Mbanganyi badi batumikila malongesha a Yezu lelu?

BANTU ba bungi batu bangata Yezu Kristo bu umue wa ku bantu batambe bunene ba katshia ne katshia. Bantu bavule batu bamuangata bu muntu mutambe bunene. Mufundi wa bena Anglais Melvyn Bragg udi wamba ne: munkatshi mua bidimu bitue ku binunu bibidi, malongesha a Yezu mmashintulule bikole nsombelu wa bantu “banene ne bakese.”

Mmunyi mudi bantu bamona Buena-Kristo?

Bantu badi bamona Buena-Kristo mushindu kayi? Batu bamba ne: Buena-Kristo “mbumue bua ku malu a bitendelelu adi maye kumpala bikole.” David Kelso wa mu Glasgow Caledonian University (mu ditunga dia Écosse) wakaleja umue mushindu udi bantu bangata Buena-Kristo. Wakafunda ne: “Bidimu binunu bibidi bikadibu buenze mbiule tente ne malu kaayi kuelekeja mu mianda ya disonga dia bintu, dibaka dia nzubu, nkindi, mijiki ne diambuluishangana.”

Kadi bakuabu ba bungi badi bamona malu munga mushindu. Kabena babenga ne: Buena-Kristo ntshitendelelu tshidi tshishindamene pa malongesha a Yezu Kristo ne tshitabuja ne: uvua muana wa Nzambi. Kadi tshidibu babenga nngikadilu wa bantu ba mu bisumbu bia malu a Nzambi badi bamba mudibu baleji-mpala ba Buena-Kristo.

Tshilejilu, Friedrich Nietzsche, muena nkindi wa mu Allemagne wa mu bidimu bia 1800 wakabikila Buena-Kristo ne: “tshilema tshia kashidi tshia bantu.” Wakafunda ne: budi “tshiledi tshia makenga, dinyanguka dia malu dinene menemene, . . . bualu Buena-Kristo budi bukuata mudimu ne malu makonyangale, a muinshi muinshi ne manyanguke a mishindu yonso bua kumona mua kukumbaja tshipatshila tshiabu.” Bushuwa,  Nietzsche uvua utamba kubipisha malu, kadi bamue bantu badi bela meji bimpe mbafike pabu ku diamba malu a muomumue. Bua tshinyi? Bualu munkatshi mua bidimu nkama mivule bantu badi badiamba mudibu bena Kristo kabena ne ngikadilu ya Yezu Kristo to, kadi badi ne “bikadilu bibi, benza malu mabi menemene ne bapenda Nzambi ku bienzedi biabu.”

Kristo utshidi mu Buena-Kristo anyi?

Ki mbibi bua kukonka ne: “Kristo utshidi mu Buena-Kristo anyi” to. Bamue nebandamune diakamue ne: “Eyowa, utshidimu. Kavuaku mulaye bayidi bende ne: uvua ne bua kuikala nabu ‘too ne ku nshikidilu kua tshikondo etshi’ anyi?” (Matayo 28:20) Eyowa, ke tshiakambaye. Kadi uvuaku musue kuamba ne: neikale ne muntu yonso uvua mua kudiamba ne: mmuyidi wende nansha yeye wenza malu mabi anyi?

Vuluka ne: bamue balombodi ba bitendelelu ba mu tshikondo tshia Yezu bavua bela meji ne: Nzambi uvua anu nabu. Bamue bavua bela meji ne: bu muvua Nzambi musungule bena Isalele bua mudimu wa pa buawu, kavua mua kubalekela to nansha bobu benze malu kayi. (Mika 3:11) Kadi bakashipa mikenji ya Nzambi kunekesha. Ke bualu kayi Yezu Kristo wakabambila ne: ‘Nzubu wenu udi mushale patupu.’ (Matayo 23:38) Nzambi wakabenga ntendelelu wabu mujima. Ke bualu kayi wakalekela biluilu bia bena Lomo bibutula tshimenga tshia Yelushalema ne ntempelo uvuamu mu tshidimu tshia 70 kunyima kua Yezu.

Bualu bua muomumue budiku mua kuenzekela Buena-Kristo lelu anyi? Tumonayi malu akamba Yezu avua bayidi bende ne bua kuenza bua kushishaye kuikala nabu too ne ‘ku nshikidilu kua tshikondo etshi.’

 [Bimfuanyi mu mabeji 2, 3]

Malongesha a Yezu Kristo mmashintulule bikole nsombelu wa bantu miliyo mivule pa buloba