondo etshi ne muoyo mujima. Netuambe tshinyi bua tshidimu etshi? Netshikale tshikondo tshia pa buatshi bua dîku dienu ne netshikale tshia pa buatshi bua Nzambi anyi? Dîku dienu diodi didisangishe pamue tshianana, malu onso audi ujinga neakumbane anyi makuabu neapangike?

Bantu ba bungi batu basue malu a nzambi mbafike ku dimona ne: bantu kabatu benza mafesto a Nowele ne Bunane ne Kristo mu mitu yabu to. Ntshilue tshikondo tshia kupeshangana bintu, tshia mafesto adi bantu benza malu adi kaayi asankisha Kristo, anyi nangananga bu tshikondo tshia dîku kudisangisha pamue. Misangu ya bungi, kudi kumueneka budiavi ne bunuavi ne malu atu atamba kufikisha bantu ku ditandangana. Udi mua kuikala mumone bualu ebu anyi bikadi nansha bikufikile wewe muine.

Biobi bikale nanku, udi mumone ne: kutuadijila ku tshikondo tshia mukalenge wa mu ditunga dia Russie Peter Munene utudi batele kuulu eku too ne lelu, malu ki mmashintuluke bikole to. Malu aa adi atonda bantu ba bungi ne mbasue bua tshikondo tshia mafesto tshikale tshikondo tshia kuela meji pa malu a Nzambi ne tshia mêku kudisangishawu bimpe. Bakuabu bine mbasue kushintulula malu ne mêyi bu mudi aa: “Yezu ke udi ne bua kuikala kumpala mu tshikondo tshia mafesto etshi.” Kadi malu adiku mua kushintuluka anyi? Adiku mua kulua kutumbisha Kristo menemene anyi? Tudiku mua kumona tshikondo tshia mafesto mushindu mukuabu anyi?

Bua kupeta mandamuna mimpe, tutangile mutu malu enzeka mu ditunga kampanda mudi bantu ne bualu bua pa buabu bua kusanka mu tshikondo etshi.