Eyowa, udi mua kupeta disanka

IMUE misangu, kabitu bipepele bua kupeta disanka dilelela ne didi dinenga. Bitu nanku nangananga bualu bantu ba bungi batu badikebela kua tshianana. Bivua bimpe bu bobu mua kuikala ne mulunda mukumbane wa kueyemena uvua mua kubaleja njila muimpe.

Bible ke udi mua kubaleja njila muimpe au udibu nende dijinga. Anji tangila anu mukanda wende umuepele, mukanda wa Misambu. Mmukanda muenza ne misambu ya tshijila 150 mimbila Yehowa Nzambi, ne tshiabibidi tshiayi mifunda kudi Davidi Mukalenge wa mu Isalele. Kadi tshidi ne mushinga wa bungi kupita dimanya dia bantu bavua baufunde ntshia se: bakaufunda ku nyuma wa Mulunda wa bantu mutambe bunene, Yehowa. Nunku tudi mua kuikala bajadike ne: mukanda eu udi ne mibelu ya kudi Nzambi idi mua kutuambuluisha, ne udi uleja njila wa kupetela disanka.

Bafundi ba Misambu bavua bajadike ne: disanka ditu difumina ku malanda mimpe adi nawu muntu ne Nzambi. Umue wabu wakafunda ne: “Disanka didi kudi muntu udi unemeka Yehowa.” (Musambu 112:1) Kakuena malanda adi bantu mua kudia, bintu bidibu mua kupeta anyi mudimu udi muntu mua kuenza udi mua kumutuadila disanka dipite didi difumina ku dikala umue wa ku “bantu badi ne Yehowa, Nzambi wabo.” (Musambu 144:15) Nsombelu wa basadidi ba bungi ba Nzambi ba lelu’eu udi ujadika mudi bualu ebu bulelela.

Tuangate tshilejilu tshia Susanne, ukadi ne bidimu bipite pa 40 mpindieu. * Wakamba ne: “Lelu eu bantu ba bungi badi babuela mu bimue bisumbu bua kukumbaja pamue bimue bipatshila anyi bua kuenza pamue amue malu. Kadi bua bobu kuangata muntu yonso udi mu tshisumbu atshi bu mulunda bitu anu mu mpukapuka, bishilangane ne bantu ba Yehowa. Tuetu tudi banangangane bualu tudi banange Yehowa. Tudi tudiumvua bimpe ne bantu bonso badi basadila Nzambi, nansha tuetu muaba kayi. Buobumue ebu budi bulengeja bikole  nsombelu wetu. Mbanganyi bakuabu badi mua kuamba mudibu ne balunda ba miaba ne nkoleshilu mishilangane, ne ba matunga mashilangane menemene? Ndi mua kuamba ne muoyo wanyi mujima ne: kuikala umue wa ku basadidi ba Yehowa ke kudi kupetesha disanka.”

Maree (wa mu ditunga dia Écosse) wakamanya pende ne: bua muntu kupeta disanka, mbimpe ikale mu malanda mimpe ne Yehowa. Wakamba ne: “Kumpala kua meme kumanya bulelela bua mu Bible, mvua ne tshibidilu tshia kutangila filme mibi itu yenza buôwa ayi. Kadi butuku tshivua ndala anu meme mukuate nkuruse mu tshianza bua kuipata mikishi imvua mmona mu filme ayi. Kadi pangakamanya bulelela ne kulekela ditangila filme ayi, malanda anyi ne Yehowa akangambuluisha bua meme kulala tshiyi ne buôwa, muikale ne disanka dia kusadila Nzambi udi ne bukole mupite bademon ne mikishi ivuabu bafuanyikija.”

Kueyemena Yehowa kudi kutupetesha disanka

Mufuki ngua bukole buonso ne udi ne meji kaayi ndekelu; katuena mua kuela mpata nansha mikese bua bualu ebu. Bu muvua Davidi mumanye ne: uvua mua kueyemena Yehowa ne muoyo wende wonso ne uvua mua kunyemena kudiye, wakafunda ne: ‘Disanka didi kudi muntu udi uvuija Yehowa tshieyemenu tshiende.’​—Musambu 40:4.

Maria wakamba ne: “Malu andi mumone mu ditunga dia Espagne ne mu matunga makuabu mmandeje ne: patudi tuenza malu bilondeshile disua dia Yehowa, nansha muoyo wetu kauyi musue, tudi amu tufika ku bipeta bitambe buimpe. Tudi tupeta disanka bualu misangu yonso njila wa Yehowa ke utu anu muimpe.”

Andreas, mukulu muena Kristo udi muenze mudimu mu matunga a bungi a ku Mputu, wakamanya pende ku malu akamuenzekela ne: tudi mua kueyemena Yehowa. Wakamba ne: “Pantshivua nsonga, tutuanyi udi kayi Ntemu uvua unsaka bua kukeba mudimu uvua mua kumpetesha mfranga ya bungi. Wakumvua bibi menemene pangakabanga mudimu wa kuyisha bua mêba a bungi ne kubenga kueyemena tshidibu babikila ne: bukubi bua mfranga ya pansio. Kadi mu mudimu wanyi wa diyisha eu, tshitu muanji kukengela tshintu, ne ndi mupete masanka a bungi adi bantu bakuabu bakeba.”

Mu 1993, bakabikila Felix bua kuambuluishaye mu mudimu wa didiundisha nzubu ya biro bia filiale bia Bantemu ba Yehowa mu tshimenga tshia Selters, mu Allemagne. Pakajika mudimu au, bakamubikila bua kuluaye muena dîku dia Betele kuine aku. Wakenza tshinyi? Udi wamba ne: “Ngakitaba dibikila edi, muikale ne dielakana. Kadi mpindieu unkadi muenze muaba eu bidimu bitue ku dikumi, ndi mutuishibue ne: Yehowa wakandamuna masambila anyi. Mmumanye tshidi tshitambe buimpe buanyi meme. Pandi mmueyemena ne  muoyo mujima ne mmulekela undombola, ndi mmupesha mushindu wa yeye kundeja tshidiye musue bua meme kuenza.”

Susanne utukadi batele uvua musue bua kuenza mudimu wa bumpanda-njila, kadi bivua bikole bua yeye kupeta mudimu wa bianza wa mêba makese. Kunyima kua dindila tshidimu tshijima bua kupeta kuoku ka-mudimu, wakeyemena Yehowa ne kuenzaye malu munga mushindu. Wakamba ne: “Ngakuuja formilere wa bumpanda-njila bua pa tshibidilu. Mvua mudilamine makuta makumbane bua majinga anyi a pa tshibidilu a ngondo mujima. Ngondo au wakalua ngondo wa dikema kundi! Mvua ne disanka dia bungi bua mudimu wanyi wa buambi, kadi mudimu wa bianza kauvua anu umueneka. Kadi anu muvua Yehowa mulaye, kakandekela to. Dituku dia ndekelu dia ngondo au, ngakapeta mudimu. Dîba adi meme kumanya ne: bushuwa ndi anu ne bua kueyemena Yehowa! Bualu ebu bua kumpala bumvua mumone mu mudimu wanyi wa bumpanda-njila mbungambuluishe bua kuikala ne nsombelu mulenga ne wa disanka.”

Kuitaba mibelu ya kudi Nzambi kudi kutupetesha disanka dia bungi

Mukalenge Davidi wakenza bimue bilema binene. Imue misangu uvua dijinga ne mibelu mimpe. Tudiku badiakaje bua kuitaba mibelu ne diyisha bu muvua Davidi mudiakaje anyi?

Aida wa mu ditunga dia France, wakamona umue musangu ne: uvua muenze tshilema tshinene. Wakamba ne: “Mvua ntamba kuditatshisha anu bua kuakajilula malanda anyi ne Yehowa. Kakuvua bualu bukuabu buvua ne mushinga to.” Wakaya kumona bakulu bena Kristo bua bamuambuluishe. Yeye mumane kuenza bidimu bipite pa 14 mu mudimu wa bumpanda-njila, udi wamba mpindieu ne: “Ndi nsanka bikole bua kumanya ne: Yehowa uvua mumbuikidile tshilema tshianyi!”

Kuitaba mibelu ya kudi Nzambi kudi mua kutuepula ku dienza tshilema. Judith wakumvuija ne: “Pamvua ne bidimu 20, mvua mulamatangane tshifiefie ne mulume mukuabu muena Allemagne, utuvua tuenza nende mudimu pamue, ne wakenza muende muonso bua kungambisha. Mmuntu uvuabu banemeka, ukavua ne mudimu muimpe, ne ukavua musele! Meme kumona ne: mvua ne bua kusungula bua kutumikila mikenji ya Yehowa anyi kuyibenga. Meme kulondela baledi banyi bualu ebu. Tatu kakadiangana tshibanga bua kumvuluija tshivua Yehowa mutekemene kundi nansha. Wakaya nanyi njila buludi, kungambilaye anu malu amvua nawu dijinga! Nansha nanku, muoyo wanyi uvua anu ukeba mua kudibingisha. Mu mbingu yakalonda Mamu uvua uyikila nanyi dilolo dionso bua kundeja mushinga wa mikenji ya Nzambi ne mudiyi ipandisha muntu. Ndi ne dianyisha dia bungi bua muvua muoyo wanyi mukokibue kakese kakese kudi Yehowa. Bua mibelu ya Yehowa ne dilongesha diende, ndi mupete disanka dia bungi. Ndi muenze bidimu bimpe bivule mu mudimu wa bumpanda-njila ne mupete mulume muena Kristo mulenga udi munnange ne udi munange Yehowa ne muoyo wende mujima.”

Bushuwa, malu adi menzeke aa adi aleja bimpe mudi mêyi a Davidi aa malelela: ‘Disanka didi kudi muntu udi ne ditomboka diende diumushibue, ne udi ne bubi buende bubuikidibue! Disanka didi kudi muntu udi Yehowa kayi ubadila dipambuka diende dia ku buakane.’​—Musambu 32:1, 2.

Disanka didi difumina ku dileja bakuabu muoyo wa luse

Davidi wakafunda ne: ‘Disanka didi kudi muntu udi wela meji a luse bua muntu udi ne mubidi mutekete! Yehowa neamupandishe mu dituku dia dikenga. Yehowa neamulame, neamukube bua yeye ashale ne muoyo. Nebamubale bu muntu udi muvudijibue disanka.’ (Musambu 41:1, 2) Muoyo wa luse ne dinanga uvua nawu Davidi kudi Mefibosheta (muana wa Yonatana mulunda wa pa muoyo wa Davidi) udi tshilejilu tshimpe tshia mushindu utudi ne bua kuikala tutangila muntu udi ukenga.​—2 Samuele 9:1-13.

Marlies udi muenze bumisionere munkatshi mua bidimu 47 uvua mupete diakalenga dia kuyisha munkatshi mua bantu bavua banyeme bitupa bivua ne ndululu bia mu Afrike, bia mu Asia ne ku Mputu wa ku Est. Wakamba bua bantu aba ne: “Badi ne ntatu kabukabu ne pa tshibidilu badi badiumvua ne: kabena batamba kubangata ne mushinga to, kabidi se: badi babenzela malu ne kansungasunga. Kuambuluisha bantu ba mushindu eu misangu mivule kutu kufila disanka.”

 Marina ukadi ne bidimu bitue ku 40 wakafunda ne: “Bu mundi tshiyi muanji kusedibua, bitu binkolesha menemene ku muoyo bua kumanya ne: kudi bantu badi mua kungambuluisha. Bualu ebu budi bunsaka panyi bua kukolesha bantu bakuabu pa kubabikila ku telefone anyi pa kubafundila mikanda. Ba bungi mbaleje dianyisha diabu. Ndi mpeta disanka pandi ngambuluisha bakuabu.”

Dimitar ukadi ne bidimu bipite pa 20 wakamba ne: “Mamu mmunkoleshe nkayende. Pantshivua muana, mvua nsanka pavua mutangidi wa Dilonga dia Mukanda dia Tshisumbu undongesha mua kuyisha lumingu luonso. Ndi amu ne dianyisha bua dinanukila diende. Ndi mumanye ne: kabivua bipepele misangu yonso bua kunsakaye kumpala nansha.” Bua dianyisha didiye nadi bua mushindu uvuabu bamuambuluishe, Dimitar mmudifile pende mpindieu mu diambuluisha bakuabu, wamba ne: “Ku ngondo yonso ntu mpatuka mu buambi ne nsonga umue ne muntu mukulumpe umue.”

Mukanda wa Misambu udi kabidi utela malu makuabu adi atuambuluisha bua kuikala ne disanka. Udi uleja mushinga wa kueyemena bukole budi Yehowa ufila pamutu pa kudieyemena nkayetu: “Disanka didi kudi bantu badi ne bukole buabo [kudi Yehowa].”​—Musambu 84:5.

Corinna udi mua kujadika bualu ebu. Wakaya mu ditunga muvua dijinga dinene dia bamanyishi. Udi wamba ne: “Ngakatuilangana ne muakulu mukuabu, bilele bikuabu ne ngelelu wa meji mukuabu. Ngakumvua bu ne: mvua pa buloba bukuabu. Mvua ngumvua bibi bia dikema bua kuyisha munkatshi mua bantu bamvua tshiyi mumanye. Ngakalomba diambuluisha kudi Yehowa, ne ku bukole buende ngakakumbana mua kuyisha dituku dionso mu tshitupa atshi tshia kule. Pakapita matuku, kuyisha mushindu eu kuakapepela anu bu mâyi. Ngakatuadija kulonga Bible ne bantu ba bungi, ne bualu ebu bumvua mumone butshidi anu bungambuluisha. Ngakalonga ne: tudi mua kujikija bipumbishi bidi bimueneka kabiyi kujikija ku bukole bua Yehowa.”

Bulelela, malu a bungi adi atuambuluisha bua kupeta disanka, bu mudi kudia bulunda ne Nzambi ne bantu bende, kueyemena Yehowa ne muoyo mujima, kuitaba mibelu yende ne kuikala ne muoyo wa luse kudi bantu bakuabu. Tuetu tuendela mu njila ya Yehowa ne tutumikila mikenji yende, udi mua kutupesha masanka a bungi.​—Musambu 89:15; 106:3; 112:1; 128:1, 2.

[Mêyi adi kuinshi]

[Tshimfuanyi mu dibeji 12]

Maria

[Tshimfuanyi mu dibeji 13]

Maree

[Tshimfuanyi mu dibeji 13]

Susanne ne Andreas

[Tshimfuanyi mu dibeji 15]

Corinna

[Tshimfuanyi mu dibeji 15]

Dimitar