Malu a mu nsombelu

Ndekelu wa bionso, tuetu kutuilangana bonso mu dîku!

MALONDA KUDI SUMIKO HIRANO

Mvua mupete nsombelu muimpe mutambe umvua musue bua bayanyi ikale pende nende. Bidimu 42 biakanji kupita kumpala kua meme kumupeta.

BAKANSELA mu 1951 pamvua ne bidimu 21. Mu bidimu binayi, tuakalela bana babidi, ne mvua ne disanka dia bungi.

Dikuabu dituku mu 1957, yayanyi wakangambila ne: misionere mukuabu wa Bantemu ba Yehowa uvua ulua kumutangila. Nansha muvua yaya muena Bouddha, wakatuadija kulonga Bible ne misionere au ne kungambilaye bua meme kulonga panyi Bible. Meme kuitaba bua kulonga. Mvua mbuela mu Mishonyi, meme kuela meji ne: mvua mua kuleja Bantemu ba Yehowa muvua malongesha abu a dishima.

Kadi ngakamona ne: tshivua mumanye Bible menemene to. Ngakakonka misionere au ne: “Yehowa nnganyi?” Katshia tshivua muanji kumvua batele dîna adi mu Mishonyi to. Misionere Daphne Cooke au (diende dikuabu Pettitt) wakandeja diakamue mu Yeshaya 42:8 mudibu bamba ne: Yehowa ndîna dia Nzambi Wa Bukole Buonso. Daphne wakandamuna nkonko yanyi yonso ne Bible.

Ngakela mpasata wetu nkonko ya mmuomumue ayi. Kadi wakangambila ne: “Kuela nkonko nkuenza bubi. Wewe itaba anu bitukadi bakulongeshe abi.” Nansha mumvua tshiyi mumone ne: kuela nkonko kuvua kubi, ngakatungunuka anu ne kuya mu Mishonyi mu bule bua ngondo isambombo Dia lumingu dionso mu dinda ne mu mapingaja mbuela mu bisangilu bia Bantemu ba Yehowa.

Diambuluisha mu dibaka dietu

Malu a mu Bible amvua ndonga avua ansankisha bikole, meme kubanga kuambila bayanyi  Kazuhiko. Misangu yonso patuvua tujikija dilonga anyi tupatuka mu bisangilu, mvua mmuambila malu onso amvua mumvue. Kadi malu au e kujudija tshimvundu pankatshi panyi ne bayanyi. Kavua musue bua meme kulua Ntemu wa Yehowa to. Tshidibi, kulonga kua Bible kuvua kunsankisha bikole, meme kutungunuka anu ne kumulonga ne kudisangisha ne Bantemu ba Yehowa.

Kumpala kua kuya mu bisangilu butuku, mvua nganji ndambila Kazuhiko biakudia bivuaye munange bikole, kadi yeye uvua uya kudia mu restoran. Pamvua mpingana, mvua mmupeta ne tshiji tshibi, kayi musue nansha kungakuisha to. Kunyima kua matuku abidi anyi asatu tshiji tshiende tshivua tshijika, kadi tshivua tshijika anu dituku dia bisangilu bivua bilonda.

Tshikondo atshi, ngakapeta disama dia tshiadi dikavua dishipe bena mu dîku dia babayanyi ba bungi. Kazuhiko uvua ne buôwa bua bungi e kungambilaye ne: wewe mumvue bimpe, newikale wenza muonso muudi musue. Bualu bumue bumvua mumulombe mbua kunganyishilaye bua ngikale mbuela mu bisangilu lumingu luonso. Yeye kuitaba.

Kunyima kua ngondo isambombo ngakumvua bimpe, meme kulonga Bible bikole mu ngondo yonso ayi. Mvua nkeba dilongesha dia dishima mu bivua Bantemu bandongesha, ngela meji ne: pamvua anu ndipeta nansha dimuepele, mvua mbilekela kashidi. Kadi tshiakadipeta nansha dimue. Malongesha a mafi a mu Mishonyi mumvua ke angakalua kutandula. Ngakajingulula mudi Yehowa ne dinanga ne buakane, meme kumona mudibi bimpe bua kutumikila mikenji yende.

Pangakumvua bimpe, bayanyi wakakumbaja dilaya diende, katshiyi kabidi ubenga bua meme kuya mu bisangilu to. Ngakaya kumpala mu malu a Nzambi, mu ngondo muitanu wa 1958, meme kutambula, kulua Ntemu wa Yehowa. Mvua njinga bikole bua bayanyi ne bana banyi kubuelabu pabu mu ntendelelu wa Nzambi mulelela.

Ngakambuluisha bana banyi bua kumanyabu Nzambi

Bana banyi bavua babuela misangu yonso mu bisangilu ne baya kumfila mu diyisha, kadi bualu bukuabu buakenzeka buakandeja ne: dimanya diabu dia malu a mu Mukanda wa Nzambi divua dienda divula. Dikuabu dituku Masahiko, muananyi wa bidimu bisambombo, uvua unaya pambelu. Meme kumvua mukuma mukole ne muntu usama. Muena mutumba mukuabu kubuelaye lubilu mu nzubu muanyi, ungela dîyi dikole ne: mbakume muanebe ku mashinyi! Mmufue anyi? Meme kuanji kudikolesha kupatuka pa mbelu. Pangakamona muvua dikalu diende dizaza, luzakalu lukole luakankuata, kadi katupa aka, meme kumumona ulua mutangile kundi kadi kayi nangananga mujiwuke to. Wakalua kungupukila wamba ne: “Mama wetu Yehowa mmumpandishe!” Mmumona ne muoyo nunku, ne ngumvua bivuaye ungambila abi, disanka kunkuata meme kutuadija kudila.

Dinga dituku, patuvua tuenda tuyisha, tatu mukuabu kunsaminaye ne: “Bua tshinyi udi wenza tshintu tshia nunku, wenda wenda utambakajija muana mukese nunku eu? Ndi mmumvuila luse be!” Kumpala kua meme kumuandamuna, Tomoyoshi muananyi wa bidimu muanda mukulu e kumuambila ne: “Kaku, mama kêna ungenzeja bua kuenda kuyisha nende to. Ndi nyisha bualu ndi musue kuenzela Yehowa mudimu.” Tatu au kupangaye tshia kuamba mushale mulengame ukema.

 Ndi mua kuamba ne: bana banyi kabavua ne tatuabu uvua mua kubalongesha malu a Nzambi to. Bivua bikengela meme mbalongeshe Bible nansha mumvua panyi ne bia bungi bia kulonga. Ngakakolesha dinanga dianyi, ditabuja dianyi ne lukunukunu luanyi, meme kudienzeja bua kuikala anu tshilejilu tshimpe. Dituku dionso mvua ngela Yehowa tuasakidila mu mêsu a bana. Mvua mbalondela malu amvua mpeta mu buambi. Bivua bibakolesha bikole. Pavuabu balue kubakonka matuku kunyima tshivua tshibavuije bampanda-njila (anyi Bantemu ba Yehowa batu bayisha bikole menemene), bakandamuna ne: “Pavua mamuetu mpanda-njila, tuvua tumumona ne disanka dia bungi, ke patudi basue kuikala petu ne disanka adi.”

Mvua ngenza muanyi muonso bua kubenga kujana tatuabu anyi muntu yonso wa mu tshisumbu tshia bena Kristo. Mvua mumanye ne: bijanu bivua mua kunnyangila bana. Bavua mua kupanga kunemeka muntu umvua mua kujana au, ne kubengabu kunnemeka bu meme njanangana.

Ngakepuka bilumbu

Mu 1963 tuakaya mu Taïwan bua mudimu wa bayanyi. Wakangambila ne: wewe muyishe bena Japon ba mu Taïwan neutukebele bilumbu. Badi mua kutuipatamu kutupingaja mu Japon, bifuane kukebela kumpanyi wabu bilumbu. Bayanyi uvua ujinga bua kututapulula ne Bantemu ba muomu.

Mu Taïwan muvuabu benza bisangilu bionso mu tshiena Chine, Bantemu bakatuakidila bimpe bitambe. Ngakadifila bua kulonga tshiena Chine bua kumona mua kuyisha bena Taïwan pamutu pa kuyisha bena Japon. Mushindu eu ke umvua mua kuepuka bilumbu bivua bayanyi mungambile abi.

Bulunda buetu ne Bantemu ba mu Taïwan buakatukolesha. Muanetu Harvey Logan ne mukajende Kathy bavua bamisionere bakatuambuluisha bikole bitambe. Muanetu Logan wakambuluisha bana banyi mu malu a Nzambi bienze anu bu tatuabu. Wakabaleja ne: kuenzela Yehowa mudimu mbualu bua disanka, kadi ki nkuikala ne nsombelu mumakane to. Ndi mujadike ne: mu Taïwan ke muakangata bana banyi dipangadika dia kuenzela Yehowa mudimu.

Tomoyoshi ne Masahiko bakabuela mu tulasa tua bena Amerike tua mu Taïwan, kulongabu Anglais ne tshiena Chine. Dimanya dia miakulu eyi diakabambuluisha bua kuluabu kuenzela Yehowa Nzambi mulelela mudimu pashishe. Ndi ngela Yehowa tuasakidila wa bungi bua mushindu uvuaye mutukudimuine tshikondo tshivua mua kutukolela tshilue tshikondo tshia masanka a kashidi. Patuakenza bidimu bisatu ne tshitupa mu Taïwan bitutu katuyi tupua muoyo, tuakapingana mu Japon.

Bana bakavua nsongalume mibandile, kadi bakavua bajinga anu kuikala badienzela malu. Ngakapitshisha mêba a bungi ngelangana nabu meji bilondeshile mêyi a mu Bible, nunku Yehowa wakabambuluisha mu tshikondo tshikole atshi. Pakajikija Tomoyoshi tulasa tua bikadilu, wakalua mpanda-njila. Wakambuluisha bantu banayi anu mu bidimu bikese bia kumpala bia mudimu  wende wa bumpanda-njila, bobu kudilambula ne kutambula. Masahiko wakalonda tshilejilu tshia muanabu, kuluaye pende mpanda-njila pakajikijaye tulasa tuende tua bikadilu. Wakambuluisha bansonga bakuabu banayi bua kuluabu Bantemu mu bidimu binayi bia ntuadijilu bia bumpanda-njila.

Pashishe Yehowa wakalua kuambuluisha bana banyi abu bikole mu mudimu wabu. Tomoyoshi wakalonga Bible ne bayende wa muntu mukaji mukuabu umvua mulongeshe Bible. Bana ba bakaji babidi ba tatu ne mamu eu bakalua pabu Bantemu ba Yehowa. Pashishe, Tomoyoshi kusela Nobuko uvua mukulumpe, Masahiko pende kuselaye Masako uvua muakunyi. Lelu eu Tomoyoshi ne Nobuko badi benza mudimu ku biro bia Bantemu ba Yehowa bidi bilombola mudimu pa buloba bujima bidi ku Brooklyn mu New York. Masahiko ne Masako badi bobu bamisionere mu ditunga dia Paraguay.

Bayanyi uvua wenda ushintuluka

Bidimu abi, bayanyi kavua musue malu etu a Bantemu to, kadi tuakamona malu avua aleja ne: uvua wenda ushintuluka. Pavua bantu babenga bimvua ngamba, uvua ungakuila ne witaba malongesha malelela a mu Bible kayi mumanye ne: uvua wenza nanku to. Uvua kabidi wambuluisha Bantemu bavua bakenga ne bintu. Mu difesto dia dibaka dia umue wa ku bana betu wakakula mu tshikoso wamba ne: “Kulongesha bantu mushindu muimpe wa kusomba mmudimu muimpe mutambe, kadi mmudimu mukole be! Bana banyi ne bakaji babu mbanyishe mudimu eu mukole bu wabu mudimu. Ndi nnulomba bua nubakuatshishe.” Malu au onso avua andeja ne: bayanyi neasadile amu Yehowa bu tuetu dikuabu dituku.

Ngakakeba mushindu wa Bantemu bakuabu kuikalabu balua kupetelangana nende ku nzubu kuetu. Mvua mbikila Kazuhiko mu bisangilu bietu bikese ne binene nansha mu tshitutu tuenza bua kuvuluka lufu lua Kristo. Pavuaye upeta dîba uvua ubuela mu bisangilu bionso ebi, kadi ku tshimfula muoyo. Misangu ya bungi mvua ngela meji ne: uvua mua kuitaba bua kulonga Bible, nanku mvua mbikila bakulu bena Kristo ku nzubu kuetu. Kadi uvua ubenga bua kulonga. Mvua ndiebeja tshivua tshimupangisha kulonga.

Dîba adi meme kuvuluka mêyi a mupostolo Petelo aa: ‘Nuenu bakaji nukokele babayenu; nunku bikala bakuabu kabayi bitabuja dîyi dia Nzambi, nebapetebue mu bualu bua Nzambi kabayi ne dîyi dia Nzambi ku bienzedi bia bakaji babu, patangilabu bienzedi bienu bilengele bidi ne ditshina.’ (1 Petelo 3:1, 2) Ngakamona ne: tshivua ntumikila mubelu eu to. Bua meme kuutumikila bimpe, bivua bikengela ne: ndifile bikole mu malu a Nzambi.

Mu 1970, ngakalua mpanda-njila bua meme kumona mua kulua muena Kristo mushindame mu malu a Nzambi. Bidimu 10 kupita, bikuabu 20 kupita, tshiyi mmona bayanyi ushintuluka! Mulongi mukuabu wa Bible wakangamba ne: “Se mbikole bua kuambuluisha bantu bakuabu paudi kuyi ukokesha bua kuambuluisha bayebe!” Dîyi adi diakasua kuntekesha, kadi tshiakapingana tshianyima to.

Mu bidimu bia 1980, baledi betu bakavua mikolo ku tshina. Kubalama eku ngenza midimu yanyi mikuabu kuvua kuntshiokesha bikole ne kuntonda bibi. Munkatshi mua bidimu bivule baledi betu aba kabavua basue bua meme kudifila ku malu a Yehowa, kadi mvua anu ndienzeja bua kubaleja dinanga. Kumpala kua mamuanyi ukavua ne bidimu 96 kufuaye wakangambila ne: “Sumiko wanyi, bobu banjule ku lufu, nembuele mu tshitendelelu tshienu.” Ngakamona ne: bionso bimvua ngenza kabivua biye mu mâyi to.

Bayanyi uvua umona bionso bimvua ngenzela baledi betu abi. Bua kuleja muvuaye ubianyisha, wakatuadija kubuela mu bisangilu bietu bionso. Munkatshi mua bidimu bia bungi uvua anu ubuela mu bisangilu, kadi kayi uya kumpala nansha kakese. Meme kutungunuka anu ne kukeba mua kumulengelela. Mvua mbikila balunda bende ne bena mudimu nende ku nzubu kuetu bua kudia nabu. Tuvua tuya nende mu dijikija dia lutetuku. Pakakepeshabu mêba a mudimu wa bampanda-njila kuluawu 70, nkavua nsombaku nende bikole.

Diangata dia pansio diakamushintulula

Bayanyi wakangata pansio mu tshidimu tshia 1993. Meme kuela meji ne: apu neikale ne dîba dia kulonga Bible. Kadi yeye kuamba ne: meme mubange kutendelela Nzambi anu bualu ndi mupete dîba se ndi buudi umupenda. Kuambaye kabidi  ne: uvua ne bua kutendelela Nzambi anu pavua muoyo wende umusaka bua kumutendelela, ka ki mmeme mmuenzeja nansha.

Dikuabu dituku Kazuhiko wakangambila bua kudifila ne muoyo wanyi mujima kudiye too ne ku lufu luanyi. Dîyi edi diakannyingalaja bibi, bualu mvua mmuenzela bionso bimvua mua kumuenzela katshia anu wansela. Mvua anu ngenza muanyi muonso bua kumusankisha, kadi yeye uvua umona bu ne: mvua mudifile bikole kudi Yehowa kupita mumvua ndifila kudiye. Pangakela meji bimpe, ngakamuambila ne: tshivua ne tshikuabu tshimvua mua kumuenzela kupita bimvua ngenza to. Meme kumuambila kabidi ne: wewe mutuadije kuenza pebe bindi ngenza ebi, tudi mua kutuadija luendu lukuabu luimpe lutambe mu nsombelu wetu nebe, kabiyi anu bua bidimu bikese, kadi bua kashidi. Matuku kupita, bayanyi nansha kungandamuna dîyi. Dikuabu kuluaye kunkonka ne: “Mpindieu neulonge nanyi Bible anyi?” Misangu yonso intu mvuluka mêyi aa ntu ngumvua disanka dia bungi be!

Meme kuambila mukulu mukuabu bua atuadije kulonga nende Bible, kadi bayanyi yeye kungambila ne: “Tshiena ndonga Bible ne muntu mukuabu to, anu wewe.” Ke tuetu kutuadija kulonga nende Bible dituku dionso. Bu mundi mu tshisumbu tshia muakulu wa tshiena Chine, ne mudi bayanyi muumanye bimpe, tuvua tulonga nende Bible mu muakulu eu. Tuakabala kabidi Bible mujima mu matuku ipatshila ku tshidimu tshijima.

Mu tshikondo atshi munga mukulu ne mukajende ba mu tshisumbu tshia muakulu wa tshiena Chine bakabanga kudifila bikole kutudi. Nansha muvuabu bana kutudi, bakalua balunda betu ba pa muoyo. Bantemu bakuabu ba bungi bakatabalela pabu bayanyi bikole. Bavua batuambuluishaku ne bayukila ne Kazuhiko, bamumone anu bu tatuabu. Bivua bimusankisha bikole.

Dikuabu dituku bakatubikila mu difesto dia dibaka divua dienzeka mu tshisumbu, kadi ku kabeji bafunde dîna dia bayanyi. Dimuangata bu mfumu wa dîku mushindu eu diakamusankisha bikole, kuitabaye bua kuya mu difesto adi. Mu matuku makese tshianana, kutuadijaye kumvuangana bimpe ne Bantemu ba Yehowa, kutuadijaye kulonga Bible ne mukulu mukuabu. Dilonga diende dia Bible, dibuela mu bisangilu ne dinanga divua bena mu tshisumbu bamunange biakamuambuluisha bua kuya kumpala mu malu a buena Kristo.

Ndekelu wa bionso, tuetu kutuilangana bonso mu dîku

Mu ngondo wa 12, tshidimu tshia 2000, bayanyi wakadilambula kudi Yehowa ne kutambula. Bana banyi ne bakaji babu bakalua kumona bualu bua tshishima ebu. Kuakapita bidimu 42, kadi ndekelu wa bionso tuetu kulua tshintu tshimue mu dîku dietu.

Mpindieu mu dinda dionso, bubidi buetu nende tutu tukonkonona mvese wa ku dituku, tubala kabidi Bible pamue. Dituku dionso edi tutu tuyukila malu a mu Bible ne tudifila bikole mu midimu ya buena Kristo. Bayanyi ukadi mpindieu musadidi wa mudimu mu tshisumbu ne matuku mashale aa uvua mulongeshe dîyi dia Nzambi kumpala kua bantu mu tshisumbu tshia muakulu wa tshiena Chine. Ndi ngela Yehowa tuasakidila bua mudiye mutusangishe pamue. Meme ne bena mu dîku dietu ne balunda betu bonso, tudi bindile ne muoyo mujima bua kulua kutumbisha dîna dia Nzambi ne bumfumu buende kashidi ne tshiendelele.

[Karte mu dibeji 13]

(Bua kumona malu bimpe, tangila mu mukanda)

CHINE

RÉPUBLIQUE POPULAIRE DÉMOCRATIQUE DE CORÉE

RÉPUBLIQUE DE CORÉE

Mbuu wa mu Japon

JAPON

Tokyo

Mbuu wa ku Est kua Chine

TAÏWAN

Taipei

[Tshimfuanyi mu dibeji 12]

Meme ne dîku dianyi mu 1958, tshidimu tshingakatambula

[Bimfuanyi mu dibeji 13]

Bakatukolesha mu ditabuja kudi Harvey Logan ne Kathy, balunda betu ba patuakumbuka mu Tokyo kuya mu Taipei

[Tshimfuanyi mu dibeji 15]

Lelu eu dîku dianyi ndidisangishe mu ntendelelu mulelela