‘Ngakajikija bimpe mumvua tshiyi muelele meji’

MULONGESHI mukuabu wa mu tulasa tua bikadilu wa mu ditunga dia Espagne wakafunda ne: “Kukadi bidimu bipite pa lukama bidi Bantemu ba Yehowa baleje mudibu banangangane, bena malu malelela, ne nangananga bantu ba ditabuja didi kadiyi kutshibuila panshi.” Bu muvua mulongeshi eu wamba muvuaye kayi witaba ne: Nzambi utuku, ntshinyi tshivua tshimufikishe ku diamba mêyi aa?

Bivua bienzeke nanku pakelabu Noemí mateta ende a njikijilu wa tulasa e kumulombabu bua kudifundila bualu. Noemí uvua mulongi wa mu bikadilu, muikale kabidi Ntemu wa Yehowa. Wakasungula tshiena-bualu tshia ne: “Tumanyinu tukunzubile tua matumba asatu tua mu bukokeshi bua bena Nazi.”

Bua tshinyi Noemí uvua musungule anu tshiena-bualu etshi? Yeye muine udi wamba ne: “Bu muvua mulongeshi kampanda ne bua kutangila bionso bimvua mfunda abi, ngakamona ne: mmushindu umvua mupete wa kumuyisha. Muyuki wa mushindu uvua Bantemu ba Yehowa ba mu ditunga dia Allemagne bashale amu ne muoyo wabu mutoke uvua mulenge mutshima wanyi bikole. Ke meme kumona ne: uvua mua kulenga kabidi bakuabu ku muoyo.”

Mudimu uvua Noemí muenze au wakasankisha bantu bapite bungi kupita ne muvuaye wela meji. Mu dia matuku 5 a ngondo wa dikumi mu 2002, bakamupesha kado mu ditunga diabu bua malu avuaye mufunde au bua didikebuluila diende mu mianda ya dimanya dia bukua bintu ne mu mianda ya nsombelu wa bantu. Tudo tutubu bapesha balongi batu bapita bakuabu ku meji mu mateta au batu batufila kudi kasumbu ka balongeshi banene 20 ba mu iniversite minene ya mu Espagne.

Noemí wakangatshila kado kende ku bianza bia mamu Pilar del Castillo, ministre wa malu a tulasa mu Espagne. Bualu ebu buakapetesha Noemí mpunga wa kupesha ministre eu bande wa video wa La fermeté des Témoins de Jéhovah face à la persécution nazie. Au pende kuangataye bande eu ne disanka dionso.

Tshikandakanda tshikuabu tshia mu tshimenga tshia Manresa mua ba Noemí tshiakakula patshi bua Noemí ne kumutumbisha bua malu avuaye mufunde, tshiotshi kutela ne malu avua Noemí mufunde mu mukanda wende au. Pinapu, mulombodi wa tshilongelu tshiabu wakamulomba pende mukanda au bua kuwakuilabu kabidi mu musekelelu wa tshidimu tshia 75 tshia katshia tshilongelu tshiabu tshiatuadija.

Ke pavua Noemí muambe ne: “Ngakajikija bimpe tulasa tuanyi tua bikadilu mumvua tshiyi muelele meji to. Ngakasanka bikole pangakabala mêyi avua mulongeshi wetu Jorge Tomás mufunde ku ntuadijilu kua luapolo luvuaye mungenzele, wamba ne:

“‘Ntu ngamba ne: Nzambi katuku to. Kadi ndi mufuane kufika ku dituishibua menemene ne: kudi anu Muntu Mutambe Bunene udi ufikisha badi bamutendelela ku dikala ne “dinanga dia muntu nabu” dilelela.’”