Tukuatshile Kristo Mukalenge mudimu ne lulamatu

‘Bakamupa bukokeshi, butumbi ne bukalenge, bua bantu bonso, ba bisamba bionso ne ba miakulu yonso bamukuatshile mudimu.’​—DANYELE 7:14.

1, 2. Mmunyi mutudi bamanye ne: Kristo kakapeta bukokeshi bua Bukalenge buende buonso mu 33?

MMFUMU kayi uvua mua kufuila bantu bende ne pashishe kulua kabidi ne muoyo bua kuikala mukalenge wabu? Mmfumu kayi uvua mua kuanji kulua pa buloba apa bua kusaka bantu bende ku dimueyemena ne ku dimulamata, ne pashishe kupingana mu diulu ne kubanga kubakokeshilamu? Anu Yezu Kristo ke uvua mua kuenza malu a nunku ne makuabu kabidi. (Luka 1:32, 33) Mu dia Pentekoste wa 33, kunyima kua Kristo mumane kufua, mubishibue ku lufu ne muye mu diulu, Nzambi ‘wakamupa bua kuikalaye mutu wa malu onso a mu ekeleziya.’ (Efeso 1:20-22; Bienzedi 2:32-36) Eu ke mushindu wakatuadija Kristo kukokesha bantu ndambu mukese. Bantu ba kumpala bakatuadijaye kukokesha bavua bena Kristo bela manyi a nyuma bavua benze Isalele wa mu nyuma, peshi ‘Isalele wa Nzambi.’​—Galatia 6:16; Kolosai 1:13.

² Bidimu bu 30 kunyima kua Pentekoste au wa mu 33, mupostolo Paulo wakajadika ne: Kristo kavua muanji kuangata bukokeshi bua Bukalenge buende buonso to, kadi ukavua ‘mushikame ku tshianza tshikole tshia Nzambi, ku musangu eu windila too ne pavuabu kuvuija badi nende lukuna ditanda dia muinshi mua makasa ende.’ (Ebelu 10:12, 13) Pashishe, batangile ku ndekelu kua bidimu lukama kunyima kua Kristo, mupostolo Yone ukavua mukulakaje wakadianjila kumona mu tshikena-kumona Mukalenge Mutambe bunene Yehowa uteka Kristo Yezu Mukalenge wa Bukalenge buvuabu bafuma ku dijadika mu diulu. (Buakabuluibua 11:15; 12:1-5) Lelu eu, tudi ne malu a bungi adi ajadika ne: Mukalenge Masiya wakatuadija kukokesha mu diulu mu 1914. *

3. (a) Lumu luimpe lua Bukalenge luakangata tshimuenekelu kayi tshikuabu kubangila mu 1914? (b) Nnkonko kayi itudi ne bua kudiela?

³ Bulelela, kubangila mu 1914 lumu luimpe lua Bukalenge nduangate tshimuenekelu tshikuabu tshidi tshisankisha bikole. Kristo udi mpindieu Mukalenge mu Bukalenge bua Nzambi bua mu diulu, nansha mutshidiye ukokesha ‘munkatshi mua badi nende lukuna.’ (Musambu 110:1, 2; Matayo 24:14; Buakabuluibua 12:7-12) Kabidi, mu buloba bujima bantu badi bamulamate badi batumikila bumfumu buende ne muoyo mujima badifila mu mudimu wa dilongesha bantu Bible mu mushindu uvua kauyi muanji kuenzeka katshia bafuka buloba. (Danyele 7:13, 14; Matayo 28:18) Bena Kristo bela manyi a nyuma, ‘bana ba mu bukalenge,’ badi benza mudimu bu ‘milopo bua bualu bua Kristo.’ Badi babambuluisha ne lulamatu luonso kudi bena mu tshisumbu tshinene tshia “mikoko mikuabo” ya Kristo. Bobu aba badi benza mudimu bu batumibue ba Bukalenge bua Nzambi. (Matayo 13:38; 2 Kolinto 5:20; Yone 10:16) Nansha nanku, mbimpe tudikonkonone muntu ne muntu bua kumona ni tudi bushuwa tuitaba bumfumu bua Kristo. Tudiku bamulamate bikole anyi? Mmunyi mutudi mua kuleja ne: tudi balamate Mukalenge udi mu diulu? Kadi tuanjayi kutangila malu adi atusaka bua kulamata Kristo.

Mukalenge udi muakanyine lulamatu lua bantu bende

4. Mmalu kayi akenza Yezu Mukalenge Musungula patshivuaye pa buloba?

⁴ Tudi tulamata Kristo bualu tudi ne dianyisha bua malu akenzaye ne bua ngikadilu yende milenga. (1 Petelo 1:8) Patshivua Yezu Mukalenge Musungula mutshikale pa buloba, wakaleja mu mushindu mukese tshivuaye ne bua kuenza dîba dikalaye ne bua kukokesha buloba bujima mu tshikondo tshidi Nzambi mulongolole. Wakadisha bavua ne nzala, kuondopa babedi, bafofo, balema, bampudi-matshi ne tumama, e kubisha too ne bamue ku lufu. (Matayo 15:30, 31; Luka 7:11-16; Yone 6:5-13) Kabidi, kumanya muvua nsombelu wa Yezu pa buloba kudi kutuambuluisha bua kumanya ngikadilu ikalaye nayi pabangaye kukokesha buloba bujima mu matuku atshidi alua, nangananga dinanga diende divua dimusaka bua kudifila bua bakuabu. (Mâko 1:40-45) Batu balonda muvua Napoléon Bonaparte muambe dimue dituku ne: “Aleksandre ne Kaisa ne Charlemagne ne meme muine tudi benze makalenge manene, kadi midimu yetu minene eyi mienza ne dimanya dietu tuvua bafike ku diyikumbaja bishi? Ku makanda. Anu Yezu Kristo ke wakashila bukalenge buende pa dinanga, ne lelu’eu bantu miliyo mivule mbitabe nansha bua kufua bua bualu buende.”

5. Ntshinyi tshivua tshienza bua ne: bumuntu bua Yezu buikale bukoka bantu bakuabu?

⁵ Bu muvua Yezu muikale mupole malu ne muena bupuekele, malongesha ende ne ngikadilu yende milenga ivua ikolesha bantu bavua bazengele ne ntatu ne majitu. (Matayo 11:28-30) Bana bavua bumvua disanka bua kuya kudiye. Balume bavua ne bupuekele ne busunguluji bakitaba bua kulua bayidi bende. (Matayo 4:18-22; Mâko 10:13-16) Mushindu uvuaye umona ne unemeka bantu bakaji wakafikisha bakaji ba bungi bavua batshina Nzambi ku dimulamata, bamue ba kudibu kufilabu mene dîba diabu, bukole buabu ne bintu biabu bua kumuambuluisha mu mudimu wende.​—Luka 8:1-3.

6. Yezu wakaleja ngikadilu kayi milenga pakafua Lazalo?

⁶ Kristo wakaleja imue ngikadilu milenga menemene ivuaye nayi pakafua mulunda wende Lazalo. Pakamonaye muvua Mariya ne Marta bikale ne kanyinganyinga, biakamutonda bikole, kushikunkaye ne muadi, “kudilaye.” “Lungenyi luende kulubakana” bua kanyinganyinga ne dibungama diakumvuaye, nansha muvuaye mumanye ne: mu katupa kîpi amu uvua ne bua kubisha Lazalo ku lufu. Pashishe, bua muoyo wa dinanga ne luse, Yezu wakenza mudimu ne bukole bua kudi Nzambi, e kujula Lazalo ku bafue.​—Yone 11:11-15, 33-35, 38-44, MMM.

7. Bua tshinyi mbiakanyine bua tuetu kulamata Yezu? (Tangila kabidi kazubu kadi mu dibeji dia 31.)

⁷ Mushindu uvua Yezu munange ne muoyo mujima malu makane ne mukine lubombo ne malu mabi udi utukemesha bikole. Misangu ibidi mijima wakipata ne dikima dionso bangenda-mushinga ba lukuka mu ntempelo. (Matayo 21:12, 13; Yone 2:14-17) Kabidi, patshivuaye pa buloba apa, bakamukeba bilumbu mu mishindu yonso, kupetaye ntatu ne makenga bitu bitufikila tuetu bantu. (Ebelu 5:7-9) Yezu wakumvua kabidi mutu muntu umvua padibu bamukine kakuyi bualu. (Yone 5:15-18; 11:53, 54; 18:38–19:16) Ndekelu wa bionso, wakitaba ne dikima dionso bua kufua lufu lua tshikisu amu bua kukumbaja disua dia Tatuende ne kupetesha bantu bende muoyo wa kashidi. (Yone 3:16) Ngikadilu ya Kristo eyi kayenaku ikusaka bua wewe kutungunuka ne kumukuatshila mudimu ne lulamatu anyi? (Ebelu 13:8; Buakabuluibua 5:6-10) Kadi bua kuikala muntu wa Kristo Mukalenge bidi bikengela kuenza tshinyi?

Malu audi ne bua kuenza bua kuikala muntu wa Kristo

8. Mmalu kayi adibu balomba bantu ba Kristo?

⁸ Ela meji ne: udi musue kulua muena ditunga dikuabu. Pa tshibidilu bitu bilomba bua kukumbaja amue malu manene. Badi mua kulomba bantu badi bajinga bua kulua bena ditunga dikuabu bua bikale ne bikadilu bimpe, bikale ne makanda a mubidi makumbane. Bia muomumue, bantu ba Kristo badi ne bua kutungunuka ne kutumikila mikenji idi ibalomba bua kuikala ne bikadilu bilenga ne makanda mimpe a mu nyuma.​—1 Kolinto 6:9-11; Galatia 5:19-23.

9. Mmunyi mutudi mua kuleja ne: tudi balamate Kristo?

⁹ Yezu Kristo udi kabidi ne bukenji bua kulomba bantu bende bua bamulamate yeye ne Bukalenge  buende. Badi baleja ne: mbamulamate padi nsombelu wabu umvuangana ne malu akabalongeshaye patshivuaye pa buloba. Tshilejilu, badi bateka malu a Bukalenge bua Nzambi ne disua diende kumpala kua bintu bia ku mubidi. (Matayo 6:31-34) Badi kabidi benza muabu muonso bua kuenza malu bu Kristo, nansha padibu mu ntatu mikole. (1 Petelo 2:21-23) Bantu ba Kristo badi kabidi balonda tshilejilu tshiende mu didifila bua kuenzela bakuabu bimpe.​—Matayo 7:12; Yone 13:3-17.

10. Mmunyi mutudi mua kuleja ne: tudi balamate Kristo (a) mu dîku ne (b) mu tshisumbu?

¹⁰ Bayidi ba Yezu badi kabidi baleja ne: mbamulamate padibu benza bua kuikala ne ngikadilu ya buena yende mu mêku abu. Tshilejilu, balume badi baleja ne: mbalamate Kristo Mukalenge wabu wa mu diulu padibu bidikija ngikadilu yende mu malu onso adibu benzela bakaji babu ne bana. (Efeso 5:25, 28-30; 6:4; 1 Petelo 3:7) Bakaji badi baleja mudibu balamate Kristo padibu ne bikadilu bimpe ne kabidi padibu baleja “mutshima wa kalolo ne ditalala.” (1 Petelo 3:1-4; Efeso 5:22-24) Bana badi baleja lulamatu luabu kudi Kristo padibu batumikila baledi babu bu muakenzaye pende. Patshivua Yezu muana mukese, uvua utumikila baledi bende, nansha muvuabu kabayi bapuangane. (Luka 2:51, 52; Efeso 6:1) Bantu ba Kristo badi badienzeja ne lulamatu luonso bua kumuidikija padibu ‘basambangana, banangangane bu bana [ba muntu]’ ne bikale ne “mitshima ya luse.” Badi bakeba bua kufuana Kristo pa kuikala ne ‘mitshima mipuekele, kabayi bashintakaja bubi ku bubi anyi tshipendu ku tshipendu.’​—1 Petelo 3:8, 9; 1 Kolinto 11:1.

Bantu ba Kristo badi balonda mikenji yende

11. Bantu ba Kristo badi batumikila mikenji kayi?

¹¹ Anu mutu bantu badi basue kulua bena ditunga dikuabu ne bua kutumikila mikenji ya ditunga adi, bantu ba Kristo badi pabu balonda ‘mikenji ya Kristo’ pa kuikala ne nsombelu udi umvuangana ne malu onso avua Yezu mubalongeshe ne avuaye mubalombe bua kuenza. (Galatia 6:2) Badi baleja lulamatu luabu nangananga padibu batumikila ‘mukenji wa butumbi’ wa dinanga. (Yakobo 2:8) Mikenji yonso eyi idi ilomba tshinyi?

12, 13. Mmunyi mutudi tukokela ‘mikenji ya Kristo’ ne lulamatu luonso?

¹² Bantu ba Kristo mbena bilema ne mapanga anu bu bantu bonso. (Lomo 3:23) Nanku, badi ne bua kutungunuka ne kuikala ne ‘dinanga dia bana babu ba mu Kristo didi kadiyi ne lubombo’ bua kumonabu mua ‘kunangangana mu mitshima yabu bikole.’ (1 Petelo 1:22) “Bikala muntu ne mukuabo tshilumbu,” bena Kristo badi balonda ne lulamatu mukenji wa Kristo padibu ‘balejangana lutulu, balekelelangana mibi yabu.’ Kutumikila mukenji eu kudi kubambuluisha bua kulengulula bilema bia bakuabu ne kumona malu mimpe adibu mua kubanangila. Kuenaku usanka bua kuikala munkatshi mua bantu badi bavuala dinanga didi “tshisuikidi tshia malu onso a buakane buonso” bualu badi batumikila ne lulamatu luonso Mukalenge wetu udi mutunange anyi?​—Kolosai 3:13, 14.

 ¹³ Yezu wakumvuija kabidi ne: dinanga divuaye nadi divua dinene kupita divua nadi bantu pa tshibidilu. (Yone 13:34, 35) Tuetu banange anu badi batunange, katuakuenza “bualu budi butambe bua banga bantu.” Dîba adi dinanga dietu kadiakuikala dikumbane to. Yezu wakatulomba bua tuetu kuidikija dinanga dia Tatuende pa kunanga too ne bantu badi batukine anyi badi batukengesha. (Matayo 5:46-48) Dinanga edi didi kabidi disaka bakokedi ba Bukalenge bua kusuminyina ne lulamatu mu mudimu wabu munene. Mmudimu kayi au?

Lulamatu luabu ludi lutetshibua

14. Bua tshinyi mudimu wa kuyisha udi ne mushinga wa bungi?

¹⁴ Bantu ba Bukalenge bua Nzambi badi mpindieu ne mudimu munene wa ‘kuyisha bua bukalenge bua Nzambi.’ (Bienzedi 28:23) Kuenza mudimu eu mbualu bua mushinga mukole bualu Bukalenge bua Masiya nebujadikile bantu ne: Yehowa ke udi Mfumu munene ku mutu kua bionso. (1 Kolinto 15:24-28) Patudi tuyisha lumu luimpe, bantu badi batuteleja badi bapeta pabu mushindu wa kulua bantu ba Bukalenge bua Nzambi. Kabidi, Kristo Mukalenge nealumbuluishe bantu bilondeshile mushindu wikalabu bandamune ku mukenji eu. (Matayo 24:14; 2 Tesalonike 1:6-10) Ke bua tshinyi mushindu munene utudi tuleja ne: tudi balamate Kristo mpatudi tutumikila dîyi diende dia kuambila bakuabu malu a Bukalenge.​—Matayo 28:18-20.

15. Lulamatu lua bena Kristo ludi lutetshibua bua tshinyi?

¹⁵ Bushuwa, Satana udi uluisha mudimu eu mu mishindu yende yonso, ne bamfumu ba matunga kabena bitaba bukokeshi bua Kristo budi Nzambi mumupeshe to. (Musambu 2:1-3, 6-8) Ke bualu kayi Yezu wakadimuija bayidi bende wamba ne: ‘Mupika kêna mutambe mfumu wende. Biankengeshabu, nebanukengeshe kabidi.’ (Yone 15:20) Nunku bayidi ba Kristo badi mu mvita ya mu nyuma idi iteta lulamatu luabu.​—2 Kolinto 10:3-5; Efeso 6:10-12.

16. Mmunyi mudi bantu ba Bukalenge bapa “Nzambi bintu bia Nzambi”?

¹⁶ Nansha nanku, bantu ba Bukalenge bua Nzambi badi bashala balamate Mukalenge wabu udi kayi umueneka ne mêsu, eku bikale kabidi banemeka bamfumu ba panu. (Tito 3:1, 2) Yezu wakamba ne: ‘Nupe Kaisa bintu bia Kaisa, nupe Nzambi bintu bia Nzambi.’ (Mâko 12:13-17) Ke bua tshinyi bantu ba Kristo batu batumikila mikenji ya mbulamatadi idi kayiyi ibengangana ne mikenji ya Nzambi. (Lomo 13:1-7) Kadi pakasua kabadi kanene ka bena Yuda bua kupepeja mikenji ya Nzambi pa kutumina bayidi ba Yezu dîyi dia ne: balekele kuyisha, bakandamuna ne dikima dionso kadi ne kanemu bamba ne: bavua ne bua ‘kutumikila mêyi a Nzambi kumpala kua mêyi a bantu.’​—Bienzedi 1:8; 5:27-32.

17. Bua tshinyi tudi ne bua kutantamena mateta a lulamatu ne dikima?

¹⁷ Bulelela, bidi bilomba bua bantu ba Kristo bikale ne muoyo mukole menemene bua kushalabu balamate Mukalenge wabu padibu babakengesha. Nansha nanku, Yezu wakamba ne: ‘Panupendabu ne panukengeshabu ne panushiminyinabu mashimi onso, bua bualu buanyi, nenuikale ne disanka. Nusanke, nuikale ne disanka dingi, bualu bua difutu dienu didi mu diulu ndinene.’ (Matayo 5:11, 12) Bayidi ba Kristo ba kumpala bakadimuena ne abu abidi muvua mêyi aa malelela. Nansha pakabelabu mfimbu bua muvuabu batungunuke ne kuyisha malu a Bukalenge, bakasanka ‘bualu bua bakabadibua ne: Mbakane bua kufuishibuabu bundu bualu bua dîna dia Yezu. Ku dituku ku dituku, mu ntempelo ne mu nzubu yabu, kabakalekela kuyisha bantu ne kubambila lumu luimpe ne: Yezu udi Kristo.’ (Bienzedi 5:41, 42) Nudi ba kuela kalumbandi bua munudi penu anu ne lulamatu mu makenga, mu masama, nansha nuenu bafuishe anyi padibu banuluisha.​—Lomo 5:3-5; Ebelu 13:6.

18. Mêyi avua Yezu muambile Ponto Pilato adi aleja tshinyi?

¹⁸ Dimue dituku Yezu eu uvuabu basungule  bua kulua Mukalenge, wakambila Ponto Pilato ngovena wa bena Lomo ne: ‘Bukalenge buanyi kabuena bua pa buloba ebu; bu bukalenge buanyi buikale bua pa buloba ebu, bantu banyi bakadi kuluangana, [bua] tshifidibu mu bianza bia bena Yuda; kadi katataka bukalenge buanyi kabuena bua kunoku.’ (Yone 18:36) Bua bualu ebu, bantu ba Bukalenge bua mu diulu kabatu bambula bia mvita bua kuluisha muntu anyi balamata ku luseke kampanda padi bantu baluangana nansha. Bua lulamatu luabu kudi ‘Mukalenge wa Ditalala,’ kabatu babuelakana nansha kakese mu malu adi apandulula bantu to.​—Yeshaya 2:2-4; 9:6, 7.

Bantu badi bashala ne lulamatu nebapete difutu dia kashidi

19. Bua tshinyi bantu ba Kristo badi mua kutekemena malu mimpe mu matuku atshilualua?

¹⁹ Bantu badi balamate Kristo ‘Mukalenge wa bakalenge’ badi ne ditekemena dimpe bua matuku atshilualua. Mbindile ne muoyo kulukulu bua kumona mushindu walejaye bukole buende budi Nzambi mumupeshe. (Buakabuluibua 19:11–20:3; Matayo 24:30) Bashadile ba ku ‘bana ba mu bukalenge’ bela manyi a nyuma mbatekemene bua kupeta bumpianyi buabu bua mushinga mukole bua kuikalabu pabu bakalenge mu diulu pamue ne Kristo. (Matayo 13:38; Luka 12:32) “Mikoko mikuabo” ya lulamatu ya Kristo mmindile ne muoyo mujima dîba dikala Mukalenge wabu ne bua kubambila ne: ‘Luayi, nuenu badi basankishibue kudi Tatu wanyi, nupiane [Mparadizu wa pa buloba wa] bukalenge buakanulongoluelabu ku tshibangidilu tshia buloba.’ (Yone 10:16; Matayo 25:34) Nanku, bantu bonso ba Bukalenge badisuike bua kutungunuka ne kukuatshila Kristo Mukalenge mudimu ne lulamatu.

[Mêyi adi kuinshi]

Udi mua kumvuija anyi?

• Bua tshinyi Kristo mmuakanyine bua tuetu kumulamata?

• Mmunyi mudi bantu ba Kristo baleja ne: mbamulamate?

• Tudi basue kulamata Kristo Mukalenge wetu bua tshinyi?

[Nkonko ya dilonga]

[Kazubu mu dibeji 31]

NGIKADILU MIKUABU MINENE YA KRISTO

Dibenga kuikala ne kansungasunga​—Yone 4:7-30.

Luse​—Matayo 9:35-38; 12:18-21; Mâko 6:30-34.

Dinanga dilelela​—Yone 13:1; 15:12-15.

Lulamatu​—Matayo 4:1-11; 28:20; Mâko 11:15-18.

Diumvuilangana​—Mâko 7:32-35; Luka 7:11-15; Ebelu 4:15, 16.

Nkatshinkatshi​—Matayo 15:21-28.

[Tshimfuanyi mu dibeji 29]

Ngikadilu ya Kristo idiku ikusaka bua wewe kumukuatshila mudimu ne lulamatu anyi?

[Bimfuanyi mu dibeji 31]

Tudi tutumikila ‘mikenji ya Kristo’ ne lulamatu luonso patudi tunangangana