Ntshinyi tshiakuambuluisha bua kumvua Bible?

YEZU wakambila Nzambi ne: ‘Wewe wakusokoka bena meji ne bena budimu malu aa, wakuasokolola kudi bana bakese.’ (Luka 10:21) Mêyi aa adi aleja ne: bua tuetu kumvua Bible, tudi ne bua kudipuekesha. Meji male a Yehowa adi amueneka patoke mu bualu ebu: mmufundishe mukanda udi anu bantu badi badipuekesha, badi bitaba bua babalongeshe mua kumvua.

Bitu bikolele bantu ba bungi bua kudipuekesha bualu tuetu bonso tudi baledibue ne lungenyi lua diditambisha. Tudi kabidi mu ‘matuku a ku nshikidilu’ mudi bantu bikale ‘badisu, bena lukuluku ne buujibue ne diambu.’ (2 Timote 3:1-4) Ngikadilu eyi idi mua kutupangisha mua kumvua Dîyi dia Nzambi. Bualu bukuabu kabidi, lutambishi lua bantu badi batunyunguluke ludi mua kutunyanga tuetu bonso. Kadi mmunyi muudi mua kufika ku dikala ne budipuekeshi ne kuitaba bua bakulongeshe Bible?

Longolola muoyo webe ne lungenyi luebe

Bible udi wamba ne: Ezela (umue wa ku bantu bavua balombola tshisamba tshia Nzambi) wakalongolola ‘mutshima wende bua kukeba mikenji ya Yehowa.’ (Ezela 7:10) Kudiku mushindu utudi mua kulongolola petu mioyo yetu anyi? Eyowa. Tshia kumpala, tudi ne bua kuitaba ne: Bible n’Dîyi dia Nzambi. Tangila tshivua mupostolo Paulo mufundile bena Kristo nende: ‘Panuakangata dîyi dinuakumvua kutudi, dia Nzambi mene, nuakaditabuja, ki mbu dîyi dia bantu, kadi bu mudidi bushuwa, dîyi dia Nzambi mene.’ (1 Tesalonike 2:13) Nansha muvua bantu bafunde Bible, malu akafundabu avua afumina kudi Yehowa. Tuetu bitabe ne: Bible mmukanda wa Nzambi, nebituambuluishe bua kuitaba malu atudi tubalamu.​—2 Timote 3:16.

Kusambila kudi kabidi kutuambuluisha bua kulongolola muoyo wetu. Bu muvua Yehowa mufundishe Bible ne nyuma wende, udi kabidi mua kutuambuluisha ne nyuma eu bua tuetu kumvua Bible. Ke bua tshinyi tudi ne bua kulomba bua Yehowa atupeshe nyuma wende. Tangila muvua mufundi wa Misambu uditatshisha bua kumvua Dîyi dia Nzambi. Wakafunda ne: “Umpe lungenyi, bua ndame mikenji yebe; ne bua meme kuyitumikila ne mutshima wanyi mujima.” (Musambu 119:34) Tulombe Nzambi lungenyi bua kumvua bitudi tubala ne bua dîyi diende dilenge muoyo wetu. Bua tuetu kumvua Bible, tudi kabidi ne bua kunanga malu malelela.

Paudi uditatshisha bua kumvua Bible, uvuluke kabidi mudi kumulonga mua kukuambuluisha. Kudi malu a bungi adi mua kutusaka bua kubala Bible, kadi bualu bua mushinga mukole  mbua se: Bible udi utuambuluisha bua kudia bulunda ne Nzambi. (Yakobo 4:8) Patudi tubala Bible ne tumona mutu Yehowa wenza malu, mudiye munange bantu badi bamunanga ne tshidiye wenzela bantu badi bamuela nyima, tudi tufika ku dimumanya bimpe. Nunku patudi tubala Bible, tuditatshishayi bua kumanya Nzambi bimpe ne bua kukolesha malanda etu nende.

Malu adi atupangisha mua kumvua Bible

Mmalu kayi adi mua kutupangisha mua kumvua Bible? Bua kumpala, nkulamata malu adi bantu bakuabu batulongeshe. Tshilejilu, udi mua kulamata malu adi bantu baudi wangata ne mushinga bitaba. Kadi newenze tshinyi bikala bantu aba kabayi banange malu adi mu Dîyi dia Nzambi? Bidi mua kutukolela bua kuitaba malu adi Bible ulongesha. Ke bualu kayi Bible udi utuambila bua kukonkonona malu onso adibu batulongeshe.​—1 Tesalonike 5:21.

Udiku mumanye ne: Mariya mamuende wa Yezu wakapeta pende lutatu lua buena elu anyi? Bavua bamulongeshe bua kuikalaye unemeka bilele bia bena Yuda. Uvua ulonda mikenji ya Mose ne muoyo umue, ne uvua uya mu nsunagoga bua kuteleja dîyi dia Nzambi. Kadi wakalua kumona ne: Nzambi katshivua witaba kabidi ntendelelu uvua baledi bende bamulongeshe to. Ke bualu kayi wakitaba malu avua Yezu ulongesha ne kuluaye umue wa ku bantu ba kumpala bakalua bena Kristo. (Bienzedi 1:13, 14) Kavua mupange kanemu kudi baledi bende anyi bua bilele biabu to, kadi wakaleja ne: uvua munange Nzambi. Nunku bua Bible kutuambuluishaye, tudi petu ne bua kulamata Nzambi pamutu pa kulamata bantu anu bu muvua Mariya muenze.

Kadi bantu ba bungi kabatu banange malu malelela adi mu Bible to. Bamue badi anu balonda bilele bia mu tshitendelelu tshiabu bidi bishindamene pa malu a dishima. Bakuabu badi baleja mu ngakuilu wabu ne mu bienzedi biabu ne: kabena bangata tshidi Bible wamba ne mushinga to. Ke bualu kayi mbikole bua kuitaba bulelela, bualu budi mua kutukosolola ne balunda betu, bena mutumba, bena mudimu netu, nansha ne bena mu dîku dietu. (Yone 17:14) Kadi Mukalenge Solomo wakafunda ne: ‘Sumba bulelela, kubupanyi nansha.’ (Nsumuinu 23:23) Wewe wangata bulelela ne mushinga, Yehowa neakuambuluishe bua kumvua Bible.

Bualu bukuabu budi mua kutupangisha mua kumvua malu adi mu Bible nkubenga kualonda. Yezu wakambila bayidi bende bua bualu ebu ne: ‘Bakunupa lungenyi lua kumanya malu a bukalenge bua mu diulu adi masokoka, kadi kabakabapalu. Mitshima ya bantu aba yakulua manyi a bungi, badi mpudi matshi.’ (Matayo 13:11, 15) Bantu ba bungi bavua Yezu muyishe kabavua basue kushintuluka to. Bavua bashilangane bikole ne ngenda-mushinga wa mu tshilejilu kampanda tshivuaye mufile. Pakapeta ngenda-mushinga au dibue dia mushinga mutambe bukole, wakaya kupana diakamue bintu bionso bivuaye nabi bua kudisumba. Ke mutudi petu mua kunanga bulelela nunku.​—Matayo 13:45, 46.

Mbikole bua kuitaba bua batulongeshe

Bualu bunene butu bupangisha muntu bua kumvua Bible mbua kubenga kuitaba bua bamulongeshe. Bidi mua kumukolela bua kuitaba ne: muntu udi umueneka mushadile kudiye amulongeshe. Pabi bapostolo ba Yezu Kristo ‘kabavua bamanye mukanda’ to. (Bienzedi 4:13) Paulo wakumvuija bua tshinyi kabavua bamanye mukanda pakambaye ne: ‘Bana betu, tangilayi dibikidibua dienu ne: Kakuena ba bungi babikidibue badi bena meji mu buntu buabu, kakuena ba bungi badi bakole, kakuena ba bungi badi baledibue bena butumbi. Kadi Nzambi wakasungula malu mapote a pa buloba bua kufuishaye nawu bena meji bundu.’ (1 Kolinto 1:26, 27) Wewe mumone ne: mbikole bua kuitaba bua muntu mupuekele kuudi akulongeshe, vuluka ne: Nzambi ke udi ukulongesha, ki mmuntu au to. Ndiakalengapu kayi dinene dia kulongeshibua kudi Yehowa “Muyishi” wetu munene!​—Yeshaya 30:20; 54:13.

Tshilejilu, Nâmana mfumu wa basalayi ba bena Sulia wakabenga mua kuitaba malu avua afumina kudi muntu mupuekele kudiye. Uvua uya kumona Elisha muprofete wa Yehowa bua amondope nsudi yende. Kadi Elisha  wakatuma muena mudimu bua kumuambila tshivuaye ne bua kuenza. Nâmana wakanji kubenga bua kutumikila dîyi dia Elisha bualu wakabenga kuitaba tshivuabu bamuambile ne mushindu muine uvuabu bamuambiletshi. Kadi wakalua kushintulula lungenyi luende, kuenzaye tshivuabu bamulomba ne nsudi yende kujikayi. (2 Bakelenge 5:9-14) Tudi mua kupeta lutatu lua muomumue patudi tukeba kulonga Bible. Tshilejilu, tudi mua kulonga ne: bua tuetu kusankisha Nzambi ne kuikala ne bikadilu bimpe, tudi ne bua kushintulula nsombelu wetu. Netuitabe bua muntu mukuabu alue kutulongesha tshitudi ne bua kuenza anyi? Anu bantu badi badipuekesha ne badi bitaba bua babalongeshe ke badi mua kupeta diakalenga dia kumvua Bible.

Kadi muntu mukuabu uvua ne muanzu munene mu bukalenge bua Kandake mukalenge mukaji wa bena Etiopia mmutushile yeye tshilejilu tshilenga. Uvua upingana mu Afrike mu dikalu diende divua tubalu tuenda tukoka pavua Filipo mulue kudiye. Filipo wakamuebeja ni uvua umvua bivuaye ubala. Muntu au kumuambila ne budipuekeshi buonso ne: ‘Ndi mua kujingulula munyi, bikala muntu kayi mundeje?’ Pakafika muntu au ku diumvua Dîyi dia Nzambi, wakatambula. Pashishe, ‘wakaya mu njila wenda usanka.’​—Bienzedi 8:27-39.

Bantemu ba Yehowa ba bungi batu bantu bapuekele. Lumingu luonso elu batu balonga ne bantu bapite pa miliyo isambombo ku nzubu yabu. Bantu miliyo ya bungi mbamone ne: kulonga Bible ne kumvua malu adimu kudi kupetesha muntu disanka, bualu Bible udi uleja mushindu wa kuikala ne nsombelu muimpe. Udi uleja kabidi tshintu tshilenga tshidi bantu mua kutekemena ne muoyo umue, ne udi ubambuluisha bua kumanya Nzambi bimpe. Wewe pebe udi mua kupeta diakalenga edi.

[Tshimfuanyi mu dibeji 7]

Biakakolela Nâmana bua kuitaba malu avua muena mudimu wa Elisha umuambila

[Tshimfuanyi mu dibeji 7]

Tudi tupeta disanka patudi tumvua Bible