Ikala ne disanka dia kuelangana meji

BAMUE bantu batu bamona dielangana meji dikuatshisha buôwa. Batu bangata dielangana meji bu mudimu mukole udi ulomba kunana lungenyi bikole. Bantu aba batu kabidi bumvua bundu nangananga padibu babala mudi dielangana meji ne mushinga. (Filipoi 4:8) Kadi tudi mua kuikala ne disanka tuetu tuangata dîba dia kuelangana meji mundamunda bua bulelela butudi balonge pa bidi bitangila Yehowa, ngikadilu yende mimpe, malu a dikema adiye muenze, malu adiye utulomba ne adiye mulongolole bua kuenza. Bua tshinyi?

Yehowa Nzambi udi Mukokeshi Mutambe bunene wa diulu ne buloba ne udi wenza mudimu mukole bua kukumbaja malu malenga adiye mulongolole. (Yone 5:17) Nansha mudi Yehowa ne bia bungi bia kuenza, utu utabalela meji adi mutendeledi wende yonso welangana mundamunda. Davidi uvua mumanye bualu ebu ne wakafunda ku bukole bua nyuma wa Nzambi ne: ‘Yehowa, wewe wakutangila munda muanyi, wakummanya. Wewe muine udi mumanye pangashikama panshi ne pangajuka, udi ujingulula meji anyi pantshidi kule.’​—Musambu 139:1, 2.

Muntu mukuabu udi mua kuanji kumona mêyi a mufundi wa Misambu aa bu adi amutekesha ku muoyo. Udi mua kudiambila ne: ‘Nansha mudi Nzambi “kule,” udi umona lungenyi luonso lubi ludi mu meji anyi.’ Bushuwa, mbimpe bua tuetu kumanya ne: Nzambi udi umona meji mabi etu. Bidi mua kutuambuluisha bua kuluangana ne meji mabi ne patudi tupeta meji mabi a mushindu eu, tudi mua kuatondela Nzambi batuishibue ne: neatufuile luse ku diambuluisha dia ditabuja ditudi nadi mu mulambu wa tshia-bupikudi wa Yezu. (1 Yone 1:8, 9; 2:1, 2) Tshidibi tudi ne bua kuvuluka ne: Yehowa utu ukonkonona basadidi bende mu mushindu muimpe. Utu uteya ntema patudi tuela meji mimpe bua bualu buende.

Pamuapa udi mua kudiebeja ne: “Yehowa utuku utangila meji mimpe onso adi nawu miliyo mivule ya basadidi bende anyi?” Eyowa. Yezu wakakula bikole bua ditutabalela dia Yehowa pakambaye ne: Yehowa udi utabalela nansha mishamisha miana ne pashishe kuluaye kusakidila ne: “Mushinga wenu udi mutambe wa mishamisha ya bungi.” (Luka 12:6, 7) Mishamisha kayena mua kuela meji bua Yehowa to. Bikala Nzambi utabalela mishamisha, kênaku mua kututabalela bikole ne kuikala ne disanka padi yonso wa kutudi wela meji buende yeye anyi? Bushuwa, anu bu Davidi tudi mua kuenza disambila edi: ‘Meji andi ngela mu mutshima wanyi ikale mitabujibue ku mêsu kuebe, Yehowa dibue dianyi ne mupikudi wanyi.’​—Musambu 19:14.

Bualu bukuabu budi buleja ne: Yehowa udi utabalela dielangana meji dia batendeledi bende ba lulamatu budi mu mêyi a muprofete Malaki mafundisha ku nyuma wa Nzambi. Wakadianjila kuamba bua matuku etu aa ne: ‘Mu tshikondo atshi bakadi banemeka Yehowa bakasombeshangana, ne Yehowa wakabateleja ne wakabumvuila. Ne mukanda wa tshivulukidi wakafundibua kumpala kuende bua kuanyisha bantu aba bakadi batshina Nzambi ne bakadi banemeka dîna diende.’ (Malaki 3:16) Patudi tuvuluka ne: Yehowa utu ‘uteleja’ anyi uteya ntema patudi tuela meji buende yeye, tudi tuangata dielangana meji bua Nzambi bu bualu bua disanka. Ke bualu kayi tudi ne bua kuambulula mêyi akafunda muimbi wa Misambu aa: “Nengelangane meji a mudimu webe wonso, nengelangane meji munda muanyi a bienzedi biebe.”​—Musambu 77:12.