Tudiku dijinga ne Masiya anyi?

MBIMPE udiele lukonko elu: “Tudi dijinga ne Masiya anyi?” Mbimpe kudiebeja bua kumanya mudi bualu bua Masiya bukutangila.

Bamue bantu bautu unemeka badi mua kukuambila diakamue ne: Udi dijinga bushuwa ne Masiya amu bu mudi muntu yonso muikale nende dijinga. Mumanyi wa mikenji ya bena Yuda wa mu bidimu lukama bia kumpala wakafunda bua Masiya ne: ‘Kudi Kristo ke kudi Nzambi wamba “eyowa” ku bionso bivuaye mulaye.’ Ke bualu kayi wakakula bua mudimu munene udi nawu Masiya mu masanka adi Mufuki wa bintu bionso mulongolole bua bisamba bionso bia pa buloba. (2 Kolinto 1:20, MMV) Bu mudi mudimu wa Masiya ne mushinga wa bungi, Bible udi wakula bikole bua dilua diende ne bua muoyo wende pa buloba. Mumanyi wa malu a kale Henry Halley wakaleja mu mukanda kampanda udibu benze nawu mudimu bikole munkatshi mua bidimu 70 bishale ebi ne: “Bakafunda Dipungila Dikulukulu bua kulongolola njila bua Dilua dia [Masiya].” Kadi dilua diende didi ne mushinga anyi? Bua tshinyi bualu ebu budi bukutangila?

Muaku “Masiya” udi umvuija ne: “Muela manyi,” ne udi mumue ne muaku “Kristo” udi bantu batambe kumanya. Mu mukanda kampanda wa mu 1970, badi bakula bua “mupikudi munene” uvua ne bua kulua bua malu mabi a Adama ne Eva. (Encyclopædia Britannica) Bavua babafuke kabayi kalema ne bavua mua kuikala ne muoyo kashidi mu mparadizu. Kadi bakajimija diakalenga edi. Muanjelu kampanda mutomboke udibu babikila ne: Satana Diabolo wakajinga kubaleja ne: Mufuki wabu uvua mubelele mukenji mukole ne bivua bimpe bu bobu mua kuangata dipangadika dia kudisunguila tshivua tshimpe ne tshibi.​—Genese 3:1-5.

Eva wakitaba dishima edi. Adama wakalonda mukajende mu ditombokela Nzambi ne kulua ku luseke lua Satana. (Genese 3:6; 1 Timote 2:14) Bua malu aa, bakajimija diakalenga dia kuikala ne muoyo mu mparadizu pa buloba. Bakashila bana babu bubi ne lufu.​—Lomo 5:12.

Diakamue, Yehowa Nzambi wakakeba mushindu wa kumbusha ntatu idi bubi bukebeshe. Dîyi dinene edi dia mu Mikenji ya Mose: muoyo ku muoyo ke diakalondaye. (Dutelonome 19:21; 1 Yone 3:8) Dîyi edi divua mua kukumbana bu umue wa mu ndelanganyi ya Adama ne Eva mua kupeta muoyo wa tshiendelele mu mparadizu pa buloba anu bu mukavua Mufuki mulongolole  bua bantu. Bualu ebu budi butufikisha kudi Masiya.

Pavua Yehowa Nzambi ulumbuluisha Diabolo, wakamba mu mulayi wa kumpala wa mu Bible ne: ‘Nenteke lukuna pankatshi pebe ne mukaji ne pankatshi pa bana bebe ne bana bende. Muana wa mukaji neakukume ku mutu webe ne wewe neumusume ku tshikankanyi tshiende.’ (Genese 3:15) Mumanyi umue wa malu a mu Bible wakamba ne: “Milayi ya malu a Masiya anu bu mudi Bible uleja, mmituadije ne tshiambilu [etshi].” Mukuabu wakamba ne: Nzambi neatume Masiya “bua kumbusha ntatu yonso idi bubi bukebeshe” ne kutuadila bantu masanka.​—Ebelu 2:14, 15.

Kadi udi umona ne: bantu badi batata bikole; mbashikile kabayi ne bua nsongo. Mukanda kampanda udi wamba ne: “Bena Yuda ba bungi batshidi anu bindile Masiya” bua “umbushe malu mabi ne atshimune baluishi babu.” (The World Book Encyclopedia) Kadi Bible pende udi wamba ne: Masiya ukavua mulue. Tuitaba tshidi Bible wamba anyi? Tshiena-bualu tshidi tshilonda netshituandamune.