Bubanji bulelela mu bulongolodi bupiabupia bua Nzambi

DAVID * tatu mukuabu muena Kristo wakaya mu États-Unis wela meji ne: udi wenza bualu buimpe butambe. Nansha muvuaye kayi musue kushiya mukajende ne bana, uvua mutuishibue ne: bua bobu kuikala ne nsombelu muimpe bivua bikengela apete makuta a bungi. Nunku wakaya ku New York pakamubikilabu kudi balela bende bavua kuine aku ne pashishe kupetaye mudimu.

Kadi ngondo mikese pashishe, bionso bivua David utekemena biakatuadija kumueneka bikole. Ukavua upeta dîba dia kuenza malu a mu nyuma anu ku mpukapuka. Ukavua mene muambe kujimija ditabuja kudi Nzambi. Ndekelu wa bionso, anu pakafikaye ku dienza bualu bubi ke pakajingululaye tshivua nsombelu wende. Dikeba dia bubanji diakamufikisha ku kakese ku kakese kule ne malu onso avua ne mushinga kudiye. Uvua ne bua kushintulula amue malu.

 Anu bu David, bantu ba bungi batu bumuka mu matunga mapele tshidimu tshionso etshi bua kumona mua kuakaja nsombelu wabu. Kadi batu pa tshibidilu bakakenga bikole mu nyuma. Bamue batu badiebeja ne: ‘Muena Kristo udiku mua kuikala ne tente mu nzubu tente pambelu eku muikale mubanji ku mêsu kua Nzambi anyi?’ Bafundi bende lumu ne bamfumu ba bitendelelu nebakuambile ne: bidi mua kuenzeka nanku. Kadi anu bu mudi David ne bakuabu bafike ku dimona, mbikole bua kulondakaja bintu ebi bionso bibidi diakamue.​—Luka 18:24.

Makuta ki mmabi to

Mbulelela se: bantu ke badi benze makuta. Anu bu bintu bikuabu bidibu benze, makuta ki mmabi to. Bushuwa, wowu ke adi apetesha bintu bikuabu. Nunku, muntu yeye muenze nawu mudimu bimpe, adi mua kumuambuluisha bikole. Tshilejilu, Bible udi wamba ne: ‘biuma bidi ne dikuatshisha,’ nangananga bua kujikija malu adi atangila bupele. (Muambi 7:12) Mbimueneke ne: mu amue malu, ‘biuma bidi bipetesha bintu bionso.’​—Muambi 10:19.

Bible udi ukandika bufuba ne udi utulomba bua kuenza mudimu bikole. Tudi ne bua kukumbaja majinga a bena mu dîku dietu ne padiku mushindu, kupeta ‘tshia kupa udi utshikengela.’ (Efeso 4:28; 1 Timote 5:8) Kabidi, pamutu pa kuikala tudikengesha, Bible udi utukankamija bua kusanka bua bitudi nabi. Udi utuambila bua ‘kuangata difutu dietu’ ne kusanka bua bintu bia ku mudimu wetu mukole. (Muambi 5:18-20) Mu Bible mudi bilejilu bivule bia balume ne bakaji bavua ne lulamatu eku bikale babanji.

Bena lulamatu bavua babanji

Abalahama musadidi wa lulamatu wa Nzambi wakapeta bimuna bia bungi, argent ne or bivule ne bena mudimu bapite bungi. (Genese 12:5; 13:2, 6, 7) Yobo uvua pende ne bubanji bupite bungi: bimuna, bena mudimu, or ne argent. (Yobo 1:3; 42:11, 12) Nansha patudi tufuanyikija ne matuku etu aa, bantu aba bavua babanji, kadi bavua kabidi babanji ku mêsu kua Nzambi.

Mupostolo Paulo udi ubikila Abalahama ne: ‘nkambua wa bonso badi ne ditabuja.’ Abalahama kavua ne minu mikole to, ne kavua mulamate ku bubanji buende wamba kufua to. (Lomo 4:11; Genese 13:9; 18:1-8) Bia muomumue, Nzambi nkayende wakamba muvua Yobo muntu wa “mutshima mutoke ne wa malu makane.” (Yobo 1:8) Uvua pabuipi misangu yonso bua kuambuluisha bapele ne bakengi. (Yobo 29:12-16) Abalahama ne Yobo bakeyemena Nzambi, kabakeyemena bubanji buabu to.​—Genese 14:22-24; Yobo 1:21, 22; Lomo 4:9-12.

Tshilejilu tshikuabu ntshia Mukalenge Solomo. Bu muvuaye mupiane nkuasa wa bukalenge wa Nzambi mu Yelushalema, Nzambi wakamupesha meji, kumupa kabidi bubanji ne lumu bipite bungi. (1 Bakelenge 3:4-14) Mu  matuku a bungi a muoyo wende, uvua muena lulamatu. Kadi mu matuku ende a ndekelu, ‘mutshima wende kawakadi muakane ku mêsu kua Yehowa.’ (1 Bakelenge 11:1-8) Bushuwa, bualu bubi buakenzekela Solomo ebu budi buleja amue a ku mateyi mavule a bubanji. Tumonayi amue a kudiwu.

Mateyi a bubanji

Buteyi butambe bunene bua bubanji ndinanga dikole dia makuta ne bintu bidiwu mua kupeteshangana. Biuma bitu bikebesha dijinga dikole ne didi kadiyi dijika dia kubivudija. Kale, Solomo wakamona bualu ebu kudi bantu bakuabu. Wakafunda ne: ‘Wananga biuma kêna usankishibua ku biuma; wananga bubanji kêna ukuta bubanji; ebu mbualu bua patupu kabidi.’ (Muambi 5:10) Pashishe, Yezu ne Paulo bakalua pabu kudimuija bena Kristo ku dinanga dibi dia biuma edi.​—Mâko 4:18, 19; 2 Timote 3:2.

Padi muntu unanga makuta kupita bintu bionso pamutu pa kuangata bu mushindu wa kupeta bintu bidiye ukengela, mbitekete bua kuenzaye malu mabi a mishindu yonso bu mudi: mafi, buivi ne kuibila. Tshilejilu, Yudasa Isakaliote umue wa ku bapostolo ba Kristo wakatungila mfumuende anu bua mpalata 30. (Mâko 14:11; Yone 12:6) Bakuabu mbalekele mukolo wa mputa bela wa naka mâyi, batendelela mfranga pamutu pa kutendelela Nzambi. (1 Timote 6:10) Nunku bena Kristo badi ne bua kudikonkonona bimpe bua kumanya tshidi bushuwa tshibasaka bua kupeta biuma bia bungi.​—Ebelu 13:5.

Dikeba dia bubanji didi kabidi ne mateyi adi makole bua kuamona. Tshia kumpala, biuma bia bungi bidi bifikisha muntu ku didieyemena. Ke tshivua Yezu wamba pakakulaye bua bukole bua “mashimi a biuma.” (Matayo 13:22) Yakobo (umue wa ku bafundi ba Bible) wakadimuija pende bena Kristo bua kabapu Nzambi muoyo mu malu abu a mishinga to. (Yakobo 4:13-16) Bu mudi biuma bimueneka bu bidi mua kutupetesha ndambu wa budikadidi, bitu bifikisha bantu badi nabi ku dibieyemena pamutu pa kueyemena Nzambi.​—Nsumuinu 30:7-9; Bienzedi 8:18-24.

Tshibidi, anu bu David utudi batele ku ntuadijilu eku, didina ne kasuki mu dikeba dia bubanji didi diangata muntu dîba ne bukole buende buonso ne dimumusha ku kakese ku kakese ku malu a mu nyuma. (Luka 12:13-21) Babanji badi kabidi mua kupona mu buteyi bua kutulakaja mfranga yabu anu bua kukumbaja majinga abu bobu nkayabu.

Tudiku mua kuamba ne: Solomo wakakuluka mu nyuma bualu uvua ujinga kuikala ne nsombelu muimpe anyi? (Luka 21:34) Uvua mumanye bimpe ne: Nzambi uvua mukandike disela bakaji ba bisamba bia bende. Pabi, wakalua kusela bakaji batue ku tshinunu. (Dutelonome 7:3) Bu muvuaye musue kusankisha bakaji bende ba bisamba bikuabu aba, wakatuadija kutendelela nzambi yabu. Anu bu mutukavua bambe kumpala, mutshima wa Solomo wakumbuka kudi Yehowa ku kakese ku kakese.

Bilejilu ebi bidi bileja patoke mudi mubelu wa Yezu eu mulelela: “Kanuena bamanye mua kukuatshila Nzambi mudimu ne Mamona diakamue.” (Matayo 6:24) Kadi mmunyi mudi muena Kristo mua kupita ne nsombelu mikole idiku lelu’eu? Tudiku mua kutekemena nsombelu muimpe mu matuku atshilualua anyi?

Bubanji bulelela mu matuku atshilualua

Bayidi ba Yezu mbashilangane ne Abalahama ne Yobo ne bena Isalele bualu mbabapeshe mudimu wa ‘kuvuija bantu ba bisamba bionso bayidi.’ (Matayo 28:19, 20) Bua kukumbaja mudimu eu, bidi bilomba dîba ne bukole bua bungi bivua mua kuikala biya ku dikeba dia biuma. Nunku bua tuetu kuenza mudimu eu bimpe, tudi ne bua kulonda tshidi Yezu utulomba etshi: ‘Kadi diambedi kebayi bukalenge bua Nzambi ne buakane buende, nunku nebanupeshe bintu ebi bionso.’​—Matayo 6:33.

David wakatabuluka anu pakavuaye muambe kujimija dîku diende, ditabuja ne malanda ende ne Yehowa. Anu bu muvua Yezu mulaye, pakatuadijilula David kudilongela Bible, kusambila ne kuteka mudimu wa buambi pa  muaba wa kumpala, malu ende onso akatuadija kuenda bimpe. Ku kakese ku kakese, wakalongolola malanda ende ne mukajende ne bana bende. Wakapetulula kabidi disanka. Utshidi anu wenza mudimu mukole. Kakalua mubanji to. Tshidibi, lutatu luvuaye mupete elu luakamulongesha malu a mushinga mukole.

David mmuelulule meji pa diya diende dia mu États-Unis ne mmudisuike bua kubenga kulekela kabidi makuta amupite dikanda. Mpindieu David mmumanye ne: makuta kaena mua kusumba malu a mushinga bu mudi malanda mimpe mu dîku, balunda bimpe ne malanda mimpe ne Nzambi to. (Nsumuinu 17:17; 24:27; Yeshaya 55:1, 2) Bushuwa kuikala ne muoyo mutoke nkupite kuikala mubanji kule ne kule. (Nsumuinu 19:1; 22:1) David ne dîku diende mbadisuike bua kuteka malu adi ne mushinga pa muaba wa kumpala.​—Filipoi 1:10.

Bantu mbatete mu mishindu yonso bua kupeta bubanji bulelela ne bikadilu bimpe, kadi mbapangile. Nzambi mmulaye ne: Bukalenge buende nebutupeteshe bintu bidi bikengela bua tuetu kuikala ne nsombelu muimpe ku mubidi ne mu nyuma. (Musambu 72:16; Yeshaya 65:21-23) Yezu wakalongesha ne: bubanji bulelela budi butuadija ne malu a mu nyuma. (Matayo 5:3) Nunku, nansha tuetu babanji anyi bapele, kuteka malu a mu nyuma pa muaba wa kumpala mpindieu ke kudi kutuambuluisha bua kudilongolola bua kubuela mu bulongolodi bupiabupia bua Nzambi budi kumpala eku. (1 Timote 6:17-19) Bulongolodi abu ke buatupetesha bubanji bulelela bua mu nyuma ne bua ku mubidi.

[Mêyi adi kuinshi]

[Bimfuanyi mu dibeji 5]

Yobo wakeyemena Nzambi, ki mbintu bivuaye nabi to

[Bimfuanyi mu dibeji 7]

Makuta kaena mua kusumba malu a mushinga mukole mu nsombelu to