Kutshinyi to, Yehowa udi nebe!

HAROLD UREY muena malu a siyanse wakapeta difutu dia Nobel. Harold wakamba bua matuku atshilualua kukadi mpindieu bidimu bipite pa 50 katshia bela bombe nikleyere ya kumpala ne: “Netuikale tudia ne buôwa, tulala ne buôwa, tuenda ne buôwa ne tufua ne buôwa.” Lelu’eu mbipepele bua kumanya bua tshinyi bantu badi ne buôwa! Dituku dionso edi mu bikandakanda badi bakula bua bantu badi benzelangana malu a tshikisu, bashipangana ne kabidi bua masama mabi a dikema.

Bu mutudi bena Kristo, tudi bamanye tshidi malu aa aleja. Adi aleja ne: tudi mu ‘matuku a ku nshikidilu’ wa ndongoluelu eu mubi wa malu, matuku avua Bible mudianjile kuleja ne: mmatuku a ‘malu makole.’ (2 Timote 3:1) Tshidibi tudi anu bamanye ne: mu katupa kîpi emu Yehowa Nzambi neenze bulongolodi bupiabupia muikala malu onso makane. (2 Petelo 3:13) Kadi lelu’eu katuena mua kuikala ne buôwa anyi?

Mudi bena mudimu ba Nzambi bamona buôwa

Yakoba ne Davidi ne Eliya bavua bumvue buôwa pakamueneka njiwu kampanda. (Genese 32:6, 7; 1 Samuele 21:11, 12; 1 Bakelenge 19:2, 3) Abi kabiena bisua kuleja ne: kabavua ne ditabuja to. Bakeyemena Yehowa ne muoyo mujima. Kadi, bu muvua Yakoba ne Davidi ne Eliya bikale bantu anu bu tuetu, buôwa buvuaku anu mua kubakuata. Yakobo muyidi wa Yezu wakafunda ne: ‘Eliya wakadi muntu wa mutshima muomumue netu.’​—Yakobo 5:17.

Tudi petu mua kumvua buôwa patudi tupeta lutatu kampanda anyi patudi tuela meji ku bualu budi mua kutufikila mu matuku atshilualua. Buôwa bua mushindu eu ki mbubi to. Bible mene udi wamba ne: Satana Diabolo mmudisuike bua ‘kuluangana mvita’ ne bantu ‘badi batumikila mikenji ya Nzambi ne badi ne bumanyishi bua Yezu.’ (Buakabuluibua 12:17) Nansha mudi mêyi aa akumbanyina nangananga bena Kristo bela manyi, Paulo wakafunda ne: ‘Bantu bonso badi basue kuikala bena kanemu mu Kristo Yezu nebakengeshibue.’ (2 Timote 3:12) Nansha nanku, katuzakadi bikole padi ntatu itukuata to. Bua tshinyi?

‘Nzambi udi Nzambi wa lupandu’

Muimbi wa Misambu Davidi wakafunda ne: ‘Nzambi [mulelela] udi Nzambi wa lupandu.’ (Musambu 68:20) Misangu ne misangu Yehowa mmuleje ne: udi ne bukole bua kusungila nabu bantu bende; utu ubasungila nansha mu ntatu mikole anyi ubapesha bukole bua kuyitantamena. (Musambu 34:17; Danyele 6:22; 1 Kolinto 10:13) Tshilejilu, katshia wewe watuadija kulonga Bible, mmalu kayi audi muvuluke adi aleja ne: Nzambi wetu udi ‘Nzambi wa lupandu’?

Tangilabi mu mukanda wa Index des publications de la Societé Watch Tower * bua kuenza makebulula pa malu avua menzeke, tshilejilu bu mudi: Mvula wa kabutu, mushindu uvuabu bapandishe Lota ne bana bende ba bakaji mu Sodoma ne Amola, dipatuka dia bena Isalele mu Ejipitu, disabuka diabu dia Mbuu Mukunze ne bua muvuaye mupangishe Hamana bua kushipesha bena Yuda bonso. Wewe ubala malu aa ne welelapu meji, ditabuja diebe nedikole ne kabidi neushale mumanye amu ne: Yehowa udi Nzambi wa lupandu. Nebikuambuluishe bua kutantamena mateta ne dikima dionso kuyi ufua ne buôwa to.

Bilejilu bia matuku etu aa

Udiku mua kuvuluka bantu badi batantamena ntatu badi muaba uudi musombele anyi? Kudi bamue bavuabu bele mu buloko bua ditabuja diabu. Kudi mua kuikala muena Kristo ukadi mukulakaje udi utungunuka ne kuenzela Nzambi mudimu nansha mudiye ne tusamasama. Anyi kudi bansonga badi kabayi babuelakana mu  malu a panu nansha mudi balongi nabu babatatshisha bikole. Kudi kabidi baledi badi badikoleshila bana kabayi ne muena dibata nabu anyi kudi bena Kristo bakuabu batshidi bajike badi benzela Yehowa mudimu nansha mudi dikala nkayabu nunku kadiyi dibasankisha. Ntshinyi tshiudi mua kulongela kudi bantu bonso aba? Ditabuja dia bantu ba mushindu eu didi mua kukuambuluisha bua kutantamena ntatu ne kuikala ne dikima padi malu akufikila.

Bidi bikengela kuikala ne dikima padibu batukeba bilumbu anyi batukengesha. Bidi kabidi bikengela dikima padi lungenyi lutuambila ne: Yehowa ki mmutunange to. Kadi mbimpe tuikale bamanye ne: Kristo wakafuila muntu yonso. (Galatia 2:20) Nanku tudi mua kusemena pabuipi ne Yehowa katuyi ne buôwa anyi ditshina dia tshianana tshianana. Patudi tudiumvua ne: ki mbitukumbanyine bua Yehowa kutunangaye, tudi mua kuvuluka mêyi a Yezu aa avuaye muambile bayidi bende, ne: ‘Kabatu bapana mishamisha ibidi ku dikuta dikese anyi? Mushamusha umue kawena upona panshi, anu bitabuja Tatu wenu. Nsuki ya ku mitu yenu mene idi mibala yonso. Nunku kanutshinyi, mushinga wenu udi mutambe wa mishamisha ya bungi.’​—Matayo 10:29-31.

Tshibejibeji tshia Tshibumba tshia Nsentedi ne tshia Réveillez-vous! bidi ne malu a Bantemu ba Yehowa ba matuku etu aa bavua batantamene ntatu ne dikima dionso. Abi kabiena bisua kumvuija ne: kabavua bumvue kanyinganyinga pavuabu ne ntatu eyi to. Tshidibi, kabavua balekele kanyinganyinga aka kabafikisha ku dilekela ditendelela Yehowa to. Malu abu adi mua kukuambuluisha pebe bua kutantamena ntatu kuyi utshina. Tutangilayi bilejilu bibidi patupu.

Njiwu yakashintulula nsombelu wende

Mu Réveillez-vous! wa dia 22 Tshisanga 2003, muvua tshiena-bualu etshi: “Njiwu yakashintulula nsombelu wanyi.” Mu tshiena-bualu etshi badi bakula bua ntatu ivua Ntemu wa Yehowa wa mu ditunga dia Kenya (diende Stanley Ombeva) mupete pavuabu bamukume ku mashinyi. Bua ditshibuka diende, wakajimija mudimu ne diambuluisha dionso divuaye upeta ku mudimu eu. Muanetu Ombeva udi ulonda ne: “Bu muvua kusama kuanyi kuenda kukola, ngakamona ne: apa kuanyi kuajiki, meme kupeta meji mabi, kubanga kutangila anu anyi malu, nkavua anu mpala mukanga. Makuabu matuku mvua anu biji biji ne bilumbu ne bantu.” Nansha muvua Ombeva ukenga mushindu eu, uvua anu ne dikima. Kakalekela dibungama diende edi dimumina mujima, dimufikisha too ne ku dilekela bionso to. Kadi uvua anu mueyemene Yehowa. Udi wamba ne: “Yehowa uvua ungambuluisha bikole mu makenga anyi onso, bingenza too ne bundu mikuabu misangu. Ngakangata dipangadika ne muoyo umue bua kubala ne kuelela meji pa mvese imvua mmona ne: idi mua kunkolesha ku muoyo.”

Bu muvua muanetu Ombeva mulonde malu ende ne muoyo mujima, biakambuluisha bana betu ba bungi bua kutantamena ntatu ne dikima. Tshilejilu, muanetu mukuabu wa bakaji wakafunda ne: “Ngakadila muadi pangakabala tshiena-bualu etshi. Ngakamona ne: ku diambuluisha dia tshiena-bualu etshi, Yehowa udi undeja dinanga ne unkolesha ku muoyo.” Ntemu mukuabu wakafunda ne: “Biena-bualu bia mushindu eu bidi bitukolesha ku muoyo bikole tuetu bonso badi ne nsombelu ya buena eyi ne badi bakenga katuyi tuambila bantu.”

Disama dia mpala

Bualu bukuabu mbudi Herbert Jennings ulonda mu tshiena-bualu tshia ne: “Kanuena bamanye muikala muoyo wenu makelela.” *  Muanetu Jennings wakakenga ne disama dia mpala bikole. Udi wamba bua matuku a ntuadijilu wa kusama kuende ne: “Bivua mvita bua meme kubuela mu bisangilu bia bena Kristo. Nansha nanku, mvua mumanye mudi bisangilu bia bena Kristo ne mushinga wa bungi. Nunku, mvua mbuela mu Nzubu wa Bukalenge anu pakavua bantu bonso bamane kusomba, ne mpatukamu kumpala kua bantu kubanga kupatuka.”

Nansha bua kuyisha bivua bualu bukole. Muanetu Jennings udi wamba ne: “Imue misangu, nansha meme mumane kufika ku nzubu kampanda, mvua mpangila too ne dikima dia kutua mbota bua kudidisha ka-ngonga ka ku tshiibi bua kunzululabu. Kadi tshivua mpingana tshianyima to, bualu mvua mumanye ne: mudimu wetu udiku bua lupandu luetu tuetu ne lua muntu yonso udi witaba malu atudi tumuambila. (1 Timote 4:16) Pashishe, mvua mpeta muoyo mukole, nya ku tshiibi tshikuabu nteta kabidi bua kuyisha. Bu mumvua ntungunuka ne kuyisha, ngakashala ne dinanga dia malu a Nzambi dikumbane, meme kupeta ne bukole bua kuluangana ne disama dianyi.”

Muyuki wa muanetu Jennings mmuambuluishe bantu ba bungi bavua baubale bavua ne bubedi bua muomumue bua kumonabu mua kushala ne muoyo mukole. Tshilejilu, muanetu wa bakaji mukuabu wakafunda ne: “Nkadi mubale Tshibumba tshia Nsentedi ne Réveillez-vous! kukadi bidimu 28, kadi tshivua muanji kubala tshiena-bualu tshimfike ku muoyo bu mudi etshi to. Bu mungakalekela mudimu wa bumpanda-njila (mudimu wa kuikala kuyisha mêba a bungi), ngakadimona bu muboya dipondo, mvua ndiambila munda munda ne: bu meme ne ditabuja dikole tshivua mua kuikala muulekele to. Kadi pamvua mubale mushindu uvua muanetu Jennings mulekele mudimu anu bua kusama kuende, biakangambuluisha bikole bua kutangila tshiakabidi nsombelu wanyi ne lungenyi luimpe. Nzambi uvua bushuwa muteleje masambila anyi!”

Muanetu wa balume mukuabu wakafunda pende ne: “Kunyima kua meme mumane kuikala mukulu mu tshisumbu munkatshi mua bidimu bipite pa dikumi, ngakajinga bua kuanji kubilekela bua disama dia mpala dimvua nadi. Mvua ngumvua bibi pamvua mbala biena-bualu bia malu a mu nsombelu bivua ne malu a dikema a bantu ba Yehowa. Kadi dinanukila dia muanetu Jennings diakankankamija. Ndi mubale tshiena-bualu etshi misangu ne misangu.”

Tuye kumpala katuyi tutshina

Anu bu Ombeva ne Jennings, Bantemu ba Yehowa ba bungi mbatungunuke ne kutendelela Yehowa Nzambi ne dikima nansha mudibu ne ntatu mibi. Wewe muikale mu nsombelu wa mushindu eu, tudi tukuela kalumbandi. Uvuluke ne: ‘Nzambi kêna upanga buakane bua kupuaye muoyo wa mudimu wenu ne wa dinanga dinuakaleja bua dîna diende, panuakakuatshila bansantu mudimu ne panutshidi nubakuatshilawu.’​—Ebelu 6:10.

Anu bu muvua Yehowa muambuluishe batendeledi bende ba kale bua kutshimuna baluishi babu, bia muomumue udi mua kukuambuluisha pebe bua wewe kupita bimpe ne ntatu yonso idi mua kukuluila. Bua bualu ebu, vuluka mêyi avua Yehowa muambile muprofete Yeshaya aa: ‘Kutshinyi, bualu bua ndi nebe, kukenzakanyi bua buôwa nansha, bualu bua ndi Nzambi webe; nenkukoleshe, bulelela, nenkukuatshishe, bulelela nenkujadike ne tshianza tshianyi tshia balume tshia buakane buanyi.’​—Yeshaya 41:10.

[Mêyi adi kuinshi]

[Bimfuanyi mu dibeji 16]

Anu bu Stanley Ombeva (kuulu eku) ne Herbert Jennings (ku dia balume), bantu bavule badi benzela Yehowa mudimu ne dikima

[Mêyi a dianyisha bua tshimfuanyi mu dibeji 14]

Foto wa USAF