“Tshimenga tshitambe bulenga tshia mu Galela”

MUTANTSHI wa kilometre 6 ne tshitupa ku Nord-Ouest kua Nazaleta, muaba uvua Yezu mukolele, kuvua tshimenga tshikuabu tshidi Evanjeliyo kayiyi mitele nansha. Kadi Flavius Josèphe mufundi wa malu a kale muena Yuda wa mu bidimu lukama bia kumpala, wakatshibikila ne: “Tshimenga tshitambe bulenga tshia mu Galela.” Tshivua tshimenga tshia Sepphoris. Ntshinyi tshitudi bamanye bua tshimenga etshi?

Panyima pa lufu lua Helode Munene, imue misangu mu 1 kumpala kua bikondo bietu ebi, bena mu Sepphoris bakatombokela bena Lomo. Ke tshiakafikisha bena Lomo bua kubutula tshimenga tshiabu. Antipa muana wa Helode wakapiana Galela ne Pérée, ke kusungulaye bikulu bia Sepphoris bua kuashilapu tshimenga tshiende tshikulu tshipiatshipia. Bakatshibakulula mu ngibakilu wa bena Greke ne bena Lomo, kadi bantu ba bungi bavuamu bavua bena Yuda. Bilondeshile Mulongeshi Richard Batey, tshiakalua “muaba munene wa mbulamatadi uvua utangila Galela ne Pérée,” too ne pakalua Antipa kuibaka tshimenga tshia Tibelia mu 21 bikondo bietu ebi ne kutshipingaja pa muaba wa Sepphoris. Mu tshikondo atshi, Yezu uvua musombele mu musoko uvua pabuipi natshi.

Mulongeshi James Strange, wakakalula bintu muinshi mua buloba mu Sepphoris, udi wela meji ne: tshimenga atshi tshivua ne tshilaminu tshia mikanda ya kale, tshibutshilu, tshilaminu tshia bingoma, banke, nzubu ya mbulamatadi, ne bisalu bia bintu bia mabumba ne mmuenu, bintu bia biamu, bilengejilu ne biakudia bia mishindu yonso. Bavua benzamu bilamba ne babisumbisha; muvua makazen a bitunga, bintu bia mu nzubu, manananshi, ne bintu bikuabu. Bantu bavuamu mu tshikondo atshi, bavua mua kuikala pankatshi pa 8 000 ne 12 000.

Yezu uvuaku mupitshile mu tshimenga etshi, tshivua mutantshi wa dîba dimue ne Nazaleta anyi? Evanjeliyo kayena yandamuna lukonko elu. Kadi mukanda mukuabu (The Anchor Bible Dictionary) udi wamba ne: “Bidi bimueneka ne: njila uvua ufumina ku Nazaleta uya ku Kana wa mu Galela uvua upitshila mu Sepphoris.” (Yone 2:1; 4:46) Wewe ku Nazaleta lua mu tshibandabanda, udi mua kumona mukuna wa mu Sepphoris udi ne bule bua metre 120. Bamue bantu batu bamba ne: misangu mikuabu, pavua Yezu muambe ne: ‘Kabena bamanye mua kusokoka musoko udi muasa pa mukuna,’ uvua wela meji ku tshimenga atshi.​—Matayo 5:14.

Panyima pa dibutuka dia Yelushalema mu 70 bikondo bietu ebi, Sepphoris wakalua tshimenga tshinene tshia bena Yuda mu Galela ne pashishe bakalua kutekamu Sanedren anyi kabadi kakulu ka bena Yuda. Mu kupita kua bidimu, tshiakalua muaba uvua bilongelu binene bia bena Yuda.

[Karte/​Tshimfuanyi mu dibej 32]

(Bua kumona malu bimpe, tangila mu mukanda)

Mbuu wa Galela

GALELA

Kana

Tibelia

SEPPHORIS

Nazaleta

PÉRÉE

[Mêyi a dianyisha bua tshimfuanyi mu dibeji 32]

Mabungu: Makalula kudi Wohl Archaeological Museum, Herodian Quarter, Jewish Quarter. Owned by Company for the Reconstruction of the Jewish Quarter in the Old City of Jerusalem, Ltd