Malu a mu nsombelu

Ntatu ne masanka a kukolesha bana muanda mukulu mu njila ya Yehowa

MALONDA KUDI JOYCELYN VALENTINE

Bayanyi wakaya mu ditunga dikuabu bua kukeba mudimu mu tshidimu tshia 1989. Wakandaya bua kuntumina makuta bua meme kukolesha bana banyi muanda mukulu. Mbingu yakapita, tshiyi mpeta mukenji nansha umue. Ngondo kupitayi anu muomumue. Nkavua ndikolesha ku muoyo ne mêyi aa: ‘Papetaye mudimu muimpe, neapingane ku nzubu.’

BU MUMVUA tshiyi ne makuta bua kuambula bujitu bua dîku dianyi, ngakateketa ku muoyo. Tshitshivua ndala butuku to; tshivua musue kuitaba tshivua tshienzeke to, ne mvua anu ndikonka ne: ‘Mmunyi mudiye mua kuenzela dîku diende nunku?’ Ndekelu wa bionso, ngakitaba ne: bayanyi uvua mutunyeme. Lelu, bidimu 16 panyima, ki mmuanji kupingana to. Ke mungakadikoleshila bana banyi. Bivua lutatu lua bungi, kadi kumona mudi bana banyi bitabe njila ya Yehowa nkumpeshe disanka dia bungi. Kadi kumpala kua kunulondela mutuvua tuenza mu dîku, nganji nnulondele mumvua mukole.

Ndi nkeba bua Bible andombole

Ngakaledibua mu 1938 mu tshidiila tshia mu Caraïbes tshia Jamaïque. Nansha muvua Tatu kayi mu tshitendelelu nansha tshimue,  uvua udiamba muvuaye muntu wa Nzambi. Uvua utamba kundomba butuku bua kumubadila mukanda wa Misambu mu Bible. Nunku, ngakamanya misambu ya bungi mu mutu. Mamu uvua ubuela mu tshitendelelu kampanda ne misangu mikuabu tuvua tuya nende.

Bavua batuambila mu masangisha amu ne: Nzambi utu wangata bantu bimpe mu diulu ne wosha bantu babi mu inferno wa kapia bua kashidi. Bavua batuambila kabidi ne: Yezu ke Nzambi ne mmunange bana. Malu aa akantonda ne ngakatuadija kutshina Nzambi. Mvua ndiebeja ne: ‘Mmunyi mudi Nzambi udi mutunange mua kukengesha bantu mu kapia?’

Lungenyi lua inferno wa kadilu lukavua lundotesha bilota bibi. Ngakatuadija pashishe kulonga Bible ne bena Adventiste batu batendelela Disambombo. Bavua balongesha ne: Nzambi kakukengesha bantu babi kashidi to, kadi neaboshe butu-butu. Dilongesha edi diakamueneka bu dikumbaneku ne ngakatuadija kubuela mu masangisha abu. Kadi malongesha abu kaavua apetangana to, ne malu amvua ndonga kaakalongolola lungenyi lubi lumvua nalu pa bikadilu bilenga.

Tshikondo atshi, bantu ba bungi bavua bitaba ne: tshiendenda ntshibi. Tshidibi, meme ne bakuabu ba bungi tuvua tumona ne: anu bantu bavua benda masandi ne bantu ba bungi ke bavua bena tshiendenda. Nunku, bantu babidi bavua kabayi baselangane kadi basombe ne lulamatu umue kudi mukuabu kabavua benza bibi to. (1 Kolinto 6:9, 10; Ebelu 13:4) Bualu ebu buakamfikisha ku dilela bana basambombo tshiyi mu dibaka to.

Ndi nkola mu nyuma

Mu 1965, Vaslyn Goodison ne Ethel Chambers bakalua kusombela mu Bath pabuipi netu. Bavua bampanda-njila (anyi bamanyishi ba ku dîba ne ku dîba ba Bantemu ba Yehowa); dimue dituku bakayukila ne Tatu. Wakitaba bua balonge nende Bible. Meme ku nzubu pavuabu balonga, bavua bayukila nanyi. Nansha mumvua ne meji mabi bua Bantemu ba Yehowa, ngakitaba bua kulonga nabu Bible bua kubaleja ne: bavua bashima.

Mvua ngela nkonko ya bungi mu dilonga ne bavua bayandamuna yonso ne Bible. Bobu ke bakandongesha ne: bafue ki mbamanye tshintu ne kabatu bakenga mu inferno to. (Muambi 9:5, 10) Ngakalonga kabidi bua muoyo wa tshiendelele mu Mparadizu pa buloba. (Musambu 37:11, 29; Buakabuluibua 21:3, 4) Nansha muvua Tatu muimanyike dilonga diende, meme ngakatuadija kubuela mu bisangilu bia Bantemu ba Yehowa. Bulongame ne mushindu muimpe uvua bisangilu abi bienzeka biakangambuluisha bua kulonga malu a Yehowa a bungi. Ngakabuela kabidi mu mpuilu ya tshijengu ne mpungilu ya distrike (bisangilu binene bitu Bantemu benza). Malu a mu Bible amvua ndonga akansaka bua kutendelela Yehowa mu mushindu uvuaye wanyisha. Kadi kuvua lutatu.

Tshikondo atshi, mvua musombe ne tatuende wa basatu ba ku bana banyi, katuyi baselangane to. Ngakalonga mu Bible ne: Nzambi mmukandike kusomba ne muntu unudi kanuyi baselangane nende to, ne kondo kanyi ka muoyo kakatuadija kundumbuluisha. (Nsumuinu 5:15-20; Galatia 5:19) Pamvua ngenda manya bia bungi, ngakajinga bua kulengeja nsombelu wanyi. Ngakangata dipangadika. Meme kuambila mulume utuvua basombe nende ne: tuvua ne bua kuselangana anyi kulekelangana. Nansha muvuaye kayi witaba malu amvua ndonga, tuakafundisha dibaka ku mbulamatadi mu dia 15 ngondo wa 8 mu 1970, bidimu bitanu panyima pa diyukila dianyi dia kumpala ne Bantemu. Ngakatambula mu ngondo wa 12 mu 1970 bua kuleja patoke ne: nkavua mudilambule kudi Yehowa.

Tshiena mua kupua muoyo dituku dianyi dia kumpala dingakayisha to. Mvua ne buôwa ne tshivua mumanye mua kutuadija kuyukila ne bantu malu a Nzambi to. Muoyo  wakatukija pavua muntu wa kumpala mukose muyuki ne lukasa. Kadi kunyima kua mutantshi mukese, buôwa buakajika. Ku ndekelu kua dituku, mvua ne disanka dia bungi bualu mvua muakule ne bantu ndambu pa malu a Nzambi ne mvua mubapeshe imue mikanda.

Ndi ntungunuka ne kukolesha dîku dianyi mu nyuma

Mu 1977 nkavua ne bana muanda mukulu. Mvua mudisuike bua kuambuluisha bana banyi bua kusadila Yehowa. (Yoshua 24:15) Nunku mvua ndienzeja bua kuikala ne tshibidilu tshia kulombola dilonga dia Bible dia mu dîku. Misangu mikuabu, anu bua ditshioka, mvua mbungila pavua muana umue ubala tshikoso, ne bana bavua bambisha. Kadi ditshioka kadivua ditupangisha bua kulonga Bible mu dîku to.

Mvua kabidi nsambila misangu ya bungi ne bana banyi. Pavuabu batantamana, mvua mbalongesha mua kusambila Yehowa. Mvua ntabalela bua yonso wa kudibu enze disambila kumpala kua kulala. Mvua kabidi nsambila ne muana yonso utshivua mupuekele.

Bayanyi wakanji kubenga bua meme kuya ne bana mu bisangilu. Kadi mudimu wa kubalama pamvua meme mu bisangilu wakamutekesha. Uvua musue kuya kutangila balunda bende butuku, kadi kumonaye ne: kuya nanku ne bana muanda mukulu kakuvua kumusankisha to. Pashishe, wakatuadija too ne kungambuluisha bua kulongolola bana bua kuya ku Nzubu wa Bukalenge.

Bana bakibidilangana ne bisangilu bionso ne bakatuadija kuya mu mudimu wa kuyisha. Pavuabu mu dikisha, bavua batamba kuyisha ne bampanda-njila (anyi bamanyishi ba ku dîba ne ku dîba) ba mu tshisumbu. Biakambuluisha bana bua kunanga tshisumbu ne mudimu wa kuyisha.​—Matayo 24:14.

Bikondo bia diteta

Bayanyi wakabangisha kuya mu matunga makuabu bua kupeta makuta. Uvua uya bua matuku a bungi kadi uvua upingana panyima pa tshikondo bule kampanda. Kadi mu 1989, wakayilamu. Anu munkavua muleje, dijimija bayanyi diakambungamija bikole. Mvua ndila ne nsambila Yehowa bikole misangu ya bungi butuku bua ankoleshe bua kutantamena  lutatu alu, ne mvua mmona ne: uvua ungandamuna. Mvese bu mudi Yeshaya 54:4 ne 1 Kolinto 7:15 ivua impesha ditalala dia mu munda ne inkolesha. Balela ne balunda bena Kristo bakankuatshisha bikole mu lungenyi ne ku mubidi. Ndi ngela Yehowa ne basadidi bende tuasakidila bua diambuluisha diabu.

Tuvua ne ntatu mikuabu. Musangu kampanda, bakipata umue wa ku bana banyi ba bakaji mu tshisumbu bua nsombelu mubi. Mvua munange bana banyi bonso bikole, kadi lulamatu luanyi kudi Yehowa luvua pa muaba wa kumpala. Nunku tshikondo atshi, meme ne bana banyi bakuabu, tuvua tulonda tshitu Bible uleja bua bantu bipata. (1 Kolinto 5:11, 13) Bantu bavua kabayi bumvua tshituvua tuenza bakatuamba bikole. Kadi panyima pa muananyi mumane kupingana mu tshisumbu, bayende wakangambila ne: dilonda dietu dia mêyi a mu Bible diakamulenga bikole. Udi mpindieu wenzela Yehowa mudimu ne dîku diende dijima.

Ntatu ya makuta

Pavua bayanyi mutulekele, tshivua mpeta makuta a bungi bualu kavua wambuluisha kabidi dîku to. Nsombelu eu wakatulongesha bua kusanka ne bituvua nabi ne kuanyisha malu a mu nyuma kupita a ku mubidi. Bana bakalonga mua kunangangana ne kuambuluishangana. Pavua bana ba bakulumpe batuadije kuenza mudimu, bavua bambuluisha bakunyi babu ne muoyo mujima. Muananyi wa bakaji wa kumpala Marseree, wakambuluisha Nicole muakunyende wa mukala bua kujikija tulasa tuende tua bikadilu. Meme panyi ngakatuadija kupanyisha bintu biakudia. Makuta makese amvua mpeta akangambuluisha bua kukumbaja majinga etu a ku mubidi.

Yehowa katu muanji kutulekela nansha. Dimue dituku ngakambila muanetu mukuabu wa bakaji ne: katuakubuela mu mpungilu wa distrike bualu katuvua ne makuta. Wakangandamuna ne: “Muanetu Val, paudi umvua anu bakula bua mpungilu, bangisha kuteka makuta a njila ku luseke. Yehowa neakuambuluishe.” Ngakalonda mubelu wende. Yehowa wakatuambuluisha ne utshidi utungunuka ne kutuambuluisha. Dîku dianyi kaditu dianji kupangila mpuilu anyi mpungilu bua makuta to.

Mu 1988, tshipepele tshikole (tshivuabu babikile ne: Gilbert) tshiakapita mu Jamaïque ne kupula nzubu wetu. Pakenzatshi bu tshidi tshituya, meme ne muananyi wa balume tuakumbuka muaba utuvua basokome bua kuya kutangila tshivua tshishale ku nzubu wetu. Pamvua ngenda nkeba mu bintu bivua binyanguke, ngakamona tshintu tshimvua tshiyi musue kulekela. Diakamue, mpepele mikole yakatuadija kabidi, kadi meme mvua anu mukuate tshintu tshianyi atshi. Muananyi wakamba ne: “Mamu, teka televizion panshi. Udi mukaji wa Lota anyi?” (Luka 17:31, 32) Mêyi a muananyi aa akantabuluja. Ngakalekela televizion ukavua mubole ne mâyi ne tuakanyema bua kudisungila.

Ndi ngumvua bibi mpindieu pandi mvuluka ne: mvua muambe kufua bua televizion. Kadi ntu ne disanka pandi ngela meji ku mêyi avua muananyi muambe dituku adi avua aleja muvuaye ne malu a mu nyuma mu mutu. Ku diambuluisha dia malu a mu Bible avuaye mulonge mu tshisumbu tshia bena Kristo, wakangambuluisha bua kupanduka ku njiwu ya ku mubidi ne pamuapa ya mu nyuma.

 Tshipepele tshiakabumbula nzubu wetu ne tshiakatushiya batekete mu maboko. Ke bena Kristo netu kulua. Bakatukolesha bua kueyemena Yehowa ne bua kutungunuka ne kuyisha ne tshisumi, ne bakatuambuluisha bua kuibakulula nzubu wetu. Mudimu eu wa dinanga, muenza kudi Bantemu badisuile ba mu Jamaïque ne ba miaba mikuabu wakatulenga ku muoyo bikole.

Tudi tuteka Yehowa pa muaba wa kumpala

Melaine, muananyi wa bakaji muibidi wakenza mudimu wa bumpanda-njila pakajikijaye tulasa. Pashishe wakitaba bua kuya kuenza bumpanda-njila mu tshisumbu tshikuabu; nunku uvua ne bua kulekela mudimu wende. Nansha muvua mudimu wende au wambuluisha dîku bikole, tuvua bashindike ne: Yehowa neatuambuluishe bu tuetu bonso bateke malu a Bukalenge buende pa muaba wa kumpala. (Matayo 6:33) Pashishe, bakalomba kabidi muananyi wa balume Ewan, bua kulua mpanda-njila. Uvua wambuluisha dîku bikole, kadi tuakamubela bua kuitaba ne tuakamujingila mabenesha a Yehowa. Tshitu muanji kutekesha bana bua kabavudiji mudimu wabu wa Bukalenge to, ne bavua bashale ku nzubu kabavua bapangila tshintu. Kadi disanka dietu ndivule ne imue misangu mene, tutu tuambuluisha bakuabu badi mu dikenga.

Lelu’eu, ndi ne disanka dia bungi dia kumona bana banyi ‘benda mu bulelela.’ (3 Yone 4) Muananyi Melaine utu uya ne bayende mu mudimu wende wa mutangidi wa tshijengu. Muananyi Andrea ne bayende mbampanda-njila ba pa buabu, ne utu uya ne bayende patuyi ukumbula bisumbu padi mutangidi wa tshijengu kayiku. Muananyi Ewan ne mukajende badi bampanda-njila ba pa buabu ne udi mukulu mu tshisumbu. Muananyi mukuabu Ava-Gay udi wenza mudimu ne bayende ku biro bia Bantemu ba Yehowa bia mu Jamaïque. Jennifer, Genieve, ne Nicole pamue ne babayabu ne bana babu badi benza mudimu ne tshisumi mu bisumbu bidibu. Tudi basombe ne Marseree, ne tudi mu tshisumbu tshia Port Morant. Ndi ne disanka dia bungi bualu bana banyi bonso muanda mukulu badi batungunuka ne kutendelela Yehowa.

Bu munkadi muntu mukole, ndi ne tusamasama tua bungi. Mpindieu ndi ne ngalabatisa, kadi ntshidi anu mpanda-njila. Kadi kukadi matuku, nkavua ne lutatu lua kuenda muaba wa tukunakuna utudi. Ngakapeta lutatu bua kutungunuka ne mudimu wanyi wa kuyisha. Ngakateta kuenda ne dikalu meme kumona ne: bivua bipepele. Ke meme kusumba dikalu dia kale ne kubangisha kuenda nadi. Kumpala, bana banyi kabavua banyisha bua kummona ne ngalabatisa ngendesha dikalu. Kadi bavua ne disanka dia kummona ntungunuka ne kuyisha bu muvua dijinga dianyi.

Bitu binsankisha bikole pandi mmona bantu bandi ndonga nabu Bible bitaba bulelela. Ntu nsambila Yehowa misangu yonso bua ambuluishe bena mu dîku dianyi bonso bashale ne lulamatu mu matuku makole a ku nshikidilu aa too ne tshiendelele. Ndi ntumbisha ne ngela Yehowa tuasakidila, ‘mumvu wa milombu,’ bualu mmungambuluishe bua kukolesha bana banyi muanda mukulu mu njila yende.​—Musambu 65:2.

[Tshimfuanyi mu dibeji 10]

Meme ne bana banyi ne bena dibaka nabu ne bankana banyi

[Tshimfuanyi mu dibeji 12]

Ntu ngendesha dikalu bua kuyisha