Tulonde tshilejilu tshia Yezu mu diambuluisha bapele

BUPELE ne dikengeshangana bidi pa buloba kukadi bidimu ne bidimu. Nansha muvua mikenji ivua Nzambi muelele bena Isalele ilomba bua kuambuluisha bapele ne kukepeshaku dikenga diabu, misangu ya bungi bantu kabavua bayilonda to. (Amosa 2:6) Muprofete Yehezekele wakaleja mushindu uvuabu bakengesha bapele. Wakamba ne: ‘Bena buloba bakukengeshangana patupu, bakunyenga bintu bia bakuabu; bakutatshisha bapele ne bakengi, bakukengesha muntu wa bende wakadi kayi ne bualu.’​—Yehezekele 22:29.

Nansha mu tshikondo tshivua Yezu pa buloba bapele bavuaku ne bantu bavua anu bakengesha bakuabu. Bamfumu ba bitendelelu kabavua baditatshishaku nansha kakese bua bapele to. Bavua bena “lukuka lua biuma” ne bavua ‘banyenga nzubu ya bakaji ba mu lufuila.’ Bavua batamba kuditatshisha bua bilele biabu pamutu pa kuditatshisha bua bakulakaje ne bapele. (Luka 16:14; 20:47; Matayo 15:5, 6) Ke bualu kayi imue misangu mu mufuanu wa Yezu wa muena Samalea wa luse, muakuidi ne muena Lewi bakapita ku luseke lukuabu lua njila pamutu pa kuya kuambuluisha muntu uvuabu batape mputa.​—Luka 10:30-37.

Yezu uvua uditatshisha bua bapele

Miyuki idi yakula bua nsombelu wa Yezu mu Bible idi ileja ne: Uvua mumanye muvua bapele bakenga ne uvua ubumvuila luse bikole. Nansha muvua Yezu musombele mu diulu, wakadienza muntu wa tshianana, kuluaye pa buloba ne ‘kulua mupele bua bualu buetu.’ (2 Kolinto 8:9) Pakatangila Yezu misumba ya bantu, ‘wakadi nabu luse, bualu bua bobu bakadi batata, bakadi bamuangalake bu mikoko idi kayiyi ne mulami.’ (Matayo 9:36) Bualu bua mukaji mupele wa mu lufuila budi buleja ne: Yezu uvua musanke bikole bua makuta makese avua mukaji au muele mu tshibutshilu, kadi ki mbua bintu ‘bia pa mutu’ bivua babanji bele nansha. Bualu buvua mukaji eu muenze buakalenga Yezu ku muoyo bualu mukaji au uvua ‘muele bintu biakadiye nabi bualu, bintu biende bionso bia kudia menemene.’​—Luka 21:4.

Yezu uvua umvuila bapele luse ne uvua kabidi uditatshisha bua bivuabu nabi dijinga. Yezu ne bapostolo bende bavua ne makuta avuabu bambuluisha nawu bena Isalele bavua bapele. (Matayo 26:6-9; Yone 12:5-8; 13:29) Yezu wakalomba bantu bavua basue kuikala bayidi bende bua kuambuluishabu bapele. Tshilejilu, wakambila nsongalume mubanji mukuabu ne: ‘Upane biudi nabi bionso, ubiabanyine bapele, newikale ne bintu mu tshibutshilu mu diulu; ulue kundonda meme.’ Dibenga dia nsongalume eu diakaleja ne: uvua munange biuma bikole kupita muvuaye munange Nzambi ne muntu nende. Ke bualu kayi kavua mukumbane bua kuikala muyidi wa Yezu to.​—Luka 18:22, 23.

Bayidi ba Kristo batu bambuluisha bapele

Kunyima kua lufu lua Yezu, bapostolo ne bayidi bakuabu bakatungunuka ne kuambuluisha bena Kristo nabu bavua bapele. Mu tshidimu tshia 49, mupostolo Paulo wakapetangana ne Yakobo ne Petelo ne Yone, kuyukilabu bua mudimu wa kuyisha lumu luimpe uvua Mukalenge Yezu Kristo mumupeshe. Kumvuanganabu bua ne: Paulo ne Bânaba baye kuyisha bantu ba ‘bisamba’ bikuabu. Kadi Yakobo ne bakuabu bakalomba Paulo ne Bânaba bua ‘bavuluke bapele.’ Ke ‘tshiakenza Paulo ne muoyo mujima.’​—Galatia 2:7-10.

Mu tshikondo tshivua Mfumu Kulaudio mu nkuasa, tshiyole tshikole tshia nzala tshiakenzeka mu bitupa bia bungi bia bukalenge bua bena Lomo. Bena Kristo ba mu Antiokia ‘muntu ne tshiakadiye natshi muntu ne tshiakadiye natshi, bakapangadija bua kukuatshisha nabi bana babu ba mu Kristo ba mu Yudaya; bakenza nunku, bakabituma kudi bakulu mu bianza bia Bânaba ne Shaula.’​—Bienzedi 11:28-30.

Bena Kristo balelela lelu mbamanye pabu ne: bayidi ba Yezu badi ne bua kuambuluisha bapele ne bena dikenga, nangananga bena kuitabuja nabu badi bakenga. (Galatia 6:10) Ke bualu kayi batu bambuluisha bantu badi mu dikenga. Tshilejilu, mu tshidimu tshia 1998 kuakenzeka minanga mikole mvula kayiyi iloka ku Nord-Est kua ditunga dia Brésil. Minanga eyi yakafubisha losa, nkunde ne matala mu madimi, ke kukebeshayi tshiyole tshibi tshia nzala tshivua katshiyi tshianji kuenzeka munkatshi mua bidimu 15. Mu imue miaba nansha mâyi etu a kunua aa avua bualu bukole. Diakamue, Bantemu ba Yehowa ba miaba mikuabu ya mu ditunga adi kuenzabu tusumbu bua kuambuluisha bantu ne bintu. Mu mêba makese tshianana, kukunguijabu  kilo ne kilo ya biakudia ne kubifutshila njila bua kubituma.

Bantemu bavua bafile makuta anyi bimue bintu bakafunda ne: “Tudi ne disanka dia bungi mutudi bambuluishe bana betu, bualu tudi bamanye ne: bualu ebu mbusankishe mutshima wa Yehowa. Katuena mua kupua muoyo tshidi Yakobo 2:15, 16 wamba to!” Mvese eu udi wamba ne: ‘Bikala muanetu mulume wa mu Kristo anyi muanetu mukaji butaka ne bakengela biakudia bia buatshia-buatshia, biabambila umue wenu ne: Yayi bienu talala, nuote kapia, nukute, kadi nuenu kanuyi nubapa bintu bidi mibidi yabu ikengela; ndikuatshisha kayi didiku?’

Mu tshimue tshisumbu tshia Bantemu tshia mu tshimenga tshia São Paulo, mudi Ntemu kampanda muntu mukaji utu uyisha lumu luimpe bikole ne utu ne didipuekesha, kadi muikale mupele. Ntemu eu utu upatata bikole bua kupeta bia kudiambuluisha nabi. Udi wamba ne: “Nansha mundi mupele, dîyi dia Nzambi ndindeje bua tshinyi ndi ne muoyo. Tshiena mumanye tshivua mua kumfikila bu bobu kabayi bangambuluishe kudi Bantemu nanyi to.” Kukadi ndambu wa matuku, mamu eu bivua bikengela bua bamupande, kadi kavua ne mushindu to. Bua lutatu elu, bena Kristo nende bakafila makuta bua bobu kumupanda. Kuambuluisha bena kuitabuja netu badi mu dikenga mushindu eu ntshimanyinu tshia bena Kristo balelela.

Nansha mudi malu a mushindu eu atusankisha, kadi bionso ebi kabiena mua kujikija bupele to. Nansha mudi mbulamatadi ya matunga mabanji ne bimue bisumbu bia pa buloba bujima bilongolola bua kuambuluisha bantu, kabiena mua kujikija bupele to. Kadi tuanji kudikonka: Mmushindu kayi wajikijabu bua kashidi bupele ne malu makuabu adi akengesha bantu lelu?

Malongesha a mu Bible adi ambuluisha bantu bikole

Miyuki ya Yezu idi mu Bible idi imuleja misangu ya bungi ukumbaja majinga a bapele nansha a bantu bakuabu kabidi. (Matayo 14:14-21) Kadi mmudimu kayi uvuaye wangata ne mushinga wa bungi? Dikuabu dituku, kunyima kua Yezu mumane kuambuluisha bantu, wakambila bayidi bende ne: ‘Tuyayi bietu kukuabu mu minga misoko idi pabuipi, mbambileku bualu bua Nzambi.’ Bua tshinyi Yezu wakakosesha mudimu wa diondopa bantu ne dibambuluisha anu bua kuya kuyisha? Udi wamba ne: ‘Ngakuluila bua bualu ebu [mmumue ne: bua kuyisha].’ (Mâko 1:38, 39; Luka 4:43) Nansha muvua Yezu wangata kuambuluisha bantu ne bintu bu bualu buimpe, kadi kuyisha Bukalenge bua Nzambi ke mudimu wende wa kumpala uvuaye nawu.​—Mâko 1:14.

Bu mudi Bible ulomba bena Kristo bua ‘kulonda mu makasa a [Yezu],’ bena Kristo mbamanye bimpe tshia kuteka muaba wa kumpala padibi bikengela kuambuluisha bantu nabu. (1 Petelo 2:21) Anu bu Yezu, bena Kristo badi bambuluisha bena dikenga. Kadi anu bu Yezu, batu bateka mudimu wa kuyisha lumu luimpe lua Bukalenge bua Nzambi kumpala kua malu makuabu onso. (Matayo 5:14-16; 24:14; 28:19, 20) Bua tshinyi kuyisha dîyi dia Nzambi kudi ne mushinga wa bungi kupita mishindu mikuabu ya kuambuluisha bantu?

Malu adi enzeka pa buloba adi aleja ne: padi bantu bumvua mibelu ya mu Bible ne bayitumikila,  badi bapeta mushindu muimpe wa kupita ne ntatu bu mudi bupele. Kabidi mukenji wa mu Bible udi utangila Bukalenge bua Nzambi udi Bantemu ba Yehowa bayisha lelu udi wambuluisha bantu bua kushala batekemene malu mimpe mu matuku atshilualua, bibapesha mushindu wa kutantamena ntatu ya mishindu yonso. (1 Timote 4:8) Tshidibu batekemene ntshinyi?

Dîyi dia Nzambi didi dituambila bua matuku atshilualua ne: ‘Bu mudi mulayi wa Nzambi tudi tutekemena diulu dipiadipia ne buloba bupiabupia mudi buakane buikalemu.’ (2 Petelo 3:13) Imue misangu patubu bakula bua “buloba” mu Mukanda wa Nzambi, batu bakula bua bantu badi basombe pa buloba. (Genese 11:1) Nanku ‘buloba bupiabupia’ budibu balaye mbantu bimpe badi Nzambi munange. Dîyi dia Nzambi didi dileja kabidi ne: mu bukokeshi bua Kristo, bantu bimpe nebapete muoyo wa tshiendelele ne masanka pa buloba bukudimuna mparadizu. (Mâko 10:30) Malu malenga aa mmalongoluela bantu bonso, too ne bapele. Mu ‘buloba bupiabupia’ abu, tshilumbu tshia bupele netshipueke ne mâyi.

[Kazubu/​Tshimfuanyi mu dibeji 7]

YEZU ‘NEAPANDISHE MUNTU MUPELE’ MUSHINDU KAYI?​—Musambu 72:12

BUAKANE: ‘Yeye nealumbuluile bapele bilumbu biabu, neasungile bana ba badi bakengela bintu, neatshibule mukengeshi wabu bitupa bitupa.’ (Musambu 72:4) Mu tshikondo tshiakokesha Kristo buloba bujima, buakane nebuikaleku bua bantu bonso. Kakuakuikala kadidi dikosa dia mishiku to; diodi mene ke didi dipingaja matunga a bungi kunyima.

DITALALA: ‘Mu matuku ende bantu bakane nebikale ne diakalengele, ditalala divule nedikaleku too ne pajimina ngondo tshiendelele.’ (Musambu 72:7) Mvita ne bimvundu ke bidi nangananga bilela bupele pa buloba. Kristo neafile ditalala pa buloba, bualu neajikije mvita ne bimvundu bionso bidi bilele bupele mu bantu.

LUSE: ‘Neafuile udi mutekete ne udi ukengela dikuatshisha luse, neasungile mioyo ya bakengedi. Neapikule mioyo yabu ku tshinyangu ne malu makole, ne mashi abu neikale tshintu tshia mushinga mukole ku mêsu kuende.’ (Musambu 72:12-14) Mu bukokeshi bua Mukalenge Yezu Kristo kakuakuikala kabidi bena dikenga ne bapele ne bantu badibu bakengesha to, bantu bonso nebikale ne disanka ne nebasombe mu buobumue.

BUBANJI: “Biakudia bivulangane pa buloba.” (Musambu 72:16, MMM) Mu bukokeshi bua Kristo biakudia nebikale bungi tshianana. Bantu kabakuikala kabidi ne biakudia bikese ne kakuakuikala biyole bia nzala bidi bilela bupele mu bantu lelu to.

[Tshimfuanyi mu mabeji 4, 5]

 Yezu uvua uditatshisha bikole bua majinga a bapele

[Tshimfuanyi mu dibeji 6]

Mukenji wa mu Bible udi usaka bantu bua kutekemena malu malenga