Nkonko ya babadi

Mmalu kayi mabi asatu avua Yezu muleje mu Matayo 5:22?

Yezu Kristo wakadimuija bayidi bende mu muyuki wende wa pa mukuna wamba ne: ‘Kadi meme ndi nnuambila ne: Muntu yonso udi ne muanabu tshiji nebamubande ku tshilumbuluidi; muntu yonso wambila muanabu ne: Laka, nebamubande kudi balumbuludi banene; muntu yonso wambila munga muntu ne: Wewe udi mupote, udi mua kukengeshibua mu Ngena wa kapia.’​—Matayo 5:22.

Yezu uvua mutele bintu bivua bena Yuda bamanye bimpe (bu mudi: tshilumbuluidi [anyi kabadi kakese], balumbuludi banene [anyi Kabadi kanene] ne Ngena wa kapia) bua kubumvuija bukole bua manyoka adibu bafila bilondeshile malu mabi adi muntu wenza.

Bualu bua kumpala, Yezu wakamba ne: muntu yonso udi utungunuka ne kufikila muanabu munda nebamufikishe ku “tshilumbuluidi” anyi ku kabadi kakese. Bilondeshile tshilele tshivuaku, tubadi tua mushindu eu tuvua mu bimenga bivua ne bantu balume 120 anyi bapite apu. (Matayo 10:17; Mâko 13:9) Balumbuluishi ba ku tubadi etu bavua ne bukenji bua kukosa bilumbu nansha bia dishipangana. (Dutelonome 16:18; 19:12; 21:1, 2) Nunku Yezu wakaleja ne: muntu udi mukine muanabu udi wenza bualu bubi menemene.

Bualu buibidi, Yezu wakamba ne: muntu udi ‘wambila muanabu ne: Laka, nebamubande kudi balumbuludi banene’ anyi ku Kabadi kanene. Muaku wa mu tshiena-Greke rha·kaʹ udibu bakudimune ne: ‘Laka’ udi umvuija “tshiluwa” anyi “tshidingidingi.” Bilondeshile mukanda kampanda, dîyi edi ke “divua bena Yuda bambangana mu tshikondo tshia Kristo.” (The New Thayer’s Greek-English Lexicon of the New Testament) Nunku Yezu wakabela bantu bikole bua kubenga kupendangana. Yezu wakamba ne: muntu uvua upendangana bavua ne bua kumulumbuluisha ku Kabadi kanene ka mu Yelushalema kavua kenza ne muakuidi munene ne bakulu ne bafundi 70 (kavuabu bakabikila ne: Sanhedrin), kadi ki nku kabadi kakese to.​—Mâko 15:1.

Bualu buisatu, Yezu wakamba ne: muntu yeye muambe mukuabu ne: “Wewe udi mupote,” nebamuele mu Ngena wa kapia. Muaku “Ngena” mmufume ku muaku wa mu tshiena-Ebelu geh hin·nomʹ, udi umvuija “tshibanda tshia Hinoma,” tshivua ku Ouest ne ku Sud kua Yelushalema wa kale. Mu matuku a Yezu, bavua buoshelamu bintu bia bukoya ne bitalu bia bantu babi menemene bavua kabayi bakumbana mua kujika mu nkita. Nanku muaku “Ngena” uvua tshimfuanyi tshimpe tshia dibutuka dia kashidi.

Kadi muaku “mupote” uvua umvuija tshinyi? Muaku udibu batele muaba eu uvua upetangana ne muaku wa mu tshiena-Ebelu udi umvuija “ntomboji,” anyi “nkoloto.” Mmuaku udi umvuija muntu wa bikadilu bibi, mutontolodi anyi muntu udi mutombokele Nzambi. Nanku muntu uvua wamba mukuende ne: “mmupote” uvua umuamba ne: mmutombokele Nzambi ne mmukumbanyine kufua bua kashidi. Bilondeshile Nzambi, muntu udi wamba mukuende nunku mmukumbanyine kufua bua kashidi.​—Dutelonome 19:17-19.

Nunku Yezu uvua mukoleshe dîyi dinene dia mu Mikenji ya Mose. Nansha muvua bantu bitaba ne: muntu uvua ushipangana bavua ne bua kumulumbuluisha anyi “kumubanda ku tshilumbuluidi” anyi ku kabadi kakese, Yezu wakaya yeye kule. Wakalongesha ne: bayidi bende badi ne bua kubenga kukuatshila bana babu tshiji.​—Matayo 5:21, 22.