Bakaledibua mu tshisamba tshisungula kudi Nzambi

‘Yehowa, Nzambi wenu, wakanusungula bua nuenu nuikale bantu bende.’​—DUTELONOME 7:6.

1, 2. Mmalu kayi manene akenzela Yehowa bantu bende, ne mmalanda kayi akadiabu nende?

MU 1513 kumpala kua Yezu kuledibua, Yehowa wakadia malanda a mushindu mupiamupia ne basadidi bende ba pa buloba. Tshidimu atshi, wakapuekesha ditunga dia Ejipitu milongo ne kupatulaye bena Isalele mu bupika. Mu dienza nunku, wakalua Musungidi ne Mfumuabu. Kumpala kua Nzambi kubenzelaye bualu ebu, wakambila Mose ne: ‘Wambile bena Isalele ne: Ndi Yehowa, ne meme nennupatule muinshi mua majitu a bena Ejipitu, nennusungile ku bupika buabu, nennupikule ne diboko diolola ne dilumbulula dikole. Nennuangate bu bantu banyi ne meme nengikale Nzambi wenu.’​—Ekesode 6:6, 7; 15:1-7, 11.

² Matuku makese kunyima kua bena Isalele bamane kumbuka mu Ejipitu, bakadia tshipungidi ne Nzambi wabu Yehowa. Mpindieu Yehowa kavua wenza malu ne muntu pa nkayende anyi ne mêku peshi ne bisa to, kadi uvua uenza ne tshisamba tshimue tshia bantu balongolola bimpe pa buloba. (Ekesode 19:5, 6; 24:7) Wakapesha bantu bende mikenji ivua ilombola nsombelu wabu wa ku dituku ne ku dituku ne nangananga ntendelelu wabu. Mose wakabambila ne: ‘Ntshisamba kayi tshidi ne Nzambi pabuipi nabu bu mudi Yehowa, Nzambi wetu, panuamubikila? Ntshisamba kayi tshidi ne mikenji ne mêyi majalame bu mikenji eyi yonso ingakuteka kumpala kuenu lelu?’​—Dutelonome 4:7, 8.

Baledibue mu tshisamba tshia bantemu

3, 4. Mbua bualu kayi bua mushinga buvua Yehowa muvuijile Isalele tshisamba tshiende?

³ Kunyima kua bidimu nkama mivule, Yehowa wakavuluija bena Isalele bualu bua mushinga buvuaye mubavuijile tshisamba tshiende. Wakabambidila mukana mua muprofete wende Yeshaya ne: ‘Yehowa, wakakufuka wewe, Yakoba, wakakufuanyikija wewe, Isalele, udi wamba ne: Kutshinyi, bualu bua ngakukupikula, ngakukubikila ku dîna diebe, wewe nguanyi. Bualu bua meme ndi Yehowa Nzambi webe, Wa Tshijila wa Isalele, Musungidi webe. Nulue kundi ne bana banyi ba balume badi ku luseke lua kule, ne bana banyi ba bakaji badi ku mfudilu kua buloba. Nulue ne muntu yonso udibu binyika dîna dianyi, ungakufuka ne ungakufuanyikija, ungakuenza bua butumbi buanyi. Yehowa udi wamba ne: Nuenu nudi bamanyi banyi, ne nudi muntu wanyi ungakusungula. Bantu bangakudifukila bua bualu buanyi, bua bobu baleje bonso butumbi buanyi.’​—Yeshaya 43:1, 3, 6, 7, 10, 21.

⁴ Bu muvua bena Isalele babikidibua ku dîna dia Yehowa, bavua ne bua kuikala bantemu ba bumfumu buende kumpala kua bisamba bikuabu. Bavua ne bua kuikala bantu ‘bakenza  Yehowa bua butumbi buende.’ Bavua ne bua ‘kuleja butumbi bua Yehowa,’ kulonda malu ende a dikema a lupandu bua kutumbisha dîna diende dinsantu. Mu tshikoso: bavua ne bua kuikala tshisamba tshia bantemu ba Yehowa.

5. Mmushindu kayi uvua Isalele muikale tshisamba tshidilambule kudi Nzambi?

⁵ Mu siekele wa 11 kumpala kua Yezu kuledibua, Mukalenge Solomo wakaleja ne: Yehowa uvua muvuije Isalele tshisamba tshisunguluke. Wakambila Yehowa mu disambila ne: ‘Wewe nguakabasungula munkatshi mua bisamba bionso bia pa buloba bua kuikalabu bupianyi buebe.’ (1 Bakelenge 8:53) Muena Isalele yonso uvua pende mu malanda a pa buawu ne Yehowa. Mose ukavua mubambile kumpala ne: ‘Nuenu nudi bana ba Yehowa, Nzambi wenu. Bualu bua nuenu nudi bantu ba tshijila kudi Yehowa, Nzambi wenu.’ (Dutelonome 14:1, 2) Ke bualu kayi bana bena Isalele kabavua ne bua kulambula Yehowa mioyo yabu to. Bavua baledibue mu tshisamba tshia bantu bakavua badilambule kudi Nzambi. (Musambu 79:13; 95:7) Bavua balongesha bana ba tshipungu tshionso tshivua tshilonda mikenji ya Yehowa, nunku bavua benzejibue bua kuyitumikila bua tshipungidi tshivua tshisuikakaja Isalele kudi Yehowa.​—Dutelonome 11:18, 19.

Budikadidi bua kudisunguila

6. Ntshinyi tshivua muena Isalele yonso ne bua kudisunguila?

⁶ Nansha muvua bena Isalele baledibue mu tshisamba tshidilambule, muntu yonso uvua ne bua kudiangatshila dipangadika dia kuenzela Nzambi mudimu. Kumpala kua kubuelabu mu Buloba Bulaya, Mose wakabambila ne: ‘Ndi mbikila diulu ne buloba bu bamonyi ba bualu ne: Ngakuteka muoyo ne lufu, ne disanka ne mulawu kumpala kuenu lelu: nunku nudisunguile muoyo, nenuikale ne muoyo ne nuenu ne bana benu; bua kunanga Yehowa, Nzambi wenu, ne bua kutumikila dîyi diende, ne bua kumulamata; bualu bua yeye udi muoyo wenu ne muvudiji wa matuku enu; nunku nenushikame mu buloba buakalaya Yehowa batatu benu, Abalahama ne Isaka ne Yakoba, bua kubapabu.’ (Dutelonome 30:19, 20) Nunku muena Isalele yonso uvua ne bua kusungula bua kunanga Yehowa, kuteleja dîyi diende ne kumulamata. Bu muvua bena Isalele bikale ne budikadidi bua kudisunguila, bavua ne bua kuambula bujitu bua bipeta bia tshivuabu basungula bua kuenza.​—Dutelonome 30:16-18.

7. Ntshinyi tshiakenzeka kunyima kua lufu lua bantu ba mu tshipungu tshia Yoshua?

⁷ Tshikondo tshia Balumbuluishi tshidi tshituleja patoke bipeta bivua bifumina ku dikala ne lulamatu anyi ku dibenga kuikala nalu. Kumpala kua tshikondo atshi, bena Isalele bakalonda tshilejilu tshimpe tshia Yoshua, ne Yehowa wakababenesha bua bualu ebu. ‘Bantu bonso bakakuatshila Yehowa mudimu matuku onso a Yoshua, ne a bakulu bakadi bashale ne muoyo kunyima kua Yoshua, bakatangilaku malu manene onso akenzela Yehowa bena Isalele.’ Kadi bidimu ndambu kunyima kua lufu lua Yoshua, ‘ba mu tshikondo tshikuabu bakabalonda kunyima kabakamanya Yehowa anyi mudimu munene wakenzelaye bena Isalele. Bena Isalele bakenza malu akadi mabi ku mêsu kua Yehowa, bakakuatshila Bâla mudimu.’ (Balumbuluishi 2:7, 10, 11) Bidi bimueneka ne: bena mu tshipungu tshiakalonda bakapepeja bumpianyi buabu bua bena mu tshisamba tshidilambule bavua Nzambi wabu Yehowa muenzele malu manene kale.​—Musambu 78:3-7, 10, 11.

Malu avua aleja didilambula diabu

8, 9. (a) Mbualu kayi bua mu Mikenji buvua bupesha bena Isalele mushindu wa kuleja muvuabu badilambule kudi Yehowa? (b) Mmasanka kayi avuabu bapeta kudi bantu bavua bafila milambu ku budisuile?

⁸ Yehowa wakapesha basadidi bende mishindu ya kuenza malu avua aleja muvuabu tshisamba tshidilambule kudiye. Tshilejilu, Mikenji yende ivua ilomba difila dia milambu, imue ya kudiyi bavua benzejibue bua kuyifila, kadi mikuabu bavua badifidilayi ku budisuile. (Ebelu 8:3) Munkatshi muayi muvua milambu ya kuosha pa kapia, ya bukula ne ya kuvuija nayi ditalala ivuabu bafila ku budisuile, bayipesha Yehowa bua kumulengelela ne kumusakidila.​—Lewitiki 7:11-13.

⁹ Milambu eyi ivuabu bafila ku budisuile  ivua isankisha Yehowa. Bavua bamba bua mulambu wa kuosha pa kapia ne wa bukula ne: ivua ‘tshintu tshivua tshitua dipembu kudi Yehowa.’ (Lewitiki 1:9; 2:2) Pavuabu bafila mulambu wa kuvuija nawu ditalala, bavua bapesha Yehowa mashi ne difuta dia nyama, kadi bitupa bikuabu bia munyinyi bavua babidia kudi bakuidi ne mufidi wa mulambu. Abi bivua biakudia bia mu tshimfuanyi bivua bileja malanda a ditalala ne Yehowa. Mikenji ivua yamba ne: ‘Panualua ne mulambu wa kuvuija nawu ditalala kudi Yehowa, nuufile ne mutshima udiye mua kuitabuja [bua anuanyishe].’ (Lewitiki 19:5) Nansha muvua bena Isalele bonso badilambule kudi Yehowa katshia ku diledibua, bantu bavua menemene ne dijinga dia kusungula Yehowa bu Nzambi wabu mu dimupesha milambu ku budisuile, yeye uvua ‘ubanyisha’ ne ubapesha mabenesha mavule.​—Malaki 3:10.

10. Mmu mêyi kayi muakaleja Yehowa dibungama diende mu matuku a Yeshaya ne a Malaki?

¹⁰ Kadi misangu mivule tshisamba etshi tshia Isalele katshivua tshishala tshilamate Yehowa to. Yehowa wakabambila mukana mua muprofete wende Yeshaya ne: ‘Kuakufila mikoko yebe kundi bu milambu ya kuosha, kuakuntumbisha ne milambu yebe mikuabu. [Tshiakukuenzeja] bua kufila milambu.’ (Yeshaya 43:23) Bualu bukuabu: milambu ivuabu kabayi bafila ku budisuile ne ku dinanga kayivua ne mushinga nansha mukese ku mêsu kua Yehowa to. Tshilejilu, bidimu bu 300 kunyima kua Yeshaya, mu matuku a muprofete Malaki, bena Isalele bavua balambula nyama mikale ne bilema. Ke bualu kayi Malaki wakabambila ne: ‘Yehowa wa misumba udi wamba ne: Tshiena ne disanka bua bualu buenu, tshiena ngitabuja mulambu ku tshianza tshienu. Nuakulua ne nyama inuakunyenga ku bukole, milema ne misame; nudi nulua nabi bu milambu! Ndi mua kubitabuja ku bianza bienu anyi? Edi ndikonka dia Yehowa.’​—Malaki 1:10, 13; Amosa 5:22.

Yehowa wakabenga tshisamba tshivua tshidilambule kudiye

11. Ndiakalenga kayi diakapeshabu bena Isalele?

¹¹ Dîba diakalua bena Isalele tshisamba  tshidilambule kudi Yehowa, wakabalaya ne: ‘Binuatumikila dîyi dianyi, ne binuanemeka tshipungidi tshianyi, nuenu nenuikale bantu banyi ba munkatshi mua bantu bonso; bualu bua buloba buonso mbuanyi. Nuenu nenuikale kundi bu bukalenge bua bakuidi, bu tshisamba tshia tshijila.’ (Ekesode 19:5, 6) Masiya mulaya uvua ne bua kumueneka munkatshi muabu ne bobu ke bavuaye ne bua kudianjila kupesha diakalenga dia kukokesha nende mu Bukalenge bua Nzambi. (Genese 22:17, 18; 49:10; 2 Samuele 7:12, 16; Luka 1:31-33; Lomo 9:4, 5) Kadi tshitupa tshinene tshia tshisamba tshia bena Isalele katshiakenza malu avua aleja muvuabu badilambule kudi Nzambi to. (Matayo 22:14) Bakabenga Masiya ne kumushipabu mene.​—Bienzedi 7:51-53.

12. Mmêyi kayi akamba Yezu adi aleja ne: Yehowa wakabenga Isalele bua kuikala tshisamba tshidilambule kudiye?

¹² Matuku makese kumpala kua Yezu kufua, wakambila balombodi ba bitendelelu ne: ‘Kanuena banji kubala mu Mukanda wa Nzambi anyi, ne: Dibue diakapidiabu kudi bibaki ba nzubu bakaditeka ku mutu kua ditumba; Eu mmudimu wa Mukalenge, udi bu bualu bua kukema ku mêsu kuetu? Ndi nnuambila ne: Nebanunyenge bukalenge bua Nzambi, nebabupe tshisamba tshidi tshikuama mamuma abu.’ (Matayo 21:42, 43) Bua kuleja ne: Yehowa wakababenga bua kuikala tshisamba tshidilambule kudiye, Yezu wakamba ne: ‘Wewe Yelushalema, Yelushalema, udi ushipa baprofete, udi ukuma bakukutuminabu mabue! Misangu ya bungi ngakasua kusangisha bana bebe bu mudi nzolo usangisha bana bende mu mapuapua ende, kadi nuenu nuakupidia. Nzubu wenu udi mushale patupu.’​—Matayo 23:37, 38.

Tshisamba tshipiatshipia tshidilambule kudi Nzambi

13. Mmêyi kayi a buprofete akamba Yehowa mu matuku a Yelemiya?

¹³ Mu tshikondo tshia muprofete Yelemiya, Yehowa wakamanyisha bualu bupiabupia buvua butangila basadidi bende. Tudi tubala ne: ‘Monayi, mu matuku alualua, nempunge tshipungidi tshipiatshipia ne bena Isalele ne bena Yuda. Yehowa udi wamba ne: Katshiena tshikala bu tshipungidi tshingakapunga ne batatu babu mu dituku dingakabakuata ku tshianza bua kubalopola mu buloba bua Ejipitu; bualu bua bakushipa tshipungidi tshianyi ne meme ngakadi mukalenge wa pamutu pabu. Yehowa udi wamba ne: Kadi etshi ntshipungidi tshindualua kupunga ne bena Isalele kunyima kua matuku au: nenteke mikenji yanyi munda muabu, nenyifunde mu mitshima yabu; meme nengikale Nzambi wabu, ne bobu nebikale bantu banyi.’​—Yelemiya 31:31-33.

14. Ndîba kayi diakaledibua tshisamba tshipiatshipia tshidilambule kudi Nzambi, ne tshivua tshiashila pa tshishimikidi kayi? Amba badi benza tshisamba etshi.

¹⁴ Bakasa tshishimikidi tshia tshipungidi tshipiatshipia etshi mu tshidimu tshia 33 pakafua Yezu ne kulejaye Tatuende mushinga wa mashi ende. (Luka 22:20; Ebelu 9:15, 24-26) Kadi tshipungidi tshipiatshipia etshi tshiakatuadija mudimu anu pakapeta bayidi ba Yezu nyuma muimpe mu Pentekoste wa mu 33 bua kuleja diledibua dia tshisamba tshipiatshipia anyi ‘Isalele wa Nzambi.’ (Galatia 6:16; Lomo 2:28, 29; 9:6; 11:25, 26) Mupostolo Petelo wakafundila bena Kristo bela manyi wamba ne: ‘Nuenu nudi tshisamba tshisungudibue, ne bakuidi ba bukalenge, ne tshisamba tshia tshijila, bantu badi bikale ba Nzambi muine, bua  nuenu nuambe bua buimpe bua Nzambi wakanubikila bua kunupatula mu mîdima bua kunubueja mu munya wende wa dikema. Mu tshikondo tshia diambedi kanuakadi bantu, kadi katataka nudi bantu ba Nzambi.’ (1 Petelo 2:9, 10) Malanda a pa buawu avua pankatshi pa Yehowa ne Isalele wa ku mubidi mamane kufua, mu tshidimu tshia 33 dibenesha dia Yehowa diakumbuka kudi Isalele wa ku mubidi ne kuyadi kudi Isalele wa mu nyuma anyi tshisumbu tshia bena Kristo, ‘tshisamba tshidi tshikuama mamuma’ a Bukalenge bua Masiya.​—Matayo 21:43.

Didilambula dia muntu pa nkayende

15. Mu dia Pentekoste wa mu 33, mbatismo kayi uvua Petelo muambile bantu bavua bamuteleja bua kutambulabu?

¹⁵ Kunyima kua Pentekoste wa mu 33, muntu yonso, muena Yuda anyi wa tshisamba tshikuabu, uvua ne bua kudilambula pa nkayende kudi Nzambi ne kutambula ‘mu dîna dia Tatu ne mu dia Muana ne mu dia nyuma muimpe.’ * (Matayo 28:19) Mu Pentekoste amu, mupostolo Petelo wakambila bena Yuda ne benyi bavua bitabuje bavua bateleja dîba adi ne: ‘Kudimunayi mitshima yenu, nubatijibue buonso buenu mu dîna dia Yezu Kristo bualu bua kunujimijilabu mibi yenu; nunku nenuangate kupa kua nyuma muimpe.’ (Bienzedi 2:38) Bena Yuda ne benyi bavua bitabuje aba bavua ne bua kulejila ku batismo wabu ne: kabavua anu balambule Yehowa mioyo yabu patupu, kadi bavua kabidi bitabe Yezu bu mushindu uvua Yehowa mulongolole bua kubabuikidila mibi yabu. Bavua ne bua kumuitaba bu Muakuidi Munene wa Yehowa ne bu Mulombodi wabu, bu Mfumu wa tshisumbu tshia bena Kristo.​—Kolosai 1:13, 14, 18.

16. Mu matuku a Paulo, mmunyi muvua bantu bavua badilongolole bimpe, bena Yuda ne ba bisamba bia bende, balua bena Isalele wa mu nyuma?

¹⁶ Kunyima kua bidimu bivule, mupostolo Paulo wakamba ne: ‘Ngakambila ba mu Damaseke diambedi, ne ba mu Yelushalema, ne ba mu luseke luonso lua Yudaya, ne ba bisamba bia bende kabidi, bua kukudimunabu mitshima yabu.’ (Bienzedi 26:20) Paulo uvua utuisha bantu, bena Yuda ne ba bisamba bia bende ne: Yezu uvua Kristo, Masiya mene, ne pashishe uvua ubambuluisha bua kudilambula ne kutambula. (Bienzedi 16:14, 15, 31-33; 17:3, 4; 18:8) Pavua bayidi bapiabapia aba badifila kudi Nzambi nunku, bavua balua bena Isalele wa mu nyuma.

¹⁷ Lelu, ditua bena Isalele wa mu nyuma badi bashale tshimanyinu tshia ndekelu dikadi pa kujika. Padidi dijika, nebanyishile “banjelo banayi” badi bakuate mpepele inayi ya kabutu bua bayilekelele, dîba adi ke didi “dikenga dinene” dituadija. Mu dindila tshikondo atshi, badi benda basangisha ne lukasa “tshisumbu tshinene” tshia bantu badi batekemene muoyo wa kashidi pa buloba apa. “Mikoko mikuabo” eyi mmisungule ku budisuile bua kuitabuja “mashi a muana wa Mukoko” ne kutambula bua kuleja ne: mmidilambule kudi Yehowa. (Buakabuluibua 7:1-4, 9-15; 22:17; Yone 10:16; Matayo 28:19, 20) Munkatshi muayi mudi bansonga bavule badibu bakoleshe kudi baledi bena Kristo. Biwikala ne baledi bena Kristo, dibala dia tshiena-bualu tshidi tshilonda etshi nedikusankishe bikole.

[Mêyi adi kuinshi]

Diambulula

• Bua tshinyi bana ba bena Isalele kabavua ne bua kudilambula kudi Yehowa muntu yonso pa nkayende?

• Mmunyi muvua bena Isalele mua kuleja ne: bavua badilambule kudi Yehowa?

• Bua tshinyi Yehowa wakabenga bena Isalele bua kuikalabu tshisamba tshidilambule kudiye, ne mmunyi muakabapinganabu kudi tshinga tshisamba?

• Kubangila mu Pentekoste wa mu 33, ntshinyi tshivua bena Yuda ne bantu ba bisamba bia bende ne bua kuenza bua kulua bena Isalele wa mu nyuma?

[Nkonko ya dilonga]

17. Mmudimu kayi wa ditua tshimanyinu ukadi pa kujika, ne mmudimu kayi mukuabu udi wenda wenzeka ne lukasa?

[Tshimfuanyi mu dibeji 21]

Bana bena Isalele bavua baledibua mu tshisamba tshisungula kudi Nzambi

[Tshimfuanyi mu dibeji 23]

Muena Isalele yonso uvua ne bua kudisunguila bua kukuatshila Nzambi mudimu

[Tshimfuanyi mu dibeji 23]

Milambu ivua bena Isalele bafila ku budisuile ivua ibapesha mushindu wa kuleja muvuabu banange Yehowa

[Tshimfuanyi mu dibeji 25]

Kubangila mu Pentekoste wa mu 33, bayidi ba Kristo bavua ne bua kudilambula kudi Nzambi muntu pa nkayende ne kuleja bualu ebu pa kutambula