Bantu bapiabapia badi babuele mu Kasumbu Kaludiki

MU Disatu mu dinda dia 24 a ngondo wa muanda mukulu 2005, bakamanyisha bualu bua disanka ku Betele wa ku Brooklyn pavuabu babala mvese wa ku dituku, uvua bena ku Betele mikuabu ya mu États-Unis ne wa mu Canada balondela ku televizion. Bakabamanyisha ne: kubangila mu dia 1 dia ngondo wa tshitema 2005, bana betu babidi aba Geoffrey Jackson ne Anthony Morris nebabuele mu Kasumbu Kaludiki ka Bantemu ba Yehowa.

Muanetu Jackson wakatuadija bumpanda-njila mu ngondo muibidi 1971 mu tshidiila tshia Tasmanie mu ditunga dia Australie. Mu ngondo muisambombo 1974, wakasela Jeanette (anyi Jenny). Matuku makese pashishe, bakalua bampanda-njila ba pa buabu. Kutuadijila mu 1979 too ne mu 2003, bavua bamisionere mu tshidiila tshia Tuvalu, tshia Samoa ne tshia Fidji bidi ku sud kua Mbuu wa Pasifike. Muanetu Jackson ne mukajende bakambuluisha kabidi bikole mu dikudimuna dia mikanda ya malu a mu Bible pavuabu mu bidiila ebi. Kutuadijila mu 1992, muanetu Jackson wakenza mudimu mu Komite wa filiale mu Samoa, ne kubangila mu 1996 wakenza mudimu mu Komite wa filiale wa mu Fidji. Mu ngondo muinayi 2003, bakababikila yeye ne mukajende ku Betele wa mu États-Unis ne bakatuadija kuenza mudimu mu tshibambalu tshia dikudimuna mikanda. Matuku makese pashishe, bakateka muanetu Jackson bua kuikala wambuluisha mu Komite wa Dilongesha wa Kasumbu Kaludiki.

Muanetu Morris wakalua pende mpanda-njila mu 1971 mu États-Unis. Mu ngondo wa 12 wa tshidimu atshi, wakasela Susan, bobu kutungunuka ne bumpanda-njila munkatshi mua bidimu binayi too ne pakalelabu muanabu wa kumpala Jesse. Pashishe bakalela muana muibidi diende Paul. Muanetu Morris wakalua tshiakabidi mpanda-njila wa pa tshibidilu mu 1979. Mukajende pende wakatuadija kabidi mudimu eu pakabangisha bana babu kuya mu kalasa. Bena mu dîku edi bakaya benda bambuluisha miaba ivuabu dijinga ne bamanyishi mu Rhode Island ne mu Caroline du Nord, mu États-Unis. Koku eku, muanetu Morris wakenza mudimu wa mutangidi wa tshijengu muambuluishi ne bana bende kuangatabu pabu mudimu wa bumpanda-njila bua pa tshibidilu. Jesse ne Paul bakaya ku Betele wa États-Unis pakavua yonso wa kudibu ne bidimu 19. Tshine tshikondo atshi, muanetu Morris wakalua mutangidi wa tshijengu. Pashishe, mu 2002 bakababikila yeye ne mukajende ku Betele ne kutuadijabu mudimu wabu mupiamupia eu mu dia 1 dia ngondo wa muanda mukulu. Muanetu Morris wakenza mudimu ku biro bidi bitangila malu onso a bisumbu ku Patterson ne pashishe kuambuluishaye mu Komite wa Mudimu wa Kasumbu Kaludiki.

Pa kumbusha bana betu babidi aba, Kasumbu Kaludiki nkenza ne bana betu aba: Carey Barber, John Barr, Samuel Herd, Stephen Lett, Gerrit Lösch, Theodore Jaracz, Guy Pierce, Albert Schroeder, David Splane ne Daniel Sydlik. Bena mu Kasumbu Kaludiki bonso mbena Kristo bela manyi.