Mununu kadi kayi nkaya

BANTU ba bungi batu balua balema anyi ba katadi wa pa buende padibu bakulakaja. Kadi kabivua nanku bua Fernand Rivaro to. Wakafua ne bidimu 95 mu tshimenga tshia Genève mu ditunga dia Suisse. Uvua mudisombele bualu mukajende ukavua mufue ne muanende wa bakaji ukavua kuende. Nansha mukavuaye misangu ya bungi anu kumbelu, kavua udiumvua bunkaya to. Misangu mivule uvua usomba ku mesa mu tshisombedi, uyikila ne bantu ku telefone pa malu a Nzambi.

Kadi patshivuaye ne makanda, kuvua tshikondo kampanda tshivua Fernand muikale nkaya bushuwa. Bua bualu kayi? Matuku makese panyima pa Fernand ne mukajende balue Bantemu ba Yehowa ba tshisumi mu 1939, Mvita Mibidi ya Buloba bujima yakabudika ku Mputu. Fernand wakalamata dipangadika diende dishindamene pa Bible dia kubenga kuenzela muntu nende bibi. Bua bualu abu, wakajimija mudimu wende wa bianza ne bakamuela mu buloko misangu ya bungi. Patudi tusangisha bungi bua matuku onso akenzaye mu nsanji, adi afika ku bidimu bitanu ne tshitupa. Munkatshi mua matuku onso aa uvua mutapulula ne mukajende ne muanende wa bakaji utshivua mukese.

Mu dikupa dîsu panyima, Fernand wakamba ne: “Bua bantu ba bungi, biakamueneka ne: mvua mulekele mudimu muimpe ne mushiye dîku dianyi mu lutatu. Bantu bakampepeja, meme kuenza bu mubunde tshilumbu. Kadi pandi ngela meji bua bidimu abi bikole, ndi mvuluka bimpe kupita malu onso mushindu uvua Yehowa utukuatshisha ne utuambuluisha. Bidimu bia bungi bikadi bipite, kadi ndi anu mueyemene Yehowa bikole bu mumvua mumueyemene tshikondo atshi.”

Ditabuja edi divua disaka Fernand bua kuyikila ne bantu ku nshinga bua ditekemena diende dishindamene pa Dîyi dia Nzambi. Pavuaye upeta muntu uvua usankidila malu avuaye uyikila nende ku nshinga, uvua umutumina mikanda idi yumvuija Bible. Pashishe, uvua ubikila kabidi muntu au bua kumuebeja ni mikanda ivua mimusankishe. Imue misangu bantu bavua bamuandamuna pa kumufundila mukanda baleja dianyisha diabu, ne bivua bimusankisha bikole.

Wewe pebe udi mua kupetangana ne muntu mukuabu udi bu Fernand mu muaba uudi musombele. Bua tshinyi kubenga kumvua kuoku malu ikalaye mua kukuambila bua umone malu atuye witabuja? Bantemu ba Yehowa batu basanka misangu yonso bua kuyikila nebe pa malu atubu bitabuja.