Dilongesha dia lutambishi ne budipuekeshi

MUANDA kampanda wakenzekela Mukalenge Davidi udi uleja dishilangana didi pankatshi pa budipuekeshi bulelela ne lutambishi lubi. Muanda eu wakenzeka kunyima kua Davidi mumane kunyenga Yelushalema ne mumuvuije tshimenga tshikulu. Davidi uvua umona Yehowa bu Mukalenge mulelela wa Isalele, ke bualu kayi wakalongolola bua balue ne Mushete [uvua uleja dikala dia Yehowa muaba uvuawu] mu tshimenga etshi. Bu muvua Davidi wangata bualu ebu ne mushinga wa bungi, wakaleja disanka diende patoke pavuaye wenda ulonda bakuidi bavua bambule Mushete. Bena mu Yelushalema bakamona mukalenge wabu ‘wenda utupika’ ne ‘uja maja ne bukole buende buonso.’​—1 Kulondolola 15:15, 16, 29; 2 Samuele 6:11-16.

Kadi Mikala mukaji wa Davidi kakasanka pamue ne bantu bavua basanka aba to. Wakatangidila pa dididishi, ne pamutu pa kuanyisha mushindu uvua Davidi utumbisha Yehowa, ‘wakamulengulula mu mutshima wende.’ (2 Samuele 6:16) Bua tshinyi Mikala wakenza bualu ebu? Bidi bimueneka ne: uvua udimona ne mushinga wa bungi bualu uvua muana wa Shaula mukalenge wa kumpala wa Isalele ne mpindieu uvua mukaji wa mukalenge muibidi wa Isalele. Uvua mua kuikala muele meji ne: bayende uvua mukalenge, kavua ne bua kuikala mudipuekeshe milongo bua kusanka mushindu wa muomumue ne bantu ba tshianana. Lutambishi luende elu luakamuenekela ku mushindu wakakidilaye Davidi pakapinganaye kumbelu. Wakamuambila ne dîyi dia nkabu ne: ‘Mona bu mudi butumbi bua mukalenge wa Isalele lelu pakamuangaye bilulu biende ku mêsu kua bakaji ba bena mudimu bende bu mudi muntu wa tshianana umuangalaja bilulu biende kayi ne bundu!’​—2 Samuele 6:20.

Ntshinyi tshiakenza Davidi bua mêyi mabi aa? Wakakanyina Mikala umuambila ne: Yehowa wakabenga tatuende Shaula ne wakamusungula yeye. Davidi kumulejaye kabidi ne: “Nendipuekeshe meme kabidi bikole, nemmueneke muntu wa tshianana ku mesu kuebe, kadi ku mesu kua bena mudimu bakaji baudi wamba aba, nebantumbishe.”​—2 Samuele 6:21, 22, MMM.

Bulelela, Davidi uvua mupangadije bua kutungunuka ne kusadila Yehowa ne budipuekeshi. Ngikadilu eu udi utuambuluisha bua kumvua tshidi Yehowa mubikidile Davidi ne: “muntu udi mutshima wanyi musue.” (Bienzedi 13:22; 1 Samuele 13:14) Bushuwa, Davidi uvua ulonda tshilejilu tshitambe bulenga tshia budipuekeshi bua Yehowa Nzambi nkayende. Nunku mêyi a Davidi akambilaye Mikala ne: “Nendipuekeshe” adi afumina ku muaku wa pa muanda wa mu buena Ebelu utubu bangata kabidi bua kumvuija mushindu udi Nzambi nkayende umona bantu. Nansha mudi Yehowa muikale mutambe bunene ku mutu kua diulu ne buloba bujima, Musambu 113:6, 7 udi wamba bua bualu buende ne: ‘udi winangila panshi [umbuka mu muanzu anyi mu buneme buende bua kuenza bualu ne muntu udi mushadile] bua kumona diulu ne buloba. Udi ubisha mupele mu dimfuenkenya, udi ujula mukengi udi mushikame mu diala.’

Bu mudi Yehowa muikale udipuekesha, kabiena bikemesha mudiye mukine ‘mêsu adi ne dipetu’ a bena lutambishi. (Nsumuinu 6:16, 17) Bua ngikadilu eu mubi uvua nende Mikala bua muvuaye mupepeje muntu uvua Nzambi musungule bua kuikala mukalenge, wakapangila diakalenga dia kulelela Davidi muana. Wakafua kayi mulele to. Ndilongeshapu kayi dia mushinga buetu tuetu! Bonso badi basue kulengelela Nzambi badi ne bua kulonda mêyi aa: ‘Nudiluatshishe ne bupuekele, bua kukuatshishangana; bualu bua Nzambi udi upidia badi badisue, kadi udi upa badi badipuekesha ngasa.’​—1 Petelo 5:5.