Udi muvuluke anyi?

Dibala dia nimero ya ndekelu ya Tshibumba tshia Nsentedi divua dikusankishe anyi? Nanku, anji tangilabi ni udi mua kuandamuna nkonko idi ilonda eyi:

• Bua tshinyi bubi buakenza Adama pakabengaye kutumikila Nzambi mbuenze anu bu disama didi baledi bashile bana babu?

Bidi nanku bualu Adama wakasambulujila ndelanganyi yende dipanga bupuangane. Tudi bapiane bubi anu bu mutu bana bapiana disama dia baledi babu.​—15/8, dibeji 5.

• Ntshinyi tshidi tshikebesha didiunda dia tshikisu lelu’eu?

Satana udi upambula bantu, ubabueja lungenyi lua tshikisu mu mitshima yabu ku diambuluisha dia bintu bidi bibasaka ku didikija tshikisu ne dishipangana bu mudi: filme, mijiki ne manaya a ku ordinatere ne bikuabu. Malu a tshikisu a mu bikandakanda anyi tudiomba mmajule tshikisu tshia bungi.​—1/9, dibeji 29.

• Pontio Pilato uvua nganyi?

Uvua muena Lomo wa mu tshisumbu tshia bendeshi ba tubalu uvua imue misangu musalayi. Mukalenge wa bena Lomo Tibelio wakateka Pilato ngovena wa Yudaya mu tshidimu tshia 26 bikondo bietu ebi. Mu tshilumbu tshia Yezu, Pilato wakateleja malu avua bakulu ba bena Yuda bafunda nawu Yezu. Wakafundila Yezu lufu anu bua kusankisha bantu.​—15/9, dibeji 10-12.

• “Tshimanyinu” tshidibu batele mu Matayo 24:3 ntshinyi?

Tshimanyinu etshi tshidi ne bitupa bivule. Bitupa ebi bionso bisanga bidi bienza tshimanyinu tshidi tshileja dikalaku dia Yezu mu Bukalenge buende. Tshimanyinu etshi tshidi tshikongoloja mvita, nzala, masama, bikumina ne dikanka dia buloba, ne tshivua ne bua kumanyisha bayidi ba Yezu ‘dikalaku diende mu bukalenge’ ne ‘nshikidilu wa tshikondo etshi.’​—1/10, dibeji 4-5.

• Bena diaspora bavua banganyi ne bavua miaba kayi?

Mbena Yuda bavua kabayi basombele mu Palestine to. Mu bidimu lukama bia kumpala, bavua nangananga mu Sulia, Asia Mukese, Babulona ne Ejipitu, ne kuvua bisumbu bikese bia bena Yuda ku Mputu mu tshitupa tshivua bena Lomo bakokesha.​—15/10, dibeji 12.

• Muena Kristo udi mua kushala ne kondo ka muoyo kimpe padiye witaba bua kuenza mudimu ne tshingoma anyi?

Muntu nkayende ke udi ne bua kudiangatshila dipangadika dia kuitaba anyi kubenga mudimu udi umulomba bua kuikala ne tshingoma anyi tshia-mvita tshikuabu. Kadi kuenza mudimu ne tshingoma kudi mua kufikisha muntu ku dipeta dibanza dia mashi bu yeye mua kuasa muntu peshi kumufikisha ku lufu anyi ku ditapika bikala bantu bakeba kumuluisha anyi kumuenzela bibi. Muena Kristo udi wenza mudimu ne tshingoma kabena mua kumupesha midimu ya pa buayi mu tshisumbu to. (1 Timote 3:3, 10)​—1/11, dibeji 31.

• Bu mudi muaku “Armagedone” mumbukile ku tshiambilu “Mukuna wa Megido,” mmumue ne: mvita ya Armagedone neyenzekele pa mukuna kampanda ku luseke lua mu Asia anyi?

Tòo. Mukuna wa Megido kautuku to, kadi mu Isalele mudi muaba muenze mubanduluke kupita tshibandabanda tshidi pabuipi apu. Muaba eu kawena mua kukumbana ‘bakalenge ba pa buloba ne bena mvita babu’ bonso nansha. Mvita minene ya Nzambi neyenzeke pa buloba bujima ne neyijikije mvita yonso. (Buakabuluibua 16:14, 16; 19:19; Musambu 46:8, 9)​—1/12, dibeji 4-7.