‘Tudi ne bua kutumikila mêyi a Nzambi kumpala kua mêyi a bantu’

Mbatupikule ne “mashi a mushinga mukole

YEHOWA wakaleja mudiye mutunange bikole pakatumaye Muanende mulela umue bua kulambula muoyo wende wa muntu mupuangane bua kutupikula. Bu mutudi bantu babi, tudi ne dijinga dikole bua batupikule, bualu kakuena muntu muena mapanga ‘udi mua kupikula muanabu ku tshintu tshiende tshimue, anyi kufila mushinga wa kumupikula nau kudi Nzambi bua yeye ashale ne muoyo tshiendelele.’ (Musambu 49:6-9) Tudi ne bua kusakidila Nzambi bikole bua mudiye ‘mutupe Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’​—Yone 3:16.

Mmunyi mudi mulambu wa Yezu utupikula? Tumonayi mishindu inayi idi mulambu eu udi uleja dinanga dinene dia Yehowa Nzambi utupikula.

Mulambu udi utupikula

Mushindu wa kumpala, mulambu wa Yezu udi utupikula ku bubi butudi bapiane kudi Adama. Tuetu bonso tudi baledibue mu bubi. Bushuwa, nansha kumpala kua tuetu katuyi banji kufika tshikondo tshia kushipa mikenji ya Yehowa, tukavua anu bantu babi. Mushindu kayi? Lomo 5:12 udi wamba ne: ‘Bubi buakalua pa buloba bualu bua muntu umue’ Adama. Bu mutudi bana ba muntu mubi Adama, tudi bapiane bubi buende. Kadi mulambu wa Yezu udi utupikula ku bubi ebu. (Lomo 5:16) Yezu mmuambuile bana ba Adama ntatu idi lufu lukebeshe bualu ‘wakalabuila muntu yonso lufu.’​—Ebelu 2:9; 2 Kolinto 5:21; 1 Petelo 2:24.

Mushindu muibidi, mulambu wa Yezu udi utupikula ku lufu ludi bubi bukebeshe. “Difutu dia bubi ndufu.” (Lomo 6:23) Mulambu wa Muana wa Nzambi mmupeteshe bantu badi batumikila Nzambi mushindu wa kupeta muoyo wa tshiendelele. Bulelela, muntu yonso ‘udi witabuja Muana udi ne muoyo wa tshiendelele; kadi udi upidia Muana kêna umona muoyo.’​—Yone 3:36.

Tumanye ne: bua Nzambi kutupikula ku lufu ludi lufumine ku bubi, tudi ne bua kuitabuja Muanende. Mbuena kuamba ne: tudi ne bua kushintulula nsombelu wetu bua umvuangane ne disua dia Nzambi. Tudi ne bua kulekela malu mabi onso atuvua tuenza ne kuenza malu adi asankisha Nzambi. Mupostolo Petelo wakamba ne: tudi ne bua ‘kukudimuna mitshima yetu, kuandamuka kabidi bua mibi yetu ijimijibue.’​—Bienzedi 3:19.

Mushindu muisatu, mulambu wa Yezu udi utuambuluisha bua kubenga kuikala ne kondo ka muoyo kadi katulumbuluisha. Bantu bonso badi badilambule kudi Yehowa ne batambule bua kulua bayidi ba Muanende badi ne ditalala mu mitshima yabu. (Matayo 11:28-30) Nansha mutudi bena mapanga, tudi tupeta disanka divule patudi tuenzela Nzambi mudimu ne kondo ka muoyo kimpe. (1 Timote 3:9; 1 Petelo 3:21) Patudi tutonda mibi yetu ne tuyilekela, Yehowa Nzambi udi utufuila luse ne tudi tupeta kondo ka muoyo kimpe kadi kakayi katulubakaja.​—Nsumuinu 28:13.

Mulambu wa Yezu udi utuambuluisha ne utupetesha ditekemena

Ndekelu wa bionso, patudi tuitabuja mulambu wa Yezu katuakudimona bu badi kabayi bakane ku mêsu kua Yehowa Nzambi. Mupostolo Yone wakafunda ne: ‘Bienza muntu bibi, tudi ne Muakuidi kudi Tatu, Yezu Kristo udi muakane.’ (1 Yone 2:1) Mupostolo Paulo wakamba bua mudimu wa buakuidi wa Yezu  ne: ‘Yeye udi ne bukole bua kusungila ne lupandu lujima badi basemena pabuipi ne Nzambi bua bualu buende, yeye muikale ne muoyo tshiendelele bualu bua kubakuila.’ (Ebelu 7:25) Patutshidi anu ne bubi nansha bukese, tudi dijinga ne Muakuidi Munene Yezu Kristo bua kutuambuluisha bua kuikala bakane ku mêsu kua Nzambi. Muakuidi munene Yezu wakenza tshinyi bua kutuakuila?

Matuku 40 panyima pa dibika dia Yezu ku lufu, wakabanda mu diulu ne wakafila mushinga wa ‘mashi ende’ kudi Nzambi. Ke bualu kayi, mu katupa kîpi emu Yezu neapikule bantu badi batumikila Nzambi ku bubi ne ku lufu. * (1 Petelo 1:18, 19) Nunku, kuena umonaku ne: tudi ne bua kunanga Yezu bikole ne kumutumikila anyi?

Tudi kabidi ne bua kunanga Yehowa Nzambi ne kumutumikila bualu ‘mmutupikule.’ (1 Kolinto 1:30) Muoyo utudi nawu udi ufumina kudiye ne anu Yeye ke udi mua kutupesha muoyo wa tshiendelele. Ke bualu kayi tudi ne bua ‘kutumikila mêyi a Nzambi kumpala kua mêyi a bantu.’​—Bienzedi 5:29.

[Mêyi adi kuinshi]

[Kazubu/​Bimfuanyi mu dibeji 9]

UVUA MUMANYE ANYI?

• Yezu uvua ku mukuna wa Oleve pakabandaye mu diulu.​—Bienzedi 1:9, 12.

• Anu bapostolo ba Yezu ba lulamatu ke bakamumona ubanda mu diulu.​—Bienzedi 1:2, 11-13.