Udi muvuluke anyi?

Dibala bia nimero ya Tshibumba tshia Nsentedi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

• Bua tshinyi kudi malu mabi a bungi pa buloba lelu eu?

Tshimue tshintu tshidi tshikebesha malu mabi mmeji mabi adi nawu bantu. (Genese 8:21) Tshikuabu tshidi ne: bantu ba bungi kabena bamanye bimpe menemene tshidi disua dia Nzambi to. Kabidi, Satana udi yeye muine ntuadijilu wa bubi, udi utungunka ne kudibueja mu malu a bantu.​—1/1, dibeji 4-6.

• Mmalu kayi malenga adi mua kumueneka bua dîyi dimpe diamba mu tshikondo tshiakane? (Nsumuinu 12:25)

Dîyi dimpe didi mua kukolesha dieyemena dia muntu, kumusaka bua kuenza bualu, kumupesha dikima ne kumusaka bua kueyemena bakuabu. Kabidi, patudi tukeba bua kuela bakuabu kalumbandi, bitu bituambuluisha bua kumona malu mimpe adibu benza.​—1/1, dibeji 16-17.

• Ntshinyi tshivua mu mushiete wa tshipungidi?

Muvua mabue abidi mafunda mikenji ne mana. Panyima pa Kola mumane kutombokela Mose, bakatekamu mulangala wa Alona bu tshimanyinu bua bantu babi ba mu tshikondo atshi. (Ebelu 9:4) Bavua mua kuikala bumushe mulangala ne mana mu mushete eu kumpala kua kubanjijabu ntempelo wa Solomo.​—15/1, dibeji 31.

• Bua tshinyi bena Yuda ba mu tshikondo tshia Nehemiya bavua ne bua kulua ne nkunyi ku ntempelo?

Mu Mikenji ya Mose kabavua balomba bua kufila nkunyi bu mulambu to. Kadi mu matuku a Nehemiya bivua bikengela nkunyi ya bungi bua kuosha milambu pa tshioshelu.​—1/2, dibeji 11.

• Tshitupa tshia mukanda tshia Muratori ntshinyi?

Ntshitupa tshia mukanda kampanda wa mu muakulu wa Latin. Mukanda eu bavua baufunde bangabanga mu tshiena-Greke pabuipi ne kundekelu kua bidimu bia 100 kunyima kua Yezu. Tshidi ne mêna a mikanda mianyisha ya mu Bible ya mifundu ya tshiena-Greke ya bena Kristo, mudi kabidi malu adi atangila mikanda ne bantu bavua bayifunde.​—15/2, dibeji 13-14.

• Bua tshinyi mukalenge mukaji Washeti wa bena Pelasa wakabenga ne muoyo umue bua kuya kuitaba kudi mukalenge? (Esetê 1:10-12)

Bible kêna utuambila tshivua mu meji ende to. Bamue bantu badi bamba ne: uvua mua kuikala mumone ne: kuya kusomba pamue ne benyi ba mukalenge bakavua bakuatshike maluvu kuvua bu kudipuekesha milongo. Anyi uvua mua kuikala ne tshitunu. Nunku nansha muvuaye muimpe kumona, uvua tshilejilu tshibi bua bakaji bakuabu ba mu bukalenge bua Pelasa.​—1/3, dibeji 9.

• Mulambu wa Yezu udi utupikula mushindu kayi?

Mulambu wa Yezu udi mua kutupikula ku bubi butudi bapiane ne ku lufu ludi bubi ebu butukebele. (Lomo 6:23) Mulambu eu udi upangisha bena Kristo bua kuikala ne kondo ka muoyo kadi kabapisha. Patudi tuitabuja mulambu eu, katuena kabidi ne buôwa kumpala kua Nzambi to. (1 Yone 2:1)​—15/3, dibeji 8.

• Ndilongesha kayi ditudi tupeta mu mukenji uvua ukandika bua kulambila kana ka mukoko mu mabele a mamuaku? (Ekesode 23:19)

Kuenza nunku kuvua mua kuikala tshilele tshia bampangano bua kulokesha mvula. (Lewitiki 20:23) Nzambi utu mupeshe nyama mikaji mabele bua kukolesha nawu tuana tuayi. Nunku kulambila kana mu mabele a mamuaku nkubenga kunemeka malanda adi Nzambi muenze kana ne mamuaku. Mukenji eu udi uleja luse ne bulenga bidi nabi Nzambi.​—1/4, dibeji 31.