Udi mufuane mutshi wa lagani auna anyi?

MU MUSOKO kampanda pabuipi ne tshimenga tshia Port Moresby, mu ditunga dia Papouasie-Nouvelle-Guinée, bambi ba lumu luimpe babidi bavua bafuma mu buambi. Munkatshi mua luendu, e kumonabu mutshi muimpe mutambe. Ke mukulumpe ku babidi abu kuamba ne: “Aa, mutshi wa lagani auna!” Kukudimukaye kudi nsonga uvuabu nende ne kumuambila ne: “Dîna edi didi diumvuija ne: ‘mutshi wa tshidimu tshionso.’ Mmushilangane ne mitshi mikuabu ya bungi ya mu matunga a luya bualu wowu utu upopoka mabeji tshidimu tshionso ne umueneka bu mume. Kadi padi mvula umata panshi, udi utuadija kusasa, wela bilongo ne upingana muawu ne kale.”

Tudi mua kupetela dilongesha ku mutshi eu wa lagani auna, anyi udibu batambe kumanya mu dîna dia musesa. Bilondeshile bamue bamanyi bapiluke, mutshi eu ngumue wa ku mitshi itanu mitambe buimpe itu ipatula bilongo pa buloba bujima. Nansha mutu mutshi eu upopoka bilongo ne mabeji mu mushipu, utu ulama mâyi a bungi munda muawu. Miji yawu mmikole ne idi mua kusasa nansha munkatshi mua mabue adi muinshi mua buloba. Ke bualu kayi lupepele nansha lua mushindu kayi kalutu mua kuupula to. Mu tshikoso, utu ushala anu tendee mu bikondo ne bitshia.

Tudi petu mua kupetangana ne nsombelu idi iteta bukole bua ditabuja dietu. Ntshinyi tshiatuambuluisha bua kushala bashindame? Anu bu mutshi wa lagani auna, tudi ne bua kunua ne kulama mâyi a muoyo adi mu Dîyi dia Nzambi. Tudi kabidi ne bua kulamata bikole kudi Yehowa ‘dibue dietu,’ ne ku bulongolodi buende. (2 Samuele 22:3) Bushuwa, mutshi wa lagani auna utu ushala anu muimpe nansha mu miaba idi kayiyi mimpe. Tudi petu mua kulama makanda a mu nyuma ne buimpe buetu pa kudia biakudia bidi Yehowa utupesha. Tuetu benze nunku, ‘netupiane milayi’ idibu batulaye ne netupete muoyo wa tshiendelele.​—Ebelu 6:12; Buakabuluibua 21:4.