Udi mua kupeta diakalenga dia kumvua Bible

BIBLE udi ne malu mimpe adi Nzambi mufundishe. Udi utuambila bua tshinyi tudi ne muoyo, bua tshinyi tudi tukenga ne tshidi tshituindile mu matuku adi kumpala. Udi utuambila kabidi tshitudi mua kuenza bua kuikala ne disanka, bua kupeta balunda ne tshia kuenza padi ntatu itukuata. Bualu budi ne mushinga kupita onso mbuobu ebu: tudi tulongamu malu a Yehowa Tatu wetu wa mu diulu. Patudi tumanya malu onso aa, tudi tupeta disanka dia kuikala ne muoyo.

Bible udi ufuanyikija kulonga mua kumanya Nzambi ne kudia biakudia. Yezu wakamba ne: ‘Muntu kikadi ne muoyo bualu bua biakudia nkayabi, ikale nawu bualu bua mêyi onso adi apatuka mukana mua Nzambi.’ (Matayo 4:4; Ebelu 5:12-14) Anu bu mudi kudia biakudia bidi biambuluisha mubidi dituku dionso kuikala ne mushinga bua kushala ne muoyo, ke mudi kabidi kubala Dîyi dia Nzambi dituku dionso ne mushinga bua kupeta muoyo wa tshiendelele.

Tutu basue kudia bualu Yehowa mmutufuke bua tuikale tumvua bimpe patudi tudia ne bualu kudia kudi kukumbaja dijinga dietu dinene. Kadi kudi dijinga dikuabu dinene ditudi ne bua kukumbaja. Yezu wakamba ne: ‘Bena diakalenga mbadi badimanye ne: mbapele [mu nyuma], bualu bua Bukalenge bua mu diulu mbuabu.’ (Matayo 5:3, Muanda Mulenga Lelu) Tuetu bafike ku diumvua Dîyi dia Nzambi, netuikale ne disanka bualu tudi bakumbaje dijinga dietu edi.

Bamue bantu batu bamona ne: mbikole bua kumvua Bible. Tshilejilu, udi mua kujinga ne: bakuambuluishe miaba idibu bakula bua bilele biudi kuyi mumanye anyi miaba idibu bakula mu nsumuinu. Kudi kabidi milayi idibu  bafunde mu bimfuanyi idi muntu mua kumvua anu padiye ubala mvese mikuabu ya mu Bible idi yakula pa bualu abu. (Danyele 7:1-7; Buakabuluibua 13:1, 2) Nansha nanku, udi anu mua kufika ku diumvua Bible. Mmushindu kayi?

Diakalenga didi muntu yonso mua kupeta

Bible n’Dîyi dia Nzambi. Nzambi udi utulejamu disua diende. Udi wela meji ne: Nzambi uvua mua kutupesha mukanda udi muntu kayi mua kumvua anyi udi anu bantu badi balonge bikole mua kumvua anyi? Yehowa kêna mua kuikala ne muoyo mubi wa mushindu eu to! Yezu Kristo wakamba ne: ‘Ntatu kayi wa munkatshi muenu, biamulomba muanende mushipa, neamupe nyoka? Muomumue, biamulombaye dikela, neamupe kaminyiminyi? Nunku nuenu bantu babi, binuamanya mua kupa bana benu bintu bimpe, Tatu wenu wa mu diulu kêna upa batu bamulomba nyuma muimpe anyi?’ (Luka 11:11-13) Nunku umanye ne: udi mua kumvua Bible. Wewe musambile Nzambi ne muoyo umue neakuambuluishe bua kumumvua. Nansha bana badi mua kumvua malongesha manene adimu.​—2 Timote 3:15.

Nansha mudibi bikengela kudienzeja bua kumvua Bible, patudi tumumvua tudi tupeta bukole. Tshilejilu, pakajuka Yezu ku lufu wakamuenekela bayidi bende babidi ne kuakula nabu pa milayi ya mu Bible. Luka udi wamba ne: ‘Wakabangila ku Mose ne ku baprofete bonso, wakabajinguluila malu akafundabu mu Mukanda wa Nzambi wonso bua bualu buende.’ Tshiakenzeka ntshinyi? Dilolo adi, pavua bayidi abu bela meji ku bivua Yezu mubalongeshe, bakambilangana ne: ‘Mitshima yetu kayakadi itema munda muetu anyi, pakadiye utuambila malu mu njila, pakadiye utujinguluila Mukanda wa Nzambi?’ (Luka 24:13-32) Bayidi abu bavua ne disanka pakumvuabu Dîyi dia Nzambi bualu ditabuja diabu diakakola ne bakatuadija kutekemena malu avua Nzambi mulaye ne muoyo mujima.

Kumvua Dîyi dia Nzambi kudi kutusankisha bikole ne kudi kutukolesha anu bu mutu kudia biakudia bilenga kutusankisha. Kulonga Bible ki mmudimu udi utonda to. Kadi udi ne bua kuenza tshinyi bua kumumvua? Tshiena-bualu tshidi tshilonda tshidi tshileja mudi “dimanya dia malu a Nzambi” mua kukusankisha.​—Nsumuinu 2:1-5.

[Tshimfuanyi mu dibeji 4]

Anu bu mutu tatu wambuluisha bana bende, ke mutu Yehowa pende utupesha nyuma wende bua kumvua Bible