Badi balekelela bakulakaje ne babakengesha

PAVUA nsentedi kampanda wenda unyunguluka butuku, mubidi wakamuela mashika bua bualu buakamonaye. Wakamona bitalu bia bakulakaje babidi (mulume ne mukajende) bavua badishipe pa kutumpika ku dididishi dia nzubu wabu uvua ku tshisasa tshia muanda mukulu. Nansha muvua didishipa diabu divuayija mubidi, tshivua tshitambe kunyingalaja ntshivua tshibasake bua kudishipa. Bakapeta kabeji mu mpaya wa mulume kamba ne: “Tudi tudishipa bualu muanetu wa balume ne mukajende badi anu batutatshisha ne batukengesha.”

Bualu ebu budi mua kuikala bukemesha bikole, kadi tshidi tshibasake bua kudishipa tshikadi bualu bua pa tshibidilu. Tudi mua kuamba ne: badi bakengesha bakulakaje pa buloba bujima. Tumonayi bilejilu:

• Mu dikonkonona kampanda diakenzabu mu ditunga dia Canada, bakulakaje 4 pa lukama bakamba muvuabu babakengesha, nangananga kudi balela babu. Kadi bakulakaje ba bungi badi bumvua bundu anyi buôwa bua kuakula bua ntatu yabu. Mu bulelela badi mua kuikala bakengesha bakulakaje batue ku 10 pa lukama.

• Tshikandakanda tshikuabu tshidi tshiamba ne: “Nansha mudi bena mu mêku a mu ditunga dia Inde bamba mudibu balamatangane bikole, bungi bua bakulakaje badi bana babu kabatshiyi banange, budi buenda buvula.”​—India Today.

• Tshisumbu kampanda tshia mu États-Unis tshidi tshitangila malu a bakulakaje tshidi tshiamba ne: bilondeshile makumi adibu benze, “batu bakengesha anyi biba bena Amerike ba bidimu 65 ne pa mutu batue ku muliyo 1 anyi 2 kudi bantu batu babalama anyi batubu beyemene.” Muena mbulamatadi mukuabu wa mu tshimenga tshia San Diego (mu Californie) udi wamba bua dikengesha bakulakaje ne: “Ntshimue tshia ku bilumbu bitambe bunene bidi bena mbulamatadi ne bua kuluisha lelu.” Udi wamba kabidi ne: “Tshilumbu etshi netshidiunde bikole mu bidimu bidi kumpala ebi.”

• Mu tshitupa tshia Canterbury, mu ditunga dia Nouvelle-Zélande, bantu badi ne buôwa bua mushindu udibu bakengesha bakulakaje badi ne biuma kudi balela babu, nangananga balela badi banua diamba, maluvu anyi basue manaya a mfranga. Bungi bua bakulakaje badibu bakengeshe mu Canterbury mbubande bikole: mu 2002 buvua bua bantu 65, kadi mu 2003 bukavua ku 107. Mutangidi wa tshisumbu kampanda tshivua tshienza bua kulama bakulakaje badibu  bakengesha udi wamba ne: “Pa kufuanyikija ne bidi bienzeka, bungi ebu mbukese menemene.”

• Tshikandakanda kampanda tshidi tshiamba ne: Kasumbu ka balumbuluishi ba mu Japon kadi kaleja ne: “Badi ne bua kutabalela bakulakaje badibu bakengesha kupita bana badibu bakuata ku bukole anyi bakaji badibu batuta.” (The Japan Times) Bua tshinyi? Tshidi tshiandamuna ne: Bualu “patudi tufuanyikija dikengesha dia bana anyi dia bakaji ne dia bakulakaje, dia bakulakaje kaditu ditamba kumueneka to. Bualu misangu mikuabu bakulakaje batu bamona ne: bobu ke badi ne bualu padi bana babu babakengesha, ne kabidi mbulamatadi ne bakokeshi mbapangile bua kujikija tshilumbu atshi.”

Bilejilu bikese ebi bidi bitusaka bua kudiebeja ne: Bua tshinyi badi bakengesha bakulakaje ba bungi nunku ne babalekelela? Dimue dituku malu adiku mua kulengela anyi? Bakulakaje badi mua kutekemena tshinyi?