“Tuambilaku kabidi malu makuabu!”

MU TSHIMENGA tshia Nezlobnaya (mu ditunga dia Russie) balongi kampanda ba mu tulasa tua bikadilu bavua balonga mikanda ya muena Russie mukuabu, diende Mikhail Bulgakov. Mu umue wa ku mikanda yende uvua uleja Yezu bu muntu wa musempasempa, kadi uleja Satana bu tshilobo. Bobu bamane kujikija kulonga mukanda au, mulongeshi kubelaye diteta. Kadi mu kalasa amu muvua mulongi mukuabu wa bidimu 16 uvua Ntemu wa Yehowa, diende Andrey. Wakalomba mulongeshi ne kanemu konso bua kenji diteta adi to, bualu kondo kende ka muoyo kavua kabenga bua kulonga mukanda wa mushindu’eu. Wakalomba bua kumvuija mushindu uvuaye yeye wangata Yezu Kristo. Mulongeshi kuitabaye.

Mu biakafundaye wakumvuija ne: nansha mundi nnemeka mushindu udi bakuabu bamona pabu malu, kadi meme ndi ngela meji ne: bua kumanya malu a Yezu mbimpe kubala umue wa ku miyuki idi mu mukanda wa Matayo, wa Mâko, wa Luka anyi wa Yone. Nuenu bayibale, “nenumanye nsombelu wa Yezu ne malongesha ende adibu balonde kudi bantu bavuaye mudia nabu ne munua nabu.” Andrey wakamba kabidi ne: “Bualu bukuabu budi butangila mushindu utu Satana. Nansha mudi bamue mua kumvua disanka bua kubala mukanda udi uleja Satana bu tshilobo, meme tshiena nadi to.” Wakumvuija ne: Satana mmuanjelu mubi udi ne bukole bua bungi, kadi wakatombokela Nzambi ne kukebela bantu ntatu ne makenga. Wakajikija muyuki wende wamba ne: “Tshiena ngitaba ne: kubala mukanda wa Mikhail Bulgakov eu kudi mua kungambuluisha to. Tshidibi, tshiena ne tshindi mfuila nende to. Kadi buanyi meme, mbimpe kubala Bible bua kulonga malu malelela adi atangila Yezu Kristo.”

Mulongeshi wabu wakasanka bikole, kumulombaye bua kuenzela balongi nende muyuki pa tshilumbu tshia Yezu Kristo. Andrey wakitaba. Mu dilonga diabu diakalonda, wakapita kumpala ne kulondela balongi nende malu avuaye mulongolole. Wakumvuija balongi nende bua tshinyi buende yeye Yezu mmuntu mutambe bunene wa katshia ne katshia. Pashishe kubalaye nshapita wa mu mukanda wa Matayo udi wakula bua lufu lua Yezu. Bu mukavua dîba divuabu bamupeshe dienda dijika, Andrey ukavua usua kujikija muyuki wende, kadi balongi babu e kuela mbila bamba ne: “Tuambilaku kabidi malu makuabu! Tshiakenzeka panyima ntshinyi?” Andrey wakatungunuka ne kubala mukanda wa Matayo pa mushindu wakabika Yezu ku lufu.

Pakajikijaye muyuki wende eu, balongi nende kumuela nkonko mipite bungi pa malu a Yezu ne a Yehowa. Andrey udi wamba ne: “Ngakalomba Yehowa bua ampeshe meji, ne wakaampesha. Meme kuandamuna nkonko yabu yonso nkong!” Andrey wakapesha mulongeshi wabu mukanda wa Muntu mutambe bunene wa katshia ne katshia. * Mulongeshi kuwangata ne disanka dionso. Andrey udi wamba ne: “Mulongeshi wetu wakangela mpue ya bungi ne kuntumbishaye kumpala kua balongi nanyi bualu tshivua mumvue bundu bua kuakula bua malu amvua ngitabuja to. Wakamba kabidi ne: uvua witaba amue a ku malu amvua muambe.”

Andrey wakasanka bua muvuaye mulonde kondo kende ka muoyo kalongesha kudi Bible, kubengaye kubala mukanda uvua upepeja Yehowa ne Muanende Yezu Kristo. Bualu ebu buakamuambuluisha bua kubenga kunyanguka ne malongesha a dishima ne kumupetesha mushindu muimpe wa kuyisha bakuabu malu adi mu Bible.

[Mêyi adi kuinshi]