Nuenu bansonga, nusungule bua kukuatshila Yehowa mudimu

“Nusungule unudi basue kukuatshila mudimu.”​—YOSHUA 24:15.

1, 2. Mmishindu kayi mibi ya batismo idibu batambuishangana mu Bukua-buena-Kristo?

MUFUNDI mukuabu diende Tertullien wakafunda ne: ‘Bana badi balua bena Kristo padibu bakumbana bua kumanya Kristo.’ Wakamba mêyi aa pabuipi ne bidimu bia 200 kunyima kua diledibua dia Yezu bua kubenga ditambuisha dia bana ba mu tshiadi anyi batekete, tshilele tshivua tshitangalake mu Buena-Kristo bua dishima mu tshikondo tshiende. Kadi munene wa Ekeleziya Augustin kavua yeye witaba mêyi a Tertullien anyi tshidi Bible wamba bua bualu ebu to. Augustin uvua yeye wamba ne: ditambuisha bana batekete didi diumbusha dikeji dia mpekatu wa ku ntuadijilu, ne bana badi bafua kabayi batambule mbafundila tshibawu tshia inferno wa kapia. Dilongesha adi diakakankamija bantu bua kuikala batambuisha bana ne lukasa padibu baledibua.

² Bitendelelu binene bia bungi bia mu Bukua-buena-Kristo bitshidi bitambuisha bana batoke. Kabidi, munkatshi mua bidimu bivule, bamfumu ba matunga ne balombodi ba bitendelelu ba mu matunga avua adiamba a bena Kristo bavua batambuisha ku bukole bantu ba mu “bisamba bia bende” bivuabu bakuata ku bupika. Kadi ditambuisha bana ne ditambuisha bantu bakulumpe ku bukole ki mbiangatshila mu Bible to.

Lelu didilambula mbualu bua ku budisuile

3, 4. Ntshinyi tshidi mua kuambuluisha bana ba bena Kristo bua kudilambula ku budisuile?

³ Bible udi uleja ne: Nzambi udi wangata bana batekete bu bansantu nansha bikala muledi umue patupu muikale muena Kristo wa lulamatu. (1 Kolinto 7:14) Abi bidiku bivuija  bana aba basadidi ba Yehowa badilambule kudiye anyi? Tòo. Kadi malu adibu babalongesha kudi baledi babu bena Kristo adi mua kubafikisha ku didilambula ku budisuile kudi Yehowa. Solomo Mukalenge wa meji wakafunda ne: ‘Muananyi, lama mukenji wa tatuebe, kulekedi diyisha dia mamuebe. Pawenda, lungenyi alu nelukulombole; pawalala panshi, neluikale mulami webe; pawatabala, neluakule nebe. Bualu bua mukenji udi muinda, diyisha diawu didi munya, kubela kudi ne diyisha kudi njila wa muoyo.’​—Nsumuinu 6:20-23.

⁴ Nkoleshilu wa baledi bena Kristo udi mua kukuba bana padibu bitaba bua kumulonda. Solomo wakamba kabidi ne: ‘Muana mulume udi ne meji udi usankisha tatuende, kadi muana mupote udi unyingalaja mutshima wa mamuende.’ ‘Umvue biebe, muananyi, wikale ne meji; lombola mutshima webe mu njila mululame.’ (Nsumuinu 10:1; 23:19) Bulelela, bua dilongesha dia baledi kunuambuluishadi nuenu bana, nudi ne bua kuitaba mibelu ne diyisha ne muoyo umue. Kanuena nuledibua bena meji nansha, kadi nudi mua kulua “ne meji” ne kulonda ‘njila wa muoyo’ ku budisuile.

Didimuija ntshinyi?

5. Mmibelu kayi ivua Paulo mupeshe bana ne batatu?

⁵ Mupostolo Paulo wakafunda ne: ‘Bana, tumikilayi baledi benu mu Mukalenge; bua bualu ebu budi buakane. Unemeke tatu webe ne mamu webe (eu udi mukenji wa kumudilu udi ne mulayi), bua wewe wikale ne dikasa dimpe ne wikale ne muoyo musangu mule pa buloba. Ne nuenu batatu, kanufuishi bana benu balela tshiji; nubadiundishe bimpe ne dibela ne didimuija bia Mukalenge.’​—Efeso 6:1-4.

6, 7. Kukolesha bana mu ‘didimuija dia Mukalenge’ kudi kumvuija tshinyi, ne bua tshinyi bualu ebu kabuena bumvuija ne: baledi badi banyanga meji a bana babu?

⁶ Baledi bena Kristo badiku banyanga bana babu padibu babakolesha mu ‘diyisha ne didimuija bia Mukalenge’ Yehowa anyi? Tòo. Bua tshinyi kudiula baledi bualu badi balongesha bana babu malu adibu bamona makane ne abapesha ngikadilu mimpe? Bantu batu bamba ne: Nzambi kenaku batu balongesha bana babu dilongesha edi, kadi nnganyi utu ubadiula bua bualu ebu? Tutuku tumvua misangu mivule bantu badiula bena Katolike bualu badi badiumvua benzejibue bua kuvuija bana babu bena Katolike anyi? Nanku bua tshinyi kuamba Bantemu ba Yehowa ne: badi banyanga ngenyi ya bana babu padibu babalongesha meji a Yehowa adi atangila malu malelela ne ngikadilu milenga?

⁷ Bilondeshile munga mukanda, muaku wa mu tshiena Gelika udibu bakudimune ne: ‘didimuija’ mu Efeso 6:4 udi umvuija ngenzelu wa “dikeba bua kululamija lungenyi, kulongolola tshidi tshibi, kulengeja mushindu wa dimona malu a mu nyuma.” (Theological Dictionary of the New Testament) Bitu bienzeka ne: nsonga abenge dilongesha dia baledi bende bualu udi ulonda bilele bia bena mulongo nende badiye kayi musue kushilangana nabu. Mbanganyi batudi mua kuamba ne: badi basaka bana kubi: baledi anyi bena mulongo nabu? Bikala bena mulongo nabu babasaka bua kunua diamba, bua kukuatshika maluvu anyi bua kuenza buenzavi, tudiku ne bua kudiula baledi bua mudibu bakeba kuakaja meji a muana ne kumuambuluisha bua kumona bubi bua ngikadilu eu wa njiwu anyi?

8. Ntshinyi tshiakambuluisha bua Timote ‘kuitabujaye’ malu akamuyishabu?

⁸ Mupostolo Paulo wakafundila Timote patshivuaye nsonga ne: ‘Wewe wikale mu malu awakayila ne [awakitabuja] ne: nga bushuwa; umanye biebe bantu bakakuyishawu; ku buana buebe wewe wakamanya Mukanda wa Nzambi, udi mumanye mua kukuvuija muena meji too ne ku lupandu luakulua bua ditabuja dia mu Kristo Yezu.’ (2 Timote 3:14, 15) Kubangila ku buana bua Timote, mamuende ne kakuende mukaji bavua bakoleshe ditabuja diende kudi Nzambi mu dimulongesha Mifundu Minsantu. (Bienzedi 16:1; 2 Timote 1:5) Pakaluabu bena Kristo pashishe, kabakenzeja  Timote bua kuitaba to, kadi ‘wakitabuja’ malu au pakamueleshishabu meji ne Mifundu.

Yehowa udi ukulomba bua kusungula

9. (a) Ntshintu kayi tshilenga tshidi Yehowa mupeshe bantu, ne mbua bualu kayi? (b) Muana umuepele mulela wa Nzambi mmuenze malu kayi ne budikadidi buende bua kudisunguila malu?

⁹ Yehowa uvua mua kuikala mufuke bantu bu nyama bua kuenzabu anu disua diende ne kubenga kuenza tshia tshianana. Kadi wakabapesha budikadidi bua kudisunguila. Nzambi wetu mmusue bua tumukokele ku budisuile. Udi usanka padiye umona bantu badiye mufuke, bana ne bakole, bamukuatshila mudimu bualu mbamunange. Tshilejilu tshitambe buimpe tshia dikokela Nzambi ne dinanga ntshia Muanende umuepele mulela, wakambaye bualu buende ne: “Eu udi Muana wanyi munange, yeye udi unsankisha bimpe.” (Matayo 3:17) Muanabute eu wakambila Tatuende ne: “Ndi ne disanka bua kuenza disua diebe, Nzambi wanyi, bulelela, mukenji webe udi mu mutshima wanyi.”​—Musambu 40:8; Ebelu 10:9, 10.

10. Ntshinyi tshidi Yehowa mutekemene kudi aba badi bamusadila?

¹⁰ Yehowa mmutekemene bua se: aba badi bamuenzela mudimu ku bulombodi bua Muanende benze disua Diende ku budisuile. Mufundi wa Misambu wakimba mu mêyi a buprofete ne: ‘Bantu bebe badi badifila kuudi ne disanka mu dituku diudi ukungija misumba ya masalayi ebe. Bansongalume bebe badi balua kuudi bu mume.’ (Musambu 110:3) Bulongolodi bujima bua Yehowa (tshitupa tshiabu tshia mu diulu ne tshia pa buloba) budi buenza mudimu mushindamene pa dienza disua dia Nzambi ne dinanga dionso.

11. Mbualu kayi budibu ne bua kusungula kudi bana badibu bakoleshe kudi baledi bena Kristo?

¹¹ Nunku nuenu bansonga nudi ne bua kumanya ne: ni mbaledi benu anyi bakulu ba mu tshisumbu kabakunuenzeja bua kutambula to. Dijinga dia kuenzela Yehowa mudimu didi ne bua kufumina kunudi. Yoshua wakambila bena Isalele ne: ‘Nukuatshile Yehowa mudimu ne muoyo wonso udi kauyi ne lubombo. Lelu nusungule unudi basue kukuatshila mudimu.’ (Yoshua 24:14-22) Bia muomumue, nuenu nkayenu ke badi ne bua kusungula bua kudilambula kudi Yehowa ne kufila mioyo yenu bua kuenza disua diende.

Diambuila bujitu buebe

12. (a) Nansha mudi baledi mua kulongesha bana babu, ntshinyi tshidibu kabayi mua kubenzela? (b) Ndîba kayi didi muana wambula bujitu bua malu adiye usungula bua kuenza kumpala kua Yehowa?

¹² Tshikondo netshilue tshikala lulamatu lua baledi benu kaluyi mua kunukuba kabidi. (1 Kolinto 7:14) Yakobo wakafunda ne: ‘Muntu udi mumanye mua kuenza bualu buimpe ne udi kayi ubuenza, bualu ebu budi bubi kudiye.’ (Yakobo 4:17) Baledi kabena mua kuenzela Nzambi mudimu pa muaba wa bana babu anyi bana pa muaba wa baledi babu. (Yehezekele 18:20) Ukadiku mumanye Yehowa ne malu adiye mulongolole bua kuenza anyi? Udiku ne bidimu bikumbane bua kumvua malu audi mulonge ne bua kudia malanda a pa nkayebe ne Nzambi anyi? Nanku kabiakuikalaku bimpe bua kuela meji ne: Nzambi udi ukumona mukumbane bua kudiangatshila dipangadika dia kumuenzela mudimu anyi?

13. Nnkonko kayi idi bansonga badi kabayi banji kutambula ne bua kudiela?

¹³ Biwikala nsonga ne kuyi muanji kutambula, mukolesha kudi baledi bena Kristo, muikale ubuela mu bisangilu bia bena Kristo  ne uyisha lumu luimpe, udiebeje bimpe ne: ‘Bua tshinyi ndi ngenza malu aa? Ndiku mbuela mu bisangilu ne ngenza mudimu wa diyisha bualu baledi banyi badi bangenzeja anyi peshi bualu ndi musue kusankisha Yehowa?’ Ukadiku mujingulule wewe nkayebe “disua dia Nzambi didi dimpe, didi dimusankisha, ne didi diakane tshishiki” anyi?​—Lomo 12:2.

Bua tshinyi kuladikija bua kutambula?

14. Mbilejilu kayi bia mu Bible bidi bileja ne: kuena ne bua kuladikija patupu bua kutambula?

¹⁴ Muena Atiopa [Éthiopie] wakebeja muambi wa lumu luimpe Filipo ne: “Tshidi tshimpumbisha bua kubatijibua ntshinyi?” Pakelaye lukonko elu uvua ufuma ku dilonga ne: Yezu uvua Masiya. Kadi muena Atiopa uvua ne dimanya dikumbane dia mu Mifundu bua kujingulula ne: kavua ne bua kujingakana bua kuleja patoke ne: kubangila pa dîba adi uvua ne bua kukuatshila Yehowa mudimu mu tshisumbu tshia bena Kristo, ne bualu ebu buakamupetesha disanka divule. (Bienzedi 8:26-39) Bia muomumue, muntu mukaji mukuabu diende Ludia, wakabululabu mutshima wende ‘bua kutumikilaye malu akambabu kudi Paulo,’ ‘wakabatijibua’ diakamue yeye ne ba mu nzubu muende. (Bienzedi 16:14, 15) Kabidi, mulami wa buloko wa mu Filipoi wakateleja Paulo ne Sila pavuabu ‘bamuambila dîyi dia Mukalenge,’ ne ‘bakamubatiza lukasa ne bantu bende bonso.’ (Bienzedi 16:25-34) Nunku, wewe muikale ne dimanya dia malu manene a Yehowa ne majinga ende, muikale ne dijinga dilelela dia kuenza disua diende, muikale kabidi ne lumu luimpe mu tshisumbu ne muikale ubuela mu bisangilu ne uyisha lumu luimpe, bua tshinyi udi uladikija bua kutambula?​—Matayo 28:19, 20.

15, 16. (a) Nngelelu wa meji kayi mubi udi mua kupangisha bamue bansonga bua kutambula? (b) Mmunyi mudi didilambula ne ditambula mua kukuba bansonga?

¹⁵ Udiku mua kuikala welakana bua kutambula bua buôwa bua ne: wewe mua kupona mu bualu bubi, nebalue kukukonka anyi? Bikalabi nanku, elabi meji bua bualu ebu: Neubenge bua kulonga mua kuendesha dikalu anu bualu udi utshina ne: dimue dituku udi mua kupetangana ne njiwu anyi? Kakuenza nanku to, ki mmuomumue anyi? Bia muomumue, kuena ne bua kuelakana bua kutambula biwikala ukumbaja malu adi akengedibua. Umanye ne: wewe mulambule Yehowa muoyo webe ne muitabe bua kuenza disua diende, nebikusake bua kuenza muebe muonso bua kukandamena malu mabi. (Filipoi 4:13) Nuenu bansonga, kanuedi meji ne: panudi nuladikija bua kutambula nanku Yehowa kêna unubadila bualu nansha bumue to. Paukadi mukumbaje bidimu bia kuambula bujitu bua malu ebe, nansha wewe mutambule anyi kuyi mutambule, Yehowa neakulumbuluishe bua bienzedi biebe.​—Lomo 14:11, 12.

¹⁶ Bantemu bavule pa buloba bujima badi bela meji ne: dipangadika diakangatabu bua kutambula patshivuabu bansonga ndibambuluishe bikole. Angata tshilejilu tshia Ntemu wa bidimu 23 wa mu dimue ditunga dia ku  Mputu. Udi uvuluka wamba ne: pakatambulaye ne bidimu 13 biakamusaka bua kuikala mudimuke bua “nkuka ya bansongalume” kayimupambuishi. (2 Timote 2:22) Patshivuaye muana mutekete, wakangata dipangadika dia kulua muyishi udi wenza mêba a bungi. Lelu, udi wenza mudimu ne disanka ku biro bia Bantemu ba Yehowa. Masanka mavule mmindile bansonga bonso badi basungula bua kukuatshila Yehowa mudimu, nansha wewe pebe.

17. Mmu malu kayi mudibi bitukengela kutungunuka ne kujingulula mudi ‘disua dia Mukalenge’?

¹⁷ Kudilambula ne kutambula ntuadijilu wa nsombelu wa kuenza disua dia Yehowa mu malu etu onso. Bua kukumbaja malu atudi badilambuile, tudi ne bua ‘kudisumbila tshikondo.’ Mmunyi mutudi mua kuenza nanku? Mmu diangata dîba dituvua mua kuenza malu a patupu ne kudifila bua kulonga Bible, kubuela mu bisangilu ne kuyisha “lumu luimpe lua Bukalenge” ne muoyo mujima. (Efeso 5:15, 16; Matayo 24:14) Patudi tudilambula kudi Yehowa ne bikale ne dijinga dia kuenza disua diende tudi tupeta bipeta bimpe mu malu onso a mu nsombelu wetu, nansha bua dijikija lutetuku, mishindu itudi badibidije mu malu a didia ne dinua, ne mijiki itudi tuteleja. Bua tshinyi kubenga kusungula mushindu wa kujikija lutetuku wikala mua kukupetesha disanka kashidi? Bantemu ba Yehowa binunu bivule batshidi bansonga nebakuambile ne: kudi mishindu ya bungi mimpe ya kujikija mukodi katuyi tutupa ku ‘disua dia Mukalenge’ Yehowa.​—Efeso 5:17-19.

‘Tudi basue kuya nenu’

18. Ndikonka kayi didi bansonga ne bua kudiela?

¹⁸ Kubangila mu 1513 kumpala kua Yezu too ne mu Pentekoste wa mu 33 kunyima kua diledibua dia Yezu, Yehowa uvua ne tshisamba tshia Isalele tshivuaye musungule bua kumutendelela ne kuikala bantemu bende. (Yeshaya 43:12) Nenku bansonga bena Isalele bavua baledibue mu tshisamba atshi. Kadi kubangila mu Pentekoste, Yehowa udi ne “tshisamba” tshipiatshipia pa buloba, Isalele wa mu nyuma, ‘bantu badi bikale ne dîna diende.’ (1 Petelo 2:9, 10; Bienzedi 15:14; Galatia 6:16) Mupostolo Paulo udi wamba ne: Kristo mmudilengejile ‘bantu badi mua kuikala bende bine, bikale ne lukunukunu lua kuenza midimu mimpe.’ (Tito 2:14) Nuenu bansonga nudi ne budikadidi bua kudimanyina muaba udi bantu abu. Mbanganyi lelu badi ‘tshisamba tshia bantu bakane badi balamata ditabuja,’ batumikila mêyi a mu Bible, bikale Bantemu ba lulamatu ba Yehowa ne bamanyisha Bukalenge bua Nzambi bu tshintu tshimuepele tshidi bantu ne bua kutekemena? (Yeshaya 26:2-4) Tangila mu bitanda bia badi badiamba bena Kristo ne mu bitendelelu bikuabu ne fuanyikija ngikadilu yabu ne tshidi Bible ulomba batendeledi balelela ba Nzambi.

19. Mbualu kayi budibu bafike ku dijadika kudi bantu miliyo mivule pa buloba?

¹⁹ Bantu miliyo mivule pa buloba bujima ne bansonga ba bungi mbafike ku dituishibua ne: Bantemu ba Yehowa bela manyi batshidi pa buloba ke badi benza “tshisamba tshia bantu bakane” etshi. Badi bambila bena Isalele wa mu nyuma aba ne: ‘Tudi basue kuya nenu, bualu bua tuakumvua ne: Nzambi udi nenu.’ (Zekâya 8:23) Tudi batekemene ne muoyo mujima ne tudi tusambila bua se: nuenu bansonga nuangate dipangadika dia kuikala munkatshi mua batendeledi ba Nzambi, ne nuenu benze nunku ‘nenusungule muoyo,’ muoyo wa tshiendelele mu buloba bupiabupia.​—Dutelonome 30:15-20; 2 Petelo 3:11-13.

Diambulula

• Didimuija dia Mukalenge didi diumvuija tshinyi?

• Mmudimu wa mushindu kayi udi Yehowa wanyisha?

• Mbualu kayi budibu ne bua kusungula kudi bansonga bonso badibu bakoleshe kudi baledi bena Kristo?

• Bua tshinyi kuena ne bua kuladikija patupu bua kutambula?

[Nkonko ya dilonga]

[Bimfuanyi mu dibeji 26]

Nnganyi uwateleja?

[Tshimfuanyi mu dibeji 28]

Mmunyi mudi didilambula ne ditambula mua kukukuba lelu?

[Tshimfuanyi mu dibeji 29]

Tshidi tshikupangisha bua kutambula ntshinyi?