Tuanyishe bulongolodi buimpe bua Yehowa

‘Tuetu netuikale ne mitshima mitalale bua buimpe bua nzubu webe.’​—MUSAMBU 65:4.

1, 2. (a) Ntshinyi tshivua midimu ivua ne bua kuenzekela ku ntempelo ne bua kupetesha tshisamba tshia Nzambi? (b) Mmalu kayi avua Davidi mulongolole bua diibaka dia ntempelo?

DAVIDI Mukalenge wa Isalele wa kale udi umue wa ku bantu ba pa buabu badi Mifundu ya tshiena-Ebelu yakula bualu buabu. Uvua mulami wa mikoko, kangimba, muprofete ne mukalenge. Uvua weyemena Yehowa Nzambi ne muoyo wende mujima. Malanda mimpe avuaye nawu ne Yehowa akamujula dijinga dia kumuibakila nzubu. Nzubu eu anyi ntempelo uvua ne bua kulua muaba wa ntendelelu mulelela mu Isalele. Davidi uvua mumanye ne: ntempelo ne midimu ivua ne bua kuenzekelamu bivua ne bua kupetesha tshisamba tshia Nzambi disanka ne mabenesha. Ke bualu kayi Davidi wakimba ne: ‘Disanka didi kudi muntu uudi [wewe Yehowa] usungula ne uudi ufikisha pepi nebe, bua ashikame mu biendelu bia tshitendelelu tshiebe! Tuetu netuikale ne mitshima mitalale bua buimpe bua nzubu webe, ntempelo webe wa tshijila.’​—Musambu 65:4.

² Yehowa kakanyishila Davidi bua kulombola midimu ya diibaka ntempelo to. Kadi wakapesha muanende Solomo diakalenga adi. Davidi kakanungana bualu bavua bapeshe muntu mukuabu diakalenga divua yeye muine mujinge ne muoyo umue to. Tshivua ne mushinga mukole buende yeye, tshivua diibaka dia ntempelo. Wakakuatshisha midimu ya diibaka ne muoyo mujima, kulejaye Solomo mushindu uvuaye ne bua kuibaka nzubu bu muvua Yehowa mumuleje yeye muine. Davidi wakalongolola kabidi bena Lewi ba bungi mu tusumbu tukese bua kuenza mudimu bimpe, ne kufilaye or ne argent bipite bungi bua kuibaka ntempelo.​—1 Kulondolola 17:1, 4, 11, 12; 23:3-6; 28:11, 12; 29:1-5.

3. Mmunyi mutu basadidi ba Nzambi bamona malu adibu balongolole bua ntendelelu mulelela?

³ Bena Isalele ba lulamatu bakakuatshisha malu onso avuabu balongolole bua ntendelelu  mulelela ku nzubu wa Nzambi. Bia muomumue lelu, tuetu basadidi ba Yehowa tudi tukuatshisha malu onso adibu balongolola bua ntendelelu wetu mu tshitupa tshia pa buloba tshia bulongolodi bua Yehowa. Nunku tudi tuleja ne: tudi ne lungenyi lua muomumue ne lua Davidi. Katuena ne lungenyi lua kudiabakena to. Kadi tudi tuanyisha malu mimpe adi mu bulongolodi bua Nzambi. Ukadiku muele meji bua malu a bungi atudi ne bua kulejela dianyisha anyi? Tukonkononayi amue a kudiwu.

Dianyisha bua bantu badi batulombola

4, 5. (a) Mmunyi mudi “mupika wa lulamatu ne wa budimu” ukumbaja mudimu wende? (b) Mmunyi mudi bamue Bantemu badiumvua bua biakudia bia mu nyuma bidibu bapeta?

⁴ Kudi malu a bungi adi atusaka bua kuikala ne dianyisha bua “mupika wa lulamatu ne wa budimu” uvua Yezu Kristo muteke ku mutu kua bintu biende pa buloba. Kasumbu ka mupika (kadi kenza ne bena Kristo bela manyi) kadi kalombola mudimu wa kuyisha lumu luimpe, kadi kalongolola bisangilu bua tuetu kutendelela, ne kadi kapatula mikanda idi yambuluisha bua kulonga Bible mu miakulu mipite pa 400. Bantu miliyo ne miliyo pa buloba bujima badi badia ne dianyisha dionso ‘biakudia’ ebi bia mu nyuma mu ‘tshikondo tshiakanyine.’ (Matayo 24:45-47, NW) Katuena mua kunungana bua bualu ebu nansha.

⁵ Munkatshi mua bidimu bia bungi, mibelu ya mu Bible idi mu mikanda ya kasumbu ka mupika mmikoleshe ne mmiambuluishe Elfi, Ntemu wa Yehowa ukadi mukulakaje. Elfi wakafunda bua kuleja dianyisha diende wamba ne: “Bu bulongolodi bua Yehowa kabuyiku, ntshinyi tshimvua mua kuikala muenze?” Peter ne mukajende Irmgard bakadi benzele pabu Nzambi mudimu bidimu bia bungi. Irmgard udi uleja dianyisha bua mikanda yonso idi mipatula kudi “bulongolodi buimpe bua Yehowa budi butabalela bantu.” Mu mikanda eyi mudi kabidi eyi idibu benzela bantu badi ne majinga a pa buawu bu mudi aba badi kabayi bamona anyi bumvua bimpe.

6, 7. (a) Mmushindu kayi udibu balombola midimu mu bisumbu pa buloba bujima? (b) Ntshinyi tshidi bamue bantu bambe bua tshitupa tshia pa buloba tshia bulongolodi bua Yehowa?

⁶ Kasumbu Kaludiki ka Bantemu ba Yehowa ke kadi kaleja mpala wa ‘mupika wa lulamatu.’ Kasumbu aka nkenza ne bakulu bakese bena Kristo bela manyi badi benzela mudimu ku Brooklyn mu New York, muaba udibu balombola midimu ya Bantemu ba Yehowa ya pa buloba bujima. Kasumbu Kaludiki kadi kateka basadidi ba Yehowa bakadi bamonemone malu bua kuenza mudimu mu biro ya filiale idi ilombola midimu ya bisumbu bipite pa 98000 pa buloba bujima. Kadi kateka kabidi bantu balume badi bakumbaja malu adi Bible ulomba bu bakulu ne basadidi ba mudimu mu bisumbu ebi. (1 Timote 3:1-9, 12, 13)  Bakulu aba badi ne dinanga badi balombola ne balama mikoko ya Nzambi idibu babapeshe bua kulama. Bushuwa, tudi ne diakalenga dinene dia kuikala munkatshi mua mikoko eyi, ne tudi tumona dinanga ne buobumue bidi munkatshi mua ‘bana betu ba mu Kristo.’​—1 Petelo 2:17; 5:2, 3.

⁷ Pamutu pa kunungana, bantu batu misangu ya bungi baleja dianyisha bua mibelu ya dinanga idibu bapeta kudi bakulu. Tuangatayi tshilejilu tshia Birgit, muena Kristo mukuabu udi ne bidimu 30 ne bia pa mutu. Patshivuaye nsongakaji, wakapetangana ne balunda babi ne wakamba kupona mu mpekatu. Kadi mibelu mitoke ya bakulu miangatshila mu Bible ne dikuatshisha dia bena Kristo nende biakamuambuluisha bua kuepuka nsombelu mubi. Mmunyi mudi Birgit udiumvua mpindieu? Udi wamba ne: “Ndi ne dianyisha dia bungi bua muntshidi mu bulongolodi buimpe bua Yehowa.” Andreas, nsongalume mukuabu wa bidimu 17 udi wamba pende ne: “Ebu mbulongolodi bua Yehowa menemene, bulongolodi buimpe bupite wonso a pa buloba.” Katuenaku mua kuikala ne dianyisha bua buimpe bua tshitupa tshia pa buloba tshia bulongolodi bua Yehowa anyi?

Bantu badi batulombola mbapange bupuangane

8, 9. Bamue bena mu tshikondo tshia Davidi bakenza malu kayi, ne ntshinyi tshivua Davidi muenze?

⁸ Bushuwa, bantu badibu bateke bua kutulombola mu ntendelelu mulelela mbapange bupuangane. Buonso buabu batu benza bilema, ne bakuabu badi badienzeja bikole bua kudikanda ku matekete abu kampanda. Bualu ebu budiku ne bua kututekesha anyi? Tòo. Nansha bantu bavua ne majitu manene mu Isalele wa kale bavua benze bilema binene. Tshilejilu, patshivua Davidi nsonga bakamubikila bua kuikalaye wimbila Mukalenge Shaula bua kumutukija tshilunji. Pashishe, Shaula wakateta mua kushipa Davidi. Ke Davidi kunyema bua kupandisha muoyo wende.​—1 Samuele 16:14-23; 18:10-12; 19:18; 20:32, 33; 22:1-5.

⁹ Bena Isalele bakuabu bakenza pabu bibi. Tshilejilu, Yoaba kamanda ka basalayi ka Davidi wakashipa Abinê mulela wa Shaula. Abashaloma wakelela tatuende Davidi tshifufu bua kuangata bukalenge. Ahitofele mufidi wa mibelu wa Davidi ne uvuaye weyemena bikole wakamutungila. (2 Samuele 3:22-30; 15:1-17, 31; 16:15, 21) Nansha nanku, Davidi kakalamina bakuabu munda ne kushalaye unungana to, ne kakalekela ntendelelu mulelela nansha. Kadi wakenza malu mu mushindu mushilangane. Ntatu yakasaka Davidi bua kulamata Yehowa ne kulama lungenyi luimpe luvuaye nalu pakanyemaye Shaula. Davidi wakimba mu tshikondo atshi ne: ‘Umfuile luse, Nzambi, umfuile luse, bualu bua muoyo wanyi udi unyemena kuudi. Bulelela, nennyemene mu mundidimbi wa mapuapua ebe bua kushalaku too ne papita dikenga dia kabutu.’​—Musambu 57:1.

10, 11. Ntshinyi tshivua tshienzekele Gertrud muena Kristo mukuabu patshivuaye nsongakaji ne ntshinyi tshiakambaye bua bilema bia bena Kristo nende?

¹⁰ Lelu mu bulongolodi bua Nzambi kamuena ditungilangana didi mua kutusaka bua kunungana to. Yehowa anyi banjelu bende anyi bakulu kabatu banyisha bua mu tshisumbu muikale bantu babi, bena tshitungu nansha. Tshidibi, tuetu bonso tutu tukenga bua dipanga bupuangane dietu ne dia basadidi bakuabu ba Nzambi.

¹¹ Tuangatayi tshilejilu tshia Gertrud, musadidi wa Yehowa wa matuku a bungi. Patshivuaye nsongakaji, bakamuamba muvuaye ushima ne: uvua mumanyishi wa Bukalenge wa ku dîba ne ku dîba. Wakenza tshinyi? Wakatuadija kunungana bua bualu abu anyi? Tòo. Matuku makese kumpala kua kufuaye mu 2003 ne bidimu 91, wakavuluka amue malu a mu nsombelu wende ne kuambaye ne: “Mu nsombelu wanyi mujima, malu a nunku avua mandongeshe ne: nansha mudi bantu benza bilema, Yehowa ke udi ulombola mudimu wende munene ne udi wenza mudimu ne bantu bapange bupuangane.” Pavua Gertrud ukenga bua bilema bia basadidi bakuabu ba Nzambi, uvua usambila Yehowa ne muoyo mujima.

12. (a) Bamue bena Kristo ba mu bidimu lukama bia kumpala mbashiye tshilejilu kayi tshibi? (b) Tudi ne bua kuela meji ku tshinyi?

¹² Bu mudi bena Kristo ba lulamatu lukole  bapange pabu bupuangane, tutungunukayi ne ‘kuenza bionso katuyi tunungana,’ nansha padi mukulu anyi musadidi wa mudimu wenza tshilema. (Filipoi 2:14, MMM) Nebikale diakabi dinene bu tuetu mua kulonda tshilejilu tshibi tshia bamue bena Kristo ba mu bidimu lukama bia kumpala! Muyidi Yuda wakamba ne: balongeshi ba dishima ba mu tshikondo atshi bavua ‘bavuija bukokeshi tshianana ne bapenda matumbi.’ Benji ba malu mabi aba bavua kabidi ‘batontolodi, bajanyi’ anyi badiabakenyi. (Yuda 8, 16) Tulekelayi manunganyi ne didiabakena, ne tuelayi meji ku malu mimpe atudi tupeta ku butuangaji bua ‘mupika wa lulamatu.’ Tuanyishayi malu mimpe adi mu bulongolodi bua Yehowa ne ‘tuenzayi bionso katuyi tunungana.’

“Edi dilongesha ndipite bukole”

13. Ntshinyi tshivua bamue benze bua amue malongesha a Yezu Kristo?

¹³ Pavua bamue bantu mu bidimu lukama bia kumpala banungana bua bantu bavua ne majitu mu tshisumbu, bakuabu bobu bavua banungana bua malongesha a Yezu. Bilondeshile Yone 6:48-69, Yezu wakamba ne: “Udi udia mubidi wanyi, unua ne mashi anyi, udi upeta muoyo wa kashidi.” Pakumvua “balongi bende ba bungi” mêyi aa, bakamba ne: “Edi dilongesha ndipite bukole, nganyi udi mua kuditeleja?” Yezu uvua mumanye ne: ‘balongi bende bavua banungana bua mêyi awu.’ ‘Kumbukila ku dîba adi, balongi [bende] ba bungi kumbuka, kulekelabu kumulonda.’ Kadi ki mbayidi bonso bavua banungana to. Tangila tshiakenzeka pavua Yezu muebeje bapostolo 12 ne: “Nudi penu basue kumbuka anyi?” Mupostolo Petelo wakandamuna ne: “Mfumu, netuye kudi nganyi? Wewe ngudi ne miaku ya muoyo wa kashidi. Buetu tuetu tudi tuitaba, bamanye kabidi ne: Wewe ke Wa tshijila wa [Nzambi].”​—MMM.

14, 15. (a) Bua tshinyi bamue bantu batu bafika ku dibenga kuanyisha amue malongesha a bena Kristo? (b) Ntshinyi tshitudi mua kulongela ku tshivua tshifikile Emanuel?

¹⁴ Mu matuku etu aa, basadidi ba Nzambi bakese ke badi kabayi banyisha amue malongesha a bena Kristo ne badi banungana bua tshitupa tshia pa buloba tshia bulongolodi bua Yehowa. Bua tshinyi bitu bienzeka nunku? Misangu ya bungi bamue bantu batu banungana bualu ki mbumvue mushindu utu Nzambi wenza malu to. Mufuki wetu utu umanyisha bantu bende bulelela ku kakese ku kakese. Nunku, diumvua dietu dia malongesha a mu Bible didi ne bua kuikala ditokeshibua ku musangu ne ku musangu. Basadidi ba Yehowa ba bungi batu basanka padibu batokesha malu nunku. Bakese batu ‘bapita kudibingisha’ ne babenga kuitaba malu adi ashintuluka aa. (Muambi 7:16) Lutambishi ludi mua kufikisha muntu ku dibenga dishintuluka, ne bamue batu bapona mu buteyi bua lungenyi lua budikadidi. Nansha nsombelu muikale mushindu kayi, manunganyi aa ki mmimpe to, bualu adi mua kutupingaja tshianyima ne ku malu a pa buloba.

¹⁵ Tshilejilu, Emanuel kavua wanyisha amue malongesha a mu mikanda ya “mupika wa lulamatu ne wa budimu.” (Matayo 24:45, NW) Wakalekela kubala mikanda eyi ne kufikaye ku diambila bakulu ba mu tshisumbu tshiabu ne: kavua musue kabidi kuikala Ntemu wa Yehowa. Kadi matuku makese panyima, Emanuel wakalua kumona ne: malongesha adi mu bulongolodi bua Yehowa mmalelela. Wakaya kamonangana ne Bantemu, kuitabaye tshilema tshiende, ne kumupingajabu mu tshisumbu tshia Bantemu ba Yehowa. Wakapetulula disanka diende.

16. Ntshinyi tshidi mua kutuambuluisha bua kumbusha dielakana bua amue malongesha a bena Kristo?

¹⁶ Netuenze tshinyi bituikala tukeba kunungana bualu tudi tuelakana bua amue malongesha adi mu bulongolodi bua Yehowa? Tuikalayi ne lutulu. ‘Mupika wa lulamatu’ udi mua kulua kuandamuna nkonko yetu ne kutokesha malu avua atupesha dielakana. Mbimpe tukebe diambuluisha dia bakulu bena Kristo. (Yuda 22, 23) Disambila, didilongela Bible ne didisangisha ne bena Kristo netu badi basue malu a mu nyuma bidi mua kutuambuluisha bua kumbusha dielakana. Bidi kabidi mua kuvudija dianyisha ditudi nadi bua malu malelela a mu Bible adi akolesha  ditabuja dietu atudi balonge ku butuangaji bua ‘mupika wa lulamatu.’

Tuikale ne lungenyi ludi lukoleshangana

17, 18. Pamutu pa kunungana, ndungenyi kayi lutudi ne bua kuikala nalu, ne bua tshinyi?

¹⁷ Bulelela bantu bapange bupuangane mbaledibue ne meji a kuenza mpekatu, ne bamue badi mua kuikala ne tshibidilu tshibi tshia kunungana kakuyi bualu. (Genese 8:21; Lomo 5:12) Kadi tuetu ne tshibidilu etshi, tudi mua kunyanga malanda etu ne Yehowa Nzambi. Ke bualu kayi tudi ne bua kudikanda ku lungenyi lua kunungana.

¹⁸ Pamutu pa kunungana bua malu a mu tshisumbu, tudi ne bua kulama lungenyi ludi lukoleshangana ne kuenza malu a pa tshibidilu adi atuambuluisha bua kuikala ne bia bungi bia kuenza, ne disanka, ne kanemu, ne nkatshinkatshi, ne ditabuja dikole. (1 Kolinto 15:58; Tito 2:1-5) Yehowa udi utangila malu onso adi enzeka mu bulongolodi buende, ne Yezu mmumanye midimu ya tshisumbu tshionso anu muvuaye muyimanye mu bidimu lukama bia kumpala. (Buakabuluibua 1:10, 11) Indila ne lutulu Nzambi ne Kristo Mfumu wa tshisumbu. Badi mua kusaka bakulu ba mu tshisumbu bua kulongolola malu adi akengedibua.​—Musambu 43:5; Kolosai 1:18; Tito 1:5.

19. Tudi ne bua kuela meji ku malu kayi patudi tuindila bua Bukalenge bua Nzambi buangate malu a bantu mu bianza?

¹⁹ Mu katupa kîpi emu, Bukalenge bua Masiya nebubutule ndongoluelu mubi wa malu eu, ne nebuangate malu onso a bantu mu bianza. Kadi mu dindila, mbimpe tushale ne lungenyi ludi lukoleshangana! Nelutuambuluishe bua kuanyisha ngikadilu milenga ya bana betu, pamutu pa kumona anu malu mabi abu. Kuela meji ku ngikadilu yabu milenga nekutupeteshe disanka. Nunku, pamutu pa tuetu kudikengesha ne manunganyi, lungenyi elu nelutukankamije ne nelutukoleshe mu nyuma.

20. Lungenyi lua dikoleshangana nelutuambuluishe bua kuvuluka masanka kayi?

²⁰ Lungenyi lua dikoleshangana nelutuambuluishe kabidi bua kuvuluka masanka a bungi atudi nawu, bualu tudi mu tshitupa tshia pa buloba tshia bulongolodi bua Yehowa. Ebu ke bulongolodi bumuepele budi bulamate Mukalenge mutambe bunene wa diulu ne buloba. Mmunyi muudi udiumvua bua bualu ebu ne bua diakalenga diudi nadi dia kutendelela Yehowa Nzambi umuepele mulelela? Lungenyi luebe luikaleku bu lua Davidi wakimba ne: ‘Wewe udi umvua milombu, bukua bantu bonso nebufike kuudi. Disanka didi kudi muntu uudi usungula ne uudi ufikisha pepi nebe, bua ashikame mu biendelu bia tshitendelelu tshiebe! Tuetu netuikale ne mitshima mitalale bua buimpe bua nzubu webe.’​—Musambu 65:2, 4.

Utshidi muvuluke anyi?

• Bua tshinyi tudi ne bua kuikala ne dianyisha bua bantu badi batulombola mu tshisumbu?

• Ntshinyi tshitudi ne bua kuenza padi bantu badi batulombola benza bilema?

• Mmunyi mutudi ne bua kumona ditokesha mushindu utudi tumvua amue malongesha a mu Bible?

• Ntshinyi tshidi mua kuambuluisha muena Kristo bua kumbusha dielakana?

[Nkonko ya dilonga]

[Tshimfuanyi mu dibeji 20]

Davidi wakaleja Solomo mushindu wa kuibaka ntempelo ne kukuatshishaye ne muoyo umue ntendelelu mulelela

[Tshimfuanyi mu dibeji 23]

Bakulu bena Kristo badi bambuluisha bakuabu mu nyuma ne disanka