Nkonko ya babadi
Nkonko ya babadi
Yosefe, musadidi wa Yehowa wa lulamatu, uvuaku ne dikopo dia pa buadi dia argent divuaye umanyina malu avua mua kuenzeka bu mudibi bisua kumueneka mu Genese 44:5 anyi?
Kakuena bualu nansha bumue budi mua kutuitabijija ne: Yosefe uvua bushuwa mutempe mbuku to.
Bible udi uleja muvua Yosefe mumanye bimpe tshivua kutempa mbuku kumvuija. Kumpala, pakalombabu Yosefe bua kumvuija tshilota tshia Palô, wakambulula misangu ne misangu ne: anu Nzambi nkayende ke udi mua ‘kumanyisha’ malu adi alua. Nunku Palô wakafika ku ditaba ne: Nzambi mulelela uvua Yosefe utendelela ke uvua mumufikishe ku dimanya malu avua ne bua kulua kadi ki mbuku nansha. (Genese 41:16, 25, 28, 32, 39) Mu Mikenji yakalua Yehowa kupesha Mose, wakakandika dienza mudimu ne majimbu anyi mbuku bua kuleja ne: anu yeye nkayende ke udi ne bua kumanyisha malu adi alua kumpala.—Dutelonome 18:10-12.
Kadi bua tshinyi Yosefe wakamba mukana mua muena mudimu wende ne: dikopo dia argent divua dimuambuluisha bua ‘kumanya malu avua mua kuenzeka’? * (Genese 44:5, MMM) Bidi bikengela tumanye malu avua menzeke dîba divuabu bambe mêyi aa.
Bu muvuaku tshiyole tshia nzala, bana babu ne Yosefe bakalua mu Ejipitu bua kupeta biakudia. Bidimu kumpala, anu bobu bana babu aba bakapana Yosefe mu bupika. Mpindieu, kabayi bamanye, badi balomba diambuluisha kudi muanabu ukadi mulue mutangidi wa malu a biakudia mu Ejipitu. Yosefe kakadimanyisha kudibu to. Kadi wakajinga kubateta. Nunku, Yosefe uvua ujinga kumanya bikala bana babu bashintuluke ne balekele malu abu mabi. Uvua kabidi musue kujadika mushindu uvuabu banange muanabu Benyamina ne tatuabu Yakobo uvua mutambe kunanga Benyamina bikole. Ke bualu kayi Yosefe wakadisokoka.—Genese 41:55–44:3.
Yosefe kuambila muena mudimu wende mukuabu bua kuuja bibuta bia bana babu ne biakudia, kupingajila muntu yonso makuta ende mu tshibuta, ne kuela dikopo dia argent dia Yosefe mu tshibuta tshia Benyamina. Mu malu onso aa, Yosefe uvua udileja bu mfumu wa mu ditunga dia bampangano. Wakashintulula ngakuilu wende ne bienzedi biende bua afuane mfumu wa nunku anu bua bana babu bavua bafume kule aba kabamumanyi to.
Pakavua Yosefe ulumbuluisha bana babu abu, wakatungunuka anu ne kudisokoka ne kubakonka ne: ‘Kanuena bamanye ne: muntu bu mundi emu udi ne bumfumu bua kujandula malu onso anyi?’ (Genese 44:15, MMV) Nunku, dikopo adi divua anu tshimue tshia ku bintu bivuaye muenze nabi mudimu bua kudisokoka. Bushuwa Yosefe kavua muenze mudimu ne dikopo bua kumanya malu avua mua kuenzeka, anu bu muvua Benyamina pende kayi mudibe.
[Mêyi adi kuinshi]
^ tshik. 5 Mukanda kampanda udi umvuija tshilele tshia kale etshi ne: “Bavua babuka ne dikopo edi pa kuela mu mâyi tshintu bu mudi ngolo, argent anyi bikanu bia kudilengeja nabi ne pashishe batangila tshimuenekelu tshiatshi; anyi batangila anu mu mâyi bu mudibu baditangila mu lumuenu.” (The Holy Bible, With an Explanatory and Critical Commentary, mupatula kudi F. C. Cook) Mumvuiji wa malu a mu Bible Christopher Wordsworth udi wamba ne: “Imue misangu, bavua buuja dikopo ne mâyi ne bapeta diandamuna ku diambuluisha dia tshimfuanyi tshivua dîba dipatula mu mâyi avua mu dikopo au.”