Nkonko ya babadi

Tshivua mupostolo Paulo usua kumvuija pakambaye ne: bakaji badi ne bua ‘kupuwa mu ekeleziya’ ntshinyi?

Paulo wakafundila tshisumbu tshia bena Kristo ba mu Kolinto ne: ‘Bu mudi bualu mu ekeleziya yonso ya bansantu, bakaji bapuwe mu ekeleziya; bualu bua kabena bitabuja bua bakaji bakulemu.’ (1 Kolinto 14:33, 34) Bua tuetu kumvua mêyi aa biakane, mbimpe tumanye tshivua Paulo wambidila dîyi edi.

Mu 1 Kolinto nshapita wa 14, Paulo uvua wakula bua bisangilu bia tshisumbu tshia bena Kristo. Uvua uleja malu avuabu ne bua kuakula mu bisangilu ebi ne mushindu uvuabu ne bua kubienza. (1 Kolinto 14:1-6, 26-34) Wakaleja kabidi ne: bavua benza bisangilu bia bena Kristo ‘bua ekeleziya adiundishibue.’​—1 Kolinto 14:4, 5, 12, 26.

Dîyi didi Paulo wamba bua ‘kupuwa’ didi misangu isatu mu 1 Kolinto nshapita wa 14. Musangu wonso, udi udiambila bantu bashilangane ba mu tshisumbu, kadi misangu yonso isatu eyi udi udiamba bua tshipatshila tshia muomumue: bua “malu onso enjibue bilengele, ne alondangane biakane.”​—1 Kolinto 14:40.

Musangu wa kumpala, Paulo wakamba ne: ‘Biakula muntu muaku unudi kanuyi bamanye, bakule nunku kudi babidi, kabapitshi pa basatu, balondangane muntu ne muntu, ne umue wenu abajinguluile muaku; kadi bikalaku kakuyi mubajinguluidi, muena muaku apuwe biende mu ekeleziya, adiakuile munda munda, akule kudi Nzambi kabidi.’ (1 Kolinto 14:27, 28) Mupostolo Paulo kavua usua kuamba ne: muntu eu kavua ne bua kuakula kabidi mu bisangilu to, tshidibi kuvua bikondo bivuaye ne bua kupuwa. Tuvuluke ne: bisangilu kabivua mua kukoleshangana pavua muntu au wakula mu muakulu uvua muntu nansha umue kayi umvua to.

Musangu muibidi, Paulo wakamba ne: ‘Baprofete babidi anyi basatu bakule, ne bakuabu bajingulule mêyi abu. Kadi bikala bualu bubuluibua kudi mukuabu udi ushikamamu, muntu wa kumudilu apuwe biende.’ Ki mbuena kuamba ne: muprofete wa kumpala uvua ne bua kulekela kuakula mu bisangilu to, kadi uvua ne bua kupuwa imue misangu. Nunku eu uvua nyuma  mubuluile bualu uvua mua kubumanyisha tshisumbu, apu tshipatshila tshia tshisangilu tshia ne: ‘buonso basambibue’ tshivua tshikumbana.​—1 Kolinto 14:26, 29-31.

Musangu muisatu, Paulo wakambila anu bakaji bena Kristo nkayabu ne: ‘Bakaji bapuwe mu ekeleziya; bualu bua kabena bitabuja bua bakaji bakulemu, kadi bikale kunyima kua balume.’ (1 Kolinto 14:34) Bua tshinyi Paulo wakelela bana betu ba bakaji mukenji eu? Bivua bua kulama bulongame mu tshisumbu. Udi wamba ne: ‘Biasuabu kuyila bualu, bakonke balume babu ku nzubu yabu; bua budi bualu bua bundu bua mukaji kuakula mu ekeleziya.’​—1 Kolinto 14:35.

Pamuapa bamue bana betu ba bakaji bavua bela malu avuabu bamba mu tshisumbu mpata. Mubelu wa Paulo wakambuluisha bana betu ba bakaji bua kabikadi babuejakaja malu mushindu eu ne bua kuitaba ne didipuekesha muaba udi Yehowa mubateke, mmumue ne: kunyima kua babayabu. (1 Kolinto 11:3) Kabidi, pavuabu bashala bapuwe nunku, bavua baleja ne: kabavua bakeba kulua balongeshi ba Dîyi dia Nzambi mu tshisumbu to. Paulo wakaleja mu mukanda wakafundilaye Timote ne: kabivua bimpe bua mukaji kuikalaye ulongesha mu tshisumbu. Wakamba ne: ‘Tshiena ngitabuja mukaji ayishe, anyi ikale ne bukokeshi ku mutu kua mulume, kadi ikale biende talalaa.’​—1 Timote 2:12.

Abi bidiku biumvuija ne: mukaji muena Kristo kênaku ne bua kuakula mu bisangilu bia tshisumbu anyi? Tòo. Mu matuku a Paulo, kuvua bikondo bivua bakaji bena Kristo, pamuapa basaka kudi nyuma muimpe, basambila peshi bamba malu a buprofete mu tshisumbu. Mu bikondo bivuabu benza malu a nunku, bavua bavuala tshintu ku mutu bua kuleja muvuabu banyisha muaba uvua Nzambi mubateke mu tshisumbu. * (1 Kolinto 11:5) Kabidi, mu matuku a Paulo nansha etu aa, badi balomba bana betu ba bakaji ne bana betu ba balume bua kuyisha. (Ebelu 10:23-25) Pa kumbusha mudimu eu wa diyisha udibu benza, bana betu ba bakaji badi bamanyisha ditekemena diabu ne bakankamija bakuabu mu bisangilu bia tshisumbu ne mandamuna malenga adibu bafilamu padibu babasungula bua kuafila, ne padibu bitaba bua kuenza manaya a bilejilu peshi miyuki ya balongi mu Kalasa ka Mudimu wa Nzambi.

Nunku, bakaji bena Kristo badi bashala ‘bapuwe’ padibu kabayi bakeba bua kuenza mudimu udibu bapeshe muntu mulume wa kulongesha tshisumbu. Kabena bela nkonko ya mpata idi ipepejija bukokeshi bua bana betu ba balume badi balongesha mu tshisumbu. Padi bana betu ba bakaji bitaba muaba udibu nawu mu tshisumbu, badi bambuluisha bikole bua ditalala kuikaladi mu tshisumbu bua ‘malu onso [mu bisangilu bia tshisumbu] enjibue bua kudiundishibua.’​—1 Kolinto 14:26, 33.

[Mêyi adi kuinshi]