Nkonko ya babadi

Bua tshinyi mu Mikenji ya Mose bavua bamona bimue bintu bitu bienzeka ku mubidi wa muntu bu bivua bimuvuija ‘ne bukoya’?

Nzambi wakafuka bitupa bia lulelu bua bantu badi baselangane badisankishe ne balelangane. (Genese 1:28; Nsumuinu 5:15-18) Kadi mu Lewitiki nshapita wa 12 ne wa 15 mudi mikenji idi itangila bukoya budi bufumina ku diela dia bilumi, ku dimona katshietshi ne dilela muana. (Lewitiki 12:1-6; 15:16-24) Mikenji ayi ivua yambuluisha bena Isalele bua kuikala ne bukole bua mubidi ne bikadilu bimpe. Ivua ileja kabidi mudi mashi mikale a tshijila ne muvuabi bikengela bua bababuikidile mibi yabu.

Mikenji ivua itangila bitupa bia lulelu eyi ivua yambuluisha bena Isalele bonso bua kuikala ne bukole bua mubidi. Mukanda kampanda udi wamba ne: “Mukenji uvua ukandika disangila matuku avua mukaji ku tshijila uvua ulama bantu ku amue masama a bitupa bia lulelu . . . ne uvua kabidi wepula bantu bakaji ku masama a kansere ka bitupa bia lulelu.” (The Bible and Modern Medicine) Mikenji eyi ivua ilama tshisamba tshia Nzambi ku amue masama avuabu kabayi bamanye anyi kabayi ne mushindu wa kuajingulula bipepele. Mankenda a bitupa bia lulelu avua kabidi avudija lulelu lua tshisamba tshia bantu bavua Nzambi mulaye lulelu luvule ne bubanji. (Genese 15:5; 22:17) Mikenji eyi ivua yambuluisha kabidi bena Isalele mu nsombelu mikuabu. Pavuabu bayitumikila, balume ne bakaji bavua balonga mua kudikanda ku majinga abu a disangila dia mulume ne mukaji.

Tshidibi, tshilumbu tshinene tshia mishindu ya bukoya bua ku bitupa bia lulelu tshivua tshitangila dipueka anyi dijimija dia mashi. Mikenji ivua Yehowa muele pa bidi bitangila mashi kayivua anu ilongesha bena Isalele muvua mashi mikale a tshijila to, kadi ivua kabidi ileja muaba wa pa buawu udi nawu mashi mu ntendelelu wa Yehowa, nangananga pa bidi bitangila milambu ne dibuikidila dia mibi.​—Lewitiki 17:11; Dutelonome 12:23, 24, 27.

Nunku malu avua mikenji eyi ilomba avua atangila dipanga bupuangane dia bantu. Bena Isalele bavua bamanye ne: Adama ne Eva kabavua mua kulela bana bapuangane panyima pa bobu bamane kuenza mpekatu. Bana babu bonso bavua ne bua kukenga bua mpekatu wabu, bakalua bapange bupuangane ne bakatuadija kufua. (Lomo 5:12) Bua bualu ebu, baledi bavua ne bua kulela bana bapange bupuangane ne bena mpekatu, nansha muvua Nzambi mulongolole bua bantu badi mu dibaka bikale balela bana bapuangane.

Malu avua Mikenji ilomba bena Isalele kaavua abavuluija anu mpekatu uvuabu bapiane, kadi avua abaleja kabidi ne: bavua dijinga ne mulambu udi upikula uvua mua kubuikidila mpekatu yabu ne kupingaja bantu ku bupuangane. Milambu ya nyama ivuabu bafila kayivua ikumbaja malu aa to. (Ebelu 10:3, 4) Nunku Mikenji ya Mose ivua ne bua kubafikisha kudi Kristo ne kubambuluisha bua kumvuabu ne: bavua ne bua kubafuila luse ne bavua mua kupeta muoyo wa tshiendelele anu ku diambuluisha dia mulambu mupuangane wa Yezu.​—Galatia 3:24; Ebelu 9:13, 14.