BUALU bubi butambe buakenzeka ku ntuadijilu kua nsombelu wa bantu pa buloba. Muanjelu mukuabu wakatombokela bumfumu bua Mufuki wende. Muanjelu eu wakafikisha Eva ku ditaba bua kudia tshimuma tshikandika. Wakakula bua Eva ne bayende Adama wamba ne: ‘Kanuena nufua bulelela; bualu bua Nzambi mmumanye ne: panuadia mamuma au, mêsu enu neabululuke, nenuikale bu Nzambi, nenumanye malu mimpe ne malu mabi.’ (Genese 2:16, 17; 3:1-5) Muanjelu mutomboke eu ke wakaluabu kubikila ne: Diabolo ne Satana.​—Buakabuluibua 12:9.

Eva wakitaba bivua Satana umuambila abi anyi? Bible udi utuambila ne: ‘Pakamona mukaji ne: Mutshi au udi muimpe wa kudia ne muimpe ku mêsu ne udi mua kupa muntu lungenyi, yeye wakangata dimuma, wakadia, wakapesha mulume wende kabidi, ne yeye wakadia.’ (Genese 3:6) Bushuwa, Adama ne Eva bakitaba lungenyi lua Satana ne kutombokelabu pabu Nzambi. Ke bualu kayi bakajimija Mparadizu uvuabu basombele buabu ne bua bana babu. Bana bavuabu ne bua kulela bapuangane ne bikale ne ditekemena dia kuikala ne muoyo kashidi bakapiana bubi ne lufu.​—Lomo 5:12.

Ntshinyi tshiakenza Yehowa Nzambi, Mfumu Mutambe bunene bua tshilumbu etshi? Wakalongolola mushindu wa kufuila bantu luse bua mibi yabu. (Lomo 5:8) Yehowa Nzambi wakajadika kabidi bukalenge bua kujikija makenga a bantu. Tshivuaye mulongolole etshi badi batshibikila ne: ‘Bukalenge bua Nzambi.’ (Luka 21:31) Bukalenge ebu budi ku bukokeshi bua Nzambi, ne budi ne tshipatshila tshisunguluke.

Ntshipatshila kayi tshidi natshi Bukalenge bua Nzambi? Nebuenze malu a mushindu kayi, ne mmashilangane ne adi makalenge a bantu enza ku tshinyi? Nebutuadije kukokesha dîba kayi? Tshiena-bualu tshidi tshilonda netshiandamune nkonko eyi.