‘Udi umvuila bamubedi udi ne budimu’

NSUMUINU 23:12 udi wamba ne: ‘Teka mutshima webe ku diyisha, uteleje matshi ebe ku mêyi a lungenyi.’ Mu mvese eu, “diyisha,” anyi dilongesha malu malenga a mu nsombelu didi ditangila didibela ne dianyisha mibelu ya bantu bakuabu. Bua kupeta diyisha dia mushindu eu bidi bikengela kumanya mibelu ya kufila ne mushindu wa kuyifila. Nunku, ‘mêyi a lungenyi’ adi afuma kudi muntu wa kueyemena adi ne mushinga bua kuyisha nawu muntu.

Mukanda wa Nsumuinu mmuule tente ne mêyi a lungenyi a mushinga mukole. Mbafunde malu aa mu mukanda eu ‘bua bantu bamanye lungenyi ne diyisha, bua bapete diyisha dia mua kuenza bienzedi bia meji, dia mu buakane, dia mu dikosa diakane dia nsambu, ne dia mu kulumbulula kuakane.’ (Nsumuinu 1:1-3) Netuikale bena meji ‘bituatelaja’ malu aa. Nsumuinu nshapita wa 15 udi ufila mibelu milenga bua mushindu wa kukanda tshiji, wa kuenza mudimu ne ludimi, ne mushindu wa kulongesha bakuabu lungenyi. Nanku tukonkonone imue mvese mu nshapita eu.

Ntshinyi tshidi mua ‘kutuyisha tshiji’?

Solomo mukalenge wa Isalele udi umvuija mêyi atu ajula tshiji anyi atshituyisha wamba ne: “Diandamuna dimpe didi dituyisha tshiji, diyi dibi didi dilundula tshiji.” (Nsumuinu 15:1, MMM) “Tshiji” mmuaku udibu bangata bua kumvuija kanyinganyinga kakole kadi muntu umvua bua tshintu tshidi katshiyi tshimusankisha to. Mmunyi mudi lusumuinu elu mua kutuambuluisha bua kupita ne tshiji tshia bantu bakuabu anyi ne tshietu?

Mêyi mashile adi mua kunyakaja malu bikole menemene. Pabi dîyi dimpe didi diodi mua kuakaja nsombelu. Nansha nanku, kuandamuna muntu dîyi dimpe padiye ne tshiji kakutu kupepele misangu yonso to. Kadi tudi anu mua kuandamuna dîyi dia mushindu eu tuetu batete bua kumanya tshidi tshifikishe muntu munda. Bible udi wamba ne: ‘Lungenyi luimpe lua muntu ludi lukanda tshiji, ne butumbi buende nkulekelela muntu bubi.’ (Nsumuinu 19:11) Muntu udi mua kuikala ne tshiji bua padiye ne buôwa anyi ukeba bua bamutabalele. Tshiji tshiende tshidi mua kuikala katshiyi nansha tshikebesha kudi dîyi diudi muambe anyi kudi tshintu tshiudi muenze. Tshilejilu, bantu batu batuandamuna bibi patutu tubayisha anu bualu batu babambile malu a dishima bua Bantemu anyi  bobu nkayabu batu batuelela meji mabi. Nanku tudi mua kufika munda ne kubandamuna bibi anyi? Nansha patudi katuyi bamanye tshidi tshifikishe muntu munda, kumuandamuna ne mêyi adi mua kumujula kabidi tshiji kudi kuleja mutudi petu katuyi bamanye mua kudibela anyi mua kudikanda. Mandamuna a mushindu eu tudi ne bua kuepuka.

Mubelu wa kuandamunangana ne dîyi dimpe udi kabidi ne mushinga nansha bua tshiji tshietu tuetu bine. Tudi mua kutumikila mubelu eu bitualonga mua kuandamuna bua kuleja mutudi tudiumvua munda mu mushindu udi kauyi utapa muntu utudi tuandamuna to. Tshilejilu, patudi ne bena mu dîku dietu, mbimpe kuleja mutudi tudiumvua ne lutulu pamutu pa kuambangana mêyi adi atapa ku muoyo anyi a bipendu. Mêyi mabi atu atamba kusaka bakuabu bua kutupingajilabu pabu. Kuambila muntu mutudi tudiumvua munda ne lutulu kakutu kutamba kutapangana ku muoyo to, kadi kutu kufikisha muntu ku dishintuluka ne kulomba luse.

“Miaku ya bantu ba meji idi ileja dimanya”

Didikanda didi dituambuluisha bua kuakaja ngakuilu wetu ne malu mine atudi tuamba. Solomo udi wamba ne: ‘Miaku ya bantu ba meji idi ileja dimanya diabu, kadi mukana mua batatakane mudi mupatula amu miaku ya budingidingi.’ (Nsumuinu 15:2, MMM) Tuetu bapete dijinga dikole dia kuambuluisha bakuabu ne tubambila malu mimpe adi Nzambi mulongolole bua kuenza, katuakuikalaku tupatula ‘mêyi adi aleja dimanya’ anyi? Bantu batatakane kabena mua kuenza nunku bualu kabena ne dimanya to.

Kumpala kua Solomo kutupeshaye mubelu mukuabu wa mushindu wa kuenza mudimu ne ludimi luetu, udi wanji utuambila bualu budi butuelesha meji ebu: ‘Mêsu a Yehowa adi kuonso, adi alama bantu babi ne bantu bimpe.’ (Nsumuinu 15:3) Tudi mua kusanka bua bualu ebu bualu badi batushindikila ne: ‘Mêsu a Yehowa adi akenzekana ku nseke yonso ya buloba bua kuleja bukole buende kudi bantu badi ne mitshima miakane kudiye.’ (2 Kulondolola 16:9) Nzambi mmumanye padi malu atudi tuenza mikale mimpe. Udi kabidi utangila malu adi bantu babi benza bua kubafuta bilondeshile bidibu benza.

Solomo udi wakula mpindieu bua mushinga wa ludimi luimpe, wamba ne: ‘Ludimi ludi luamba mêyi a kalolo ludi bu mutshi wa muoyo, kadi ludi luamba mêyi a bupidia ludi lunyanga mutshima.’ (Nsumuinu 15:4) “Mutshi wa muoyo” udi umvuija tshintu tshidi tshiondopa ne tshikolesha. (Buakabuluibua 22:2) Mêyi a kalolo adi muntu wa meji mua kuamba adi atalaja lungenyi lua badi baumvua. Adi abasaka bua kuleja ngikadilu milenga. Kadi bua ludimi ludi luamba malu a mafi anyi malu mabi ludi lunyanga lungenyi lua badi baluteleja.

Itaba dilongesha, ‘utangalaje lungenyi’

Mukalenge Solomo udi wamba kabidi ne: ‘Mupote udi upetula diyisha dia tatuende, kadi udi umvuila bamubedi udi ne budimu.’ (Nsumuinu 15:5) Mmunyi mudi muntu mua ‘kumvuila bamubedi’ bikalabu kabayi banji kumubela? Mvese eu udi uleja mudibi bimpe kulongesha bantu bua kuakaja malu kampanda padibi bikengela kuakaja. Tshilejilu, mu dîku, baledi (nangananga tatu) badi ne bujitu bua kubela bana babu, ne bana pabu badi ne bua kuitaba mibelu eyi. (Efeso 6:1-3) Kadi, mutendeledi yonso wa Yehowa utu upeta dilongesha mu mushindu kampanda anyi kansanga. Ebelu 12:6 udi wamba ne: ‘Mukalenge udi ukengesha [anyi ubela] udiye munange, Udi ututa muana mulume yonso udiye witabuja.’ Mushindu utudi tuangata dilongesha udi uleja ne: tudi ne meji anyi tudi batshimbakane.

Solomo udi wakula kabidi bua dishilangana dikuabu wamba ne: ‘Mishiku ya bena meji idi itangalaja lungenyi, kadi mitshima ya bapote kayena yenza nunku.’ (Nsumuinu 15:7) Kulongesha lungenyi anyi dimanya kudi anu bu kutangalaja maminu. Mu bikondo bia kale, tshidime kavua ukuna maminu ende onso mu tshina tshimue to. Kadi, uvua wenda uamiamina ku kakese ku kakese too ne pavuawu atuangana mu budimi buonso bujima. Ke mudibi kabidi bua dilongesha bakuabu. Tshilejilu, patudi tuyisha muntu, ki mbimpe kumuambila malu onso atudi bamanye mu Bible musangu umue to.  Kadi muntu udi ne meji udi udikanda padiye wakula. Udi ‘utangalaja’ lungenyi padiye umvuija bimpe dilongesha dia mu Bible dimue ku musangu dimue ku musangu ne wakula bilondeshile mudi muntu umvua malu. Ke tshiakenza Yezu Kristo udi Tshilejilu tshietu pakayikilaye ne mukaji muena Samalea.​—Yone 4:7-26.

Kupetesha bakuabu dimanya kudi kumvuija kuamba malu adi abalongesha ne abambuluisha. Bidi bikengela kuela meji bimpe bua kuamba mêyi adi alongesha muntu tshintu kampanda ne amukolesha. Ke bualu kayi “muntu muakane udi wela meji a tshidiye mua kuandamuna.” (Nsumuinu 15:28, MMM) Mbimpe mêyi etu ikale anu bu mvula wa yebayeba udi utalaja buloba, kadi kaikadi bu mvula mukole udi upula bintu ne ubinyanga bionso to!

“Ba tshijila mu malu onso”

Kutangalaja dimanya dia Yehowa ne dia malu ende ne kumulambula milambu ya “mamuma a mishiku” bu ‘mulambu wa kumutumbisha nawu’ ke malu adi aleja meji. (Ebelu 13:15) Kadi bua Yehowa kuanyishaye milambu ya mushindu eu, tudi ne bua kuikala ‘ba tshijila mu malu onso a muoyo wetu.’ (1 Petelo 1:14-16) Bua kutumvuija dishilangana dikuabu ditudi ne bua kumanya, Solomo udi wela nsumuinu ibidi mishilangane. Udi wamba ne: “Mulambu udi bantu babi bafila udi utondesha Yehowa, kadi ditendelela dia bantu bakane didi dimusankisha. Bienzedi bia muntu mubi bidi bitondesha Yehowa, kadi yeye udi unanga muntu udi ulonda buakane.”​—Nsumuinu 15:8, 9.

Mmunyi mudi bantu badi bumuka mu njila wa muoyo bangata dinyoka ne malu adi mabindile? (Matayo 7:13, 14) Bible udi wamba ne: “Muntu udi ubenga kulonda njila muakane nebamunyoke bikole, udi ubenga mibelu neafue.” (Nsumuinu 15:10, MMM) Pamutu pa kuitaba dinyoka didi ditupingaja mu njila didibu batupesha kudi bakulu ba mu tshisumbu ne kunyingalala ne muoyo mujima bua bituvua benze, bamue badi badifile mu dienza dia malu mabi batu basungula bua kulekela njila wa buakane. Kuenza nanku se mbutshimbakane bua dikema!

Kadi netuambe tshinyi bua muntu udi uleja mudiye muanyishe mibelu kadi munda munda muyibenge? Nansha yeye pende kêna ne meji to. Solomo udi wamba ne: ‘Muaba wa Bafue ne wa Kubutuka bidi buashi ku mêsu kua Yehowa, mitshima ya bantu idi mitambe kubululuka kudiye!’ (Nsumuinu 15:11) Mu ngakuilu wa mu tshimfuanyi, kakuena tshintu nansha tshimue tshidi mua kuikala kule ne Nzambi wa muoyo kupita muaba wa bafue to. Kadi nansha nanku, muaba eu udi anu kumpala kuende. Mmumanye muntu yonso udimu ne bienzedi biende kabidi, ne udi ne bukole bua kumubisha. (Musambu 139:8; Yone 5:28, 29) Nunku bua Yehowa kumanya tshidi mu muoyo wa muntu  yonso, mbipepele be! Mupostolo Paulo wakafunda ne: ‘Bintu bionso bidi butaka ne bibulula ku mêsu kua utudi nende ne bualu.’ (Ebelu 4:13) Kuenza bu badi bitaba bualu kampanda kudi mua kudinga anu bantu, kadi kakuena mua kudinga Nzambi to.

Muntu utu ubenga dilongesha katu anu ubenga dinyoka patupu to, kadi utu ukina ne muntu udi umunyoka. Solomo wakamba ne: “Mubuidi kena musue bantu bamubele.” Bua kukolesha tshilumbu udi usakidila lungenyi lua muomumue wamba ne: “Kena uya kudi bena meji nansha.” (Nsumuinu 15:12) Mbualu butambe bukole bua muntu eu kululamija njila wende.

Mmuenenu mulenga

Nsumuinu isatu idi ilonda idi yakula yonso anu bua “mutshima.” Bua kumona mua kumvuija mudi mpala wetu uleja mutudi tudiumvua, Solomo udi wamba ne: ‘Mutshima wa disanka udi uvuija mpala wa musangelu, kadi bikala mutshima ne kanyinganyinga, muoyo wa muntu udi uteketa teketee.’​—Nsumuinu 15:13.

Ntshinyi tshidi mua kunyingalaja muoyo? Bible udi wamba ne: ‘Lutatu mu mutshima wa muntu ludi lumunemeshila bujitu’ ne kanyinganyinga. (Nsumuinu 12:25) Ntshinyi tshitudi mua kuenza bua malu kampanda atudi katuyi basue kaatupangishi disanka? Nanku pamutu pa kuimanyina pa malu atudi katuyi mua kujikija, mbimpe tutambe kuela meji a malu mimpe adi Yehowa mutuenzele mpindieu ne ikalaye ne bua kutuenzela kabidi. Kuenza nunku nekutusemeje pabuipi nende. Kusemena pabuipi ne ‘Nzambi wa disanka’ nekutupeshe disanka ku muoyo wetu uvua unyingalala.​—1 Timote 1:11, NW.

Malu adi mu Bible adi kabidi mua kutuenza disanka dia bungi menemene ne kutukolesha. Mufundi wa Misambu wakamba ne: wa diakalenga mmuntu udi ne ‘disanka diende dikale mu mikenji ya Yehowa, ne mu mikenji yende mmudiye welangana meji munya ne butuku.’ (Musambu 1:1, 2) Nansha patudi ne kanyinganyinga ku muoyo wetu, dibala dia Bible ne diela dia meji a malu atudi tubala neditukoleshe. Tudi kabidi ne mudimu wa buambi udi Nzambi mutupeshe bua kuenza. Bible udi utushindikila ne: ‘Badi bamiamina maminu ne binsonji ku mêsu nebapole biakudia ne mbila ya disanka.’​—Musambu 126:5.

Solomo udi wamba ne: ‘Mutshima wa mujinguludi wa mianda udi ukeba lungenyi, kadi mukana mua bapote mudi mudia bupote.’ (Nsumuinu 15:14) Lusumuinu elu ludi lutuleja bimpe dishilangana didi pankatshi pa mubelu wa muena meji ne wa muntu udi mupote. Mujinguludi wa mianda udi ukeba lungenyi kumpala kua kubelangana. Udi wanji uteleja bimpe bua kumvua mudi tshilumbu bimpe menemene. Udi ukeba mu Bible bua kupeta mikenji ne mêyi kampanda adi atangila tshilumbu atshi. Mibelu yende idi ipatukila anu mu Dîyi dia Nzambi nkayadi. Kadi mupote yeye, kêna ukeba bua kumanya malu onso adi atangila nsombelu kampanda to, udi wakula ne labalaba kayi wela meji. Nunku, patudi tukeba mibelu, mbimpe tuyilombe kudi muntu mushindame udi ne dimanya dia bungi pamutu pa kuyilomba kudi bantu badi anu mua kutuambila malu atudi basue. Tudi ne disanka bua mutudi ne ‘mapa mikale bantu’ anyi bakulu mu bisumbu bia bena Kristo badi ‘bakeba lungenyi’ kumpala kua kutubela!​—Efeso 4:8, NW.

Lusumuinu ludi lulonda mpindieu ludi lutuleja mushinga wa kuikala ne mmuenenu mulenga. Solomo udi wamba ne: ‘Matuku onso a mukengi adi mabi, kadi muena mutshima wa disanka utu wikala ne bidia bia disanka matuku onso.’ (Nsumuinu 15:15) Nsombelu udi ne bikondo bituye ne matuku a disanka ne a makenga, a tuseku ne a kudila. Bu tuetu mua kushala batangile anu malu mabi, kanyinganyinga ke kikala mu meji etu tente, ne matuku etu onso neikale anu atunyingalaja. Kadi bu tuetu mua kutamba kuimanyina pa malu mimpe ne pa malu adi Nzambi mutulaye, malu adi mua kutunyangila disanka kaakututekesha to, kadi netupete disanka munda tente. Mmuenenu mulenga udi utuambuluisha bua kuikala ne “bidia bia disanka matuku onso.”

Nunku mu mishindu yonso, tuanyishayi dilongesha. Tulekelayi bua dilongesha diakaje lungenyi luetu ne ngakuilu wetu, kabidi ne bienzedi bietu ne mmuenenu wetu.

[Tshimfuanyi mu dibeji 13]

“Diandamuna dimpe didi dituyisha tshiji”

[Tshimfuanyi mu dibeji 15]

Baledi badi ne bujitu bua kulongesha bana

[Tshimfuanyi mu dibeji 15]

‘Mishiku ya bena meji idi itangalaja lungenyi’