Banjelu badi mua kutuenzela tshinyi?

MUPROFETE Danyele wakafunda bua banjelu bavuaye mumone mu tshikena-kumona ne: ‘Banjelu binunu ne binunu bakakuatshila Nzambi mudimu, banjelu binunu dikumi misangu binunu dikumi bakimana kumpala kuende.’ (Danyele 7:10) Mvese eu udi uleja ne: Nzambi wakafuka banjelu bua kumuenzela mudimu ne kuenza tshionso tshidiye ubambila.

Nzambi utu imue misangu utuma banjelu bua kuenzela bantu amue malu. Netumone mutuye ubatuma bua kukolesha bantu bende ku muoyo ne kubalama, bua kufikisha mikenji yende ku bantu ne bua kunyoka bantu babi.

Banjelu batu bakolesha bantu ku muoyo ne babalama

Katshia anu banjelu bamona muakafuka Nzambi buloba ne bantu ba kumpala, batu ne dijinga dikole dia kumanya malu a bantu. Yezu Kristo udi wamba (bu meji menze bu muntu patshivuaye mu diulu) ne: ‘Disanka dianyi divule diakadi bua kusomba ne bukua-bantu.’ (Nsumuinu 8:31) Bible udi wamba mudi “banjelu basue kutangilatangila” mu malu adi atangila Kristo ne avua baprofete bamanyishe.​—1 Petelo 1:11, 12.

Banjelu aba bakalua kumona panyima pa matuku ne: bantu bavule kabavua bakuatshila Mufuki wabu udi mubanange mudimu to. Bualu ebu buvua bubabungamije bikole! Kadi, padi muntu uvua muenze bubi unyingalala ubulekela ne upingana kudi Yehowa, ‘disanka didi ku mêsu kua banjelu.’ (Luka 15:10) Banjelu batu baditatshisha bikole bua basadidi ba Nzambi. Yehowa uvua ubatuma misangu ya bungi bua kukolesha basadidi bende ba lulamatu badi pa buloba ne bua kubalama. (Ebelu 1:14) Tumonabi bimue bilejilu.

Banjelu babidi bakapandisha Lota ne bana bende ba bakaji ku kabutu ka Sodoma ne Amola, kubapatulabu mu bimenga abi. * (Genese 19:1, 15-26) Panyima pa bidimu bivule, bakela muprofete Danyele mu buina bua ntambue, kadi kayakamudia to.  Mbua tshinyi? Wakamba ne: ‘Nzambi wanyi wakatuma muanjelu wende, wakasuika mbanga ya ntambue.’ (Danyele 6:22) Banjelu bakambuluisha Yezu ku ntuadijilu kua mudimu wende pa buloba. (Mâko 1:13) Kabidi kumpala kua Yezu kufuaye, muanjelu wakamumuenekela, “wakamukolesha.” (Luka 22:43) Dikuatshisha dia kudi muanjelu eu divua diambuluishe Yezu bikole mu tshikondo atshi! Muanjelu wakapatula kabidi mupostolo Petelo mu buloko.​—Bienzedi 12:6-11.

Banjelu batu batulama petu lelu’eu anyi? Tuetu tutendelela Yehowa bilondeshile Dîyi diende, banjelu bende (badi ne bukole bupite ne badi kabayi bamueneka) nebatulame. Bible udi wamba ne: ‘Muanjelu wa Yehowa udi wasa tshitudilu tshiende tshinyunguluke badi batshina Nzambi, udi ubasungila.’​—Musambu 34:7.

Kadi tumanye ne: mudimu munene wa banjelu ngwa kuenzela Nzambi mudimu, ki ngwa kuenzela bantu mudimu to. (Musambu 103:20, 21) Banjelu badi balonda dîyi dia Nzambi, kadi ki ndia bantu to. Nunku, utudi ne bua kulomba diambuluisha n’Yehowa Nzambi, ki mbanjelu to. (Matayo 26:53) Bulelela, bu mutudi katuyi tumona banjelu, katuena mua kujadika mudi Nzambi ukuata nabu mudimu bua kuambuluisha bantu to. Tshidibi, tudi bamanye ne: Yehowa utu ‘uleja bukole buende bua bantu badi ne mitshima miakane kudiye.’ (2 Kulondolola 16:9; Musambu 91:11) Tudi bashindike ne: ‘Bituamulomba tshintu tshionso bu mu disua diende, Nzambi udi utumvuila.’​—1 Yone 5:14.

Bible udi kabidi wamba ne: anu Nzambi nkayende ke utudi ne bua kusambila ne kutendelela. (Ekesode 20:3-5; Musambu 5:1, 2; Matayo 6:9) Ke tshidi banjelu ba lulamatu batusaka bua kuenza. Tshilejilu, pakakeba mupostolo Yone bua kukukuila muanjelu, wakamutandisha ne: ‘Tangila, kuenji nanku. Ukukuile Nzambi.’​—Buakabuluibua 19:10.

Banjelu batu bafikisha mikenji idi Nzambi utuminangana

Muaku “muanjelu” udi umvuija “mutuadi wa mukenji,” ne eu ke mukuabu mushindu udi banjelu benzela Nzambi mudimu, badi batuadila bantu mikenji yende. Tshilejilu, ‘muanjelu Gabaliele wakatumibua kudi Nzambi mu musoko wa Galela, dîna diawu Nazaleta.’ Mbua tshinyi? Bua kuambila Mariya nsongakaji utshivua kamama ne: uvua ne bua kupeta difu ne kulela muana wa balume, ne kumuinyika ne: Yezu. (Luka 1:26-31) Bakatuma kabidi muanjelu bua kuambila balami ba mikoko bavua mu mpata ne: ‘Kristo Mukalenge’ mmuledibue. (Luka 2:8-11) Banjelu bakatuadila Abalahama, Mose, Yezu ne bakuabu badibu batele mu Bible mikenji ya kudi Nzambi.​—Genese 18:1-5, 10; Ekesode 3:1, 2; Luka 22:39-43.

Mmunyi mudi banjelu bamanyisha mikenji ya kudi Nzambi lelu? Tshilejilu, tuangate mudimu uvua Yezu mumanyishe uvua bayidi bende ne bua kuenza kumpala kua nshikidilu kuluaye. Wakamba ne: ‘Nebambile bantu bonso ba pa buloba lumu luimpe elu lua bukalenge, neluikale tshimanyishilu ku bisamba bionso; pashishe, nshikidilu nealue.’ (Matayo 24:3, 14) Tshidimu tshionso etshi Bantemu ba Yehowa batu benza mêba mapite pa muliyare mujima bayisha Bukalenge bua Nzambi. Kadi udiku mumanye ne: banjelu batu pabu badifile mu mudimu eu anyi? Mupostolo Yone wakamba bua tshikena-kumona tshiakamonaye ne:  ‘Ngakatangila muanjelu mukuabu, wakadi ne lumu luimpe lua tshiendelele lua kuambilaye badi pa buloba, ne kudi ditunga dionso ne tshisamba tshionso ne muakulu wonso ne bantu bonso.’ (Buakabuluibua 14:6, 7) Mvese eu udi uleja mudimu munene udi banjelu benzela bantu lelu.

Bantemu ba Yehowa badi bamona mudi banjelu babalombola mu mudimu wabu wa diyisha bantu ku nzubu ne ku nzubu. Misangu ya bungi batu bapeta bantu bavua bafuma ku dilomba Nzambi bua abatumine muntu udi mua kubumvuija malu ende. Ku diambuluisha dia mudimu wa banjelu ne wa Bantemu, bantu bavule badi bafika ku dimanya Yehowa tshidimu tshionso etshi. Enza bua mudimu wa lupandu eu udi wenzeka ku bulombodi bua banjelu ukuambuluishe.

Banjelu batu bafila manyoka adi Nzambi ukoselangana

Nansha mudi banjelu kabayi ne bukenji bua kulumbuluisha bantu, kabatu anu basombe patupu to. (Yone 5:22; Ebelu 12:22, 23) Bu mutubu benza dîyi didi Nzambi ubambila, bakafila manyoka avuaye ukosela bantu kale. Tshilejilu, Nzambi wakabatuma bua kuluisha bena Ejipitu bavua bakuate bena Isalele ku bupika. (Musambu 78:49) Kabidi, butuku bumue patupu ‘muanjelu wa Yehowa’ wakashipa basalayi 185 000 mu tshitudilu tshia baluishi ba bantu bende.​—2 Bakelenge 19:35.

Matuku atshilualua, banjelu nebabutule baluishi ba Nzambi. Yezu nealue ‘ne banjelu bende ba bukole mu kapia kadi kakenka. Neadisombuele kudi bantu badi kabayi bamanye Nzambi ne kudi badi kabayi batumikila lumu luimpe.’ (2 Tesalonike 1:7, 8) Kadi bantu badi kabayi bitaba mukenji udibu bayisha lelu pa buloba bujima ku diambuluisha dia banjelu ke babutulabu. Kabakushipa bantu badi bakeba Nzambi ne batumikila malongesha a mu Bible to.​—Sefanya 2:3.

Katuenaku mua kuikala ne dianyisha bua banjelu ba lulamatu aba badi bakumbaja dîyi dia Nzambi anyi? Yehowa udi ubatuma bua kukuatshisha bena lulamatu bende ba pa buloba ne kubalama. Bualu ebu budi butukolesha ku muoyo bualu bademon batu bakeba kutuenzela bibi.

Bademon mbanganyi?

Bidimu bitue ku 1 500 kunyima kua Satana Diabolo mumane kudinga Eva mu Edene, banjelu bakuabu bakamona ne: uvua mufike ku dipambuisha bantu bonso, pa kumbusha bantu bakese aba: Abele, Hanoka ne Noa. (Genese 3:1-7; Ebelu 11:4, 5, 7) Bamue banjelu  pabu bakalonda Satana. Bible udi ubabikila ne: nyuma ivua kayiyi itumikila Nzambi mu “matuku a Noa.” (1 Petelo 3:19, 20) Dibenga kutumikila Nzambi diabu diakalua kumueneka munyi?

Mu matuku a Noa, banjelu bungi butudi katuyi bamanye bakatombokela Nzambi, kushiyabu miaba yabu mu dîku dia mu diulu, e kulua pa buloba bavuale mibidi ya bantu. Mbua tshinganyi? Mbua kumanyangana ne bakaji. Bobu kulela ne bakaji abu bana bavuabu babikila ne: ba-Nefilime, bantu ba tshikisu, balebale ba mfiondo. Kabidi, ‘mibi ya bantu yakadiundadiunda munkatshi mua ba pa buloba ne meji avuabu bela mu mitshima yabu avua mabi matuku onso.’ Kadi Yehowa kakitaba bua bubi kutungunuka nanku kashidi to. Wakalokesha Mvula wa Kabutu e kushipaye benji ba malu mabi bonso, too ne ba-Nefilime. Anu basadidi ba Nzambi ba lulamatu ke bakashala ne muoyo.​—Genese 6:1-7, 17; 7:23.

Banjelu bavua batombokele Nzambi abu kabakafua bobu ku Mvula wa Kabutu to. Bakumbusha mibidi yabu ya bantu, kualukilabu mu diulu ne mubidi wa nyuma. Panyima, bakalua kubabikila ne: bademon. Bakaditeka ku luseke lua Satana Diabolo udibu babikila ne: ‘mukalenge wa bademon.’ (Matayo 12:24-27) Bademon badi bakeba bikole bua bantu babatendelele anu mutu mfumuabu ukeba pende.

Bademon batu ne bukole bua kuenzelangana bibi, kadi katubatshinyi to, bualu bukole buabu budi ne mikalu. Pakapinganabu mu diulu, Nzambi kakabitabila bua kupingana munkatshi mua banjelu ba lulamatu to. Kabavua kabidi mua kupeta butoke kudi Nzambi to, kabutu ke kavua kabindile. Mbabele mu mîdima ya mu nyuma idibu babikila ne: Tartare. (2 Petelo 2:4) Yehowa mmubele mu ‘nkanu ya tshiendelele’ bua bikale anu mu mîdima ya mu nyuma. Kabatshitu kabidi ne mushindu wa kuvuala mubidi wetu wa buntu to.​—Yuda 6.

Tshia wewe kuenza ntshinyi?

Bademon batshitu anu benzeja bantu malu anyi? Eyowa, ke tshidibu benza ne ‘mateyi’ a buena adi mfumuabu Satana Diabolo uteyangana nawu. (Efeso 6:11, 12) Kadi tuetu tutumikila mibelu ya mu Dîyi dia Nzambi, tudi mua kukandamena bademon. Kabidi, banjelu ba lulamatu badi balama bantu badi banange Nzambi.

Nanku kabienaku bimpe bua wewe kulonga malu adi Nzambi utulomba mu Bible ne kuatumikila anyi? Udi mua kumanya malu a bungi a mu Bible wewe mupetangane ne Bantemu ba Yehowa ba muaba uudi anyi mufundile bapatudi ba tshibejibeji etshi. Bantemu ba Yehowa nebitabe bua kulonga nebe Bible dituku ne dîba diwasua kuyi ufuta makuta.

[Mêyi adi kuinshi]

[Kazubu mu dibeji 6]

MUSHINDU UDI BANJELU BALONDANGANE

Yehowa mmulongolole banjelu bende bonso mushindu eu:

Muanjelu udi ne bukole ne bukokeshi bupite bakuabu bonso m’Mikaele mfumu wa banjelu anyi Yezu Kristo. (1 Tesalonike 4:16; Yuda 9) Baselafima ne bakeluba ne banjelu bakuabu badi muinshi muende.

Baselafima badi ne muanzu mubandile bikole mu bulongolodi bua Nzambi. Badi bakuatshila Nzambi mudimu ku nkuasa wende wa bumfumu. Mudimu wabu ngwa kumanyisha bunsantu bua Nzambi ne kuenza bua bantu bende bikale bakezuke mu nyuma.​—Yeshaya 6:1-3, 6, 7.

Bakeluba batu pabuipi ne nkuasa wa Yehowa ne batu bamanyisha butumbi buende.​—Musambu 80:1; 99:1; Yehezekele 10:1, 2.

Banjelu bakuabu pabu mbaleji-mpala ba Yehowa, ne badi bakumbaja disua diende.

[Tshimfuanyi mu dibeji 4]

Banjelu bakapatula Lota ne bana bende ba bakaji bua kubapandisha

[Tshimfuanyi mu dibeji 5]

Pakakeba mupostolo Yone kukukuila muanjelu, wakamuambila ne: ‘Kuenji nanku!’

[Tshimfuanyi mu dibeji 6]

Banjelu batu bafila manyoka a kudi Nzambi

[Tshimfuanyi mu dibeji 7]

Mudimu wa diyisha udi banjelu balombola mmukuambuluishaku anyi?