‘Tudi ne bua kutumikila mêyi a Nzambi kumpala kua mêyi a bantu’

‘Mvita idi mu bianza bia Yehowa’

BILUILU bibidi mbimanyinangane etshi eku etshi eku bua kuluangana mu tshibandabanda kampanda. Munkatshi mua matuku 40 majima, Goleyata tshilobo tshia bena Peleshete udi ujikijila basalayi ba bena Isalele panshi ne bipendu bibi; buôwa bua lufu budi bubakuata!​—1 Samuele 17:1-4, 16.

Goleyata udi uyobola bena Isalele ubelela mbila wamba ne: ‘Sungulayi muntu umue bua tuluangane nende. Yeye muntshimune, munshipe, netushale bapika benu; kadi meme mumutshimune, mumushipe, nudi nushala bapika betu, nutuenzela mudimu. Ndi nduisha tshiluilu tshia bena Isalele lelu ewu. Numpeshe muntu, tuluangane nende babidi.’​—1 Samuele 17:8-10, MMM.

Kale, kuvua tshilele tshia kumona bilobo bibidi biluangana mu dîna dia biluilu biabu. Pavua tshilobo tshia luseke lumue tshitshimuna, tshiluilu tshiabu ke tshivua tshitshimuna. Kadi muntu udi uyobola bena Isalele eu kêna bu musalayi wetu yonso eu to. Mmuntu wa mpolondo udi ukuatshisha buôwa, wa tshikisu tshibi. Kadi bu mudi Goleyata upenda tshiluilu tshia tshisamba tshia Yehowa, udi udikosela nkayende tshibawu tshia lufu.

Eyi ki mmvita bu mvita yetu yonso eyi to. Mmvita idi pankatshi pa Yehowa Nzambi ne nzambi ya bena Peleshete. Kadi Shaula Mukalenge wa bena Isalele udi ukanka ne buôwa pamutu pa kuikala ne muoyo mukole ne kuya ne tshiluilu tshiende bua kuluisha baluishi ba Nzambi.​—1 Samuele 17:11.

Nsongalume kampanda udi weyemena Yehowa

Padi biluilu ebi bimanyinangane, nsongalume kampanda dîna diende Davidi, ukadibu bele manyi bua kulua mukalenge wa Isalele udi ulua kutangila bana babu badi mu tshiluilu tshia Shaula. Padi Davidi umvua bipendu bia Goleyata, udi ukonka ne: ‘Muene Peleshete eu udi kayi mutengula, udi nganyi bua kufunaye bulobo kumpala kua bena mvita ba Nzambi wa muoyo?’ (1 Samuele 17:26) Pavua Davidi umona Goleyata, uvua umona bena Peleshete ne nzambi yabu. Bua tshiji tshikole tshidi natshi Davidi, udi ujinga kuluisha Goleyata muntu uvua kayi mutengula eu bua kuluila Yehowa ne bena Isalele. Kadi Mukalenge Shaula udi umuambila ne: ‘Wewe kuena mua kuya bua kuluangana ne muena Peleshete eu bualu bua wewe utshidi nsongalume.’​—1 Samuele 17:33.

Tangilayi mudi lungenyi lua Shaula ne lua Davidi lushilangane! Shaula yeye udi umona Davidi anu bu muana mukese mulami wa mikoko udi ujinga kuluangana ne muntu wa mpolondo wa tshikisu tshikole. Kadi Davidi yeye, udi umona Goleyata bu muntu udi upenda Yehowa Nzambi Mukalenge wa diulu ne buloba. Davidi udi ne dikima bualu mmushindike ne: Nzambi kêna mua kulekela bapenda dîna diende ne baseka tshisamba tshiende bibi nunku, kayi ne tshidiye wenza to. Padi Goleyata uditua makumbu bua bukole budiye nabu, Davidi yeye udi weyemena Yehowa, bualu udi utangila tshilumbu etshi mushindu udi Nzambi yeye utshimona.

‘Ndualua kuudi mu dîna dia Yehowa’

Davidi mmumanye bua tshinyi udi weyemena Nzambi. Udi uvuluka muvua Nzambi mumuambuluishe bua kusungila mikoko yende kudi nyama wa ours ne wa ntambue. Mulami wa mikoko eu mmushindike ne: Yehowa neamuambuluishe mpindieu bua kuluangana ne muluishi eu udi kayi kutua tshiadi. (1 Samuele 17:34-37) Udi wangata mukaba wa dikupa nawu mabue ne nsoka itanu bua kuluisha Goleyata.

 Davidi udi wangata dipangadika edi dia kuluangana mvita mikole eyi bualu udi utekemena ne: Yehowa neamupeshe bukole. Udi wambila muena Peleshete eu kayi nansha utshina ne: ‘Wewe udi ulua kundi ne muele wa mvita ne difuma ne difuma dia kabenda, kadi meme ndualua kuudi mu dîna dia Yehowa, Nzambi wa bena mvita ba bena Isalele uwakufunyina bulobo kumpala kuende. Yehowa neakufile mu tshianza tshianyi lelu eu. Bantu bonso ba pa buloba nebamanye ne: Nzambi udi munkatshi mua bena Isalele bulelela; ne bantu bonso ba mu tshisumbu etshi nebamanye ne: Yehowa kêna usungila bantu bua muele wa mvita ne bua difuma, bualu bua mvita idi mu bianza bia Yehowa.’​—1 Samuele 17:45-47.

Biakapita bishi? Bible udi wamba ne: ‘Davidi wakapita muena Peleshete bukole ku tshieledi [tshimue tshia] dibue; wakatapa muena Peleshete, wakamushipa; kadi Davidi kakadi ne muele wa mvita mu tshianza tshiende.’ (1 Samuele 17:50) Kavua ne muele wa mvita mu tshianza tshiende to, kadi Yehowa Nzambi ke uvua mumupeshe bukole. *

Bualu ebu budi buleja ne: Davidi uvua weyemena Yehowa mu mvita eyi. Padibi bikengela kutumikila bantu anyi kueyemena bukole bua Yehowa, katuelakanyi to. ‘Tudi ne bua kutumikila mêyi a Nzambi kumpala kua mêyi a bantu.’ (Bienzedi 5:29) Pashishe, tuetu tumona ntatu idi itukuata mushindu udi Yehowa Nzambi uyimona, netumone ntatu ya mikole anu bu mitekete.

[Mêyi adi kuinshi]

[Kazubu/​Tshimfuanyi mu dibeji 9]

GOLEYATA UVUA BUNENE KAYI?

Samuele wa kumpala 17:4-7 udi wamba ne: Goleyata uvua bule bupite bua coudées isambombo anyi pabuipi ne metre asatu. Kazaku ka tshiamu kavuaye uvuala kadi kaleja kabidi bunene ne bukole buende. Kavua ne kilo 57! Difuma diende divua ne mutshi mule, muikale ne lusongo lua tshiamu lua bujitu bua kilo 7. Bualu bua dikema, bia-mvita bia Goleyata bivua ne bujitu kupita too ne Davidi muine!