Bavua basankishe mioyo ya baledi babu

‘MUANANYI, bikala mutshima webe ne meji, mutshima wanyi mene newikale ne disanka.’ (Nsumuinu 23:15) Bulelela, baledi bena Kristo batu basanka patu bana babu bapeta meji a kudi Nzambi. Mu disambombo dia matuku 10 ngondo wa 9, tshidimu tshia 2005, bantu 6 859 ba mu matunga a bungi bavua badisangishe mu difila dia mapoloma dia kalasa ka 119 ka tshilongelu tshia Bible tshia Gilada. Bantu bonso bavua ne disanka dia bungi, nangananga baledi ba balongi 56 bavua bapete mapoloma.

David Walker (ukadi muenze bidimu bia bungi ku Betele wa mu États-Unis) wakatuadija ne disambila dienza ne muoyo mujima. Pashishe David Splane (wa mu Kasumbu Kaludiki ka Bantemu ba Yehowa) mulombodi wa ndongamu au kutuadijaye programe pa kuambila baledi ba balongi ne: “Tudi tunuela kalumbandi ne muoyo umue. Ngikadilu milenga inudi bakoleshe mu bana benu mmibasake bua kuenza mudimu wa bumisionere.” Baledi abu bavua mua kubungama bualu bana babu bavua ne bua kuya miaba mile mu katupa kîpi. Kadi Muanetu Splane kubakoleshaye ku muoyo ne: “Kanunyingaladi bua bana benu to. Yehowa neabalame bimpe kunupita nuenu.” Ke kuambaye ne: “Elayi meji ku malu mimpe ikala bana benu ne bua kukumbaja. Bantu badi bakenga nebapete busambi bulelela bua musangu wa kumpala.”

Mua kutungunuka ne kutuadila bakuabu disanka

Muanetu Splane wakabikila bangamba-malu banayi. Wa kumpala, Ralph Walls wa mu komite wa filiale wa mu États-Unis kuakulaye pa tshiena-bualu tshia ne: “Nulame mêsu enu matabale.” Kulejaye ne: bufofo bua mu nyuma mbubi menemene kupita bua ku mubidi. Tshisumbu tshia mu bidimu lukama bia kumpala tshia mu Laodikiya tshiakajimija lumonu lua mu nyuma. Bakambuluisha bena Kristo ba mu tshisumbu atshi; kadi bitu bimpe kuepuka bufofo ebu pa kulama mêsu etu a mu nyuma matabale. (Buakabuluibua 3:14-18) Muanetu Walls kuambaye ne: “Nulame mêsu enu matabale ne numone bantu badi ne majitu mu tshisumbu anu mutu Yehowa ubamona.” Balongi kabena ne bua kunyingalala kupitshisha padiku bilumbu mu tshisumbu to. Mukalenge Yezu Kristo udi umona malu onso au. Neenze bua bilumbu abi bijike mu tshikondo tshiakanyine.

Pashishe, Samuel Herd wa mu Kasumbu Kaludiki kuandamunaye ku lukonko elu: “Nukadi badiakaje anyi?” Anu mutu muntu udi uya ku luendu wangata bilamba bikalaye nabi dijinga, ke mudi balongi ne bua kuvuala ngikadilu ya bumuntu bupiabupia. Badi ne bua kuikala ne luse lua buena lua Yezu. Tshilejilu, pakamuambila muena nsudi kampanda ne: ‘Biwasua kuenza nunku, udi mumanye mua kundengeja,’ Yezu wakamba ne: ‘Ndi musue, wikale mulengejibue.’ (Mâko 1:40-42) Ke ngamba-malu eu kuamba ne: “Nuenu basue kuambuluisha bantu bushuwa, nenupete mushindu wa kubambuluisha.” Filipoi 2:3 udi ubela bena Kristo bua kumona bakuabu bu ‘babatambe.’ Muanetu Herd kuambaye ne: “Kuikala ne budipuekeshi nkupita kuikala ne dimanya. Dimanya dienu nediambuluishe bantu banuapeta mu mudimu wa  buambi ne bena Kristo nenu badi mu tshisumbu anu nuenu bikale ne budipuekeshi.” Kujikijaye pa kuamba ne: balongi bobu batungunuke ne kuvuala dinanga dia bena Kristo, nebikale badiakaje bua kuenza luendu miaba yabatumabu, ne nebenze mudimu mulenga.​—Kolosai 3:14.

Mark Noumair (umue wa ku balongeshi ba ku Gilada) wakashiya mioyo ya bateleji kulukulu ne tshiena-bualu etshi: “Nenutungunuke ne kudileja anyi?” Uvua wakula bua dianyisha dietu dia bulenga bua Yehowa. Musambu wa 103:2 udi wamba ne: ‘Mutshima wanyi, uvudijile Yehowa disanka; kupu muoyo bua masanka onso akutupaye.’ Bena Isalele bakapanga kuleja dianyisha bua mana avua mabambuluishe bua kushala ne muoyo, baabikila ne: ‘Biakudia bia tshianana.’ (Nomba 21:5) Mana kaavua mashintuluke to, kadi dianyisha diabu ke divua dijimine. Mulongeshi eu kuambaye ne: “Nuenu bapue muoyo malu atu Yehowa wenza ne babange kumona mudimu wenu bu tshintu tshia tshianana, mushindu unudi nuangata mudimu udi Yehowa munupeshe neushintuluke.” Musambu wa 103:4 udi wamba ne: Yehowa udi ‘ukuteka luse lujalame pa mutu pebe.’ Balongi nebamone luse lujalame lua Nzambi mu bisumbu biabu bipiabipia.

Lawrence Bowen (mulongeshi mukuabu wa ku Gilada) uvua muakule pa tshiena-bualu tshia ne: “Masanka neanupete anyi?” Uvua mumone ne: balongi ba mu kalasa ka 119 bavua balonge bikole bua kulua bamisionere bakumbane. Kadi mpindieu, badi ne bua kushala balamate Yehowa ne mudimu udiye mubapeshe. Mu Buakabuluibua 14:1-4, mbakule bua bantu 144 000 bu “bantu badi balonda Muana wa Mukoko kuonso kudiye uya.” Bonso badi mu tshisumbu etshi mbalamate Yehowa ne Muanende nansha mu makenga, ne badi bakumbaja tshipatshila tshiabu. Ngamba-malu eu kuambaye ne: “Tuetu petu tulamatayi Yehowa ne mudimu udiye mutupeshe nansha bia munyi.” Balongi bobu benze nunku, nebamone mudi masanka a Yehowa ‘abapeta.’​—Dutelonome 28:2.

Mbapatule bipeta bilenga mu mudimu wabu

Pavua balongi mu kalasa, ku ndekelu kua lumingu luonso bavua baya kuyisha. Pavua sekretere wa tshilongelu Wallace Liverance wakula nabu bua mudimu au, biakamueneka ne: bavua baukumbaje bimpe. Bavua bayishe lumu luimpe mu miakulu mipite pa dikumi ne batuadije kulonga Bible ne bantu ba bungi. Mulume kampanda ne mukajende (bavua pabu mu kalasa) bakatuadija kulonga ne muena Chine mukuabu. Bamane kulonga misangu ibidi, bakamuebeja muvuaye udiumvua bua muvuaye ulonga malu a Yehowa. Wakabulula Bible wende, kubalombaye bua kubala Yone 17:3. Uvua mudimone ukadi mu njila wa muoyo.

Pashishe Anthony Morris wa mu Kasumbu Kaludiki kuelaye bana betu basatu ba balume badi benza mudimu mu komite ya filiale ya mu République dominicaine, Équateur ne Côte d’Ivoire nkonko. Bana betu aba kukoleshabu balongi ku muoyo, kubambila ne: Komite ya filiale mmibindile ne muoyo kulukulu bua kubambuluisha bua kuibidilangana ne miaba idibu baya.

Pashishe, Leonard Pearson (wa mu dîku dia Betele dia mu États-Unis) kuakulaye ne bana betu basatu ba mu Komite ya filiale eyi: République démocratique du Congo, Papouasie Nouvelle Guinée ne Ouganda. Bana betu aba bakalomba balongi bua kuditua ne muoyo mujima mu mudimu wabu wa kuyisha. Tshilejilu, bamisionere babidi (mulume ne mukajende) bakadi benze bidimu bipite pa 21 mu Congo mbambuluishe bantu 60 bua kudilambula ne kutambula. Bamisionere aba badi balonga Bible mpindieu ne bantu 30, ne bantu 22 badibu balonga nabu badi babuela mu bisangilu. Bu mudi bia kunowa bikale bia bungi nunku, edi ke dîba dimpe dia kuenza mudimu wa bumisionere.

Kuamba lumu luimpe ne mitalu

Gerrit Lösch (wa mu Kasumbu Kaludiki) ke uvua muenze muyuki wa ndekelu. Uvua muakuile pa tshiena-bualu tshia ne: “Kuakula malu a Nzambi ne kumanyisha malu a Yezu mu dituku dia Mukalenge.” Miaku “dimanyisha,” “bamanyishi” ne “bumanyishi” idi misangu 19 mu mukanda wa Buakabuluibua. Tudi tumona mudi Yehowa uleja patoke mudimu udiye musue bua basadidi bende benze. Ndîba kayi ditudi mua kumanyisha malu aa? Mu ‘dituku dia Mukalenge.’ (Buakabuluibua 1:9, 10) Dituku edi diakatuadija mu 1914, didi ditungunuka mu matuku etu aa,  ne nediye too ne mu matuku atshilualua. Bilondeshile Buakabuluibua 14:6, 7, banjelu badi bambuluisha mu mudimu eu wa kumanyisha bantu malu a Nzambi. Buakabuluibua 22:17 udi uleja ne: mbapeshe bashadile ba ku bena Kristo bela manyi bujitu bua kulombola mudimu wa kumanyisha bantu malu a Yezu. Kadi tuetu bonso tudi ne bua kuenza mudimu eu lelu. Mu mvese wa 20, badi baleja mudi Yezu wamba ne: “Ndi ndua lubilu.” Muanetu Lösch kuambila bateleji bonso ne: “Bikilayi bantu ne: ‘Luayi nuangate mâyi a muoyo tshianana.’ Yezu udi ulua lubilu. Tukadi badiakaje anyi?”

Fred Rusk (uvua mulongeshe ku Gilada bidimu 11) ke uvua mujikije ne disambila dia kuela nadi Yehowa tuasakidila divua dilenge mioyo ya bateleji bonso. Disambila edi divua dijikije bimpe dituku dia masanka adi.

[Kazubu mu dibeji 13]

MALU ADI ATANGILA BALONGI

Bungi bua matunga adibu bafumine: 10

Bungi bua matunga adibu babatume: 25

Bungi bua balongi: 56

Muayene wa bidimu: 32,5

Muayene wa bidimu mu bulelela: 16,4

Muayene wa bidimu mu mudimu wa ku dîba ne ku dîba: 12,1

[Tshimfuanyi mu dibeji 15]

Kalasa ka 119 ka Gilada, Tshilongelu tshia Bible tshia Watchtower

Mu liste udi kuinshi eku mbabale milongo batuadijile kumpala batangile kunyima, mbafunde mêna babangile ku dia bakaji batangile ku dia balume mu mulongo wonso.

(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.