Televizion udi ndeji muimpe wa bana anyi?

IMUE misangu, bidi mua kumueneka bimpe kulekela bana benu batangila televizion panudi nuenza midimu mikuabu. Kadi ntshinyi tshidi televizion mua kubenzela?

Tshikandakanda kampanda tshidi tshileja ne: “Nansha bana ba mu maboko badi mua kumvua malu adi enzeka ku televizion.” (The New York Times) Mu dikonkonona dikuabu didibu benze matuku aa, bavua baleje bana ba tshidimu tshimue bindidimbi bîpi bia ku televizion muvua mamu mukuabu unaya ne tshintu kampanda. Tshikandakanda etshi tshidi tshiamba ne: “Pavua mamu eu utshina tshintu etshi, bana bavua babenga pabu bua kunaya natshi ne misangu ya bungi bavua batshina, babipisha kuisu anyi badila. Kadi pavua mamu eu utshisankidila, bana bavua bitaba pabu bua kunaya natshi kakuyi bualu.”

Bidi bimueneka ne: malu adi enzeka ku televizion adi mua kulenga bana. Netuambe tshinyi bua mushindu udi malu aa mua kubashintulula? Munganga Naoki Kataoka (utu ulongesha mushindu wa kuondopa bana ku tshilongelu tshia baminganga tshia Kawasaki mu tshimenga tshia Kurashiki mu ditunga dia Japon) mmukonkonone bana bavule badi batalale talalaa ne badi kabayi ne disanka kuisu. Bana bonso aba bavua batangila televizion anyi video munkatshi mua matuku a bungi. Tshilejilu, muana umue wa balume wa bidimu bibidi kavua mua kuyukila ne bantu ne kavua mumanye miaku ya bungi to. Uvua utangila video dinda too ne dilolo matuku onso katshia wakumbaja tshidimu tshimue. Mamuende wakitaba mubelu wa munganga wa kulekesha muana dimona dia video ne kutuadija kunaya nende. Ke muana kubanga kumanya miaku ya bungi. Nunku, mbimpe baledi bikale banaya ne bana babu.

Yehowa Nzambi, Mufuki wa dîku, uvua muleje mushinga wa kuyukila ne bana. Wakambila bena mu tshisamba tshiende kale ne: ‘Nuenu nenuyishe bana benu [mêyi a Nzambi], nuenu nenusombelele nabu bua mêyi au, panuashikama mu nzubu wenu, ne panuenda mu njila, ne panualala, ne panuabika.’ (Dutelonome 6:7) Nunku, baledi ke badi ne bua kulongesha bana babu bimpe ‘njila udibu ne bua kuendela’ mu mêyi ne mu bienzedi, ki mmudimu wa televizion to.​—Nsumuinu 22:6.