Dikumbula diakashintulula meji anyi bikole

TATU mukuabu uvua bansongakaji babidi Bantemu ba Yehowa baye kuyisha wakamba ne: “Tshiakanengakana bua kulondela bena mu dîku dianyi bualu bua bantu babidi bandi ngangata bu banjelu bavua Nzambi muntumine.” Tatu au uvua mubungame bikole bua mukajende ukavua ne bidimu 45 uvua mufue mbingu mikese kumpala kua bansongakaji aba kuyabu kuende. Bu muvua bana bende basombele kule ne kabavua ne mushindu wa kutungunuka ne kumukolesha ku muoyo to. Balunda anyi bena mutumba kabavua balua kumusamba to.

Tatu eu wakambila bansongakaji bavua baye kumuyisha ne: “Tshitu ndomba kabidi Nzambi to.” Nansha nanku, bansongakaji aba bakamumvuila luse ne bobu kumushila kabeji kakese ka malu a mu Bible kadi ne tshiena-bualu tshia se: Nditekemena kayi ditudi nadi bua bananga betu bakadi bafue? Wakakabala dilolo adi ne kumukoleshaku ku muoyo.

Kunyima kua matuku makese, bansongakaji babidi bena Kristo aba bakaya kumumona kabidi. Bavua bavuluke muvuaye mubungame bikole musangu wa kumpala uvuabu baye kumumona ne mpindieu bakaya bua kumanya muvuaye muladile. Tatu eu wakafunda pashishe ne: “Ngakakema bikole muvua bantu bamvua tshiyi nansha mumanye baditatshisha bua bualu buanyi.” Mêyi a mu Bible akamuambilabu akamukankamija. Bansongakaji aba bakamulaya bua kulua kumumona kabidi. Mukalenge eu wakasanka bikole ne yeye kufika ku difunda mêyi atudi batele kulu eku mu mukanda uvuaye mutume ku Nzubu wa Bukalenge wa Bantemu ba Yehowa ba muaba uvuaye.

Kumpala kua yeye kuya kusombela pabuipi ne muaba udi muanende wa balume, wakabuela mu tshimue tshisangilu tshia Bantemu ba Yehowa ne yeye kudia biakudia ku ba umue wa ku bansongakaji abu. Wakafunda ne: “Ndi ngumbuka mu tshitupa etshi, kadi bansongakaji abu ne tshitendelelu tshienu nebishale anu mu mutshima wanyi ne mu masambila anyi. Bulelela, ndi nsambila mpindieu, ndi mene nsambila bikole. Ndi mushintulule meji anyi bikole. Bansongakaji abu mbangambuluishe bikole mu muanda eu, ne nengikale ne dianyisha kudibu kashidi.”