Idikija Kristo paudi ne bukokeshi

KUKADI bidimu ndambu bivuabu batete bantu bua kumanya mutu muntu wenza malu mu imue nsombelu. Malu akenzeka akakemesha bibi. Bavua batapulule bantu bavuabu batete abu mu bitupa bibidi. Bakateka bamue bua bikale batangila bakuabu, benze bu basalayi ne bakuabu bavua benze bu bena buloko. Tshiakenzeka ntshinyi?

Badi bamba ne: “Anu mu matuku makese tshianana, ba bungi ba ku bavua bu [basalayi] kabatshivua kabidi ne bukalanga to, bakatuadija kukengeshangana ne kupeshangana manyoka mapite bungi. Kadi aba bavua bu bena buloko bobu bavua ne buôwa, batumikila bionso bivuabu babambila ne badipuekesha bikole.” Bakebuludi bakalua kuamba ne: Pa kuamba muntu yonso udi mua kupanga malu padiye udimona ku mutu kua bakuabu.

Dilombola dimpe ne dibi

Kulombola bantu bilenga nkuimpe kutambe bualu kudi mua kubaleja malu mimpe a kuenza ne nunku badi mua kuikala ne makanda a mubidi, kudiumvua bimpe ne kulua balunda ba Nzambi. (Nsumuinu 1:5; Yeshaya 48:17, 18) Kadi anu mudi bualu budibu balonde ku mbangilu buleja, bantu ba bungi badi babanga kuenza malu mabi padibu bapeta bukokeshi. Bible udi uleja bubi bua bualu ebu wamba ne: ‘Pakokesha muntu mubi, bantu badi batua mikemu.’​—Nsumuinu 29:2; Muambi 8:9.

Kulombola bantu bibi nkubi nansha tuetu bikale ne meji mimpe. Tshilejilu, matuku adi panshi aa, tshisumbu kampanda tshia bena nzambi tshia mu ditunga dia Irlande tshidi tshitangila malu a tulasa tshiakalomba luse patoke bua mushindu mubi uvua bamue balongeshi bakengeshe balongi mu tulasa. Ba bungi ba ku balongeshi abu kabavua ne meji mabi to, kadi mushindu uvua bamue benzeja malu ke uvua mutambe bubi. Tshilejilu, tshimue tshikandakanda tshiakamba ne: “Balongeshi ba bungi ba mu tshisumbu tshia bena nzambi [atshi] bavua bakengeshe bana ba bungi bikole; bana aba bakashala ne mputa ku muoyo mutantshi mule bua malu a tshikisu aa.” (The Irish Times) Kadi udi mua kuenza tshinyi bua kuambuluisha bantu baudi ulombola pamutu pa kubakuatshisha buôwa anyi kubanyingalaja bua malu audi wamba ne audi wenza?​—Nsumuinu 12:18.

Bakapesha Yezu Kristo “bukokeshi buonso”

Tuangatabi tshilejilu tshia Yezu Kristo. Matuku makese kumpala kua kubandaye mu  diulu wakambila bayidi bende ne: ‘Bakumana kumpa bukokeshi buonso mu diulu ne pa buloba.’ (Matayo 28:18) Bayidi bende bakumvua buôwa pakumvuabu mêyi aa anyi? Bakelaku meji ne: mpindieu Yezu uvua mua kubanga kuenza malu anu bu bamfumu ba bena Lomo bavua badiatshila bantu bonso bavua basua kubatombokela panshi anyi?

Bible udi wamba patoke ne: kabivua nanku to! Yezu uvua ukokesha anu bu Tatuende. Tshilejilu, nansha mudi Tatuende Yehowa muikale ne bukole bupite bungi ne muikale Mfumu wa bintu bionso, mmusue ne: bantu bende bamutumikile ne muoyo wa disanka, kabiyi bu bia babuite kuisu, kabayi ne buôwa ne ki mmusue bamutumikile bienze bu badi babenzeja malu ku bukole. (Matayo 22:37) Yehowa katuku wenza mudimu bibi ne bukokeshi buende to! Bualu kampanda bua dikema buakamona muprofete Yehezekele budi buleja ne: Yehowa utu ukokesha bimpe.

Yehezekele wakamona banjelu banayi bavua batumbisha bumfumu bua Nzambi. Muanjelu yonso uvua ne mpala inayi. Yehezekele udi wamba ne: ‘Bua bimfuanyi bia mpala yabu ngakamona ne: buonso buabu banayi bakadi ne mpala wa muntu ne mpala wa nyama wa ntambue ku luseke lua tshianza tshia balume, ne mpala wa ngombe ne mpala wa nyunyi wa mukanku ku luseke lua tshianza tshia bakaji.’ (Yehezekele 1:10) Mpala inayi eyi idi ileja ngikadilu minene inayi ya Nzambi. Bible udi wamba ne: ngikadilu eyi ke dinanga: didibu baleja kudi mpala wa muntu; buakane: budibu baleja kudi mpala wa ntambue; ne meji: adibu baleja kudi mpala wa mukanku. Ngikadilu isatu eyi idi yenda pamue ne bukole, ngikadilu muinayi udibu baleja kudi mpala wa ngombe. Bionso ebi bidi bileja tshinyi? Bidi bileja ne: Yehowa katu wenza mudimu tshienzenza ne bukole buende anyi ne bukokeshi bupite bungi budiye nabu to, kadi utu kabidi ne dinanga ne meji ne buakane.

 Bu mudi Yezu Kristo widikija Tatuende Yehowa, udi pende dîba dionso wenza mudimu ne bukokeshi muikale ne dinanga ne meji ne buakane. Ke bualu kayi bayidi bende bavua badiumvua bimpe menemene pavuaye ubalombola. (Matayo 11:28-30) Kadi Yehowa Nzambi ne Yezu Kristo bavua bamanyike bikole bua dinanga diabu, ki mbua bukole anyi bukokeshi budibu nabu to.​—1 Kolinto 13:13; 1 Yone 4:8.

Utu wewe wenza mudimu bishi ne bukokeshi buebe?

Utu ukokesha bakuabu bimpe anyi? Tshilejilu, biwikala mfumu wa dîku: Utu ulombola malu ne dîyi dia bumfumu ne ujinga amu ne: bakuabu benze tshidi muoyo webe musue anyi? Bena mu dîku diebe batu bakutumikila bualu badi bakutshina anyi bualu mbakunange? Batu bakutumikila anu bualu udi ne bukokeshi anyi? Bua kuendesha malu mu dîku bu mudi Bible wamba, mbimpe bamfumu ba mêku badiele nkonko eyi.​—1 Kolinto 11:3.

Tuakula mpindieu bua aba badi ne bukokeshi mu tshisumbu tshia bena Kristo. Bua wewe kumanya ni udi ukokesha bimpe, bala mêyi manene adi alonda aa. Yehowa ke wakaafundisha ne Yezu wakaatumikila.

‘Mupika wa Mukalenge ikale biende ne kalolo kudi bantu bonso, ikale ne lutulu; adimuishe badi badimanyika bu baluishi ne mutshima wende mupuekele.’​—2 Timote 2:24, 25.

Bamue bena Kristo ba kumpala bavua ne bukokeshi bua bungi. Umue wa kudibu uvua Timote. Uvua ne bukokeshi bua ‘kuelela bakuabu mukenji ne: Kanuyishi bantu diyisha dikuabu’ to. (1 Timote 1:3) Tudi tuela meji ne: Timote uvua ne ngikadilu ya buena ya Nzambi mu malu onso avuaye wenza. Uvua utumikila mubelu wa Paulo wa kulongesha ‘ne lutulu’ ne ‘kuikala ne kalolo kudi bantu bonso’ mu dilombola diende dia malu mu tshisumbu tshia bena Kristo. Bu muvuaye ne bidimu bishadile kudi bia bakulu nende, uvua ne bua kuikala bu muana wa kanemu ku mêsu abu. Uvua kabidi ne bua kuikala bu mukulu wa bantu muimpe kudi bantu bavua ne bidimu bishadile ku biende. (1 Timote 5:1, 2) Ne muntu wa nunku, bena mu tshisumbu bavua mua kuikala bumvuangana anu bu mutu bana ba muntu pamutu pa kuikala ne mashika kabayi basankidilangana anu bu bapitshi ba njila.​—1 Kolinto 4:14; 1 Tesalonike 2:7, 8.

‘Bamfumu ba bisamba bia bende badi babalongolola ne diambu, bantu babu badi banene badi babakokesha. Bualu buenu kabuena nunku; wasua kulua munene munkatshi muenu neikale muena mudimu wenu.’​—Matayo 20:25, 26.

Ba tshikokesha nkaya badi balombola bantu ‘ne diambu,’ babenzeja malu adibu bobu  basue ne mushindu udibu bobu basue, babambila bua kubanyoka padibu kabayi babatumikila. Kadi Yezu yeye wakambila bayidi bende bua kukuatshila bakuabu mudimu pamutu pa kubenzeja malu ku bukole. (Matayo 20:27, 28) Malu avuaye wenzela bayidi bende avua aleja muvuaye ne dinanga. Wewe wenza malu bu Yezu, bantu nebakutumikile ne disanka. (Ebelu 13:7, 17) Nunku badi mua kufika too ne ku dienza malu audi kuyi mubalombe ne disanka dionso.​—Matayo 5:41.

‘Nulame tshisumbu tshia mikoko ya Nzambi tshidi munkatshi muenu, kanuikadi bu bakokeshi ba badi kunyima kuenu, kadi nudivuije bifuanyikiji [anyi bilejilu] bimpe kudi mikoko.’​—1 Petelo 5:2, 3.

Batangidi bena Kristo ba lelu mbamanye ne: Nzambi neabebeje bua luendu lua bena mu tshisumbu bonso. Ke bualu kayi badi benza mudimu wabu eu ne muoyo umue. Badi baditatshisha bua kuenzela bena Kristo nabu malu ne muoyo muimpe, ne disuminyina ne dinanga. Anu bu mupostolo Paulo, badi benza mudimu benzelamu ne bakolesha ditabuja dia bena Kristo nabu, kadi kabena babatumina dîyi to.​—2 Kolinto 1:24.

Padibi bikengela kubela muntu, bakulu badi bamubela ne dîyi dimpe bua apetulule bukole bua kutungunuka ne kuenzela Nzambi mudimu. Kabatu bapua mubelu wa Paulo eu muoyo to: ‘Bana betu, bikala muntu mutulukile ku bualu bubi, nuenu badi ne nyuma, numupingaje kudi Nzambi ne mutshima wa kalolo; udimuke biebe, bua wewe kuteyibu.’​—Galatia 6:1; Ebelu 6:1, 9-12.

‘Nulejangane lutulu, nulekelelangane mibi yenu, pamutu pa malu aa onso, nuluate dinanga, didi tshisuikidi tshia malu onso a buakane buonso.’​—Kolosai 3:13, 14.

Kadi newenze tshinyi ne muntu udi kayi wenza tshidi Bible wamba bu mudibi bikengela? Utuku widikija Yehowa ne Yezu, ubumvuila ne wela meji ne: bidi mua kuikala bua bubi butudi bapiane anyi? (Yeshaya 42:2-4) Anyi wewe utu ukeba bua bantu benze dîba dionso kantu ne kantu kadi Bible wamba? (Musambu 130:3) Tshibi uvuluke ne: mbimpe kuikala ne lutulu padiku mushindu, ne kuikala ne dîsu dikole padibi bikengedibua. Kuenza malu ne dinanga kudi kulela diumvuangana dikole pankatshi pebe ne bantu baudi ulombola.

Nansha wewe ne bumfumu bua mushindu kayi, wenze muebe muonso bua kuidikija Yehowa ne Yezu. Uvuluke muvua Davidi muleje muvuaye wanyisha mushindu udi Yehowa ulombola bantu bende. Wakamba ne: ‘Yehowa udi mulami wanyi, tshiena nkengela tshintu; yeye udi undadika mu mitoloka ya mashinde. Udi undombola pepi ne mâyi adi talalaa; udi ukankamija mutshima wanyi. Udi undombola mu njila ya buakane bualu bua dîna diende.’ Yezu pende wakadiamba ne: ‘Ndi mulami muimpe wa mikoko; ndi mumanye yanyi, yanyi idi mimmanye, bu mudi Tatu mummanye, meme kabidi ndi mumanye Tatu; ndi mfuila mikoko.’ Amba tumone, kudiku tshilejilu tshikuabu tshimpe tshia kulonda bu tshia Yehowa ne Yezu anyi?​—Musambu 23:1-3; Yone 10:14, 15.

[Lungenyi lunene lua mu dibeji 18]

Yehowa udi ulombola bantu bilenga ne buakane ne meji ne dinanga dionso

[Tshimfuanyi mu dibeji 18]

Bakulu batu kabidi babela bantu badi benza malu mabi ne dinanga dionso

[Tshimfuanyi mu dibeji 19]

Paulo wakabela Timote bua kuikala bu muana wa kanemu ne bu mukulu wa bantu muimpe

[Tshimfuanyi mu dibeji 20]

Yezu utu ulombola bantu ne meji ne buakane ne dinanga dionso