Malu a mu nsombelu

Yehowa mmungambuluishe bua meme kumupeta

MALONDA KUDI FLORENCE CLARK

Ngakakuata tshianza tshia bayanyi uvua usama bikole. Bu mumvua muena Anglikane, ngakalomba Nzambi bua bayanyi kumvuaye bimpe ne kumulaya ne: yeye kayi mufue, nemmukebe too ne pamvua ne bua kumupeta ne kushala musadidi wende.

BAKANDELA mu dia 18 ngondo wa 9 mu 1937, mu musoko wa bena kalaba wa Oombulgurri pabuipi ne mpata wa Kimberley, ku Ouest kua ditunga dia Australie ne bakanginyika ne: Florence Chulung.

Tshiena mua kupua muoyo malu mimpe a ku buana buanyi to. Ngakalonga malu makese a nshindamenu pa bidi bitangila Nzambi ne Bible mu tshitendelelu tshia muaba utuvua, kadi mamu ke wakandongesha mikenji ya bena Kristo. Uvua umbadila Bible pa tshibidilu ne kutuadijila anu ku buana buanyi ngakananga malu a mu nyuma bikole. Mvua kabidi munange mamu muakunyi uvua misionere mu tshitendelelu tshiabu. Mvua mumanye mu muoyo wanyi ne: ndi ne bua kulonda mu makasa ende.

Mu musoko wetu uvuabu babikila ku kale ne: Forrest River Mission, muvua tshilongelu tshivua anu ne kalasa ka kumpala too ne ku kitanu. Tuvua tulonga anu mêba abidi mu dinda dionso. Ebi bivua biumvuija ne: tshivua ne mushindu wa kulonga bikole to, pabi tatu kavua musue nanku to. Tatu uvua musue bua bana bende bonso balonge bimpe, ke bualu kayi tuakumuka mu Oombulgurri ne kuya mu tshimenga tshia Wyndham. Dituku dituakamuangala adi divua dibi buanyi meme, kadi mu Wyndham ngakapeta mushindu wa kulonga bimpe bua bidimu binayi bivua bishale  kutuadijila mu 1949 too ne mu 1952. Ndi ne dianyisha dia bungi bua muvua tatu mungambuluishe bua kulonga.

Mamu uvua wenza mudimu kua doktere kampanda, ne pangakajikija kalasa ne bidimu 15, anu yeye doktere au kundomba bua kuenza mudimu mu lupitadi lua mu Wyndham. Meme kuitaba ne disanka dionso, bualu tshikondo atshi bivua bikole bua kupeta mudimu.

Bidimu bikese pashishe, meme kupetangana ne Alec, mutoke mukuabu uvua mulami wa bimuna. Tuakaselangana mu 1964, mu tshimenga tshia Derby mumvua mbuela pa tshibidilu mu Ekeleziya wa Anglikane. Dituku dikuabu Bantemu ba Yehowa kuluabu kumbelu kuanyi. Meme kubambila ne: tshitu musue kubateleja nansha kakese ne kabadiatshi kabidi makasa abu kuanyi to. Nansha nanku, bakamba bualu bukuabu buakandenga bikole ku muoyo bua ne: dîna dia Nzambi n’Yehowa.

“Kuena mua kudienzela disambila anyi?”

Mu 1965 nsombelu wakatuadija kukola. Bayanyi wakapetangana ne njiwu minene misangu isatu: ibidi ne kabalu kende, umue ne mashinyi ende. Diakalenga, mputa yende yonso yakuma ne kutuadijilulaye midimu yende. Kadi panyima pa matuku makese, wakadishinda kabidi ne kabalu. Bua musangu eu, uvua mutapike mputa mibi ku mutu. Pangakafika mu lupitadi, doktere wakangambila ne: bayanyi neafue. Tshinyingunyingu tshiakankuata. Munganga kulombaye nsaserdose bua kulua kuntangilaye, kadi kumuandamunaye ne: “Mpindieu to. Nindua malaba!”

Meme kuambila mansere ne: mvua nkeba bua nsaserdose ikale ku luseke luanyi bua kusambilaye nanyi. Yeye kungambila ne: “Ntshilumbu kayi etshi? Kuena mua kudienzela disambila anyi?” Ke meme kuya kusambila kumpala kua mpingu ivua mu nzubu wa Mvidi Mukulu; kadi kakuvua bua nsongo to. Bayanyi uvua umueneka lufu apa muoyo apa. Mvua ndikonka ne: ‘Ntshinyi tshingenza bu bayanyi eu mua kufua?’ Mvua kabidi nditatshisha bikole bua bana banyi basatu: Christine, Nanette ne Geoffrey. Nnsombelu kayi wikalabu nende bikala tatuabu katshiyipu? Diakalenga, matuku asatu pashishe, bayanyi kusangulukaye ne kupatuka mu lupitadi mu dia 6 ngondo wa 12 mu 1966.

Nansha muvuaye umueneka bu mumvue bimpe, wakashala ne kalema mu buongo buende. Uvua ujimija lungenyi ne wakalua muena binsununsunu. Ukavua mushadile anu bilumbu ne bana ne ubatuta bikole pavuabu kabayi benza malu bu bantu bakulumpe. Bivua bualu bukole bua kumubeja. Mvua ne bua kumuenzela kalu ne kalu konso. Meme kutuadija kumulongesha tshiakabidi bua kubala ne kufunda. Bu mumvua eku mmulama, eku midimu ya nzubu mingindile anu meme, biakantshiokesha bikole. Bidimu muanda mutekete panyima pa njiwu ya bayanyi eyi, tuakalekelangana bua meme kumona mua kupetululaku mubidi.

Ngakangata bana, meme kuya ku Sud mu tshimenga tshia Perth. Kumpala kua meme kuenza luendu elu, muakunyanyi wa bakaji ukavua mutuadije kulonga Bible ne Bantemu ba Yehowa mu tshimenga tshikese tshia Kununurra tshia ku Ouest kua Australie. Wakandeja tshimfuanyi tshidi mu mukanda wa Bulelela budi bufikisha ku muoyo wa kashidi * tshidi tshileja muikala mparadizu udi Bible mulaye. Anu mu wowu mukanda eu, wakandeja kabidi ne: Nzambi udi ne dîna, diende n’Yehowa ne bualu ebu kundengabu ku muoyo bikole. Bu mumvua tshiyi muanji kumvua malu aa mu tshitendelelu tshietu, ngakangata dipangadika dia kuela Bantemu ba Yehowa nshinga pantshivua mfikilaku mu tshimenga tshia Perth.

Kadi mvua ne dielakana dikese bua kubakeba. Pashishe dilolo dikuabu, ngonga wa ku tshiibi kudilaye. Muananyi wa balume wakaya ku tshiibi ne kualukila lubilu wamba ne: “Mamu, bantu bauvua ukeba kubikila ku nshinga abu nya balu.” Ngakapapuka bibi ne kumuambila ne: “Bambila ne: tshienaku to!” Ke yeye ne: “Mamu, si udi mumanye ne: tshitu ndinga to.” Pangakumvua nanku, meme kuya kunzulula tshiibi. Pangakabela muoyo,  bakapapuka. Bavua balue kukeba muntu mukuabu ukavua mupatuke muaba au. Meme kubabueja mu nzubu ne kubafuimisha ne nkonko, kadi kungandamunabu bimpe ne Bible.

Lumingu luakalonda, ngakatuadija kulonga Bible ne Bantemu mu mukanda wa Bulelela budi bufikisha ku muoyo wa kashidi. Dilonga edi kukanjuladi kabidi dinanga dianyi dia malu a Nzambi. Mbingu ibidi pashishe, meme kubuela mu Tshivulukilu tshia lufu lua Yezu Kristo. Meme kutuadija kubuela mu bisangilu bia mu Dia lumingu dionso ne katupa kakese, kubuela bisangilu bia munkatshi mua lumingu. Meme kutuadija kabidi kuyisha bakuabu bimvua ndonga. Meme kumona ne: kuambuluisha bakuabu bua kulonga bulelela bua mu Bible, kuvua kumpetesha bukole. Ngondo isambombo pashishe, meme kutambula mu mpungilu wa distrike uvua muenzekele mu Perth.

Pakavula dimanya dianyi dia Bible, ngakamona ne: Yehowa udi wangata dibaka bu tshintu tshia tshijila pamue ne mukenji udi mu 1 Kolinto 7:13 udi wamba ne: ‘Mukaji udi ne mulume udi kayi muena kuitabuja, ne mulume eu udi usanka bua kuikala nende, mukaji kalekedi mulume wende nansha.’ Mvese eu wakansaka bua kupingana kudi bayanyi Alec.

Ndi mpingana ku Derby

Ngakafika ku Derby mu dia 21 ngondo 6 mu 1979, panyima pa meme mumane kushiyangana ne bayanyi bidimu bitanu bijima. Bushuwa, mvua ne dielakana ne ndiebeja muikalaye ne bua kumona dialukila dianyi edi. Kadi bualu bua dikema, wakasanka bua mumvua mupingane nansha muvuaye kayi mutambe kusanka bua munkavua mulue Ntemu wa Yehowa. Wakandomba diakamue bua meme kuya mu tshitendelelu tshiende mumvua kumpala kua meme kuya ku Perth. Meme kumumvuija ne: tshivua kabidi mua kuenza nanku to. Ngakadienzeja bua kunemeka bumfumu buende ne kuditeka pa muaba wanyi wa mukaji muena Kristo. Ngakateta bua kuyukila nende malu a Yehowa ne bidiye mulaye bua matuku atshilualua, kadi kakitaba to.

Kadi pashishe, Alec wakalua kuitaba bua meme kuikala anu Ntemu ne kubanga kungambuluisha ne mfranga bua meme kubuela mu mpungilu, mu mpuilu ne bisangilu bia lumingu luonso. Ngakasanka bikole pakansumbilaye mashinyi (avua tshintu tshia mushinga mu tshitupa etshi tshia kule tshia mu Australie) a meme kuikala nya nawu mu buambi. Bana betu ba balume ne ba bakaji too ne mutangidi wa tshijengu, bavua balala matuku a bungi kumbelu kuetu. Ebi biakambuluisha Alec bua kumanyangana ne Bantemu ba bungi ne kumuenekabi ne: uvua munange kusomba nabu.

Ndi ndiumvua bu Yehezekele

Mvua nsanka bikole pavua bana betu balua kuntangila, kadi mvua ne lutatu lunene. Anu meme nkayanyi ke uvua Ntemu mu tshimenga tshia Derby tshijima. Tshisumbu tshivua pabuipi apu tshivua mu tshimenga tshia Broome, mutantshi wa kilometre 220. Ke meme kudisuika bua kumanyisha lumu luimpe ne bukole buanyi buonso. Yehowa kungambuluisha bua meme kudilongolola bua kuyisha ku nzubu ne ku nzubu. Ngakamona mudimu eu mukole, kadi tshiakapua muoyo mêyi a mupostolo Paulo aa: ‘Ndi mumanye mua kuenza malu onso mu Mukalenge udi unkolesha.’​—Filipoi 4:13.

Bamfumu ba bitendelelu kabavua basue kummona nyisha to, nangananga pamvua nyisha bena kalaba nanyi. Bakateta bua kuntshingisha ne kundekesha mudimu wa kuyisha. Kadi buluishi buabu buakansaka bua kudisuika bikole bua kutungunuka ne kuyisha ne mvua ndomba Yehowa misangu yonso bua angambuluishe. Mvua misangu yonso mvuluka dikankamija divuaye mupeshe Yehezekele  edi: ‘Kadi mona, nenkoleshe mutu webe kupite yabu bukole, ne tshitshu tshiebe netshipite tshiabu. Nemvuije mutu webe mukole bu dibue dia mbongo mene, mupite dibue dia mutemu bukole. Kubatshinyi nansha, kukuatshiki buôwa ku mêsu kuabu.’​—Yehezekele 3:8, 9.

Misangu ya bungi, bantu bakuabu babidi ba mu tshitendelelu kampanda bavua bandondakaja pamvua nya mu tshisalu. Bavua bampenda bibi ne dîyi ditekela anu papa bua bantu bavua mu tshisalu bumvue. Mvua ngenza anu bu tshiena mubamone. Dikuabu, pamvua muye kutangila mamu kampanda utukavua bayukila nende, mpasata wa mu tshitendelelu tshia muaba au kulua umbanda mundi tshiyi ngitabuja Yezu. Wakandiapula Bible mu bianza, kumunyukula muîsu muanyi ne kumumpingajila. Meme kumutangila buludi mu mpala ne dikima dionso, kumutelela mêyi a mu Yone 3:16 ne kumujadikila ne: ndi ngitabuja Yezu. Diandamuna dianyi edi kumufikadi bikole, kushalaye anu vii, kukuataye njila e kuya.

Mvua musue kuyisha ba-Aborigène ba mu Derby. Nsaserdose mukuabu wakateta bua kumpangisha bua kuyukila ne bantu ba mu musoko kampanda, kadi bakamutuma muaba mukuabu. Nunku, meme kumona mua kubayisha. Mvua njinga bua kuenza mudimu wa bumisionere bu muvua mamu muakunyi, ne mpindieu, ndi nguenza pa kuambuluisha bakuabu bua kulonga Dîyi dia Nzambi. Ba-Aborigène ba bungi bavua bangakidila bimpe, ne ngakatuadija kulonga Bible ne bantu ba bungi.

Ndi mumanye majinga anyi a mu nyuma

Munkatshi mua bidimu bitanu bijima anu meme nkayanyi ke uvua Ntemu wa Yehowa mu Derby. Ngakamona ne: bivua bikole bua meme kushala mukole mu nyuma pamvua tshiyi mpeta dikankamija dia bena kuitabuja nanyi mu bisangilu pa tshibidilu.  Dituku dikuabu, ngakadiumvua mutekete ku muoyo bikole, ke meme kuya kuendakana mu mashinyi. Pangakapingana kumbelu dilolo menemene, ngakasangana muanetu wa bakaji mukuabu ne bana bende muanda mutekete bangindile. Bavua bantumine mikanda ivua yumbukila mu tshisumbu tshia Broome. Kutuadijila anu dituku adi, muanetu wa bakaji au Betty Butterfield, wakalongolola bua kuikala ulua ku Derby musangu umue ku ngondo ne usomba nanyi lumingu lujima. Tuvua tuyisha nende ne tuenza dilonga dia Tshibumba tshia Nsentedi ku mbelu kuanyi. Meme panyi, mvua nya ku Broome musangu umue ku ngondo.

Bana betu ba mu Broome bavua bangambuluisha bikole, ne bavua imue misangu benza luendu lule bua kulua ku Derby bua kulua kuyisha nanyi. Bakalomba bana betu ba mu bimenga bikuabu bavua bapitshila mu Derby bua kuikalabu balua kuntangila ne kuyisha nanyi. Bena ngendu aba bavua bantuadila miyuki ya patoke mikuata mu bande. Bamue bavua balua kuenza nanyi dilonga dia Tshibumba tshia Nsentedi. Bavua bankolesha bikole pavuabu balua kuntangila.

Diambuluisha ditambe bunene

Munkatshi mua ndambu wa bidimu, muanetu Willis Arthur ne mukajende Mary, ba ku Ouest kua Australie bavua balua kungambuluisha bua ngondo isatu mu tshikondo tshia mashika. Muanetu Willis uvua ulombola bisangilu bietu ne mudimu wa buambi. Tuvua tuya miaba ya kule ya mu mpata wa Kimberley, tuenda tukumbula bantu miaba ivuabu bamunyina nyama. Misangu yonso ivua muanetu Willis ne mukajende bapingana kuabu, mvua ndiumvua anu bu muana wa nshiya.

Ndekelu wa bionso patukavua batangile ku ndekelu kua 1983, ngakasanka pangakumvua ne: muanetu Sturgeon Danny ne mukajende Denise ne bana babu banayi bavua ne bua kulua kusombela mu Derby. Pakafikabu, tuvua ne mushindu wa kuenza bisangilu bia ku lumingu luonso ne kuyisha pamue. Mu 2001 tuakenza tshisumbu. Lelu’eu, Derby udi ne tshisumbu tshikole tshidi ne bamanyishi ba Bukalenge 24 ne bakulu babidi ne musadidi wa mudimu umue badi batutabalela mu nyuma. Imue misangu, tutu tubuela mu bisangilu bantu batue ku 30.

Pandi ntangila bidimu bionso bidi bishale ebi, bidi bingenza disanka bua mudi Yehowa mungambuluishe bua kumuenzela mudimu. Nansha mudi bayanyi kayi mulue muena Kristo bu meme, udi utungunuka ne kungambuluisha mu mishindu mikuabu. Bantu batanu ba mu dîku dietu mbalue Bantemu, ke bana banyi ba bakaji babidi, bikulu banyi ba bakaji babidi ne muana wa muakunyanyi wa bakaji. Kabidi balela banyi bavule badi balonga Bible ne Bantemu ba Yehowa.

Ndi ngela Yehowa tuasakidila wa bungi bua mudiye mungambuluishe bua meme kumupeta. Ndi mudisuike bua kumulamata kashidi ne tshiendelele.​—Musambu 65:2.

[Mêyi adi kuinshi]

[Karte/​Bimfuanyi mu dibeji 15]

(Bua kumona malu bimpe, tangila mu mukanda)

AUSTRALIE

Wyndham

Mpata wa Kimberley

Derby

Broome

Perth

[Mêyi a dianyisha]

Nyama wa kangourou ne nyunyi: Lydekker; koala: Meyers

[Tshimfuanyi mu dibeji 14]

Pamvua ngenza mudimu wa bumunganga mu lupitadi lua Wyndham mu 1953

[Tshimfuanyi mu dibeji 15]

Tshisumbu tshia mu Derby mu 2005