Nkonko ya babadi

Mushete wa tshipungidi uvua amu ne mabue abidi a mikenji anyi uvua kabidi ne bintu bikuabu?

Dîba dia dibanjija dia ntempelo wa Solomo mu tshidimu tshia 1026 kumpala kua bikondo bietu ebi, ‘tshintu tshikuabu katshivua munda mua mushete, anu mabue abidi akatekamu Mose ku Holeba kuakapunga Yehowa tshipungidi ne Bena Isalele, pakalopokabu mu Ejipitu.’ (2 Kulondolola 5:10) Kadi kabiakashala amu nanku to.

Bena Isalele bakabuela mu tshipela tshia Sinai kunyima kua ‘ngondo isatu bamane kulopoka mu buloba bua Ejipitu.’ (Ekesode 19:1, 2) Pashishe, Mose wakaya ku mukuna wa Sinai kuakamupeshabu mabue abidi avua ne Mikenji. Mose udi wamba ne: ‘Ngakanyunguluka, ngakapueka ku mukuna, ngakateka mabue mu mushete ungakenza, adimu bu muakangambila Yehowa.’ (Dutelonome 10:5) Mushete eu wa kuteka mabue a Mikenji uvua Yehowa muambile Mose bua kuenza uvua anu wa tshitupa tshîpi. (Dutelonome 10:1) Too ne pabuipi ne ku ndekelu kua tshidimu tshia 1513 kumpala kua bikondo bietu ebi, mushete wa tshipungidi kauvua muanji kujika to.

Matuku makese kunyima kua dibapikula mu Ejipitu, bena Isalele bakatuadija kudilakana bua biakudia. Ke Yehowa kubapesha mana. (Ekesode 12:17, 18; 16:1-5) Mose wakambila Alona tshikondo atshi ne: ‘Angata mulondo, welemu litre ya mana inayi tente, uuteke kumpala kua Yehowa bua kulamina ndelanganyi yenu.’ Bible udi utungunuka ne: ‘Alona kuteka mulondo kumpala kua Mushete wa mêyi a Yehowa [tshilaminu tshimpe tshia bintu bia mushinga] bua kuulama, bu muvua Yehowa muambile Mose.’ (Ekesode 16:33, 34, MMM) Nansha muakela Alona mana mu mulondo tshikondo atshi, bavua ne bua kuindila bua kuateka kumpala kua Mushete wa mêyi a Yehowa too ne pavua Mose ujikija Mushete wa tshipungidi ne utekamu mabue a Mikenji.

Anu mutudi bamone, bakajikija mushete wa tshipungidi ku ndekelu kua tshidimu tshia 1513. Bakalua kuteka dikombo dia Alona mu Mushete eu kunyima menemene, pakatomboka Kola ne bena diende. Mupostolo Paulo udi wakula bua ‘mushete wa tshipungidi muvua tshivuadi tshia ngolo tshitekelamu mana ne mulangala wa Alona wakela ntonga ne mabue akadi ne mêyi a tshipungidi mafundapu.’​—Ebelu 9:4.

Mana avua biakudia bivua Nzambi mupeshe bena Isalele munkatshi mua bidimu 40 biakashalabu mu tshipela. Nzambi wakalekela kubapeshawu ‘pakabangabu kudia bintu biakasanganabu mu buloba’ bulaya. (Yoshua 5:11, 12) Bakateka dikombo dia Alona mu mushete wa tshipungidi bua wikale tshivulukilu kudi bantu badi batombokela Nzambi. Bualu ebu budi buleja ne: dikombo edi diakashalamu bidimu bionso biakenzabu mu tshipela. Nunku, bidi biumvuika bimpe ne: bakumbusha dikombo dia Alona ne mulondo wa mana mu mushete wa tshipungidi matuku ndambu kunyima kua dibuela dia bena Isalele mu Buloba Bulaya ne kumpala kua dibanjija dia ntempelo wa Solomo.