Mushindu umuepele wajika ntatu idi lufu lukebesha!

LAZALO ne bana babu ba bakaji Mâta ne Mariya bavua basombele mu Betania, tshimenga tshivua mutantshi wa kilometre mitue ku 3 ne Yelushalema. Dimue dituku pavua mulunda wabu Yezu kayipu, Lazalo wakabanga kusama bikole. Bana babu kutuadija kudituta eku ne eku. Kutuminabu Yezu mukenji. Matuku abidi panyima pa Yezu mumane kumvua lumu elu, wakasa luendu bua kuya kumona Lazalo. Mu njila, Yezu wakambila bayidi bende ne: uvua uya bua kujula Lazalo ku tulu. Bayidi kabavua bumvue tshivua Yezu musue kuamba to, ke yeye kubambila patoke ne: “Lazalo udi mufue.”​—Yone 11:1-14.

Pakafika Yezu ku lukita lua Lazalo, wakatuma dîyi bua bumbushe dibue divuabu bajike nadi ku lukita. Wakasambila ne dîyi dikole ne pashishe kuambaye ne: ‘Lazalo, lopoka.’ Lazalo wakapatuka mu lukita. Yezu wakabisha muntu uvua mufue kukavua matuku anayi.​—Yone 11:38-44.

Muyuki wa Lazalo eu udi uleja ne: dibika dia bantu ku lufu ke diajikija ntatu idi lufu lukebesha. Kadi tshishima tshia kujula Lazalo ku lufu tshivua tshienzeke bushuwa anyi? Bible udi wamba ne: tshivua tshienzeke. Bala Yone 11:1-44 bua kumona mudi malu aa malelela. Udi welesha mpata ne: malu aa kaavua menzeke anyi? Wewe welesha mpata, bidi biumvuija ne: udi ubenga kuitaba kabidi bishima bionso bidibu baleje mu Bible, pamue ne tshia dibika dia Yezu Kristo muine ku lufu. Bible udi wamba ne: ‘Bikala Kristo kayi mubishibue ku bafue, ditabuja dienu didi patupu.’ (1 Kolinto 15:17) Dibika dia bantu ku lufu ndilongesha dinene dia mu Bible. (Ebelu 6:1, 2) Kadi ‘dibishibua’ didi diumvuija tshinyi?

‘Dibika dia bafue’ ntshinyi?

Badi bakula bua dibika misangu mipite pa 40 mu Mifundu ya tshiena-Greke. Muaku eu mmufumine ku muaku wa tshiena-Greke udi umvuija ne: “Kujuka tshiakabidi.” Muaku wa muomumue mu tshiena-Ebelu udi umvuija ne: “Kulua tshiakabidi ne muoyo.” Kadi muntu yeye mumane kufua, ntshinyi tshialuabu kubisha? Kabena mua kubisha mubidi to, bualu utu ubola ne upingana ku buloba. Kabena babisha mubidi umue umue au to, kadi badi babisha muntu uvua mufue. Nunku, padi Nzambi ubisha muntu ku lufu udi umupingajila tshiakabidi bumuntu buende, mbuena kuamba ne: ngikadilu yende, malu a nsombelu wende wa kale ne malu onso adi amusunguluja.

Yehowa Nzambi kakuikala ne lutatu lua kuvuluka bumuntu bua bantu bakadi bafue to, bualu utu uvuluka malu onso mu mushindu mupuangane. (Yeshaya 40:26) Bu mudi Yehowa ke udi mufuke muoyo, mbipepele bua kubishaye muntu umue umue ne mubidi mupiamupia. (Musambu 36:9) Bible udi wamba kabidi ne: Yehowa Nzambi ‘udi ne dijinga’ dikole dia kubisha bafue. (Yobo 14:14, 15) Tudi ne bua kusanka bikole bualu Yehowa kêna anu mua kubisha bantu ku lufu to, kadi ke tshidiye ujinga ne muoyo mujima.

Yezu Kristo pende udi ne mudimu munene mu dibisha dia bantu ku lufu. Tshidimu ne matuku makese panyima pa Yezu mumane kutuadija mudimu wende wa kuyisha, wakamba ne: ‘Bu mudi Tatu ubisha bafue, ubapa muoyo; nunku kabidi Muana udi upa badiye musue muoyo.’ (Yone 5:21) Bualu buakenzekela Lazalo kabuenaku buleja ne: Yezu Kristo udi ne bukole ne dijinga dia kubisha bafue anyi?

 Kadi netuambe tshinyi bua lungenyi lua ne: tudi ne tshintu munda muetu tshitu katshiyi tshifua? Dilongesha dia dibika dia bafue kadiena dipetangana ne lungenyi lua ne: muntu udi ne nyuma udi utungunuka ne muoyo patudi tufua. Tuetu bikale ne tshintu tshitu katshiyi tshifua munda muetu, dibisha bantu ku lufu kadiakuikala ne mushinga to. Mâta muanabu ne Lazalo kavua witaba ne: pavua Lazalo mufue uvua mutungunuke ne kuikala ne muoyo muaba kampanda to. Uvua mumanye ne: nekuikale dibishibua dia bafue. Ke bualu kayi pakamuambila Yezu ne: ‘Muanenu neabike kabidi,’ Mâta wakamuambila ne: ‘Ndi mumanye ne: Yeye neabike dituku dia ku nshikidilu diabika bantu bonso kabidi.’ (Yone 11:23, 24) Nansha pakabika Lazalo, kakalonda bualu nansha bumue buvua bumuenzekele pavuaye mufue to. Uvua mufue tshia bushuwa. Bible udi wamba ne: ‘Bafue kabena bamanye bualu nansha bumue’ to. Udi wamba kabidi ne: ‘Kakuena mudimu, kakuena kulongolola kua malu, kakuena lungenyi anyi meji ku Muaba wa Bafue [anyi Sheol] kuudi uya.’​—Muambi 9:5, 10.

Nunku bilondeshile Bible, anu dibika dia bafue ke diajikija ntatu idi lufu lukebeshe. Kadi ku bantu bonso bakadi bafue, nebabishe banganyi ne nebababishe bua kusombelabu penyi?

Mbanganyi babishabu?

Yezu wakamba ne: ‘Dîba nedilue diumvua bonso badi mu nkita dîyi diende, nebajuke.’ (Yone 5:28, 29) Bilondeshile dilaya edi, Yehowa neabishe bantu bonso badi mu nkita badiye muvuluke. Kadi tudi mua kudiebeja ne: Ku bantu bonso bakadi bafue, mbanganyi badi Nzambi muvuluke bikalaye mua kubisha?

Mukanda wa Ebelu nshapita wa 11 udi utela mêna a bantu bavua bakuatshile Nzambi mudimu ne lulamatu. Bobu abu pamue ne bantu bakuabu badi benzele Nzambi mudimu ne lulamatu badi bafue bidimu bidi panshi ebi nebabishibue. Kadi netuambe tshinyi bua bantu bavua kabayi batumikile mikenji ya Nzambi, imue misangu bualu kabavua bayimanye? Nzambi udi ubavuluka bobu pabu anyi? Eyowa, udi uvuluka ba bungi, bualu Bible udi ulaya ne: ‘Dibika dia bafue nedikaleku, ne dia bakane ne dia babi.’​—Bienzedi 24:15.

 Tshidibi, ki mmuntu yonso ukadi mufue wabishibua to. Bible udi wamba ne: ‘Bituenza malu mabi bua disungula dia mutshima patuakamana kuangata dimanya dia bushuwa, kakuena kushala kabidi munga mulambu bua kubuikidila nawu mibi, kadi kudi kushala kuindila kukuabu kua dilumbulula kudi kukuatshisha buôwa.’ (Ebelu 10:26, 27) Bamue bantu bavua benze mibi idibu kabayi mua kubabuikidila to. Kabena mu Muaba wa bafue to, kadi badi mu Ngena, muaba wa mu tshimfuanyi udi uleja kabutu ka kashidi. (Matayo 23:33) Kadi tudi ne bua kudimuka bua kubenga kuamba ne: muntu kampanda neabike anyi kakubika to. Ebu mbualu budi Nzambi nkayende mumanye. Mmumanye bantu badi mu Muaba wa bafue ne badi mu Ngena. Kadi tuetu, tuenzayi muetu muonso bua kuikala ne nsombelu udi usankisha Nzambi.

Mbanganyi babishabu bua kuya mu diulu?

Dibishibua dia Yezu Kristo divua dibishibua dia pa buadi menemene. ‘Wakashipibua mu mubidi wende kadi wakavuijibua muoyo mu nyuma.’ (1 Petelo 3:18) Kakuvua muntu ukavuabu babishe nunku kumpala to. Yezu muine wakamba ne: ‘Kakuena muntu wakubanda mu diulu anu yeye wakufuma mu diulu, Muana wa muntu mene.’ (Yone 3:13) Eyowa, Yezu ke muntu wa kumpala uvuabu babishe mu nyuma. (Bienzedi 26:23) Panyima pende, bakabisha bakuabu mu nyuma. Bible udi wamba ne: ‘Muntu ne muntu neabike mu mulongo wende: Kristo, mamuma a kukuama diambedi; ne pashishe, bantu ba Kristo nebabike paluaye.’​—1 Kolinto 15:23.

Nzambi neabishe tshisumbu tshikese tshia bantu badibu babikila ne: ‘bantu ba Kristo’ bua kuyabu kuenza mudimu wa pa buawu mu diulu. (Lomo 6:5) ‘Nebakokeshe’ ne Kristo ‘pa buloba.’ (Buakabuluibua 5:9, 10) Nebikale kabidi bakuidi bualu nebenze pabu mudimu wa kumbusha ntatu idi mifumine ku bubi budi bantu bapiane kudi Adama. (Lomo 5:12) Bantu bakokesha ne Kristo bu bakalenge ne bakuidi badi 144 000. (Buakabuluibua 14:1, 3) Nebabike ne mubidi wa mushindu kayi? Bible udi wamba ne: nebabike ne “mubidi wa nyuma.” Mubidi eu neubapeteshe mushindu wa kusomba mu diulu.​—1 Kolinto 15:35, 38, 42-45.

Ndîba kayi didibu babisha bantu bua kuya mu diulu? Kolinto wa kumpala 15:23 udi wandamuna ne: ‘Palua Kristo’ bua kuikala Mukalenge. Malu adi enzeka pa buloba katshia mu 1914 adi aleja patoke ne: dilua dia Kristo bua kukokesha ne ‘nshikidilu wa tshikondo etshi’ biakatuadija tshidimu atshi. (Matayo 24:3-7) Nunku tudi mua kuamba ne: dibishibua dia bena Kristo ba lulamatu badi baya mu diulu dikadi dimane kubanga, nansha mutudi katuyi tumona mudidi dienzeka. Ebi bidi biumvuija ne: bapostolo ne bena Kristo ba kumpala bakadi bajuke ne badi mu diulu. Kadi netuambe tshinyi bua bena Kristo badi ne ditekemena dia kukokesha ne Yezu mu diulu batshidi ne muoyo mu matuku etu aa? Badi babika “mu kuvinya kua disu” anyi diakamue padibu bafua. (1 Kolinto 15:52) Dibika dia kasumbu aka kakese ka bantu 144 000 didi ne bua kuenzeka kumpala kua dia bantu ba bungi bikala ne bua kubika bua kusomba pa buloba. Ke bualu kayi badi badibikila ne: ‘Dibika dia ku lufu’ dia kumpala ne ‘dibika dia ku lufu dia ku mudilu.’​—Filipoi 3:11; Buakabuluibua 20:6.

Mbanganyi babishabu bua kusomba pa buloba?

Bilondeshile Bible, nebabishe bantu ba bungi bua kusomba pa buloba. (Musambu 37:29; Matayo 6:10) Mupostolo Yone wakumvuija tshikena-kumona tshilenga tshiakamonaye bua bantu babishabu ku lufu wamba ne: ‘Mâyi manene kabidi, akapatula bafue bakadimu, ne lufu ne Muaba wa bafue biakapatula bafue bakadimu, ne bakalumbuluisha muntu yonso bu muakadi bienzedi biende. Bakela lufu ne Muaba wa bafue mu dijiba dia kapia. Elu ndufu luibidi, dijiba dia kapia mene.’ (Buakabuluibua 20:11-14) Nzambi udi uvuluka bantu badi mu Muaba wa bafue. Neabishe muntu yonso udimu. (Musambu 16:10; Bienzedi 2:31) Nealumbuluishe muntu yonso bilondeshile malu ikalaye ne bua kuenza panyima pa bamane  kumubisha. Kadi ntshinyi tshiafikila lufu ne Muaba wa bafue? Nebabiele mu ‘dijiba dia kapia.’ Ebi bidi biumvuija ne: lufu ludi bantu bapiane kudi Adama kaluakukengesha kabidi bantu to.

Muntu yonso ukadi mufuishe udi ne bua kuikala ne disanka dia kumvua ne: Nzambi mmulaye bua kubisha bantu ku lufu. Pavua Yezu mubishe muana umuepele wa mukaji wa mu lufuila wa mu Naina, mukaji eu wakumvua disanka dia dikema! (Luka 7:11-17) Bible udi wamba bua baledi ba muana wa bakaji wa bidimu 12 uvua Yezu mubishe ne: ‘Bakatamba kukema’ anyi bakasanka bikole. (Mâko 5:21-24, 35-42; Luka 8:40-42, 49-56) Netuikale ne disanka dia kuakidila bantu batuvua bafuishe mu buloba bupiabupia budi Nzambi mulaye.

Kumanya malu adi atangila dibika dia bantu ku lufu kudi kutuenzela tshinyi? Mukanda kampanda udi wamba ne: “Bantu ba bungi batu batshina lufu ne kabatu basue kutumaku meji to.” (The World Book Encyclopedia) Bua tshinyi? Bualu lufu ntshintu tshidi bantu ba bungi kabayi bajingulula, tshidibu kabayi bamanye ne tshidibu batshina. Tuetu bamanye tshitu tshienzekela muntu padiye ufua ne bikale ne ditekemena dia kubishibua, tudi mua kupeta muoyo mukole patudi kumpala kua ‘muena lukuna wa ndekelu’ lufu. (1 Kolinto 15:26) Dimanya edi neditukoleshe kabidi ku muoyo patudi tufuisha mulunda wa pa muoyo anyi mulela wetu kampanda.

Dibika dia bantu pa buloba nedituadije dîba kayi? Lelu buloba mbuule tente ne tshikisu, bimvundu, dishipangana ne dinyanga dia bintu bidi bitunyunguluke. Bu bantu mua kubika bua kusomba pa buloba buule ne malu a nunku, disanka diabu nedikale anu dia tshitupa tshîpi. Kadi Mufuki wetu mmulaye ne: mu katupa kîpi emu neajikije malu mabi onso adi mu buloba budi Satana ukokesha. (Nsumuinu 2:21, 22; Danyele 2:44; 1 Yone 5:19) Malu adi Nzambi mulongolole bua buloba akadi pa kukumbana. Pashishe, bantu bungi kabuyi kubala badi bafue nebabike bua kusomba pa buloba bua ditalala budi Nzambi mulongolole.

[Tshimfuanyi mu dibeji 7]

Bantu ba bungi bakadi bafue nebabike bua kusomba pa buloba