Mushindu wa kupeta mandamuna malelela

MU DIA 18 a ngondo wa 12 tshidimu tshia 1810 mazuwa avua ne dîna ne: HMS Pallas a mu ditunga dia Grande-Bretagne akapambuka. Bualu ebu buakenzeka dilolo pakavua butuku busua kuila ne buvua bukebesha kudi tshipepele tshikole tshiakenzeka ku Sud lua ku Est kua Écosse. Kuvua mîdima mikole ne neige ya katshia ivua ipangisha bendeshi ba mazuwa bua kuenda bimpe ne kumonabu butoke bua kapia ka ku mukuna kuvuabu mua kutudila bimpe kakuyi njiwu. Elabi meji bua disanka divuabu mua kuikala nadi pavuabu bamone butoke ne batangija mazuwa abu muaba uvua kapia! Bia dibungama, butoke ebu ki mbuvuabu nabu dijinga bua kufikabu ku tshitudilu to. Butoke buvuabu balonde buvua bua kapia katemesha kudi bena mudimu bavua kumpenga kua tshitudilu tshia mazuwa. Mazuwa a Pallas akadikuma mu mabue kunyangukawu bibi bitambe. Bantu dikumi ne umue bakafua. Bibi be!

Mu bualu bua mazuwa a Pallas, anu tshilema tshikese ke tshiakakebesha njiwu ayi. Mikuabu misangu bantu bavua benda ne mazuwa au bakapeta njiwu bua butoke bua kapia ka dishima buvua bubadinge. Bilondeshile mukanda kampanda, bantu bavua batemesha kapia ka mushindu eu bua kupambuisha mazuwa a mâyi bua kudikumawu mu mabue bua kuibabu bintu bivuamu.​—Wrecks, Wreckers and Rescuers.

‘Mukanda wa Nzambi udi mua kukufikisha ku lupandu’

Paudi wenda ukeba butoke budi anu bu mandamuna malelela a nkonko kampanda, udi mua kupetangana ne njiwu bu ivua bantu aba bavua benda ne mazuwa bapete. Udi mua kuitaba bualu budi mua kukupambuisha anyi badi mua kukushima dishima dibi. Malu aa adi mua kukufikisha ku njiwu. Kadi ntshinyi tshiudi mua kuenza bua kudikuba? Enza bua muaba uudi upetela mandamuna wikale muaba muimpe ne mulelela. Kukadi bidimu bipite pa 125 bidi Tshibumba tshia Nsentedi tshileja ne: Bible, n’Dîyi dia Nzambi difundisha ku nyuma wende ne ke muaba udi bulelela, bualu ‘Mukanda wa Nzambi udi mumanye mua kukuvuija  muena meji too ne ku lupandu.’​—2 Timote 3:15-17

Bushuwa, bua wewe kuitaba ne: mu Bible ke muudi mua kupetela butoke bulelela, mbimpe wewe kukeba bijadiki bidi bileja mudi Bible wamba bulelela. (Musambu 119:105; Nsumuinu 14:15) Udi mua kufundila Bantemu ba Yehowa bapatudi ba tshibejibeji etshi bua kumanya malu adi mambuluishe bantu ba bungi bua kuitababu ne: Bible mmukanda wa Nzambi. Tshilejilu, bala kakanda ka Un livre pour tous. * Mudi malu adi aleja ne: Bible mmujalame, mmulelela ne mmufundisha kudi Nzambi.

Malongesha malelela a nshindamenu

Mmalongesha malelela kayi a nshindamenu adi mu “Mukanda wa Nzambi”? Tuanji kukonkonona malongesha adi alonda aa.

Kudi anu Nzambi umuepele Wa-Bukole-Buonso udi Mufuki wa bintu bionso. (Genese 1:1) Tudi panu “bualu bua [Nzambi] wakafuka bintu bionso” ne mmutupeshe muoyo. (Buakabuluibua 4:11) Ke bua tshinyi anu yeye nkayende ke utudi ne bua kutendelela. Mufuki ke Mpokolo wa bulelela buonso budi mua kututokeshila njila. (Musambu 36:9; Yeshaya 30:20, 21; 48:17, 18) Udi ne dîna didiye musue bua tuikale tumubikila. (Ekesode 3:15) Dîna adi bavua badifunde mu maleta a tshiena-Ebelu ne mu maleta etu aa didi ne: YHWH ne didi misangu mitue ku 7 000 mu Bible. Munkatshi mua bidimu bia bungi mbenze mudimu ne dîna edi dia “Yehowa” mu Tshiluba.​—Musambu 83:18.

Yehowa uvua mufuke bantu bua kusombabu bimpe kashidi mu Mparadizu pa buloba apa. Wakafuka bantu ne ngikadilu bu yende. Uvua mubafuke ne bipedi ne dimanya divua ne bua kubambuluisha bua kuikalabu ne disanka dia kashidi pa buloba. (Genese 1:26-28) Nzambi kavua muenze buloba bu muaba wa kutetela bantu bua kubalongolola ku nsombelu wa mu diulu mudibu mua kuikala nende mu malanda mimpe to.

Bantu bavua Nzambi mufuke kabavua ne bubi to. Kadi bubi buakabuela mu bantu pavua muanjelu kampanda ne bantu ba kumpala basungule bua kudienzela malu ne kutombokela Nzambi. (Dutelonome 32:5) Baledi betu ba kumpala bakajinga kudisunguila bobu nkayabu tshivua tshimpe ne tshibi. (Genese 2:17; 3:1-5) Bualu ebu buakabueja lufu mu bantu. (Genese 3:19; Lomo 5:12) Bua kukosa bilumbu biakajuka bua ditomboka edi, Yehowa wakasungula bua kuanji kulekela malu mabi pa buloba. Nansha nanku, ki mmushintulule tshivuaye mulongolole bua bantu ne buloba to. (Yeshaya 45:18) Bantu nebikale ne muoyo kashidi pa buloba ebu bukudimuna Mparadizu.​—Matayo 6:10; Buakabuluibua 21:1-5.

Yezu Kristo ki n’Nzambi Wa-Bukole-Buonso to, kadi Mmuana wa Nzambi. Yezu Kristo yeye nkayende wakalongesha bayidi bende bua kusambila ne: ‘Tatu wetu udi mu diulu, banemeke dîna diebe.’ (Matayo 6:9) Kavua udiangata mumue ne Nzambi to. Kadi wakamba ne: “Tatu udi muntambe meme.”​—Yone 14:28.

Yezu udi ne mudimu munene mu malu adi Nzambi mulongolole bua kukumbaja. Nzambi wakamutuma pa buloba ‘bu munya, bua yonso wamuitabuja kashadi biende mu mîdima.’ (Yone 12:46) Bilondeshile mupostolo Petelo, ‘mu munga muntu yonso kamuena lupandu.’  (Bienzedi 4:12) Bidi nanku, bualu tudi tupeta lupandu ku diambuluisha dia mashi a mushinga mukole a Kristo. (1 Petelo 1:18, 19) Yezu Kristo wakafila muoyo wende bu mulambu bua kupikula bantu ku bubi buvua Adama ne Eva babakebele. (Matayo 20:28; 1 Timote 2:6) Bualu bukuabu kabidi, Nzambi uvua muenze mudimu ne Yezu bua kukumbajaye disua Diende ne malu adiye mulongolole.​—Yone 8:12, 32, 46, 47; 14:6; Bienzedi 26:23.

Nzambi mmulongolole Bukalenge anyi mbulamatadi wa mu diulu muenza ne Yezu Kristo ne bantu bakuabu badibu basungule pa buloba. Malu adi atangila Bukalenge bua Nzambi ebu adi mu Bible. Nzambi mmuteke mbulamatadi eu bua ne: disua diende dienzeke pa buloba bu mudidi dienzeka mu diulu. (Matayo 6:10) Nzambi kavua mulongolole ku ntuadijilu kua bufuki bua bantu kuyabu mu diulu to. Uvua mubalongoluele buloba bua bobu kusombabu. Kadi pakenza muntu mpekatu, Nzambi wakalongolola tshintu kampanda tshipiatshipia. Wakalongolola bua kusungula bantu ‘ba mu tshisamba tshionso ne ba mu muaku wonso ne ba munkatshi mua bantu bonso ne ba munkatshi mua ditunga dionso bua kukokeshabu bu bakalenge’ ne Kristo mu diulu. (Buakabuluibua 5:9, 10) Mu katupa kîpi emu, Bukalenge ebu ‘nebutshibule ne nebubutule’ makalenge onso a bana ba bantu adi makebele bukua-bantu ntatu ne makenga.​—Danyele 2:44.

Anyima utu ufua. Dilongesha dilelela dia nshindamenu dia mu Bible edi didi dileja patoke tshidi muntu ne malu adiye mutekemene bua matuku atshilualua. Dilongesha edi didi diambuluisha bua kumbusha tshibuejakaji ne mashimi adi nawu bantu bua mushindu udi bafue.

Mukanda wa kumpala wa mu Bible udi utuambila ne: ‘Yehowa Nzambi wakafuka mulume ne dinfuenkenya dia buloba, wakela mupuya wa muoyo mu diulu diende ne mulume wakalua ne muoyo’ anyi anyima udi ne muoyo. (Genese 2:7) Bidi biumvuija tshinyi? Anyima ki ntshintu tshidi munda mua muntu to. Muntu kêna ne anyima to. Kadi udi anyima, bualu anyima mmuenza kudi ‘dinfuenkenya dia buloba’ ne mupuya wa muoyo udi mufume kudi Nzambi. Anyima utu ufua. Padi muntu ufua, anyima mmufue, bualu muntu ng’anyima.​—Genese 3:19; Muambi 9:5, 10.

Bantu bakadi bafue badi mua kubishibua ku lufu. Tshikondo tshidi Nzambi mulekele malu mabi enzeka etshi pafikatshi ku ndekelu, ‘bonso badi mu nkita nebumvue dîyi dia Yezu nebajuke, bakenzenza bimpe nebajuke mu dibika dia muoyo, bakenzenza bibi nebajuke mu dibika dia dipila.’ (Yone 5:28, 29; Bienzedi 24:15) Dibika dia ku lufu nediambuluishe bantu bua bikale ne nsombelu muimpe wa mu  mparadizu anu bu muvua Nzambi mulongolole ku ntuadijilu.

Konkonona Bible ne muoyo mujima dituku dionso

Kuenaku umona mudi dimanya dia malongesha a nshindamenu aa mua kukuambuluisha anyi? Mu tshikondo etshi tshia bimvundu, dimanya dia mushindu eu didi mua kukukuba ku ‘lungenyi ludibu batupakana ne: Ndulelela’ kadi eku luikala dishima didi Satana Diabolo mumuangalaje pa buloba. Utu udileja bu ‘muanjelu wa munya,’ ne bena mudimu bende badiandamuna bu “bakuatshishi ba malu makane.” (1 Timote 6:20; 2 Kolinto 11:13-15) Kuvudija dimanya dia malu a mu Bible kudi mua kukuambuluisha bua kuepuka tshidi bantu bela meji ne: ndimanya, kadi eku dimanya edi difuma ku nkindi ya bantu ‘bena meji ne bena budimu’ badi ‘bapetula dîyi dia Yehowa.’​—Matayo 11:25; Yelemiya 8:9.

Bu muvuaku malongesha a mashimi a bungi ne nkindi mu tshikondo tshiende, mupostolo Yone wakadimuija bena Kristo ba mu bidimu lukama bia kumpala ne: ‘Kanuitabuji nyuma yonso.’ Wakamba kabidi ne: ‘Kadi nutete nyuma ni idi ya Nzambi.’ (1 Yone 4:1) Elabi meji bua mufuanu eu. Wewe mupete mukenji kampanda udi ne mushinga wa bungi mu nsombelu webe, neuwitabe kuyi muukonkonone bualu udi ufumina kudi muntu muimpe anyi? Kabitu nanku to. Neujinge kuanji kumanya kudi mukenji eu mufumine ne tshidiwu wamba kumpala kua kuwitaba.

Padi Nzambi mufundishe mukanda wende udi ne malongesha malelela, mmukuambuluishe bua wewe ‘kujingulula’ butoke bulelela budi bukumbane buudi mua kulonda. (1 Tesalonike 5:21) Mu bidimu lukama bia kumpala bavua balomba bantu ba muoyo muimpe bua ‘kudikebela mu Mukanda wa Nzambi ku dituku ku dituku’ bua kumanyabu ne: malu avuabu babalongeshe avua malelela anyi? (Bienzedi 17:11) Udi pebe mua kuenza bia muomumue. Itaba bua Bible akulombole bu ‘muendu udi utema mu muaba wa mîdima.’ (2 Petelo 1:19-21) Wewe muenze nanku, ‘neusangane dimanya dia malu a Nzambi’ didi difila mandamuna malelela a nkonko kabukabu.​—Nsumuinu 2:5.

[Mêyi adi kuinshi]

[Tshimfuanyi mu dibeji 4]

Dîyi dia Nzambi didi bu muendu

[Tshimfuanyi mu dibeji 5]

Dîna dia Nzambi nnganyi?

[Tshimfuanyi mu dibeji 5]

Bantu mbatekemene tshinyi mu matuku atshilualua?

[Tshimfuanyi mu dibeji 6]

Yezu n’Nzambi Wa-Bukole-Buonso anyi?

[Tshimfuanyi mu dibeji 6]

Bafue batu penyi?

[Tshimfuanyi mu dibeji 7]

Dibika dia bantu ku lufu ndilongesha dilelela dia nshindamenu dia mu Bible