Lenga mutshima wa muana

KUTUKU muanji kumvua bibi bua kumona muana kampanda unaya manaya a mvita anyi? Manaya a mushindu eu mmatangalake bikole, adi too ne kudi bana bakese. Kadi mmunyi muudi mua kuambuluisha muana bua kulekelaye manaya a mvita bua kunaya manaya a tshianana? Misionere wa Bantemu ba Yehowa udi muenze matuku a bungi mu Afrike (diende Waltraud) wakapeta mushindu wa kuambuluisha muana mukuabu wa balume bua kulekela manaya a mvita.

Waltraud wakanyema mvita mu ditunga divuaye ne kuya mu ditunga dikuabu. Pakafikaye, wakatuadija kulonga Bible ne mamu uvua ne muanende wa balume wa bidimu bitanu (diende Werner). Misangu yonso ivua Waltraud uya kutangila mamu au, uvua upeta muanende eu unaya ne kangoma ka ndundu (ki kende kantu konso ka kunaya naku kavuaye naku). Kavua wenda ukeba bintu bia kuasa to, kadi uvua anu mufue mu dikakangula ne dikakanga misangu yonso, wenza bu udi welamu masashi.

Waltraud wakebeja Werner ne: “Werner, udi mumanye tshidi tshimfikishe mu ditunga dienu emu anyi? Mbua mvita. Mvua munyeme mu ditunga mumvua kumpala bualu bantu babi bavua bashipangana ne bingoma anu bu tshiebe etshi. Udi umona ne: diasangana bingoma ndimpe anyi?”

Werner wakabungama, ne kumuandamuna ne: “Tòo, ki ndimpe to.”

Waltraud kumuambila ne: “Mmuomu, ki ndimpe to.” Pashishe wakamuebeja ne: “Kadi udiku mumanye bua tshinyi ntu ndua kunutangila wewe ne mamuebe lumingu luonso anyi? Mbualu Bantemu ba Yehowa batu basue kuambuluisha bantu bua kuikalabu mu ditalala ne Nzambi ne bantu nabu kabidi.” Bu muvua mamuende wa Werner muanyishe, Waltraud wakambila Werner ne: “Wewe mumpeshe kangoma kebe aka, nenkimanshe, nenkutuadile kamashinyi ka nkata inayi.”

Werner wakamupesha kangoma aka. Panyima pa mbingu inayi, Waltraud wakamutuadila kamashinyi ka mabaya kavua ne nkata inayi; Werner kusanka bikole.

Utuku pebe upeta dîba dia kuyukila ne bana bebe, uteta bua kulenga mitshima yabu bua kubengabu bintu bia kunaya nabi bidi bienze bu bingoma anyi? Wewe muenze nanku, neupeshe bana bebe dilongesha dikala mua kubambuluisha mu nsombelu wabu mujima.