Badi ne mitshima mipuekele nebapiane buloba

“Ndi ngela meji ne: buloba nebushintuluke ne nebupingane muvuabu kale. . . . Kabiakuenzeka malaba mu dinda to, kadi mu tshikondo tshidi kule menemene, palua diulu dipiadipia ne buloba bupiabupia.”​—Jean-Marie Pelt, mumanyi mupiluke wa bena France wa kapepa ne bintu bidi pa buloba.

BANTU ba bungi nebasanke bua kumona buloba buetu ebu bukudimuna mparadizu, bualu malu adi manyanguke ne nsombelu mikole bidi bibatatshisha. Kadi dijinga edi ki ntshilota tshia bantu ba matuku etu aa nansha. Kale menemene, Bible ukavua mulaye ne: Mparadizu neapingane pa buloba. Mêyi a Yezu bu mudi: ‘Badi ne mitshima mipuekele nebapiane buloba,’ ne ‘benze pa buloba muudi musue bu mudibu benza mu diulu’ adi munkatshi mua mvese idi bantu bamanye bikole. (Matayo 5:5; 6:10) Tshidibi lelu eu, bantu ba bungi kabena bitaba ne: mparadizu neikale pa buloba, ne bantu badi ne mitshima mipuekele nebasombemu to. Bua bantu ba bungi badi badiamba bena Kristo, Mparadizu ukadi mujimine kashidi.

Tshikandakanda tshia bena France tshia La vie tshidi tshiumvuija bua tshinyi bantu ba bungi kabatshiena bitaba lungenyi lua mparadizu wa pa buloba anyi wa mu diulu, tshiakula nangananga bua tshitendelelu tshia bena Katolike. Tshidi tshiamba ne: “Panyima pa lungenyi lua mparadizu lumane kuikala dilongesha dinene munkatshi mua bidimu bitue ku 1 900, ndulue kujimina mu masangisha a ku mikuna, mu mayisha a mu Dia lumingu, mu malongesha a teoloji, ne mu tulasa tua kateshisme.” Badi bamba mudi “mabungi makole” a “mîdima ne dibuejakaja dia malu” mabuitshidije muaku mparadizu. Bamue bampasata badi babenga kuwutela bualu udi “ufila ngenyi ya bungi menemene ya disanka pa buloba.”

Bua Frédéric Lenoir, mulongeshi wa nsombelu wa bantu udi mutambe kulonga malu a bitendelelu, ngenyi ya mparadizu ikadi milue “bimfuanyi bidi bileja anu bintu bia mushindu umue.” Bia muomumue, Jean Delumeau mufundi wa malu a kale ne udi mufunde mikanda ya bungi pa mparadizu, udi wela meji ne: milayi ya mu Bible neyikumbane mu tshimfuanyi, kadi ki mmu bulelela to. Mmufunde ne: “Ku lukonko lua ne: ‘Ntshinyi tshidi tshishale ku Mparadizu?’ malongesha a bena Kristo adi andamuna ne: Ku diambuluisha dia dibika dia Mupandishi, dimue dituku tuetu bonso netupukilangane ne mêsu etu neamone disanka.”

Dilongesha dia mparadizu wa pa buloba ditshidi ne mushinga anyi? Ntshinyi tshidi tshindile bushuwa buloba buetu mu matuku atshilualua? Tshimfuanyi tshia matuku atshiluala ntshibuitshidile anyi ntshitoke bimpe? Tshiena-bualu tshidi tshilonda netshiandamune nkonko eyi.

 [Mêyi a dianyisha bua tshimfuanyi mu dibeji 2]

TSHIZUBU: Emma Lee/​Life File/​Getty Images