Nkonko ya babadi

Ntshinyi tshidi tshikoka “biuma bia mu bukua bisamba” bua bilue mu “nzubu” wa ntendelelu mulelela?​—Hagai 2:7, MMM.

Yehowa uvua muambe mukana mua muprofete Hagai ne: “Nenzakaje bisamba bionso, biuma bia mu bukua bisamba nebipuile munemu, nenguuje Nzubu wa tshijila ewu ne lumu.” (Hagai 2:7, MMM) ‘Dizakeja bisamba’ ke didi dikoka “biuma” bia mu bukua bisamba, tuamba ne: bantu badi banange bulelela, bua balue mu ntendelelu mulelela anyi? Diandamuna didi ne: Tòo.

Tutangilayi tshidi tshizakeja, bisamba ne tshipeta tshia dizakeja dine. Bible udi wamba ne: ‘Ba mu bisamba bia bende badi badisangisha popamue bua bafune bulobo, ne bantu ba bende badi bapangadija meji a malu a patupu.’ (Musambu 2:1) ‘Malu a patupu’ adibu ‘bapangadija’ mbua kutungunuja makalenge abu. Badi bazakala bikole bua bukalenge buabu kupita bua bintu bionso.

Kumanyisha lumu luimpe lua Bukalenge bua Nzambi kudi Bantemu ba Yehowa benza pa buloba bujima kudi kuteka bukokeshi bua bisamba mu njiwu. Bushuwa, Bukalenge budi nabu Yezu Kristo mu bianza ‘nebutshibule makalenge [adi bantu benze] aa onso bitupa bitupa, nebuabutule.’ (Danyele 2:44) Mu malu atudi tuyisha mudi mukenji wa dilumbuluisha udi uzakeja bukua bisamba. (Yeshaya 61:2) Ne dizakeja edi didi dikola padi mudimu wa kuyisha uya kumpala ne udiunda menemene. Dizakeja divuabu balaye mu Hagai 2:7 didi dipatula tshinyi?

Mu Hagai 2:6 tudi tubala ne: ‘Bualu bua Yehowa wa misumba udi wamba ne: Papita tshikondo tshîpi, nenzakaje diulu ne buloba, mâyi manene ne buloba bûme.’ Mupostolo Paulo wakatela mêyi adi mu mvese eu pavuaye mufunde ne: ‘Wakutulaya wamba ne: Musangu umue mukuabu kabidi meme nenzakaje, ki mbuloba nkayabu, kadi diulu kabidi. Dîyi edi, Musangu umue mukuabu, didi dituleja diumusha dia bintu bidi bizakajibua bu bintu bienjibua, bua bintu bidi kabiyi bizakajibua [Bukalenge] bishale.’ (Ebelu 12:26, 27) Eyowa, bulongolodi ebu nebuzakajibue bua kubutudibua buonso ne kushila bulongolodi bupiabupia bua Nzambi muaba.

Bantu badi banange bulelela kabena balue mu ntendelelu mulelela bualu badi bazakeja bukua bisamba to. Tshienzedi tshidi tshibakoke kudi Yehowa ne mu ntendelelu wende ntshia muomumue ne tshidi tshizakeja bukua bisamba, tuamba ne: lumu luimpe lua Bukalenge bua Nzambi budi bukokesha, ludibu bayisha pa buloba bujima. Dimanyisha dia “lumu luimpe lua tshiendelele” didi dikoka bantu badi badiakaje bua balue mu ntendelelu mulelela wa Nzambi.​—Buakabuluibua 14:6, 7.

Mukenji wa Bukalenge mmukenji wa dilumbuluisha ne wa lupandu. (Yeshaya 61:1, 2) Tshipeta tshia diumanyisha tshidi ne nseke ibidi: kuzakeja bukua bisamba ne kulua kua biuma bia bukua bisamba ku butumbi bua Yehowa.