Ntshinyi tshidi Nzambi ujinga bua buloba?

BUA tshinyi utu musue kuendakana mu lupangu lulengeja bimpe ne bilongo bia mupuya muimpe ne bia mekala-mekala? Bua tshinyi utu usanka pautu ubandila dijiba dilenga dia mâyi a kazeze anyi mpata mialabale? Bua tshinyi utu wanji wimana bua kuteleja patu tunyunyi tuimba tusambu tuimpe kulu kua mitshi? Bua tshinyi utu kabidi usanka paudi ubandila mudi tuana tua mbuji tutumpika tunaya ne tunyunguluka mamu watu?

Nkonko yonso eyi idi ne diandamuna anu dimue. Bualu Nzambi uvua mutufuke bua tusombe mu Mparadizu. Ke muaba uvuaye muteka baledi betu ba kumpala Adama ne Eva. Tudi bapetele dijinga dia kusomba mu Mparadizu kudibu, ne bobu pabu kudi Mufuki wabu Yehowa Nzambi. Yehowa uvua mumanye ne: tuetu bantu tuvua ne bua kuikala ne disanka mu Mparadizu bualu uvua mutufuke bua tuikale tusanka ne bintu bilenga bia pa buloba buetu ebu.

Bua tshinyi Yehowa wakafuka buloba? ‘Wakabufuka bua bantu bashikamepu.’ (Yeshaya 45:18) Nzambi “wakafuka buloba” ne wakapesha Adama ne Eva budimi bua Edene buvua muaba mulenga wa kusombela. (Yelemiya 10:12; Genese 2:7-9, 15, 21, 22) Bavua ne bua kuikala basanka pavuabu babandila misulu ivuamu, bilongo ne mitshi. Bavua bamona nyunyi ibuka mulu ne nyama ya mishindu yonso yendakana pa buloba kayiyi ibenzela bualu. Mishipa ya mishindu yonso ne nyama mikuabu ya mu mâyi ivua inayila mu mâyi matoke too. Bualu bua mushinga mukole ku bionso ebi mbua se: Adama ne Eva bavua basombe pamue bu mulume ne mukaji. Bavua ne bua kulela bana, ne bobu ne ndelanganyi yabu bavua mua kualabaja mikalu ya Mparadizu.

Nansha mudi buloba kabuyi mparadizu lelu, tudi mua kubufuanyikija ne nzubu muimpe mudi dîku dia disanka disombele. Buloba buetu ebu budi ne bionso bidi bikengela bua bantu kuikalabu ne disanka bu mudi: butoke, lupepele, mâyi ne biakudia. Mmunyipu mututu tuanyisha butoke ne luya lua dîba ne mushindu utu ngondo ukenkesha butuku! (Genese 1:14-18) Muinshi mua buloba tudi ne bintu  bitudi mua kutemesha bua kupeta luya bu mudi mabue a makala ne kasolonyi. Luendu lua dimata dia mvula ne mushindu udi misulu idiela mu mikuabu bidi bitupetesha mâyi. Ndekelu wa bionso, bisonsa bidi bibuikile buloba bidi bibulama anu bu mutu tapi ya mu nzubu minene ilama siman.

Anu mutudi mua kuikala ne biakudia bia bungi mu nzubu, ke mudi kabidi pa buloba pikale biakudia bia bungi. Ku diambuluisha dia biakudia bivule bidi mu madimi ne bimuma bia bungi, Yehowa ‘udi ututumina bikondo bia bufuke, uuja mioyo yetu ne disanka.’ (Bienzedi 14:16, 17, MMM) Bu mudi buloba buimpe nunku, tshinkayibi muikalabu pikala Yehowa ‘Nzambi wa disanka’ mua kubukudimuna mparadizu!​—1 Timote 1:11, NW.

 [Mêyi a dianyisha bua bimfuanyi mu dibeji 2]

TSHIZUBU: Buloba: NASA photo; Mitoto: NASA, ESA and AURA/​Caltech