‘Tudi ne bua kutumikila mêyi a Nzambi kumpala kua mêyi a bantu’

‘Nzambi wetu neatusungile’

TSHIBILU tshia dibanjija lupingu lunene luvuabu bimanyike mu mpata wa Dula (bimueneka ne: bivua pabuipi ne tshimenga tshia Babulona) tshivua ne bua kukemesha bantu. Bavua babikile bamfumu banene mu tshibilu etshi tshinene bua kuluabu kuinamina lupingu alu dîba divua biombelu bia mishindu yonso ne bua kuimba. Mukalenge Nebukadenesâ wa bena Babulona uvua muele dîyi ne: muntu yonso uvua kayi utendelela lupingu alu uvua ne bua kufua mu tshikutu tshia kapia kakole. Nnganyi uvua mua kubenga kutumikila dîyi adi?

Kadi bantu bavua muaba au bakakema pakamonabu batendeledi basatu ba Yehowa aba: Shadalaka, Meshaka ne Abedenego bimane tendee. Bavua bamanye ne: bu bobu binamine lupingu alu, bavua ne bua kutupa ku mukenji uvua ubalomba bua kulamata anu Yehowa Nzambi. (Dutelonome 5:8-10) Pakabakonka Nebukadenesâ bua tshinyi bavua bashale anu bimane, ne dikima dionso bakamuandamuna ne: ‘Biasua Nzambi wetu utudi tukuatshila mudimu kutusungila, yeye neatupandishe ku tshikutu tshia kapia kakole ne mu tshianza tshiebe kabidi, mukalenge. Kadi bikalaye kayi musue kuenza nunku, umanye biebe, mukalenge, ne: katuena tukuatshila nzambi yebe mudimu, katuena tutendelela lupingu lua or luwakuimanyika.’​—Danyele 3:17, 18.

Pakelabu bena Ebelu basatu aba mu tshikutu tshia kapia kakole, bakasungidibua mu tshishima. Nzambi wakatuma muanjelu wende bua kulama basadidi Bende ba lulamatu aba. Kadi bakavua bamane kusungula nansha bua kufua pamutu pa kutupa ku mêyi a Yehowa. * Mmuenenu wabu uvua wa muomumue ne wakalua bapostolo ba Yezu Kristo kuleja bidimu bipite pa 600 panyima, pakambilabu bena ku kabadi kanene ka bena Yuda ne: ‘Tudi ne bua kutumikila mêyi a Nzambi kumpala kua mêyi a bantu.’​—Bienzedi 5:29.

Malongesha a mushinga kutudi

Shadalaka, Meshaka ne Abedenego badi bilejilu bimpe bia bantu bavua ne ditabuja, butumike ne lulamatu. Bena Ebelu basatu aba bakaleja ditabuja kudi Yehowa. Kondo kabu ka muoyo kalongesha kudi Dîyi dia Nzambi kakavua kitaba bua kuenzabu bualu buonso buvua bumvuangana ne ntendelelu wa dishima anyi buleja lulamatu luabu ku ditunga. Bena Kristo ba lelu badi pabu beyemena Nzambi mulelela mu mushindu wa muomumue. Mbalombola kudi kondo kabu ka muoyo kalongesha kudi Bible ne badi babenga bua kudifila mu malu a ntendelelu wa dishima anyi mu bibilu bidi bishipa mêyi ne mikenji ya Nzambi.

Bena Ebelu basatu ba lulamatu aba bakeyemena Yehowa ne bakabenga kushintakaja dimutumikila diabu ku tshintu tshionso tshivua Bukalenge bua bena Babulona mua kubapesha bu mudi lumu, muanzu munene anyi butumbi. Bansongalume aba bavua badiakaje bua kukenga nansha bua kufua pamutu pa kunyanga malanda abu ne Nzambi. Anu bu muvua Mose muenze kale kumpala kuabu, ‘bakatantamana bu bavua batangila Yeye udi kayi umueneka ku mêsu.’ (Ebelu 11:27) Nansha bu Yehowa musungule bua  kubasungila anyi mubenge, bavua badisuike busatu buabu bua kushala anu bamulamate pamutu pa kutshina ne kukeba bua kudisungila. Mupostolo Paulo uvua mua kuikala muvuluke tshilejilu tshiabu etshi pakakulaye bua bena lulamatu ‘bakajima bukole bua kapia.’ (Ebelu 11:34) Basadidi ba Yehowa badi baleja ditabuja ne butumike bia mushindu eu lelu padibu bapitshila mu malu adi ateta muoyo-mutoke wabu.

Tudi tulongela kabidi ku bualu buakafikila Shadalaka, Meshaka ne Abedenego ne: Nzambi udi mufutshi wa bantu badi bamulamate. Mufundi wa Misambu wakimba ne: ‘Yehowa kêna ulekela bansantu bende.’ (Musambu 37:28) Lelu’eu, katuena mua kutekemena bua Nzambi kutusungila mu tshishima bu muvuaye musungile bena Ebelu basatu abu to. Kadi tuikale bajadike ne: nansha lutatu lua mushindu kayi mua kutufikila, Tatu wetu wa mu diulu neatuambuluishe. Nzambi udi mua kujikija lutatu alu, kutupesha bukole bua kulutantamena anyi kutubisha bituashala ne lulamatu too ne ku lufu. (Musambu 37:10, 11, 29; Yone 5:28, 29) Ditabuja, butumike ne lulamatu bidi bitshimuna misangu yonso idi muoyo-mutoke wetu muikale mu diteta ne patudi tusungula bua kutumikila mêyi a Nzambi pamutu pa mêyi a bantu.

[Mêyi adi kuinshi]

[Kazubu/​Tshimfuanyi mu dibeji 9]

UVUA MUMANYE ANYI?

• Bena Ebelu basatu aba bavua ne bidimu bitue ku 30 pakatetabu lulamatu luabu.

• Bakakolesha menemene kapia ka mu tshikutu.​—Danyele 3:19.